Toe Foki ki he Kau Mahuʻingaʻia ʻi he Ongoongo ʻo e Puleʻangá
1 ʻI he lolotonga ʻo e ngaahi uike kuohilí, naʻa tau fiefia ai ʻi he monū ko hono tufaki ʻa e Ongoongo ʻo e Puleʻangá Fika 35, ʻa ia naʻe fakakaveinga ko e “ʻE Feʻofaʻaki Kotoa Koā ʻa e Kakaí?” Ko e kau malanga ʻi he feituʻu kotoa pē ʻoku nau feinga ke aʻu ki he lahi taha ʻo e faʻahinga tāú mo e tatau ko ʻeni ʻo e Ongoongo ʻo e Puleʻangá. (Mt. 10:11) Neongo ʻoku fakataimi-tēpileʻi ʻa e feingangāué ke ngata ʻi he Sāpate, Nōvema 16, kapau ʻoku kei toe ha feituʻu lahi ke ngāueʻi, ʻe kole atu nai ʻa e kau mātuʻá kiate koe ke hokohoko atu ʻa hono tufaki ʻa e Ongoongo ʻo e Puleʻangá Fika 35 kapau ʻoku kei toe ʻa e tatau ʻa e fakatahaʻangá.
2 Ko e tatau ko ʻeni ʻo e Ongoongo ʻo e Puleʻangá kuó ne langaʻi ʻa e mahuʻingaʻia ʻa e kakai tokolahi. Te nau sio ai ko e faʻahinga ʻo e tangatá ʻi he tuʻunga fakalūkufuá kuo mole ʻa ʻenau ʻofa fakaenatulá pea ko ia ai, ʻoku nau fifili ki he meʻa ʻoku tukutauhi mei he kahaʻú. (2 Tim. 3:3) ʻOku fiemaʻu ke tau toe foki ki he kau mahuʻingaʻia kuo fakatupú.
3 ʻOku Maʻu ʻa e Ola ʻe he Ongoongo ʻo e Puleʻangá: ʻI he lolotonga ʻo e feingangāue ʻo e 1995 mo e Ongoongo ʻo e Puleʻangá, ko ha fefine naʻá ne maʻu ha tatau naʻá ne haʻu ki ha fakataha ʻi he Fale Fakatahaʻangá koeʻuhi he naʻá ne fiemaʻu ke ako lahi ange fekauʻaki mo e meʻa ʻoku tui ki ai ʻa e Kau Fakamoʻoni ʻa Sihová. ʻI he fakataha ko iá, naʻá ne loto-lelei ai ke tali ha ako Tohitapu pea hili iá naʻe tātātaha ke ne liʻaki ha fakataha. ʻIkai ke fuoloa, naʻá ne fai ha tohi ki he siasi naʻá ne ʻi ai ki muʻá, ʻo fakangata ʻene toe hoko ko e mēmipá!
4 ʻI he taimí ni, ʻoku laui teau ʻa e kakai ʻi he feituʻú kuo nau lau ʻa e pōpoaki ʻi he Ongoongo ʻo e Puleʻangá Fika 35. Ka ko e hā ʻenau tali ki aí? Neongo naʻa nau mālieʻia ange ʻi he meʻa naʻa nau laú, ko e lahi tahá heʻikai te nau fai ha meʻa kaeʻoua kuo toe ʻaʻahi atu kiate kinautolu ha taha ʻo e Kau Fakamoʻoni ʻa Sihová. ʻOkú ke fai ha fokotuʻutuʻu ke toe ʻaʻahi? Ko e tokanga anga-ʻofa ki hotau kaungā faʻahinga ʻo e tangatá ʻoku totonu ke ne ueʻi kitautolu ke tau fai pehē. Ko kinautolu kotoa pē naʻa nau fakahā ʻa e mahuʻingaʻia ʻi he Ongoongo ʻo e Puleʻangá ʻoku totonu ke fai ha toe ʻaʻahi ki ai.
5 Ko e Hā Te Ke Leaʻaki ʻi Hoʻo Toe Fokí? Te ke lava nai ke fai ha kiʻi fakamatala fekauʻaki mo e taimi totonu ʻa e pōpoaki ʻi he Ongoongo ʻo e Puleʻangá pea ʻeke leva ha fehuʻi fakatupunga-fakakaukau. Fanongo tokanga ki he meʻa ʻoku fakahā ʻe he tokotaha-ʻapí koeʻuhi ke lava ai ke ke ʻilo ʻa e meʻa ʻoku ʻi hono ʻatamaí. Pea fakahanga leva ʻa e tokangá ki ha poini feʻungamālie ʻi he polosiua Fiemaʻu, ʻa ia ʻoku fakaeʻa ʻi he Ongoongo ʻo e Puleʻangá. Kapau ʻe fai mai ha tali lelei kiate koe, feinga ke kamata leva ha ako Tohitapu ʻi he vave tahá.
6 Ko e ngaahi tuʻuaki ʻeni ʻe niʻihi ʻoku fokotuʻu mai ʻe lava ke ke ʻahiʻahiʻi ʻi he taimi te ke toe foki ai ki ha faʻahinga naʻa nau fakahā ʻa e mahuʻingaʻia ʻi he “Ongoongo ʻo e Puleʻangá” Fika 35:
◼ “Mahalo pē ʻokú ke manatuʻi ʻa e fakamatala kuo pulusi naʻá ku toki tuku atu kiate koé. Ko ʻene pōpoakí ʻokú ne lave ki ha meʻa mahuʻinga ʻokú ne vahevaheʻi ʻa e faʻahinga ʻo e tangatá ʻi he ʻahó ni—ko e siʻi ʻo e ʻofa ki he niʻihi kehé.” Fakahanga ʻa e tokangá ki he fakamoʻoni ʻoku hā ʻi he peesi 2 ʻo e Ongoongo ʻo e Puleʻangá ʻi he ʻuluʻi kaveinga “Kuo Fakaʻau ʻo Momoko ʻa e ʻOfa ki he Kaungāʻapí.” ʻEke ange leva, “ʻOkú ke fakakaukau ko e taumuʻa ia ʻa e ʻOtuá ke moʻui ʻa e faʻahinga ʻo e tangatá ʻi he founga ko ʻení?” Tuku ke ne tali. Huke ki he lēsoni 5 ʻi he polosiua Fiemaʻu, pea feinga ke kamata ha ako Tohitapu.
◼ “ʻI heʻeta ʻuluaki fetaulakí, naʻá ku tuku atu ai kiate koe ha fakamatala ʻi he kaveinga ko e ‘ʻE Feʻofaʻaki Kotoa Koā ʻa e Kakaí?’ ʻOkú ke fakakaukau ʻe malava ke ʻi ai ha māmani pehē?” Tuku ke ne tali. Huke ki he lēsoni 6 ʻi he polosiua Fiemaʻu, pea lau ʻa e palakalafi 6. Lau leva ʻa e talaʻofa ʻa e ʻOtuá ʻi he Maika 4:3, 4. Kapau ʻoku hā mai ha mahuʻingaʻia mei he tokotaha-ʻapí, tuʻuaki ʻa e polosiuá mo ha ako.
◼ “ʻI heʻeku ʻaʻahi fakamuimui mai kiate koé, naʻá ku tuku ai ha fakamatala ʻoku fakakaveinga ‘ʻE Feʻofaʻaki Kotoa Koā ʻa e Kakaí?’ ʻOku ʻi loto ai ha tuʻuaki ki ha ako Tohitapu taʻetotongi ʻi ʻapi. ʻOku ou toe foki maí ke fakahā atu kiate koe ʻa e tokoni ki he akó ʻa ia ʻoku mau ngāueʻakí. [Fakahā ange ʻa e tohi ʻIlo.] Ko e tohi ko ʻení ʻokú ne fakamatalaʻi māʻalaʻala ʻa e taimi ʻe feʻofaʻaki kotoa ai ʻa e kakaí, pea ʻokú ne toe tali ʻa e ngaahi fehuʻi ʻe niʻihi te ke fifili nai fekauʻaki mo ia: Ko e hā ʻoku tau tupu ai ʻo motuʻa pea maté? Ko e hā ʻoku fakangofua ai ʻe he ʻOtuá ʻa e faingataʻá? Ko e hā ʻoku hoko ki he faʻahinga ʻoku tau ʻofa ai kuo maté?” Pea ʻeke ange leva, “ʻE lava ke u fakahāhaaʻi atu kiate koe ʻa e founga ʻo e akó?” Kapau ʻoku ʻikai tali ʻe he tokotaha-ʻapí hoʻo tuʻuakí, ʻeke ange kiate ia pe te ne saiʻia ke lau ʻa e tohí ʻiate ia pē. Kapau te ne tali, tuku ha tatau, pea fakamatalaʻi ange ko ʻetau ngāue fakaeako Tohitapu ʻi māmani lahí ʻoku poupouʻi ia ʻaki ha tokoni loto-fiefoaki. Fokotuʻutuʻu ke toe foki ki ai.
7 ʻI hono ngāueʻi ʻa e feituʻú kotoa ʻaki ʻa e Ongoongo ʻo e Puleʻangá Fika 35, te tau tuʻuaki nai ʻa e tohi ʻIlo he lolotonga ʻo e toenga ʻo e māhiná. Ko hano fili lelei ʻo e ngaahi tuʻuaki ʻoku fokotuʻu mai ki he tohi ko ʻení ʻe lava ke maʻu ia ʻi he peesi fakamuimui ʻo ʻEtau Ngāue Fakafaifekau ʻo e Puleʻanga ʻi he tatau ʻo Sune mo Nōvema 1996; mo e Sune 1997.
8 Ko hono tufaki makehe ko ʻeni ʻa e Ongoongo ʻo e Puleʻangá ʻoku totonu ke ne ueʻi kotoa kitautolu ke tau fakatupulekina ʻetau ngaahi feinga ʻi he ngāue fakamalangá. ʻI he tokoni ʻa Sihová te tau malava ai ke tuipau ko e feingangāue ko ʻení ʻe pau ke lavameʻa, ʻi hono tokoniʻi ʻa e kakaí ke nau sio ki he taumuʻa ʻa e ʻOtuá ki he kotoa ʻo e faʻahinga ʻo e tangatá ke nau feʻofaʻaki. ʻOfa ke hokohoko atu hono tāpuakiʻi ʻe Sihova ʻetau ngaahi feinga tōtōiví ʻi heʻetau toe foki ki he kau mahuʻingaʻia ʻi he Ongoongo ʻo e Puleʻangá.