Ongoongo ʻo e Puleʻangá Fika 38 ke Tufaki ʻi Nōvema!
1. Ko e hā ʻa e ngaahi fehuʻi ʻa e kakaí fekauʻaki mo e kau maté, pea ʻe anga-fēfē hono tali ʻa e fifili ko iá ʻi Nōvema?
1 Ko e maté ko ha fili ia ʻo e kakai kotoa pē, neongo pe ko e hā ʻenau tuí. (1 Kol. 15:26) ʻOku fifili ʻa e tokolahi pe ʻoku ʻi fē ʻa e kau maté pe te nau lava nai ke toe sio kia kinautolu. Ko ia ai, ko e ngaahi fakatahaʻanga takatakai ʻi he māmaní te nau kau ʻi hono tufaki ʻi ha māhina ʻe taha ʻa e Ongoongo ʻo e Puleʻangá Fika 38, ʻoku fakakaveinga “ʻE Toe Moʻui Mai Koā ʻa e Kau Maté?” Ko e feingangāue makehe ko ení ʻe kamata ia ʻi Nōvema 1. Hili ʻa e tufaki makehe ko ení, ʻe ngāueʻaki leva ʻa e Ongoongo ʻo e Puleʻangá Fika 38 ʻi he ngāue fakafaifekaú ko ha tuleki.
2. ʻOku anga-fēfē hono fokotuʻutuʻu ʻa e Ongoongo ʻo e Puleʻangá Fika 38?
2 Founga Hono Fokotuʻutuʻu Iá: ʻOku fokotuʻutuʻu ʻa e Ongoongo ʻo e Puleʻangá Fika 38 ke peluki fakalōloa ke hā ʻi muʻa ʻa e kaveinga fakamānakó fakataha mo e ngaahi lea “Te ke pehē . . . ʻio? ʻikai? mahalo pē?” ʻI he taimi ʻe fakaava ai ʻe he tokotaha lau tohí ʻa e Ongoongo ʻo e Puleʻangá, ʻe sio ai ki he meʻa ʻoku leaʻaki ʻe he Tohi Tapú ʻi he tali ki he fehuʻi he kaveingá mo e meʻa ʻoku talaʻofa ʻe he Tohi Tapú ʻe lava ke ʻuhinga kiate iá. ʻE toe sio foki ai ki he ngaahi ʻuhinga ʻe lava ke ne tui ai ki he Tohi Tapú. Ko e peesi fakaʻosi ʻo e Ongoongo ʻo e Puleʻangá ʻoku ʻi ai ha fehuʻi mahuʻinga kiate ia ke fakakaukau ki ai pea fakaafeʻi ia ke ako lahi ange.
3. Ko e hā e founga ʻe tufaki ai ʻa e Ongoongo ʻo e Puleʻangá Fika 38?
3 Founga ʻE Tufaki Aí: Ko e feingangāue ko ení ʻe meimei tatau mo e ngaahi feingangāue ki hono tufaki ʻo e ngaahi tohi fakaafe ki he Fakamanatú mo e fakataha-lahi fakavahé. ʻE tokonaki ʻe he kau mātuʻá ha tataki ki he founga ʻe ʻosiki ai ʻa e feituʻu ngāue fakalotofonuá, fakafehoanaki mo e tohi ʻo ʻEpeleli 1, 2013 naʻa nau maʻú. Ko e ngaahi fakatahaʻanga ʻoku siʻisiʻi honau feituʻu ngāué ʻe lava ke nau tokoni ki he ngaahi fakatahaʻanga ofi ai ʻoku lahi ange honau feituʻu ngāué. ʻI he taimi ʻoku maʻu ai ʻa hoʻo tatau ʻo e Ongoongo ʻo e Puleʻangá Fika 38, manatuʻi ke ʻave pē ʻa e lahi ʻokú ke fiemaʻu ke ngāueʻaki ki he uike ʻe tahá. Lolotonga ʻa e feingangāué, ko e ngaahi tataú ʻe tufaki ʻi he faifakamoʻoni ki he kakaí ʻi he hili hono ngāueʻi kotoa ʻa e feituʻu ngāue fale-ki-he-falé. Kapau kuo tufaki kotoa ʻa e ngaahi tataú ki muʻa ʻi he ngataʻanga ʻo e māhiná ʻe tuʻuaki leva ʻa e tohi ʻoku totonu ke tuʻuakí. ʻI he ʻuluaki Tokonakí, te tau fakahangataha ai ke kau ʻi he feingangāue makehé kae ʻikai ko e kamata ʻo e ngaahi ako Tohi Tapú. ʻI he ngaahi fakaʻosinga uiké, ʻoku totonu ke tau toe tuʻuaki ʻa e makasiní ʻi he taimi ʻoku feʻungamālie aí. ʻOkú ke fai ha fokotuʻutuʻu ke ke kau kakato ki he feingangāue makehe ko ení?