ʻOku Fakahaofi Kitautolu ʻe he Meesi ʻa Sihová mei he ʻIkai ha ʻAmanakí
“Ke ke mēsi kiate au, ʻe ʻOtua, he ko ho tau ʻa e manavaʻofa: ke ke tamateʻi ʻeku ngaahi angahala ke hoa mo e lahi ʻo hoʻo ʻaloʻofa.”—SĀME 51:1.
1, 2. ʻOku malava fēfē ke uesia ʻe ha angahala mamafa ha toko taha ʻo e kau sevāniti ʻa Sihová?
KO E lao ʻa Sihová ʻe ʻikai ke lava ʻo maumauʻi taʻe tautea. ʻOku hoko ʻo hā mahino ʻa e meʻá ni ʻo kapau te tau fai ha angahala mamafa nai ki he ʻOtuá! Neongo kuo tau tauhi anga-tonu nai kia Sihova ʻi ha ngaahi taʻu, ka ko e maumauʻi ʻo ʻene laó ʻe fakatupunga nai ai ke tau loto-moʻua lahi pe mātuʻaki loto-mafasia. Te tau ongoʻi nai kuo liʻaki kitautolu ʻe Sihova pea ʻoku ʻikai te tau kei taau ke tauhi kiate ia. ʻOku hangē nai ʻa ʻetau angahalá ko ha konga ʻao lahi mo matolu ʻokú ne tāpuni ʻa e maama ko e hōifua mai ʻa e ʻOtuá.
2 Ko Tuʻi Tēvita ʻo ʻIsileli ʻo e kuonga muʻá naʻá ne aʻusia ha tuʻunga pehē. Naʻe anga-fēfē ʻa e hoko ʻa e meʻá ni?
ʻE Lava ke Iku ʻa e Ngaahi Laka Halá ki he Angahala Mamafa
3, 4. Ko e hā naʻe hoko kia Tuʻi Tēvita lolotonga ʻa e vahaʻa taimi ʻo e tuʻumālié?
3 Naʻe ʻofa ʻa Tēvita ki he ʻOtuá ka naʻá ne fai ha ngaahi laka hala ʻo iku ai ki he ngaahi angahala mamafá. (Fakafehoanaki mo Kalētia 6:1.) ʻOku malava ke hoko ʻa e meʻa ko ʻení ki ha taha taʻe haohaoa pē, tautautefito kapau ʻokú ne maʻu ha mafai ki he niʻihi kehé. Koeʻuhi ko ha tuʻi tuʻumālie ia, naʻe maʻu ai ʻe Tēvita ʻa e ongoongoa mo e mālohi. Ko hai ia ne fakatoʻotoʻa ke ne poleʻi ʻa ʻene leá? Ko e kau tangata alafuá naʻa nau talangofua vave mo loto ke tauhi kiate ia, pea naʻe loto-lelei ʻa e kakaí ke fai ʻa ia naʻá ne tala ange ke nau faí. Ka neongo ia, naʻe hala ʻa Tēvitá ko ʻene fakatokolahi ʻa hono ngaahi uaifí pea mo ʻene lau ʻa e tokolahi ʻo e kakaí.—Teutalōnome 17:14-20; 1 Kalonikali 21:1.
4 ʻI he lolotonga ʻo e vahaʻa taimi tuʻumālie fakamatelie ko ʻení, naʻe fai ai ʻe Tēvita ʻa e ngaahi angahala mamafa ki he ʻOtuá mo e tangatá. Naʻe iku ha angahala ʻe taha ki ha toe angahala kehe ʻoku hangē ko ha ngaahi filo lālanga fakataha ʻo ha tupenu ʻa hono faʻu ʻe Sētané! Lolotonga ʻa e ʻi he taú ʻa e kau ʻIsilelí mo e kau ʻĀmoní, naʻe mamata ʻa Tēvita mei hono funga falé ki he uaifi matamatalelei ʻo ʻUlaiá, ko Patisepa, ʻoku fai ʻene kaukau. Naʻe ʻi he taú ʻa ʻUlaia ia, ko ia naʻe fekau ʻe he tuʻí ke ʻomai ʻa Patisepa ki hono pālasí peá ne fai tono mo ia. Fakakaukau atu ki he ʻohovale lahi ē ka ko ʻene ʻilo ki mui kuo feitama ʻa e fefiné! Naʻe fekau ʻe Tēvita ke ʻomai ʻa ʻUlaia, ʻo ne ʻamanaki ʻe mohe ia mo Patisepa ʻi he pō ko iá pea ʻe lau ai ʻa e tamá ʻe ʻUlaia ko ʻene tama pē. Naʻe fakafisi ʻa ʻUlaia ia ke mohe mo hono malí, neongo naʻe fakainu ia ʻe Tēvita ʻo konā. Kuo faingatāmaki ʻaupito ʻa Tēvita, ko ia naʻe ʻave ʻe Tēvita ki he ʻeiki tau ko Sioapé ha fekau fakafufū ke fakamuʻomuʻa ʻa ʻUlaia ki he konga tau ʻoku mālohí ke fakapapauʻi ke ne mate ai. Naʻe tāmateʻi ʻa ʻUlaia ʻi he taú, pea naʻe fai ʻe he uitoú ʻa hono tengihia ʻi ha vahaʻa taimi pea naʻe toki mali leva ʻa Tēvita mo e uitoú telia naʻa ʻilo ʻe he kakaí kuó ne feitama.—2 Sāmiuela 11:1-27.
5. Ko e hā naʻe hoko ʻi he ʻosi ʻo e angahala ʻa Tēvita mo Patisepá, pea ko e hā naʻe hoko kiate ia koeʻuhi ko ʻene ngaahi angahalá?
5 Naʻe fakahā ʻe he ʻOtuá ʻa e ngaahi angahala ʻa Tēvitá ʻo fakafou ʻi he palōfita ko Nētané, ʻo ne pehē: “Te u fakatupu ha mala kiate koe mei ho fale oʻou.” Ko ia ai, naʻe mate ʻa e tama naʻe fanauʻi ʻe Patisepá. (2 Sāmiuela 12:1-23) Ko e ʻuluaki foha ʻo Tēvita, ko ʻAmanoní, naʻá ne tohotohoʻi ʻa hono tuofefine tamai taha ʻoʻona ko Temá pea naʻe fakapoongi ʻa ʻAmanoni ʻe he tuongaʻane ʻo Tema. (2 Sāmiuela 13:1-33) Naʻe feinga ʻa e foha ʻo e tuʻí ko ʻApisalome ke faʻao ʻa e taloní peá ne fakamaaʻi ʻa ʻene tamaí ʻaki ʻene fai fehokotaki fakasino mo e kau sinifu ʻa Tēvitá. (2 Sāmiuela 15:1–16:22) Naʻe ʻosi ʻa e tau fakafonuá ʻi he mate ʻa ʻApisalomé pea naʻe toe lahi ange ai ʻa e mamahi ʻa Tēvitá. (2 Sāmiuela 18:1-33) Kae kehe, naʻe fakatōkilaloʻi ʻa Tēvita ʻe heʻene ngaahi angahalá pea naʻá ne ʻilo ai ʻa e fie maʻu ke taka ofi ki hono ʻOtua manavaʻofá. Kapau te tau faihala, ʻai ke tau fakatomala anga-fakatōkilalo pea ʻunuʻunu atu kia Sihova.—Fakafehoanaki mo Sēmisi 4:8.
6. Ko e hā ʻa e ʻuhinga naʻe mātuʻaki halaia ai ʻa Tuʻi Tēvitá?
6 Naʻe mātuʻaki halaia ʻa Tēvitá koeʻuhi he ko ha pule ʻIsileli ia naʻá ne ʻilo lelei ʻa e Lao ʻa Sihová. (Teutalōnome 17:18-20) Naʻe ʻikai ko ha Felo ia ʻo ʻIsipite pe ko ha tuʻi Pāpilone ʻa ia naʻe ʻikai te nau maʻu ʻa e ʻilo ko iá pea nau faʻa fai nai ʻa e ngaahi meʻa ʻoku ʻikai ke hōifua ki ai ʻa e ʻOtuá. (Fakafehoanaki mo ʻEfesō 2:12; 4:18.) Naʻe ʻilo ʻe Tēvita ko e tonó mo e fakapoó ko e ongo angahala mamafa ia, koeʻuhí he ko e memipa ia ʻo e puleʻanga naʻe fakatapui kia Sihova. (ʻEkisoto 20:13, 14) ʻOku ʻilo foki ʻe he kau Kalisitiané ʻa e Lao ʻa e ʻOtuá. Kae kehe, ʻoku hangē pē ko Tēvitá, ʻoku maumauʻi ia ʻe he niʻihi koeʻuhi ko e angahala tukufakaholo, tuʻunga vaivai ʻo e tangatá, mo e fakatauele ʻoku ʻikai ke fakafepakiʻi. Kapau ʻe hoko ʻeni ki ha toko taha ʻiate kitautolu, ʻoku ʻikai fie maʻu ke tau nofo ʻi ha tuʻunga fakapoʻuli ʻa ia ʻe nenefu ai ʻa ʻetau sio fakalaumālié mo kāpui ai kitautolu ʻe he ʻikai ha ʻamanakí.
ʻOku Maʻu ʻa e Fiemālie ʻi he Vete ʻo e Angahalá
7, 8. (a) Ko e hā ʻa e meʻa naʻe hoko kia Tēvita ʻi heʻene feinga ke fūfuuʻi ʻa ʻene ngaahi angahalá? (e) Ko e hā ʻa e ʻaonga ʻo e vete angahalá pea ʻoua te te toe fai angahala?
7 Kapau ʻoku tau halaia ʻi hono maumauʻi lahi ʻa e lao ʻa e ʻOtuá, naʻa mo ʻetau vete ʻa ʻetau ngaahi angahalá kia Sihova ʻe faingataʻa nai. Ko e hā ʻe malava ke hoko ʻi he ngaahi tuʻunga peheé? ʻI he Sāme 32, naʻe fakamoʻoni ai ʻe Tēvita: “Lolotonga ʻeku fakalongo pe [kae ʻikai vete ʻa e angahala], ko hoku ngaahi hui naʻe ʻaufoē, pea ʻosi ʻa e ʻaho mo ʻeku toʻe. He ko e ʻaho mo e po naʻe mamafa mai ho [Sihova] nima: naʻa ku mahahuʻa hange ha meʻa ʻi he laʻalaʻa.” (Sāme 32:3, 4Veesi 3, 4) Naʻe ongosia ʻa Tēvita ʻi heʻene feinga ke fūfuuʻi ʻene angahalá mo lōmia hono konisēnisi ʻoku halaiá. Naʻe holo lahi fau ʻa hono iví ʻi he loto-mamahí ʻo ne hangē ha fuʻu ʻakau ʻoku faingataʻaʻia ʻi he laʻalaʻaá ko e ʻikai ha hauhau ke moʻui mei ai. Ko e moʻoni, naʻá ne hokosia nai ha ngaahi ola kovi fakaefakakaukau mo fakaesino. Kae kehe, naʻe ʻikai te ne toe fiefia. Ko e hā ʻoku totonu ke tau faí, kapau ʻoku ʻi ai ha taha ʻiate kitautolu ʻokú ne ʻi ha tuʻunga meimei tatau?
8 Ko e vete ʻo e angahalá ki he ʻOtuá ʻe lava ke maʻu ai ʻa e fakamolemole mo e fiemālie. Naʻe hiva ʻa Tēvita: “Naʻa ku fakamoʻoni ki he ʻAfiona ʻeku hia, pea naʻe ʻikai te u fufū ʻeku angahala: naʻa ku pehe, Te u vete ki he ʻEiki ʻeku ngaahi talangataʻa; pea naʻa ke tamateʻi ʻa e moʻua o ʻeku angahala.” (Sāme 32:5) ʻOkú ke mamahi lahi ʻi ha angahala fufū? ʻIkai ʻe lelei taha ke vete ia pea ʻoua ʻe toe fai ia koeʻuhi kae maʻu ʻa e meesi ʻa e ʻOtuá? Fēfē ke ke fakahā ki he kau mātuʻa ʻi he fakatahaʻangá mo kumi ki ha faitoʻo fakalaumālie? (Palōvepi 28:13; Sēmisi 5:13-20) ʻE fakatokangaʻi ʻa hoʻo fakatomalá, pea ʻe faifai atu pē ʻe toe maʻu ʻa hoʻo fiefia faka-Kalisitiané. Naʻe pehē ʻe Tēvita: “Monuʻiaa ka ko e toko taha kuo fakamolemole ʻene talangataʻa, kuo ʻufiʻufi ʻene faihala. Monuʻiaā ka ko e tangata ʻoku ʻikai lau hia ki ai ʻe Sihova, pea ʻi hono laumalie ʻoku ʻikai ha kākā.”—Sāme 32:1, 2.
9. Naʻe faʻu ʻanefē ʻa e Sāme 51 pea ko e hā ʻa hono ʻuhingá?
9 Naʻe pau ke fai ʻe Tēvita mo Patisepa ha fakamatala kia Sihova ko e ʻOtuá ki he hala naʻá na faí. Naʻe fai meesi ʻa e ʻOtuá kiate kinaua, neongo naʻe malava ke tāmateʻi kinaua koeʻuhi ko ʻena angahalá. Naʻe fakatautefito ʻa ʻene meesi kia Tēvitá koeʻuhi ko e fuakava ki ha Puleʻangá. (2 Sāmiuela 7:11-16) ʻOku hā ʻi he Sāme 51 ʻa e fakakaukau fakatomala ʻa Tēvita ki heʻene ngaahi angahala fekauʻaki mo Patisepá. Naʻe faʻu ʻa e Sāme fakaueʻi-loto ko ʻení ʻe he tuʻí heʻene fakatomalá ʻi he hili ʻa hono fakahā ki hono konisēnisí ʻe he palōfita ko Nētané ʻa e fakalilifu ʻo ʻene maumauʻi ʻa e lao fakaeʻotuá. Naʻe fie maʻu ha loto-toʻa kia Nētane ke ne fakahā kia Tēvita ʻa ʻene ngaahi angahalá, ʻo hangē tofu pē kuo pau ke loto-toʻa ʻa e kau mātuʻa Kalisitiane kuo fakanofó koeʻuhi ke nau fai ha ngaahi meʻa pehē ʻi he ʻahó ni. Naʻe vete anga-fakatōkilalo ʻe he tuʻí ʻene angahalá, ka naʻe ʻikai te ne fakaʻikaiʻi ʻa e tukuakiʻí mo ne fekau ke tāmateʻi ʻa Nētane. (2 Sāmiuela 12:1-14) ʻOku hā ʻi he Sāme 51 ʻa e meʻa naʻá ne leaʻaki ki he ʻOtuá ʻi he lotu ʻo fekauʻaki mo ʻene ngaahi angafai fakatupunga ongoongo-koví pea ʻoku feʻunga ke fakalaulauloto ʻi he faʻa lotu, tautefito kapau kuo tau faihala pea fakaʻamu ki he meesi ʻa Sihová.
Te Tau Fai ha Fakamatala ki he ʻOtuá
10. Naʻe lava fēfē ke hokosia ʻe Tēvita ha toe ake fakalaumālie?
10 Naʻe ʻikai ke feinga ʻa Tēvita ke fakatonuhiaʻi ʻa ʻene angahalá ka naʻá ne kole: “Ke ke mēsi kiate au, ʻe ʻOtua, he ko ho tau ʻa e manavaʻofa: ke ke tamateʻi ʻeku ngaahi angahala ke hoa mo e lahi ʻo hoʻo ʻaloʻofa.” (Sāme 51:1) ʻI heʻene faihalá, naʻe lakasi ai ʻe Tēvita ʻa e ngaahi fakangatangataʻanga ʻa e Lao ʻa e ʻOtuá. Kae kehe, naʻe ʻi ai ha ʻamanaki ki hano fakaake fakalaumālie ia, kapau ʻe fakahā ʻe he ʻOtuá kiate ia ha ʻaloʻofa ʻo fakatatau mo ʻEne manavaʻofá, pe ʻofa mateakí. Ko e hulu fau ʻo e ngaahi fai meesi ʻa e ʻOtuá ʻi he kuo hilí naʻe maʻu ai ʻe he tuʻi kuo fakatomalá ni ha makatuʻunga ke ne tui ʻe tāmateʻi ʻe hono Toko Taha Ngaohí ʻa ʻene ngaahi angahalá.
11. Ko e hā naʻe fakahā ʻe he ngaahi feilaulau ʻo e ʻAho ʻo e Fakaleleí, pea ko e hā ʻoku fie maʻu ki he fakamoʻui ʻi he ʻaho ní?
11 Naʻe tuʻu fakaefakatātā ʻa e ngaahi feilaulau naʻe fai ʻi he ʻAho ʻo e Fakaleleí ʻo fakahā ʻoku ʻi ai ʻa e founga ʻa Sihova ke fakamaʻa ʻaki ʻa e faʻahinga fakatomalá mei heʻenau angahalá. ʻOku tau ʻilo he taimí ni ko ʻene meesí mo ʻene fakamolemolé ʻoku fakaaʻu mai kiate kitautolu ʻo makatuʻunga ʻi heʻetau tui ki he feilaulau huhuʻi ʻa Sīsū Kalaisí. Kapau ko Tēvita ē, ʻa ia naʻá ne ʻilo ki he ngaahi fakataipe mo e ngaahi ʻata pē ʻo e feilaulau ko ʻení, ka naʻe falala ia ki he manavaʻofa ʻa Sihová mo ʻene ngaahi meesí, ʻoku totonu ke toe lahi ange ʻa e tui ʻa e kau sevāniti ʻa e ʻOtuá ʻi he ʻahó ni ki he huhuʻi kuo tokonaki mai ko honau fakamoʻuí!—Loma 5:8; Hepelū 10:1.
12. ʻOku ʻuhinga ʻa e fai angahalá ki he hā, pea naʻe ongoʻi fēfē ʻa Tēvita ʻo fekauʻaki mo ʻene faihalá?
12 Naʻe tānaki atu ʻe Tēvita ʻi heʻene kole ki he ʻOtuá: “Ke ke matuʻaki fo au mei heʻeku hia, pea ʻai ke u maʻa mei heʻeku angahala, he ʻoku ou ʻiloʻi ʻeku talangataʻa, pea ʻoku ma feʻao maʻu pe mo ʻeku angahala.” (Sāme 51:2, 3) Ko e fai angahalá ko e tō nounou mei he ngaahi tuʻunga ʻa Sihová. Ko e moʻoni ko e meʻa tofu pē ia naʻe fai ʻe Tēvitá. Kae kehe, naʻe ʻikai ke hangē ia ko ha toko taha fakapō pe tono ʻoku ʻikai ke tokanga ia ki he hala kuó ne faí, kae tokanga pē ia ki ha tautea pe ko ha malava ke ne maʻu ai ha mahaki. Naʻe fehiʻa ʻa Tēvita ia ki he koví, he naʻe ʻofa ia kia Sihova. (Sāme 97:10) Naʻá ne fakaliliʻa ʻiate ia ki heʻene angahalá tonu pea naʻá ne fie maʻu ke fakamaʻa ʻosiʻosingamālie ia ʻe he ʻOtuá. Naʻe ʻilo lelei ʻe Tēvita ʻa ʻene ngaahi angahalá pea naʻá ne mātuʻaki fakatomala koeʻuhi ko ʻene tuku ʻa ʻene holi angahalaʻiá ke ne lavaʻi iá. Naʻe feʻao maʻu pē mo ia ʻene angahalá, he ko ha konisēnisi kuo halaia ʻo ha toko taha manavahē ki he ʻOtuá ʻe ʻikai pē ke fiemālie ia kae ʻoua kuo ʻi ai ha fakatomala, vete angahala, mo e fakamolemole ʻa Sihová.
13. Ko e hā naʻe lava ai ʻe Tēvita ke ne pehē naʻá ne fai angahala ki he ʻOtuá toko taha pē?
13 ʻI heʻene ʻiloʻi ʻa e pau ke ne fai ha fakamatala kia Sihová, naʻe pehē ʻe Tēvita: “Ko koe—ko koe pe kuo u angahala ki ai: pea kuo u fai ʻa e meʻa ʻoku kovi ʻi hoʻo vakai: koeʻuhi ke ha hoʻo tonuhia ʻo ka ke ka lea, pea ke ʻataʻatā ʻo ka ke ka fakamauā.” (Sāme 51:4) Naʻe maumauʻi ʻe Tēvita ʻa e ngaahi lao ʻa e ʻOtuá, ʻo ne fakaongoongokoviʻi ʻa e tuʻunga tuʻí, pea naʻá ne “tuku ʻi he ngaue na ha tuʻunga ke lauʻikovi ai ʻa Sihova,” ʻo ne fakaʻatā Ia ki he lauʻikoviʻi. (2 Sāmiuela 12:14; ʻEkisoto 20:13, 14, 17) Ko e ngaahi tōʻonga angahala ʻa Tēvitá ko e toe ngaahi fakalotomamahi foki ia ki he kau ʻIsilelí mo e ngaahi memipa ʻo hono fāmilí, ʻo hangē tofu pē ko ha toko taha faihala ʻosi papitaiso ʻi he ʻahó ni ʻokú ne fakatupunga ha mamahi pe faingataʻaʻia lahi ki he fakatahaʻanga Kalisitiané pea ʻi he lotolotonga ʻo e faʻahinga ʻoku ʻofa aí. Neongo naʻe ʻilo ʻe he tuʻí heʻene fakatomalá kuó ne fai angahala ki he kaungātangata ʻo hangē ko ʻUlaiá, ka naʻá ne ʻiloʻi ʻa e lahi ange ʻa hono fatongia kia Sihová. (Fakafehoanaki mo Sēnesi 39:7-9.) Naʻe fakamoʻoniʻi ʻe Tēvita ʻe māʻoniʻoni pē ʻa e fakamaau ʻa Sihová. (Loma 3:4) Ko e kau Kalisitiane kuo nau fai angahalá ʻoku fie maʻu ke nau maʻu ʻa e anga ʻo e fakakaukau tatau pē.
Ngaahi Tuʻunga ʻOku Kiʻi Fakatonuhiaʻi Ai
14. Ko e hā ʻa e ngaahi tuʻunga ʻoku kiʻi fakatonuhiaʻi ai naʻe lave ki ai ʻa Tēvita?
14 Neongo naʻe ʻikai ke feinga ʻa Tēvita ke ne fakatonuhiaʻi ia, ka naʻá ne pehē: “Vakai naʻe fanauʻi au mo e hia; ʻio naʻe tuʻituʻia ʻeku faʻe ʻiate au ko e meʻa angahala.” (Sāme 51:5) Naʻe fanauʻi ʻa Tēvita ʻi he angahala, pea naʻe hokosia ʻe heʻene faʻeé ʻa e ngaahi mamahi ʻo e fanauʻí koeʻuhi ko e angahalaʻia tukufakaholó. (Sēnesi 3:16; Loma 5:12) Naʻe ʻikai ke ʻuhinga ʻa ʻene ngaahi leá ke pehē ko e fehokotaki fakasino totonu ʻi he nofo malí, tuʻituʻiá, mo e fanauʻí ko e angahala ia, koeʻuhi he ko e tokonaki ia ʻa e ʻOtuá ki he nofo malí mo e fanauʻi ʻo e fānaú; pea naʻe ʻikai ko ha lave ia ʻa Tēvita ki ha angahala pau ʻa ʻene faʻeé. Naʻe feitamaʻi ia ʻi he angahala koeʻuhi ko ʻene ongo mātuʻá naʻá na angahalaʻia ʻo hangē ko e kakai angahalaʻia kotoa pē.—Siope 14:4.
15. Ko e hā ʻoku totonu ke ʻoua te tau faí, neongo ʻe tokaʻi nai ʻe he ʻOtuá ʻa e ngaahi tuʻunga ʻoku kiʻi fakatonuhiaʻi ai ʻa e meʻa naʻa tau faí?
15 Kapau kuo tau fai angahala, ʻe lava ke tau lave ʻi heʻetau lotu ki he ʻOtuá ki ha ngaahi tuʻunga ʻoku kiʻi fakatonuhiaʻi ai ʻa e meʻa naʻe iku nai ki heʻetau faihalá. Kae ʻoua naʻa tau liliu ʻa e ʻofa maʻataʻatā ʻa e ʻOtuá ko ha kalofanga ia ki ha ʻulungāanga fakalielia pe ko hono ngāueʻaki ʻo e angahalaʻia tukufakaholó ko ha meʻa ke ne maluʻi kitautolu mei hono fua ʻa e halaia ʻo ʻetau angahalá. (Siutasi 3, 4) Naʻe tali ʻe Tēvita ʻa e halaia ki hono tauhi ʻa e ngaahi fakakaukau taʻe maʻá mo e ʻunua ki he ʻahiʻahí. ʻAi ke tau lotu muʻa ke ʻoua naʻa tuku kitautolu ki he ʻahiʻahí pea tau ngāue ʻo fakatatau mo e lotu peheé.—Mātiu 6:13.
Kole ke Fakamaʻa
16. Ko e hā ʻa e ʻulungāanga ʻoku manako ai ʻa e ʻOtuá, pea ʻoku totonu ke kaunga fēfē ʻa e meʻá ni ki hotau ʻulungāangá?
16 ʻOku matamatalelei nai ʻa e kakai ʻoku nau moʻui līʻoa ki he ʻOtuá, ka ʻoku loloto ange ʻa e sio ʻa e ʻOtuá ʻi he meʻa ʻoku hā mai mei tuʻá ʻo ne sio ki honau anga totonu ʻi lotó. Naʻe pehē ʻe Tēvita: “Vakai ʻoku ke [Sihova] manako ki he fai moʻoni ʻi he feituʻu lotoloto: pea ʻi he potu fufu te ke ngaohi au ke u ʻilo ʻa e poto.” (Sāme 51:6) Naʻe halaia ʻa Tēvita ʻi he loi mo e kākā ʻi hono faʻufaʻu ke mate ʻa ʻUlaiá mo e feinga ke fufū ʻa e ngaahi moʻoniʻi meʻa ʻo fekauʻaki mo e feitama ʻa Patisepá. Ka neongo iá, naʻá ne ʻilo ʻoku manako ʻa e ʻOtuá ki he fai moʻoní mo e māʻoniʻoní. ʻOku totonu ke ueʻi kitautolu ʻe he meʻá ni ke tau ʻulungāanga lelei, he ʻe fakahalaiaʻi kitautolu ʻe Sihova ʻo kapau te tau kākā. (Palōvepi 3:32) Naʻe toe ʻiloʻi foki ʻe Tēvita kapau ʻe ‘ʻai ia ʻe he ʻOtuá ke ne ʻilo ʻa e poto lahi ʻaupito,’ ʻi heʻene hoko ko ha tuʻi ia kuo fakatomalá, te ne malava ke fai ki he ngaahi tuʻunga fakaʻotuá ʻi he toenga ʻo ʻene moʻuí.
17. Ko e hā ʻa e ʻuhinga ʻo e lotu ke fakamaʻa ʻaki ʻa e ʻisopé?
17 Naʻe hoko atu ʻa e kole ʻa e tangata tohi-sāmé koeʻuhi he naʻá ne ʻilo ʻa hono fie maʻu kiate ia ʻa e tokoni ʻa e ʻOtuá ke lavaʻi ʻa e ngaahi hehema angahalaʻiá: “Ke ke fakamaʻaʻi isope au, pea te u maʻa: fo au, pea te u hinehinaange he sinou.” (Sāme 51:7) ʻI he lotolotonga ʻo e ngaahi meʻa kehe, ko e ʻakau ko e ʻisopé (ngalingali ko e marjoram, pe Origanum maru) naʻe ngāueʻaki ki he ouau fakamaʻa ki he kakai naʻa nau puke ki muʻa ʻi he kiliá. (Livitikō 14:2-7) Ko ia naʻe feʻunga mālie ʻa e lotu ʻa Tēvita ke fakamaʻa ia mei he angahalá ʻaki ʻa e ʻisope. ʻOku toe fekauʻaki ʻa e fakakaukau ʻo e fakamaʻá mo ʻene kole ke fufulu ia ʻe Sihova ke ne mātuʻaki maʻa fakalūkufua, ʻo hinehina ange ia ʻi he sinoú ʻoku ʻikai ke ʻi ai ha ngaahi ʻuli aí. (ʻAisea 1:18) Kapau ʻoku ʻi ai ha toko taha ʻiate kitautolu ʻokú ne faingataʻaʻia ʻi he konisēnisí koeʻuhi ko ha faihala, ʻai ke tau maʻu ʻa e tui ʻe lava ke fakamaʻa mo fufulu kitautolu ʻe he ʻOtuá ʻo makatuʻunga ʻi he feilaulau huhuʻi ʻa Sīsuú ʻo kapau te tau fakatomala ʻo kumi ki heʻene fakamolemolé.
Kole ke Toe Fakafoki
18. Ko e hā ʻa e tuʻunga naʻe ʻi ai ʻa Tēvita ʻi he ki muʻa ke ne fakatomala mo vete ʻene angahalá, pea ʻe tokoni fēfē ʻa e ʻilo ki he meʻa ko ʻení ʻi he ʻaho ni?
18 ʻE mahino ʻa e ngaahi lea ʻa Tēvitá ki ha Kalisitiane pē kuó ne faingataʻaʻia ʻi he konisēnisi halaia: “Tuku [Sihova] ke u fanongo ki he fakafiefia mo e mavava, kae meʻe ʻa e ngaahi hui kuo ke fakavolu.” (Sāme 51:8) Ki muʻa ke fakatomala ʻa Tēvita mo vete ʻa ʻene ngaahi angahalá, naʻe hoko ʻa e faingataʻaʻia ʻa hono konisēnisí ke ne loto-mamahi lahi ai. Naʻa mo e ngaahi hiva fiefia mo e fakafiefia naʻe fai ʻe he kau hiva lelei mo e kau tāmeʻa pōtoʻí naʻe ʻikai pē ke ne maʻu ha fiemālie mei ai. Naʻe fuʻu lahi ʻa e langa ʻo e faingataʻaʻia ʻa e toko taha angahalaʻia ko Tēvitá koeʻuhi ko e ʻikai hōifua ʻa e ʻOtuá ki ai, ko ia naʻá ne hangē ko ha tangata naʻe fakavolu hono ngaahi huí. Naʻá ne fakaʻamua ki ha fakamolemole, fakaake fakalaumālie, mo ha toe fakafoki mai ʻo e fiefia naʻá ne maʻu ki muʻá. ʻOku toe fie maʻu foki ki ha toko taha faihala kuo fakatomala ʻi he ʻahó ni ʻa e fakamolemole ʻa Sihová koeʻuhi ka ne toe maʻu ʻa e fiefia naʻá ne maʻu ki muʻa peá ne fai ʻa e meʻa ʻo tuʻutāmaki ai ʻa hono vā mo e ʻOtuá. Ko e toe fakafoki mai ʻo e “fiefia tupu ʻi he Laumalie Maʻoniʻoni” ʻoku hā ai ki he toko taha fakatomalá kuo fakamolemoleʻi ia ʻe Sihova mo ne ʻofaʻi foki ia. (1 Tesalonaika 1:6) Ko ha fakafiemālie lahi ē ʻoku maʻu mei ai!
19. ʻE anga-fēfē ʻa e ongoʻi ʻa Tēvitá ʻo kapau ne tāmateʻi ʻe he ʻOtuá ʻa e kotoa ʻo ʻene ngaahi hiá?
19 Naʻe toe lotu ʻa Tēvita: “Hanga kehe mei heʻeku ngaahi angahala, pea tamateʻi ʻeku hia kotoa.” (Sāme 51:9) ʻOku ʻikai ke ʻamanekina ke hōifua ʻa Sihova ki he angahalá. Ko ia, naʻe kole ai kiate ia ke ne hanga kehe mei he ngaahi angahala ʻa Tēvitá. Naʻe toe kole foki ʻa e tuʻí ki he ʻOtuá ke ne tāmateʻi kotoa ʻa ʻene ngaahi hia kotoa, ʻo tāmateʻi hono kotoa ʻene taʻe māʻoniʻoní. Pehē ange mai ke fai pehē ʻa Sihova! ʻE ongoʻi fiemālie ange ʻa Tēvita, toʻo atu mo e kavenga ʻo e konisēnisi faingataʻaʻiá, pea tuku ke ʻilo ʻe he tuʻi fakatomalá kuo fakamolemoleʻi ia ʻe hono ʻOtua anga-ʻofá.
Fēfē Kapau Kuó Ke Fai Angahala?
20. Ko e hā ʻoku fokotuʻu atu ki ha Kalisitiane pē kuó ne fai ha angahala mamafa?
20 ʻOku fakahaaʻi ʻe he Sāme 51 ko ha sevāniti fakatapui pē ʻa Sihova kuó ne fai angahala mamafa ka kuo fakatomalá ʻe lava ke ne kole ʻi he ʻilo pau kiate ia ke ne fakahā ki ai ʻa e hōifuá pea fakamaʻa ia mei heʻene angahalá. Kapau ko ha Kalisitiane koe kuó ke faihala ʻi ha founga pehē, fēfē ke ke kumi ki he fakamolemole ʻa ʻetau Tamai ʻi hēvaní ʻi he lotu anga-fakatōkilalo? Fakahaaʻi ʻa hono fie maʻu kiate koe ʻa e tokoni ʻa e ʻOtuá koeʻuhi ke ke tuʻu taau ʻi hono ʻaó, pea kole ke ne toe fakafoki mai ʻa hoʻo fiefia ki muʻá. ʻE lava ke lotu ʻi he tui pau ʻa e kau Kalisitiane kuo fakatomalá kia Sihova mo ha ngaahi kole pehē, “he lōlahi ʻene fakamolemole.” (ʻAisea 55:7; Sāme 103:10-14) Ko e moʻoni, ʻoku totonu ke fakahā ki he kau mātuʻa ʻi he fakatahaʻangá koeʻuhi ke nau fai ha tokoni fakalaumālie ʻe fie maʻu.—Sēmisi 5:13-15.
21. Ko e hā ʻe hoko ki ai ʻa ʻetau sivisiviʻí?
21 Ko e meesi ʻa Sihová ʻokú ne fakahaofi ʻa ʻene kakaí mei he ʻikai ha ʻamanakí. Ka tau sivisiviʻi muʻa ʻa e ngaahi kole fakamātoato kehe ʻa e toko taha fakatomala ko Tēvitá ʻi he Sāme 51. ʻE hā mei heʻetau ako ki aí ʻoku ʻikai ke taʻe tokaʻi ʻe Sihova ha loto-lavea.
Ko e Hā Haʻo Tali?
◻ Ko e hā ʻa e uesia ʻe lava ke hoko mei ha angahala mamafa ki ha taha ʻo e kau sevāniti ʻa Sihová?
◻ Naʻe uesia fēfē ʻa Tēvita ʻi heʻene feinga ke fufū ʻene angahalá?
◻ Ko e hā naʻe pehē ai ʻe Tēvita naʻá ne fai angahala ki he ʻOtuá toko taha pē?
◻ Neongo ʻe tokaʻi nai ʻe he ʻOtuá ʻa e ngaahi tuʻunga ʻoku kiʻi fakatonuhiaʻi ai ʻo kapau te tau fai ha angahala, ko e hā ʻoku totonu ke ʻoua te tau faí?
◻ Ko e hā ʻoku totonu ke fai ʻe ha Kalisitiane kapau kuó ne fai ha angahala mamafa?