“Ke Toka Teuteu ʻa Kimoutolu”
1 ʻI heʻene kikite mahuʻinga fekauʻaki mo e fakaʻosiʻosi ʻo e fokotuʻutuʻu ko eni ʻo e ngaahi meʻá, naʻe fakatokanga ai ʻa Sīsū ʻo fekauʻaki mo e hoko ʻo nōfoʻi ʻi he tokanga ki he ngaahi meʻa fakamāmani ʻi he moʻuí. (Mt. 24:36-39; Luke 21:34-35) Koeʻuhi ko e mapuna hake ʻo e mamahi lahí ʻe lava ke hoko ia ʻi ha taimi pē, ʻoku mātuʻaki fiemaʻu ke tau tokanga ki he naʻinaʻi ʻa Sīsuú: “Ke toka teuteu ʻa kimoutolu foki: he ko e hoko mai ʻa e Fanautama ʻa Tangata ʻe fai ʻi ha taimi ʻoku ʻikai te mou ʻamanaki ai kiate ia.” (Mt. 24:44) Ko e hā ʻe lava ke ne tokoniʻi kitautolu ʻi he fekauʻaki mo e meʻá ni?
2 Tauʻi ʻa e Loto-Moʻuá mo e Ngaahi Fakalelú: Ko e taha ʻo e ngaahi tōʻanga fakalaumālie kuo pau ke tau leʻohi kitautolu mei aí ko e “lotomoʻua ki he moʻui ni.” (Luke 21:34) ʻI he ngaahi fonua ʻe niʻihi, ko e masivá, taʻemaʻu ngāué, mo e mamafa e fakamole ki he moʻuí ʻoku ʻai ai ke faingataʻa ke maʻu ʻa e ngaahi fiemaʻu ki he moʻuí. ʻI he ngaahi fonua kehé, ʻoku anga-maheni ʻaki ai ʻa e feinga ke maʻu mai ʻa e ngaahi koloa fakamatelié. Kapau ko e tokanga ki he meʻa fakamatelié ʻoku kamata ke ne puleʻi ʻetau fakakaukaú, ʻoku tau ʻi ha tuʻunga fakatuʻutāmaki ʻo e mole ʻa ʻetau tokangataha ki he ngaahi meʻa moʻoni ʻo e Puleʻangá. (Mt. 6:19-24, 31-33) ʻOku tokoniʻi kitautolu ʻe he ngaahi fakataha ʻa e fakatahaʻangá ke tauhi maʻu ʻa e tokangataha ko iá. ʻOkú ke ʻai ko hoʻo taumuʻá ia ke maʻu ʻa e fakatahá kotoa?—Hep. 10:24, 25.
3 Ko e māmani he ʻaho ní ʻoku fonu ia ʻi he ngaahi fakalelu ʻa ia ʻe lavangofua ke ne kaihaʻasi ʻa hotau taimi mahuʻingá. Ko e ngāueʻaki ʻo e komipiutá ʻe lava ke hoko ia ko ha tauhele kapau ʻoku fakamoleki ʻe ha taha ha taimi tōtuʻa ʻi he sio holo he ʻInitanetí, lau mo e ʻave ʻĪ-meilí, pe vaʻinga ʻi he ngaahi keimi fakakomipiutá. ʻE lava ke mole ʻa e ngaahi houa taʻefaʻalaua ki he televīsoné, ngaahi faivá, ngaahi vaʻinga manakoá, lau e tohi fakamāmaní mo e ngaahi sipotí, ʻo toe pē ai ʻa e taimi pe ivi siʻisiʻi kia kitautolu ki he ngaahi ngāue fakalaumālié. Lolotonga ʻoku lava ke ʻomai ʻe he fakafiefiá mo e mālōloó ʻa e fakaivifoʻou fakataimi, ko e ako Tohitapu fakafoʻituituí mo fakafāmilí ʻoku ʻomai ai ʻa e ngaahi ʻaonga taʻengata. (1 Tim. 4:7, 8) ʻOkú ke fakatau mai ha taimi ke fakalaulauloto ai ki he Folofola ʻa e ʻOtuá ʻi he ʻaho taki taha?—Ef. 5:15-17.
4 He houngaʻia ē ko kitautolu ʻi he fokotuʻutuʻu ʻe he kautaha ʻa Sihová ha polokalama ʻo e fakahinohino fakalaumālie ke tokoniʻi kitautolu ke “lava ke hao mei he ngāhi meʻa ko ia fulipe ʻoku ene ke hoko; pea ke tuʻu ʻi he ʻao ʻo e Fanautama ʻa Tangata.” (Luke 21:36) ʻOfa ke tau ngāue ʻaonga kakato ʻaki ʻa e ngaahi tokonakí ni pea ‘toka teuteu ai kitautolu’ koeʻuhi ke hoko nai ai ʻetau tuí ʻo “iku ki he fakamaloia moe ogoogo lelei moe nāunāu i he fakaha mai o Jisu Kalaisi.”—1 Pita 1:7, PM.