Toe ʻAʻahi ke Langaʻi Hake ʻa e Houngaʻiá
1 ʻOku langaʻi mo fakalahi ai pē ʻa e tupu ʻa e toko taha ʻapí ke ne hoko ko ha toko taha tuí ʻe he ngaahi toe ʻaʻahi ʻoku ʻi ai hono taumuʻá. Ko e hā ʻa e ngaahi fokotuʻu ʻaonga ʻe niʻihi ʻe malava ke tau manatuʻi ʻi heʻetau toe ʻaʻahi kiate kinautolu naʻe fie fanongó?
2 Ko e ʻuluaki meʻá, teuteu lelei. ʻOku kamata ʻeni ʻi he ʻuluaki ʻaʻahí. ʻO anga-fēfē? ʻAki hano hiki ʻa e fakamatala mahino ʻo kinautolu naʻe fie fanongó. Hiki ʻa e hingoa ʻo e toko taha ʻapí, mo e kaveinga naʻe fai ki ai ʻa e fetalanoaʻakí, ko e anga ʻo ʻene talí, mo ha tohi pē naʻe tuku. Pea toe vakai ki hoʻo fakamatala kuo hikí ki muʻa ʻi hoʻo toe ʻaʻahí, pea fakakaukau ʻaki ʻa e faʻa lotu pe ko e hā te ke leaʻakí.
3 Ko eni kuó ke mateuteu. Ko e hā ʻa e meʻa te ke leaʻakí? Kapau naʻá ke langaʻi ha fehuʻi ki he toko taha ʻapí ʻi hoʻo ʻuluaki ʻaʻahí, te ke malava ke hoko atu ʻa e fetalanoaʻakí ʻo fakatuʻunga ʻi he kaveinga ko iá ʻi hoʻo toe ʻaʻahí. Ko e fakatātā, kapau naʻe fakatefito ʻa e ʻuluaki ʻaʻahí ki he ngaahi tāpuaki ʻoku ʻomai ʻe he Puleʻanga ʻo e ʻOtuá, te ke langaʻi nai ha fehuʻi “Ko e hā ʻoku fakangofua ai ʻe he ʻOtuá ʻa e fulikivanú?”
ʻI hoʻo toe ʻaʻahí, ʻosi hoʻo fakafeʻiloaki koé, te ke lea pehē ni nai:
◼ “ʻI heʻeta talanoa kuo ʻosí, naʻá ta talanoa ai pe ko e hā ʻoku fakangofua ai ʻe he ʻOtua ʻofá ke fuʻu hulu ʻa e fulikivanú ʻi he ʻahó ni. Naʻá ke toe fakakaukau ki he meʻá ni? [Tuku ke ne tali.] ʻOkú ke fakakaukau ʻoku tokanga moʻoni mai ʻa e ʻOtuá ki he kakaí? [Tuku ke ne tali.] Fakakaukau ange ki he lau ʻa e Tohi Tapú ʻi he Sione 3:16.” ʻI he ʻosi hono lau ʻa e veesí te ke fakahanga nai ʻa e tokangá ki he palakalafi 32-37 ʻi he kiʻi tohi ko e ʻOtua ʻOku Tokanga Mai, ʻa ia ʻokú ne fakahā atu ʻa e meʻa ʻe fai ʻe Sihova maʻá e kakaí.
4 Ko ha toe fehuʻi fakatupu fakakaukau ʻe taha te ke langaʻi nai ʻi hoʻo ʻuluaki ʻaʻahí ko e: “Kapau ko e tūkunga ia ʻa e ʻOtuá ki he tangatá ke moʻui ʻo taʻe ngata, ko e hā ʻoku hoholo ai ʻa e kakaí ʻo motuʻa mo maté?” ʻI hoʻo toe ʻaʻahí, te ke malava ʻo fakahā kiate kinautolu ʻa e tali mei he Tohi Tapú ki he fehuʻi ko iá ʻa ia ʻoku maʻu ʻi he Loma 5:12. ʻI he ʻosi hono lau ʻa e konga Tohi Tapú, lave ki he palakalafi 18 mo e 19 ʻo e kiʻi tohi ʻOtua ʻOku Tokanga Mai, ʻa ia ʻoku fakamatalaʻi ai ʻa e ʻuhinga tefito pe ko e hā ʻoku hoholo ai ʻa e tangatá ʻo motuʻa mo maté.
5 Ko e faleʻi ke fakatokangaʻi. ʻAi ke tokanga ʻo kau ki he ngaahi fehuʻi te ke ʻeke ʻi hoʻo toe ʻaʻahí. Ko e fehuʻi hangē ko ia, “Naʻá ke lau ʻa e tohi naʻá ku tukú?” pe “ʻOkú ke manatuʻi au?” pe “ʻOkú ke manatuʻi ʻa e meʻa naʻá ta talanoa ki ai ʻi heʻeku ʻi heni ki muʻá?” ʻoku nau faʻa ʻai ai ʻa e toko taha ʻapí ki ha tuʻunga ʻoku ʻikai ke sai. ʻOku ʻikai ke faʻa ola lelei ʻa e ngaahi fehuʻi peheé. ʻI he tafaʻaki ʻe tahá, ʻai ke ke anga-fakakaumeʻa, ngaofengofua, mo talanoa fuonounou. Ko e ngaahi ʻulungāanga ʻeni ʻe tokoni ki he pōpoaki ʻoku tau fakahaá.
6 Ko e ngaahi founga ko ení mo e ngaahi founga kehe foki ʻe malava ke ngāueʻaki ke fakatupulekina ʻa e houngaʻia ʻi he ngaahi loto ʻo kinautolu ʻoku fie fanongó. Fēfē ke fokotuʻu ai ha taumuʻa fakafoʻituitui ko hono fai ha toe ʻaʻahi ʻe taha pe lahi ange ʻi he uike taki taha? Ngāueʻaki ʻa e ngaahi fokotuʻu lelei ko eni ʻoku hā ʻi ʻolungá, pea kumi mo talanoa ki ha toko taha malanga taukei te ne tokoniʻi koe. ʻE toe lahi ange ʻa hoʻo fiefiá ʻi hoʻo langa hake ʻo toe lahi ange ʻa e fie fanongo naʻe ʻuluaki maʻú ʻaki hoʻo fai ha ngaahi toe ʻaʻahi ola lelei.