Puha Fehuʻi

◼ Ko e hā ʻa e meʻa ʻoku totonu ke fai ʻi he vili mai ʻa e toko taha ʻapí ke ʻoua ʻe toe fai ange ha ʻaʻahi ki hono ʻapí mei he Kau Fakamoʻoni ʻa Sihová?

Kapau te tau vakai atu ʻoku ʻi ai ha fakaʻilonga ʻi he matapaá ʻoku mātuʻaki tapui ai ha ʻaʻahi fakalotu pe lave fakahangatonu ki he Kau Fakamoʻoni ʻa Sihová, ko e meʻa lelei taha ke faí ke ʻai pē ʻa e fakaʻamu ʻa e toko taha ʻapí pea ʻoua ʻe tukituki ai.

ʻI he taimi ʻe niʻihi ʻoku tau sio ki ha fakaʻilonga ʻokú ne tapui ʻa e kau tangata fai fakatau pe kau kole tokoni. ʻOku ʻikai ke fakakau kitautolu ki he fakaʻilonga ko ení koeʻuhi he ko ʻetau ngāué ko e ngāue ʻofa fakalotu. ʻE taau leva ke tukituki ʻi he matapaá. Kapau ʻe fakafepaki mai ʻa e toko taha ʻapí, te tau malava ʻo fakamatala fakapotopoto ʻa e ʻuhinga ʻoku tau ongoʻi ai ko e fakaʻilonga peheé ʻoku ʻikai ke kau ia kiate kitautolu. Kapau ʻe toki fakamahinoʻi ʻe he toko taha ʻapí ko e tapu ko iá ʻoku kau ki ai ʻa e Kau Fakamoʻoni ʻa Sihová, te tau talangofua leva ki he meʻa ʻokú ne fakaʻamu ki ai.

ʻI he ngaahi ʻapi ʻe niʻihi ʻoku tau ʻaʻahi ki ai, ʻe hā mei he toko taha ʻapí ʻa ʻene ʻita mo ne kouna fakamatemate mai ke ʻoua ʻe toe fai ange ha ʻaʻahi. ʻOku totonu ke fai ki he meʻa ʻokú ne fie maʻú. ʻOku totonu ke fakaʻilongaʻi ʻa e ʻaho ko iá ʻi ha laʻi pepa pea tuku ia ʻi he sila ʻo e mape ʻo e kauhalá koeʻuhi ke ʻoua ʻe ʻaʻahi ki he ʻapi ko iá ʻa e kau malanga ʻe ngāue ʻi he feituʻu ko iá ʻi he kahaʻú.

Kae kehe, ʻoku totonu ke tau manatuʻi ko e ngaahi ʻapi peheé ʻoku ʻikai ke totonu ke liʻaki ʻaupito. ʻE hiki nai ʻa kinautolu ʻoku lolotonga nofo aí ki ha feituʻu ʻe taha. Te tau fetaulaki nai mo ha memipa kehe ia ʻo e fāmilí te ne loto-lelei ke fanongo. ʻOku malava nai ke liliu ʻa e loto ʻo e toko taha ʻapi naʻa tau ʻuluaki lea ki aí peá ne toe loto-lelei ke tau ʻaʻahi atu ki ai. Ko ia ʻi he ʻosi atu ha taimi, ʻoku totonu ke toe fai ha fetuʻutaki fakapotopoto kiate kinautolu ʻoku nofo ʻi he ʻapí ke fakapapauʻi ʻa e anga ʻo ʻenau ongoʻi ʻoku nau lolotonga maʻú.

ʻOku totonu ke toe vakai tuʻo taha ʻi he taʻu ki he faile ʻo e ngaahi feituʻu ʻoku fai ai ʻa e malangá ʻo hiki fakahokohoko ʻa e ngaahi ʻapi ʻa ia naʻe fakahā ke ʻoua ʻe fai ha ʻaʻahi ki aí. ʻI he tataki ʻa e ʻovasia ngāué, ʻe vaheʻi ki he kau malanga taukei mo lea fakapotopotó ke nau ʻaʻahi ki he ngaahi ʻapi ko iá. ʻE malava ke fakamatalaʻi ko ʻetau ʻaʻahí ke vakai pe ʻoku kei nofo ai ʻa kinautolu naʻe nofo ai ki muʻá. ʻOku totonu ke maheni ʻa e toko taha malangá mo e kupu ʻi he tohi Reasoning, peesi 15-24 ʻi he kaveinga ko e “How You Might Respond to Potential Conversation Stoppers.” Kapau ʻe lelei ʻa e anga ʻo e talí, ʻe toe fai nai ha ʻaʻahi ki ai ʻi he kahaʻú ʻi he founga mahení. Kapau ʻoku kei hokohoko atu ʻa e toko taha ʻapí ʻene fakafilí, ʻoku totonu ke ʻoua ʻe toe fai ha ʻaʻahi ki ai ʻo aʻu ki he taʻu hono hokó. ʻE fakakaukauʻi ʻe he kau mātuʻa fakalotofonuá kapau ko e ngaahi tuʻunga ʻo fekauʻaki mo ha ʻapi peheé ʻe fie maʻu ke fai ha faʻahinga founga kehe ki ai.