U nga tiyisega kharini gu khuwe Jehovha a ngu gu tsakeya?

1. Giwudziso muni sithumi nyo khaguri sa Jehovha si nga dzi girago?

SI NGU hi thaveleya gu dziti gu khethu Jehovha a ngu tsakeya vathu vaye kha nga tsawa. Bhibhiliya yari khiyo: “[Jehovha] a ngu tsakiswa khu vathu vaye.” (Ndzi. 149:4) Ambari ulolo, dzimbe dzitepo vambe vathu va nga vbeya tshivba va bwe va dzi wudzisa gu khavo: ‘Ina Jehovha a ngu nyi tsakeya?’ Vathu nya vangi va khumbugwago omu nya Bhibhiliya va nga thumeya Jehovha khu gu tumbega, dzimbe dzitepo va vbede tshivba khu kotani nya olu va nga ba va kanakana gu khavo ina va ngu tsakedwa khu Jehovha gani. — 1 Sam. 1:6-10; Joba 29:2, 4; Ndzi. 51:11.

2. Khu mani Jehovha a mu tsakeyago?

² Bhibhiliya ya gu si vega guagani gu khiyo vathu nya mba vbeleya va nga tsakedwa khu Jehovha. Khu ndziya muni? Ethu hi yede gukhodwa ga Jesu Kristo hi bwe hi bhabhatiswa. (Joh. 3:16) Khu kharato, ha gu yeyedza vambe gu khethu hi dzi layide ga sighoho sathu, nigu hi tumbiside Nungungulu gu gira gugola gwaye. (Mith. 2:38; 3:19) Jehovha a ngu tsaka ngudzu tepo hi girago silo sesi gasi gu hidzimeya gwaye. Ha gu gira satshavbo gasi gu simama ni gitumbiso gyathu nya lisima nya gu mu thumeye, Jehovha a na hi tsakeya a bwe a hi wona nga dzipari dzaye. — Ndzi. 25:14.

3. Siwudziso muni hi na bhulago khiso?

³ Ganiolu, khu ginani vathu nyo khaguri va dzipwago nga khatshi kha va tsakedwi khu Nungungulu? Jehovha o yeyedza kharini gu khuye a ngu hi tsakeya? Nigu Mukristo a nga tiyisega kharini gu khuye a ngu tsakedwa khu Jehovha?

KHU GINANI VAMBE VA DZIPWAGO NGA KHATSHI KHA VA TSAKEDWI KHU JEHOVHA?

4-5. Ambari ha gu dzipwa na hi si phasi gilo, hi nga tiyisega khu ginani?

⁴ Gukhugeya wananani waso, sanana nya singi si ngu dzipwa na siri mwalo lisima. (Ndzi. 88:15) Ndriyathu nyo pwani khu Adrián wari, khuye: “Dzitepo nya dzingi, nyi di gu dzipwa na nyiri mwalo lisima. Na nyi ngari gyanana, nyi ngu dundruga tepo nyi nga gombeleya ndranga yangu gasi yi si kodza gu vboha paradhesini. Ambari olu nyi nga ba nyi tiyisega khu isoso, kha nya nga ba nyi dzipwa na nyi gu ninganedwa khu gu manega iyoyo.” Tony, a nga mba dandriswa khu Dzifakazi dza Jehovha wari, khuye: “Vavelegi vangu gima va si nyi embeyi gu khavo va ngu nyi haladza mwendro gu nyi zundza. Isoso si nyi giride nyi dzipwa nga khatshi ni gevbini nyi nga ba nyi gira kha gya nga ba gi va tsakisa.”

⁵ Dzimbe dzitepo, ha gu dzipwa na hi si phasi gilo, hi nga dundruga gu khethu Jehovha a hi ranide avbo gwaye khu gu wona gilogyo avbo gwathu. (Joh. 6:44) Uye a ngu wona silo nya sadi hi gu mba si kodza gu si wona ethu vamune, nigu a ngu siti esi si gu romo monyoni gwathu. (1 Sam. 16:7; 2 Dzik. 6:30) Khu kharato, hi nga mu tumba tepo a ganeyago gu khuye hi na ni lisima.— 1 Joh. 3:19, 20.

6. Mupostoli Pawulo a dzipwide kharini khu sighoho a giridego gale?

⁶ Na va si hevbule lisine, vambe vbakari gwathu va giride silo si va girago va dzipwa nandru kala muhuno. (1 Ped. 4:3) Vambe va thumeyago Jehovha khu gu tumbega va ngo dwana ni gu wegeleya gwawe. Ahati uwe ke? Ina dzimbe dzitepo u ngu dzipwa nga khatshi Jehovha kha si kodzi gu gu divaleya? Abari kharato, tiyisega gu khuwe sithumi nyo tumbege sa Jehovha si dzipwide khu ndziya nyo fane. Khu giyeyedzo, mupostoli Pawulo dzipwide na si phasi gilo tepo a nga dundrugeya khu gu mba vbeleya gwaye. (Rom. 7:24) Khu lisine, Pawulo a di gu dzi layide khu sihoso a giridego nigu a di gu bhabhatisidwe. Ambari ulolo, a di dzi embeya gu khuye uye i “dugwana ngudzu ga vapostoli” ni gu khuye “gighohi gyakone nya gikhongolo.” — 1 Kor. 15:9; 1 Thim. 1:15.

7. Ginani hi yedego gu simama gu gi dundruga maningano khu sihoso hi giridego gale?

⁷ Papayi wathu wa ndzadzini a gu tumbisa gu hi divaleya ha gu dzi laya. (Ndzi. 86:5) Ha gu lomba divalelo nya sihoso hi giridego, hi nga tumba gu khethu esi Jehovha a ganeyago lisine nigu a na hi divaleya. — Kol. 2:13.

8-9. Hi nga pala kharini gudzipwa hi gu nago nya gu khethu gima kha hi na nga si kodza gu gira nya singi gasi gu tsakisa Jehovha?

⁸ Hatshavbo hi ngu dzina gu gira satshavbo hi si kodzago gasi gu thumeya Jehovha. Ganiolu, vambe va nga dzipwa nga khatshi gima kha va giri satshavbo va si kodzago gasi gu tsakedwa khu Jehovha. Ndriyathu nyo pwani khu Amanda wari, khuye: “Eni nyo pimisa gu kheni gu gireya Jehovha satshavbo nyi si kodzago sa gu thula gu khiso tepo yatshavbo nyi yede gu gira nya singi. Khu kharato, dzitepo nya dzingi nyo zama gu gira nya singi guvbindra esi si gomogo tshivbani gwangu. Tepo nyi ‘hosisago,’ eni nya gu pimisa gu kheni Jehovha a nyi zangarede guvbindra edzi nyi dzipwago khidzo.”

⁹ Hi nga pala kharini gudzipwa hi gu nago nya gu khethu gima kha hi na nga gira nya singi gasi gu tsakisa Jehovha? Dundruga gu khuwe Jehovha kha garadzi. Uye gima kha vireyi gu khuye hi gira silo si gu mwalo tshivbani gwathu. Uye a ngu tsaka khu satshavbo hi mu gireyago, ganiolu si gu romo tshivbani gwathu. Nigu gambe, dundrugeya khu vathu va khumbugwago omu nya Bhibhiliya va nga thumeya Jehovha khu monyo wawe watshavbo. Khu giyeyedzo, dundrugeya khu Pawulo. Uye a thumide khu sighingi khu myaga nya yingi, a endra mipfhuka nyo laphe a bwe a tula mabandla nya mangi. Ambari ulolo, tepo silo si nga vbindrugedza womini gwaye a bwe a si si kodzi gu tshumayela nga gale, ina Jehovha kha nga ba a mu tsakeya gambe? Ahihi. Uye a simamide gu gira esi a nga si kodza, nigu Jehovha a mu kategiside. (Mith. 28:30, 31) Khu ndziya nyo fane, esi hi gireyago Jehovha dzimbe dzitepo si nga vbindrugedza. Ganiolu, nya lisima gwaye gighelo gi hi kutsago gasi gu mu thumeya. Hongoleni hi wona dzindziya nyo khaguri edzi Jehovha a yeyedzago khidzo gu khuye a ngu hi tsakeya.

JEHOVHA A GU YEYEDZA KHARINI GU KHUYE A NGU HI TSAKEYA?

10. Hi ngapwa kharini Jehovha na gu hi embeya gu khuye a ngu hi tsakeya? (Johane 16:27)

¹⁰ Khu gu thumisa Bhibhiliya. Jehovha a gu vbwetedza dzindziya gasi gu yeyedza vathu vaye gu khuye a ngu va haladza nigu a ngu va tsakeya. Milowo ya gu yeyedza siemo sivili Jehovha a nga embeya Jesu gu khuye uye Gyanana Gyaye a gi haladzago nigu gi mu tsakisago ngudzu. (Mat. 3:17; 17:5) Ina u ngu dzina gupwa Jehovha na gu embeya gu khuye a ngu gu tsakeya? Jehovha kha hi embeyi isoso khu dzandzini, ganiolu a gu hi embeya khu gu thumisa Lito laye. Tepo hi lerigo malito nyo mbure aya Jesu a embedego vapizane vaye, so gira gu khatshi ha “gupwa” Jehovha na gu hi embeya malito yoyo. (Leri Johane 16:27.) Jesu a di gu pimedzeya makhalelo ya Papayi waye. Khu kharato, tepo hi lerigo gu khethu Jesu yeyedzide gu khuye a di gu tsakeya valandreyi vaye nya mba vbeleya, ganiolu nyo tumbege, ethu hi nga dundrugeya Jehovha na gu hi embeya malito yoyo. — Joh. 15:9, 15.

11. Tepo hi tshanganago ni sigaradzo, ina sa gu thula gu khiso kha hi tsakedwi gambe khu Jehovha? (Jakobe 1:12)

¹¹ Khu gu hi ninga esi hi si vbwetago. Jehovha a ngu dzina ngudzu gu hi phasa, khu giyeyedzo khu gu hi ninga esi hi si vbwetago khu nyamani. Ganiolu, dzimbe dzitepo Jehovha a ngu dzumeleya silo nya mba sadi si hi dugeleya, gu fana ni esi si dugeledego Joba. (Joba 1:8-11) Tepo hi tshanganago ni sigaradzo, kha si thuli gu khiso kha hi tsakedwi gambe khu Nungungulu. Gu diga isoso, sa gu hi ninga mathomo nya gu yeyedze edzi hi haladzago khidzo Jehovha ni edzi hi mu tumbago khidzo. (Leri Jakobe 1:12.) Nigu tepo hi tshanganago ni sigaradzo, hi na wona edzi Jehovha a hi haladzago khidzo ni gu hi phasa gu timiseya.

12. Ginani hi nga gi hevbulago khu giyeyedzo gya Dmitrii?

¹² Wona giyeyedzo gya ndriyathu nya mwama nyo pwani khu Dmitrii. Uye a di bangedwa khu pawu nigu kha nga ba a si kodza gu mana thumo khu migima nya yingi. Uye a di hunga gu yeyedza gu khuye a di gu tumba Jehovha khu gu gira nya singi thumoni nyo tshumayele. Yi di vbindra migima nya yingi na si mani thumo. Khu gulandreya, a di dwala ngudzu nyo bwe a si si kodzi gu khuga khu vbakamani. Khu kotani nya isoso, a di pheya gu pimisa gu khuye kha nga ba ari mwama mwendro papayi nya wadi a bwe a pimisa gu khuye Jehovha kha ngo mu tsakeya. Khavbovbo, ga wutshigu nyo khaguri, gyanana gyaye nya gyagadzyana gi di dzega lidangaliya li nga ba liri ni malito ma gomogo umo ga Isaya 30:15 ma gu khayo: “Tshivba yanu yi di hadza gu mana gutangala ni gitumbo.” Igyo gi di dzega lidangaliya lolo gya vega mihungoni nya kama, gi bwe gi ganeya gu khigyo: “Papayi wa gu tshuka u si dzipwi gwadi, dundruga lowo wowu.” Dmitrii a di tugula gu khuye khu gu phaswa khu Jehovha, ndranga yaye yi diri ni gilo nyo hodze, sombo nyo ambale ni wulanga nyo khale. Uye wari, khuye: “Egi nyi nga ba nyi yede gu gira, gu rula nyi bwe nyi simama gu tumba Nungungulu wangu.” Wa gu ba u emisana ni giemo nyo fane, tiyisega gu khuwe Jehovha a na gu khathaleya a bwe a gu phasa gu timiseya.

13. Khu vamani Jehovha ava thumisago gasi gu hi embeya gu khuye a ngu hi tsakeya nigu khu ndziya muni?

¹³ Khu gu thumisa vandriyathu. Jehovha a gu thumisa vandriyathu gasi gu hi embeya gu khuye a ngu hi tsakeya. Khu giyeyedzo, uye a gu kutsa vambe gasi va hi tiyisa tepo si vbwetegago. Ndriyathu wa Ásia a wonide isoso tepo a nga ba a garadzega. Uye a di vbeledwa khu thumo a bwe a dwala ngudzu. Khavbovbo, mwama waye a di gira gighoho nya gikhongo a bwe a dusedwa malungelo nya gu thume kha nga lidhota. Uye wari, khuye: “Kha nya nga ba nyi si pwisisa gu kheni khu ginani isoso si nga ba si nyi dugeleya. Nyi di gu pimisa gu kheni nyi di gu giride gilogyo nyo vivbe nigu Jehovha kha nga ba a tsakiswa gambe kheni.” Ndriyathu yoyu a di lomba Jehovha gasi gu mu tiyisegisa gu khuye a ngu mu tsakeya. A si giride khu ndziya muni isoso? Uye a gu tshamuseya gu khuye: “Madhota ya libandlani ma di ganeya ni eni ma bwe ma nyi tiyisegisa gu khayo Jehovha a ngu nyi haladza.” Khu gu landreya, a di lomba gambe giphaso ga Jehovha. Uye a gu engedza gu khuye: “Ga listhigu la limwedo nyi di hakha lidangaliya nyi nga lovedwa khu vandriyathu nyo khaguri va libandlani gwangu. Tepo nyi nga leri malito yawe nyo tiyise, nyi di wona gu kheni Jehovha a di gu nyi engisede.” Khu lisine, Jehovha a ngu hi embeya gu khuye a ngu hi tsakeya khu gu thumisa malito nyo tiyise ya vambe.— Ndzi. 10:17.

14. Khu yevbini yimbe ndziya Jehovha a yi thumisago gasi gu yeyedza gu khuye a ngu hi tsakeya?

¹⁴ Jehovha gambe a ngu yeyedza gu khuye a ngu hi tsakeya khu gu thumisa vandriyathu gasi gu hi ninga wusingalagadzi tepo hi wu vbwetago. Khu giyeyedzo, ga lizana myaga nyo pheye, Jehovha a di thumisa mupostoli Pawulo gasi gu lova 14 malangaliya ma nga hadzi phasa vambe vandriyathu. Omu nya malangaliya yoyo, Pawulo a di ninga wusingalagadzi nyo kongome vandriyaye khu ndziya nya yadi. Khu ginani Jehovha a nga leleteya Pawulo gu lova wusingalagadzi wowo? Jehovha, Papayi nya wadi, nigu a gu kawuka sanana saye a si “golago.” (Mav. 3:11, 12) Khu kharato, ha gu ningwa wusingalagadzi wu seketedwago omu nya Bhibhiliya, kha si thuli gu khiso kha hi tsakedwi khu Jehovha. Wulangani nya isoso, so yeyedza gu khiso Jehovha a na simama gu hi haladza. (Hebh. 12:6) Khu sevbini simbe silo si yeyedzago gu khiso hi ngu tsakedwa khu Jehovha?

SIMBE SILO JEHOVHA A SI THUMISAGO GASI GU YEYEDZA GU KHUYE A NGU HI HALADZA

15. Khu vamani ava Jehovha a va ningago liphuvbo laye nya guage, nigu ha gu tiyisega kharini khu isoso?

¹⁵ Jehovha a gu ninga liphuvbo nya guage vale a va tsakeyago. (Mat. 12:18) Dundrugeya khu siwudziso sesi: ‘Ina nyi di nga si kodza gu yeyedza mihandro nya liphuvbo womini gwangu? Ina u tugude gu khuwe u ngu laphiseya monyo vambe guvbindra gale na wu si hevbuli khu Jehovha?’ Tepo u yago u haguleya mihandro nya liphuvbo la Nungungulu, u na tiyisega gu khuwe Jehovha a ngu gu tsakeya. — Wona kwadru yi gu khiyo: “Mihandro nya liphuvbo . . . ”

16. Jehovha a gu thumisa vamani gasi gu tshumayela mahungu nya yadi, nigu wa gu dzipwa kharini khu isoso? (1 Vatesalonika 2:4)

¹⁶ Jehovha a ngu tsaka khu gu ninga thumo nya gu huweleye mahungu nya yadi vale a va tsakeyago. (Leri 1 Vatesalonika 2:4.) Wona edzi ndriyathu nya nyamayi nyo pwani khu Jocelyn a wuyedwego khidzo khu gu bhuleya vambe mahungu nya yadi. Litshigu limwedo, Jocelyn a di wuga na si dzipwi gwadi. Uye wari, khuye: “Nyi dzipwide nya nyiri mwalo tshivba nigu na nyi si phasi gilo. Ganiolu, eni nyi diri piyoneru, nigu li diri litshigu nyi nga ba nyi li vegiside gasi gu hongola thumoni nyo tshumaleye. Khu kharato, nyi di gombeya nyi bwe nyi hongola thumoni nyo tshumayele.” Ni dzimindrudzile Jocelyn a di tivana ni Mary, nyamayi nya wadi a nga dzumeya gihevbulo nya Bhibhiliya. Hwane nya migima nyo khaguri, Mary a di ganeya gu khuye a di gu gombeya ga Jehovha a lomba giphaso tepo khiyo Jocelyn a nga khokhota lidimba laye. Na gu dundrugeya khu matshango yaya, Jocelyn wari, khuye: “Nyi di dzipwa nga khatshi Jehovha a gu nyi embeya gu khuye ‘Eni nyi ngu gu tsakeya.’” Khu lisine, khandri vatshavbo va na dzumeyago mahungu yathu. Ganiolu, hi nga tiyisega gu khethu Jehovha a ngu tsaka tepo hi dzi garadzago gasi gu bhuleya vambe mahungu nya yadi.

17. Ginani u gi hevbulago khesi Vicky a ganedego maningano ni dzegiso? (Ndzimo 5:12)

¹⁷ Dzegiso wa gu thuma ga vale va tsakedwago khu Jehovha. (1 Thim. 2:5, 6) Ganiolu, ahati ha gu simama gu dzipwa nga khatshi kha hi tsakedwi khu Jehovha, ambari na hi gu khodwa avba nya dzegiso nigu na hi bhabhatisidwe? Dundruga gu khuye khandri tepo yatshavbo hi yedego gu tumba gudzipwa gwathu, ganiolu hi yede gu tumba Jehovha. Uye a gu wona vale va khodwago avba nya dzegiso nga vathu nyo lulame mahoni gwaye nigu a ngu tumbisa gu va kategisa. (Leri Ndzimo 5:12; Rom. 3:26) Gu dundrugeya khu dzegiso si phaside Vicky. Uye wari, khuye: “Gukhugeya gale, Jehovha a di gu zama gu nyi yeyedza lihaladzo laye. Ganiolu, si di gu gira nga khatshi nyo embeya Jehovha gu kheni: ‘Kha wu na nga si kodza gu haladza muthu nya nga eni. Dzegiso wa Gyanana gyago kha wu si kodzi gu divaleya sighoho sangu satshavbo.’” Tepo a nga dundrugeya khu giningwa gegi nya dzegiso, a di pheya gu wona gu khuye Jehovha a ngu mu haladza. Anethu hi nga wona gu khethu Jehovha a ngu hi haladza ni gu hi tsakeya ha gu dundrugeya khu dzegiso.

18. Hi nga tiyisega khu ginani ha gu simama gu haladza Papayi wathu wa ndzadzini?

¹⁸ Ambari olu hi zamago gu thumisa esi hi si hevbudego avba nya ndrima yeyi, dzimbe dzitepo hi nga vbeya tshivba hi bwe hi dzi wudzisa gu khethu ina Jehovha a ngu hi tsakeya gani. Isoso sa gu girega, dundruga gu khuwe uye a gu tsakeya “vale va simamago gu mu haladza.” (Jak. 1:12) Khu kharato, simama gu hidzimeya ga Jehovha u bwe u vbwetedzeya dzindziya a dzi thumisago gasi gu yeyedza gu khuye a ngu gu tsakeya. Dundruga gu khuwe Jehovha “mwalo hwindzo ga moyo ni moyo wathu.” — Mith. 17:27.