A Tame A Tiyisela Hambiloko A Godolisiwa

1. I mpsini swi nga yendla leswaku ka doropa la Xilo a vanhu va vaviseka va tlhela va rila?

SAMUWELE a swi vonile leswaku a vanhu a doropeni a va vavisekile. Phela a vanhu ka doropa la Xilo a va li ku rileni hintamu. I vavasati ni vana vangaki lava a va li ku rileni hi mhaka ya leswi vapapayi va vona, vanuna va vona, vana ni vamakwavu va vona a va nga ha ta tlhela kaya? Hinkwaswu leswo swi yendlekile hi mhaka ya leswi Vafilista va nga dlaya 30.000 wa masonchwa anyimpini naswona na ku nga se yendleka leswo a va dlaye 4.000 wa masonchwa ya Vayisrayele ka nyimpi yin’wani. — 1 Sa. 4:1, 2, 10.

2, 3. Hi wani makhombo lawa ma nga yendla leswaku doropa la Xilo li daniseka li tlhela li nga ha hloniphiwi?

² Phela leli ku ve lin’we la makhombo ka lawa a ma ta yendleka. Vana vambirhi va ku biha va Muprista Wamukulu Eli ku nga Hofini na Feniyasi, a va teke areka ya ku kwetsima ya ntwananu va suka na yona aXilo. Phela a areka leyi a yi tshama ka ndhawu ya ku kwetsima hintamu ndzeni ka tabernakela ku nga tempele leyi a yi yendliwe ku fana ni tende funtshi a yi kombisa swaku Xikwembu xi kona ka ndhawu liyani. Kambe Vayisrayele a va teke Areka va famba na yona nyimpini na va pimisa leswaku a yi ta va vhikela swaku va nga hluliwi. Kambe Vafilista va va tekele Areka va tlhela va dlaya Hofini na Feniyasi. — 1 Sa. 4:3-11.

³ Ku ringana malembe ya manyingi swinene a tabernakela aXilo a yi hloniphiwa hintamu hi mhaka ya leswi a yi ni Areka. Kambe swoswi a areka a yi nga ha li kona doropeni. Nkama Eli lweyi a a ni 98 wa malembe a nga twa leswo, a wile hi ka xitshamu xa yena a fa. Mamanyani wa yena lweyi na yena a a feliwe hi nuna, hi siku loliyani a file na a psala n’wana. Kambe na a nga se fa a te: “Xikwembu a xi nga ha ta va pfuna Vayisrayele.” Phela swilo se a swi txintxile ka doropa la Xilo. — 1 Sa. 4:12-22.

4. I mpsini leswi hi nga ta swi djondza ka ndzima leyi?

⁴ Samuwele a a ta yendla yini leswi a a kumana ni swikarhatu leswi a swi ta tshuka swi mu godolisa? Ku nga va leswaku lipfumelo la yena a li ta tama li tiya, hambileswi a a fanele a pfuna vanhu lava a va nga ha vhikeliwi hi Yehovha naswona a a nga ha va yamukeli? Namuntlha hinkwerhu hi nga ha kumana ni swikarhatu leswi nga hi godolisaka swi tlhela swi ringa lipfumelo la hina, kambe a hi voneni swin’wani leswi hi nga swi djondzaka ka xikombiso xa Samuwele.

A “Nyime Ni Swilo Swa Ku Lulama”

5, 6. I mpsini leswi Bibele li vulavulaka hi swona hi nkama wa 20 wa malembe, naswona Samuwele a a yendla yini swaku a tshama na a khomekile?

⁵ Ka rungula leli landzelaka, Bibele a la ha vulavuli hi Samuwele kambe li vulavula hintamu hi Areka ya ku kwetsima. Bibele li kombisa leswaku Vafilista va hluphekile hintamu hileswi a va teke Areka, hi mhaka leyo va sindziseke ku yi tlhelisa ka Vayisrayele. Loko se li ya vulavula hi Samuwele, se a ku hundze kolomo ka 20 wa malembe. (1 Sa. 7:2) I mpsini leswi Samuwele a nga swi yendla ka malembe hinkwawu lawa? A hi voneni leswi Bibele li swi vulaka hi mhaka leyi.

⁶ A Bibele li vula leswaku na ku nga se sungula nkama lowu wa 20 wa malembe, a “rito la Samuwele li fika ka Vayisrayele hinkwavu.” (1 Sa. 4:1) A Bibele li kombisa leswaku loko malembe lawa se ma hundzile, kan’we hi lembe Samuwele a a yendzela madoropa manharhu ya Israyele leswaku a lulamisa swikarhatu swa vanhu a tlhela a lulamisa ni ku holovisana loku a ku li kona, se a gama a tlhelela ka doropa la yena aRama. (1 Sa. 7:15-17) Swa tikomba swaku Samuwele a a tshama na a khomekile, naswona ndzeni ka malembe lawa ya 20 a ve ni swilo swa swinyingi swa ku swi yendla.

7, 8. a) I mpsini leswi Samuwele a nga swi byela vanhu loko se ku hundze 20 wa malembe? b) Vanhu va yendle yini nkama va nga twa leswi Samuwele a nga va byela swona?

⁷ A mahanyelo ya ku biha ni wukanganyisi la vana va Eli, a swi yendle swaku lipfumelo la Vayisrayele li hola. Swi tikomba ingi vanyingi se a va tlhelelile ka ku gandzela swikwembu swa mavunhwa. Kambe loko se ku hundze 20 wa malembe, Samuwele a byele Vayisrayele a ku: “Loko ku li swaku mi tlhelela ka Yehovha hi timbilu ta n’wina hinkwatu, susani swikwembu swa matiko ni swifaniso swa Axitoreti xikarhi ka n’wina, mi tshembeka ka Yehovha hi ku helela, mi tirhela yena ntsena se a ta mi ponisa ka voko la Vafilista.” — 1 Sa. 7:3.

⁸ “A voko la Vafilista” a li va tikisela hintamu Vayisrayele. Phela leswi Vayisrayele a va hluliwile nyimpini, Vafilista a va pimisa leswaku a va ta hlupha vanhu va Xikwembu na va nga chavi nchumu. Kambe Samuwele a tiyisekise Vayisrayele swaku loko va txintxa va tlhelela ka Yehovha, a swilo a swi ta txintxa. Ku nga va leswaku Vayisrayele a va tinyimisele ku txintxa? Phela Samuwele a tsake hintamu hi ku vona swaku Vayisrayele va suse swifaniso hinkwaswu “va tirhela Yehovha ntsena.” Samuwele a hlengelete Vayisrayele aMizpa ku nga doropa leli kumekaka ka tintshava a norte ka Yerusalema. Vayisrayele va hlengeletanile, va titsona swakudla va tlhela va kombisa leswaku a va tisola hi mhaka ya leswi va nga djohela Yehovha hi ku gandzela swikwembu swa mavunhwa. — Lerha 1 Samuwele 7:4-6.

9. Vafilista va yendle yini nkama va nga twa leswaku Vayisrayele va le Mizpa, naswona Vayisrayele va yendle yini nkama va nga tiva swaku va le nghozini?

⁹ Loko Vafilista va twe leswaku Vayisrayele va tlhanganile aMizpa, va swi vone na ku li nkama wa kahle wa leswaku va ya helisa vatirheli lava va Yehovha. Va game va rhumela masonchwa ya vona leswaku ma ya Mizpa. Vayisrayele va swi tivile leswaku a va li nghozini naswona va sungule ku chava swinene se va kombela Samuwele leswaku a va khongelela ka Yehovha. Samuwele a swi yendlile leswo a tlhela a nyikela ni gandzelo. Nkama Vafilista va nga hlasela doropa la Mizpa, Yehovha a hlamule xikhongelo xa Samuwele hi ku “yendla swaku ku va ni ku duma kakukulu ka tilo ka tlhelo la Vafilista.” — 1 Sa. 7:7-10.

10, 11. a) Hi mhaka muni ku dzindza loku Yehovha a nga ku rhumela ka Vafilista a ku nga tolovelekanga? b) I mpsini leswi nga yendleka hi mhaka ya nyimpi leyi nga va kona aMizpa?

¹⁰ Indjhe Vafilista lava, a va fana ni swivanani leswi loko swi twa ku dzindza ka tilo swi tsutsumaka swi ya ka vamamani va swona? Nada. Phela vona a va li masonchwa ya matimba naswona a va tolovelile ku lwa tinyimpi, kambe a guwa la ku dzindza ka tilo leli va nga li twa a va nga li tolovelanga naswona a va nge se tshama va li twa. Ku nga va leswaku a guwa leli li ve “likulu hintamu” lakaku va ze va chava? Ku nga va leswaku a tilo a li yo baa nkama lowu na ku dzindza? Kumbe a ku dzindza loku a ku twala hintamu ka tintshava leswi nga yendla swaku Vafilista va nga xi tivi ni xa ku xi yendla? Ku nga na mhaka swaku swi yendlekise ku yini, a guwa leli li yendle swaku Vafilista va chava hintamu va tlhela va sungula ku kayakaya. Phela handle ka ku vona va hlongolisa Vayisrayele, Vafilista hi vona va nga hlongolisiwa hi Vayisrayele. Vavanuna va Israyele va suke aMizpa va dlaya Vafilista va va hlongolisa ku ringana mpfhuka wa ku leha swinene anze ka ndhawu ya sul ka Yerusalema. — 1 Sa. 7:11.

¹¹ Phela nyimpi liyani yi yendle leswaku swilo swi txintxa ka vanhu va Xikwembu. A Vafilista a va ha tlhelanga va zama ku hlasela Vayisrayele nkama hinkwawu lowu Samuwele a a li muyavanyisi naswona madoropa lawa a va ma tekile ma tlhele ma fumiwa hi Vayisrayele. — 1 Sa. 7:13, 14.

12. Samuwele a “nyime ni swilo swa ku lulama” hi ndlela yini, naswona hi lini wumunhu leli nga mu pfuna leswaku swilo swi tama swi mu fambela kahle?

¹² Loko se ku hundze malembe ya manyingi, mupostolo Pawulo a patse na Samuwele nkama a nga vulavula hi vayavanyisi ni vaprofeta va ku tshembeka lava a “va nyime ni swilo swa ku lulama.” (Heb. 11:32, 33) Phela Samuwele a pfune Vayisrayele swaku va yendla swaswinene ka Yehovha. Swilo swi tame swi mu fambela kahle, hikusa a a nyimela Yehovha hi ku lehisa mbilu nkama lowu a a yendla swilo hi ku tshembeka hambileswi a a godolisiwa. Samuwele a a li munhu wa ku rhandza ku khensa. Loko Vayisrayele va hlulile aMizpa, Samuwele a teke ribye a li veka xikarhi ka Mizpa kuva a khumbukisa Vayisrayele leswaku i Yehovha lweyi a a va pfunile. — 1 Sa. 7:12.

13. a) Leswaku hi tekelela Samuwele, hi lini wumunhu leli hi faneleke hi va na lona? b) U vona leswaku hi wini nkama wawunene wa ku va ni wumunhu leli Samuwele a nga va na lona?

¹³ Indjhe na wena wa swi lava ‘ku nyimela swilo swa ku lulama’? Loko u swi lava, i swinene kuva u djondza hi ku lehisa mbilu ka Samuwele, ku tiveka hansi ka yena u tlhela u rhandza ku khensa. (Lerha 1 Pedru 5:6.) Phela wumunhu lolelo i la lisima hintamu ka hina hinkwerhu. Swi ve kahle swinene kuva Samuwele a ve ni wumunhu lolelo a tlhela a li kombisa nkama na wa ha li jovhem hikusa swi mu pfunile ka malembe lawa ma nga landzela na se a gugile, nkama a nga kumana ni swiyimu swin’wani leswi nga mu godolisa.

“Vana Va Wena A Va Xi Tekeleli Xikombiso Xa Wena.”

14, 15. a) Nkama Samuwele se na a gugile, i mpsini leswi nga yendleka leswi nga mu godolisa? b) Ku nga va leswaku Samuwele a a li papayi lweyi a a fanele a layiwa ku fana na Eli? Tlhamusela.

¹⁴ Loko Bibele li tlhela li vulavula hi Samuwele, se a a gugile naswona hi nkama wolowo Samuwele se a a ni vana vambirhi ku nga Yuwele na Abiya. A va nyike ntirho wa leswaku va mu pfunisa ka ntirho wa yena wa ku va muyavanyisi kambe a ntirho lowu a wu nga va faneli. Hambileswi Samuwele a a li wanuna wa ku tshembeka, a tlhela a yendla swilo swaswinene, a vana va yena a va tirhisa xitshamu xa vona xa ku va vayavanyisi leswaku va yendla swilo leswi a swi ta pfuna vona ntsena. Phela a va nga yendli swilo hi ndlela ya ku lulama naswona a va pfumela ku xaviwa. — 1 Sa. 8:1-3.

¹⁵ Siku lin’wani madoda ya Israyele ma ye ma ya khala ka muprofeta Samuwele lweyi se a a gugile. Wona ma te: “Vana va wena a va xi tekeleli xikombiso xa wena”. (1 Sa. 8:4, 5) Ku nga va leswaku Samuwele a a swi tiva leswi vana va yena a va swi yendla? Bibele a li hi byeli, kambe ku hambana na Eli, Samuwele a a li papayi wamunene lweyi a swi nga lavi swaku a layiwa. Phela Yehovha a a mu layile Eli a tlhela a mu khatisa hileswi a kalaka a nga va layanga vana va yena lava a va yendla swilo swa ku biha ni leswi Eli a nga langa ku hlonipha vana va yena ku tlula ku hlonipha Yehovha. (1 Sa. 2:27-29) Yehovha a nga zanga a xi vonile xihoxo xolexo ka Samuwele.

16. Va titwisa ku yini vapsali lava vana va vona va kalaka va nga va yingisi, naswona xikombiso xa Samuwele xi nga va tiyisisa ku yini?

¹⁶ A Bibele a li hi byeli hi ndlela leyi Samuwele a nga titwa tingana hi yona, a vilela kumbe a godola hi ku vona swaku vana va yena a va yendla swilo swa ku biha. Kambe vapsali va nga swi twisisa leswi Samuwele a nga titwisa xiswona. Leswi hi hanyaka ka minkama ya ku karhata namuntlha, swi tolovelekile leswaku vana va nga va yingisi vapsali. (Lerha 2 Timotiya 3:1-5.) A xikombiso xa Samuwele swi nga yendleka xi va tiyisa xi tlhela xi va pfuna hintamu vapsali lava kumanaka ni xiyimu xa ku fana. Samuwele a nga pfumelelanga swaku mahanyelo ya ku biha ya vana va yena ma txintxa ndlela leyi a a yendla swilo hi yona. Khumbuka swaku hambiloko ku djondzisa vana kumbe ku va nyika switsundzuxu swi nga khumbi mbilu ya vona, kambe xikombiso xa vapsali xi nga va djondzisa minchumu ya yinyingi. Naswona vapsali minkama hinkwayu va fanele va tikarhatela ku tsakisa Papayi wa vona Yehovha Xikwembu ku fana ni leswi Samuwele a nga swi yendla.

“Hi Vekeli Hosi”

17. I mpsini leswi madoda ya Israyele ma nga swi kombela ka Samuwele, naswona Samuwele a titwise ku yini hi xikombelo xa vona?

¹⁷ Phela vana va Samuwele a va nga swi pimisi swaku mahanyelo ya vona ya ku biha ni ya ku nyenyentsa a ma khumba ni vanhu van’wani. Madoda ya Israyele ma byele Samuwele ma ku: “Hi vekeli hosi swaku yi ta hi yavanyisa ku fana ni matiko laman’wani hinkwawu.” Ku nga va leswaku leswi va nga swi kombela, swi yendle Samuwele a pimisa leswaku a va nga ha na mhaka na yena? Phela ku ringana malembe ya manyingi, Samuwele hi yena a a yavanyisa vanhu hi vito la Yehovha. Kambe swoswi Vayisrayele a va lava hosi leyi a yi ta va yavanyisa ku nga li muprofeta wa ku fana na Samuwele, naswona matiko lawa a ma li kusuhi na vona a ma ni tihosi se na vona Vayisrayele a va lava ku va ni hosi. Se Samuwele a titwise ku yini? Bibele li li: “A swi mu tsakisanga Samuwele”. — 1 Sa. 8:5, 6.

18. Yehovha a mu tiyisise ku yini Samuwele, naswona a va kombise ku yini Vayisrayele swaku a xikombelo xa vona a ku li xirhuku?

¹⁸ Vona leswi Yehovha a nga hlamulisa xiswona nkama Samuwele a nga mu byela hi xikombelo xa Vayisrayele ka xikhongelo xa yena. Yena a te: “Yingisa hinkwaswu leswi va ku byelaka swona, hikusa a va tshikanga wena, va tshike mina swaku ni nga ha vi hosi ya vona.” Phela marito lawa ma mu tiyisile hintamu Samuwele, kambe ka Yehovha Xikwembu xa Matimba Hinkwawu, a xikombelo xa Vayisrayele a ku li xirhuku xaxikulu. Yehovha a byele muprofeta wa yena swaku a basopisa Vayisrayele a va byela swaku a va ta koka ku vava hileswi a va lava hosi leyi nga munhu. Nkama Samuwele a nga va byela leswo, vona va sindzisile va ku: “Ihim, hina hi lava hosi.” Leswi Samuwele a a yingisa Xikwembu a ye a ya tota hosi leyi Yehovha a a yi langile. — 1 Sa. 8:7-19.

19, 20. a) Samuwele a wu yingisise ku yini nawu wa Yehovha wa ku tota Sawulo swaku a va hosi? b) Samuwele a tame a pfuna vanhu va Yehovha hi ndlela yini?

¹⁹ Ku nga va leswaku Samuwele a yingise Yehovha na a kwatile? Ku nga va leswaku ku godolisiwa hi van’wani swi yendle swaku mbilu ya yena yi kwata hintamu? Swi nga yendleka vanhu vanyingi a va ta va va yendle leswo, kambe Samuwele a nga zanga a swi yendlile leswo. Samuwele a tote Sawulo swaku a va hosi ya nyuwani a tlhela a pfumela swaku a a langiwe hi Yehovha. A bejare Sawulo kuva a kombisa swaku a a mu hoyozela ni swaku a a tiveka hansi ka hosi leyi ya nyuwani, a game a byela Vayisrayele a ku: “Ma mu vona lweyi Yehovha a nga mu langa? Phela a nga kona wa ku fana na yena xikarhi ka vanhu hinkwavu.” — 1 Sa. 10:1, 24.

²⁰ Samuwele a a vona swilo swaswinene ka hosi leyi Yehovha a nga ha yi langile ku nga li swihoxo swa yona, funtshi a a tshama na a tshembekile ka Yehovha, handle ka ku lava ku tsakeliwa hi xitshungu lexi a xi txintxatxintxa mavonelo ya xona. (1 Sa. 12:1-4) Phela Samuwele a yendle ntirho wa yena hi ku tshembeka, a pfune vanhu va Xikwembu swaku va tivonela ka swilo kumbe ka swiyimu leswi a swi ta wonha wunghanu la vona na xona. A tlhela a va pfuna leswaku va tshama na va tshembekile ka Yehovha. Phela switsundzuxu swa Samuwele swi ti khumbe hintamu timbilu ta vanhu lavayani lakaku va kombele Samuwele swaku a va khongelela ka Yehovha. Yena a va hlamule hi ndlela yayinene a ku: “A ni nge djoheli Yehovha hi ku tshika ku mi khongelela funtshi ni ta tama ni mi djondzisa hi ndlela yayinene ni ya ku lulama.” — 1 Sa. 12:21-24.

21. Xikombiso xa Samuwele xi nga ku pfunisa ku yini loko u tshuka u godola hileswi munhu mun’wani a nga yamukela ntirho lowu a wu wu lava?

²¹ U tshama u godola hileswi munhu mun’wani a nga yamukela ntirho lowu wena a wu wu navela? Xikombiso xa Samuwele xi hi khumbukisa leswaku a hi fanelanga hi pfumelela wukwele li tata mbilu ya hina. (Lerha Swivuriso 14:30.) Phela Yehovha a ni mintirho ya yinyingi ya ku tsakisa leyi a nga yi nyikaka vatirhi va yena va ku tshembeka.

“U Ta Rila Hi Mhaka Ya Sawulo Anze Siku Muni?”

22. Hi mhaka muni swi twala kuva Samuwele a vone swilo swaswinene ka Sawulo?

²² Phela a swi twisiseka kuva Samuwele a vona swilo swaswinene ka Sawulo, hikusa Sawulo a a li ni wumunhu lalinene. A a lehile, a a sasekile, a a nga chavi nchumu naswona a ku sunguleni a a tiveka hansi. (1 Sa. 10:22, 23, 27) Naswona Sawulo a a ni chunseko wa ku tilangela leswi a a lava ku swi yendla ka wutomi la yena, ni swiboho leswi a a ta swi yendla. (Det. 30:19) Ku nga va leswaku Sawulo a wu tirhisile kahle chunseko wolowo?

23. Hi lini wumunhu la ku sungula la lisima hintamu leli Sawulo a nga li luza, naswona a swi kombisise ku yini swaku a a ya a tibyela?

²³ Lexi vavisaka hileswaku loko munhu a twa ku nandzika hi ku fuma van’wani, nchumu xa ku sungula lexi a xi luzaka i ku tiveka hansi. Phela a swi hlwelanga swaku Sawulo a sungula ku tibyela, funtshi a nga yingisanga minawu ya Yehovha leyi a nga byeliwa yona hi ku tirhisa Samuwele. Siku lin’wani hileswi a a hele mbilu, Sawulo a nyikele magandzelo lawa a ma fanele ma nyikeliwa hi Samuwele. Phela swi lave Samuwele a mu laya, a tlhela a mu byela swaku a mfumu a wu ta susiwa ka ndjangu wa yena. Handle ka ku va Sawulo a djondzile leswi a nga layiwa, a tame a yendla swilo swa ku biha hintamu ku tlula swa ku sungula, a tlhela a nga xi yingisi Xikwembu. — 1 Sa. 13:8, 9, 13, 14.

24. a) Nkama Sawulo a nga lwa nyimpi ni Vaamaleki, a swi kombisise ku yini swaku a a nga ha mu yingisi Yehovha? b) Sawulo a yendle yini nkama va nga mu laya, naswona i mpsini leswi Yehovha a nga mu byela swaku a ta swi yendla?

²⁴ Yehovha a byele Sawulo swaku a ya lwa ni Vaamaleki, a helisa hinkwaswu ka doropa la Vaamaleki a tlhela a dlaya na hosi Agagi. Kambe Sawulo a nga mu dlayanga Agagi a veke minchumu hinkwayu yayinene funtshi a nga yi helisanga. Nkama Samuwele a nga mu laya, Sawulo a kombise swaku impela se a a txintxile. Hikusa handle ka ku tiveka hansi a pfumela ku layiwa, a zame ku tinyimelela a tlhela a zama ku baleka ka swikarhatu leswi a nga swi vanga, funtshi a tlhele a nyika nandzu xitshungu. Swin’wani leswi Sawulo a nga swi yendla swaku a yala ku layiwa, ku ve ku vula swaku minchumu yin’wani leyi a a yi tekile a yi ta tirhisiwa swaku ku yendliwa magandzelo hi yona ka Yehovha. Kambe Samuwele a game a mu byela marito lawa hi ma tivaka kahle, lawa ma nge: “Phela ku yingisa swa yampsa ku tlula ku yendla magandzelo”. Na a nga chavi nchumu, Samuwele a laye Sawulo a tlhela a mu byela leswi Yehovha a a lava ku swi yendla. Yena a vule swaku a wuhosi a li ta susiwa ka Sawulo, li nyikiwa wanuna mun’wani wa ku yampsa.a — 1 Sa. 15:1-33.

25, 26. a) Hi mhaka muni Samuwele a rilile hi mhaka ya Sawulo, naswona Yehovha a mu layise ku yini? b) I mpsini leswi Samuwele a nga swi djondza nkama a nga ya kaya ka Yese?

²⁵ Leswi Sawulo a nga swi yendla, swi yendle swaku Samuwele a karhateka hintamu swinene. A hete wusiku hinkwalu na a kombela ku pfuniwa ka Yehovha. Phela Samuwele a te ni ku rila hi mhaka ya Sawulo. Samuwele a a vone wumunhu lalinene leli Sawulo a a li na lona ni leswi a a ta kota ku swi yendla. Kambe leswi Sawulo a nga txintxa, a swo fana ni loko Samuwele a cheliwe hi mati ya ku titimela. Sawulo a a txintxe hintamu, funtshi a a luzekeliwe hi wumunhu la yena lalinene a tlhela a djikela Yehovha. Samuwele a yalile ku tlhela a vonana na Sawulo. Kambe hi ku famba ka nkama, Yehovha a tsundzuxe Samuwele a ku: “U ta rila hi mhaka ya Sawulo anze siku muni? Phela ni mu susile swaku a nga ha vi hosi aIsrayele. Chela mafurha ka limhondzo li za li tala, u gama u famba u ya ka Yese lweyi a tshamaka Betlehema, hikusa ni tilangele hosi ka vana va yena.” — 1 Sa. 15:34, 35; 16:1.

²⁶ A xikongomelo xa Yehovha a xi dependeri hi vanhu va ku kala va nga hetisekanga lava minkama yin’wani va kalaka va nga tshembeki. Loko munhu a nga tshembeki ka Yehovha, Yena a mu txintxa hi mun’wani swaku a hetisisa xikongomelo xa yena. Se Samuwele lweyi a a gugile a tshike ku rila hi mhaka ya Sawulo. Naswona hi ku kongomisiwa hi Yehovha a ye Betlehema kaya ka Yese, lani a nga tiva vana va yena va madjaha va ku saseka swinene. Kambe nkama a nga vona n’wana wa Yese wa matevula, Yehovha a mu byele swaku a a nga fanelanga a txuvuka leswi a a tshamise xiswona hi le handle. (Lerha 1 Samuwele 16:7.) Hi wugamu Samuwele a tive Davhida, ku nga n’wana wa wugamu wa Yese, lweyi Yehovha a a mu langile swaku a va hosi.

27. a) I mpsini swi nga yendla swaku lipfumelo la Samuwele li ya li tiya? b) U xi vonisa ku yini xikombiso lexi Samuwele a nga hi siyela xona?

²⁷ Nkama Samuwele na a li kusuhi ni ku fa, a swi vonile swaku ku va Yehovha a txintxe Sawulo a veka Davhida swaku a va hosi a swi li kahle swinene, hikusa Sawulo a a ya a tlulisa mpimu hi ku yendla swilo swa ku biha. Phela Sawulo a lave ni ku dlaya Davhida hi mhaka wukwele, funtshi se a a djikele Yehovha. Kambe Davhida a a ni wumunhu la ku saseka swinene la ku fana ni ku tiya nhlana, ku tshembeka ni lipfumelo. Phela lipfumelo la Samuwele li ye li tiya hintamu swinene nkama na a li kusuhi ni ku fa. A swi vonile leswaku a ku na xikarhatu lexi nga hi hetaka matimba lexi nga hlulaka Yehovha, funtshi a nga tlhela a xi txintxa xi va nkateko. Hi wugamu Samuwele a file na a ni kolomuyani ka 100 wa malembe naswona ndhuma ya yena a ya ha tama yi tiviwa. A swi hlamalisi leswi Vayisrayele hinkwavu va nga karhateka va tlhela va vaviseka hileswi wanuna lweyi a a file! Namuntlha, lava tirhelaka Yehovha va nga ha tivutisa leswi: Indjhe ni ta tekelela lipfumelo la Samuwele?