Yesu A Humelela Ka Vadjondzisiwa Va Yena

Loko se ku hundze nkamanyana na Yesu a humelelile ka vapostolo va yena, Pedru a fambe a ya phasa tihlampfi ka Lwandle la Galileya. Tomasi, Yakobe na Yohani ni vadjondzisiwa van’wani va fambe na yena. Vona va hete wusiku hinkwalu na va zama ku phasa tihlampfi, kambe a va kumanga nchumu.

Se nimixo va vone wanuna na a nyimile ka ndhawu ya ku woma. Yena a vulavule na vona hi rito la ku tlakuka, a va vutisa swaku a va swi kotile ku phasa tihlampfi ke?

Vona va vule swaku a va nga kumanga nchumu. Se wanuna lwiyani a va byele swaku va peta redi ka tlhelo la xinene la boti. Se vadjondzisiwa va yendle swoleswo, nkama va nga zama ku li humesa, vona va vone swaku a li talile hi tihlampfi. Phela a li talile hintamu lakakuva hambi hi ku li humesa leswaku va li peta ka boti a va nga ha swi koti. Se hi nkama wolowo Yohani a swi tsumbulile swaku wanuna lwiyani a ku li Yesu, a gama a ku:

— I Yesu!

Se hi ku hantlisa Pedru a nghene ka lwandle, a hlambela anze ka ndhawu ya ku woma. Vadjondzisiwa van’wani va landzele Pedru hi boti.

Loko vadjondzisiwa va fike ka ndhawu ya ku woma va voni mapawu ni tihlampfi na swi woxiwa. Yesu a byele vadjondzisiwa leswaku va tisa tihlampfi tin’wani swaku va ti woxa. Se Yesu ni vadjondzisiwa va yena va sungule ku dla. Yena a game a vutisa Pedru a ku:

— U ni rhandza ku tlula ntirho wa wena?

Pedru a hlamula a ku:

— Ina Hosi, wa swi tiva swaku na ku rhandza.

Yesu a ku:

— Hlayisa vanhu va mina.

Yesu a tlhele a vutisa Pedru swaku a a mu rhandza ke? Pedru a tlhele a vula leswaku a a mu rhandza. Se Yesu a mu byele leswaku a hlayisa vanhu va yena. Nkama lowu Yesu a nga mu vutisa ka wunharhu leswaku a a mu rhandza, Pedru a kwatile a gama a hlamula a ku:

— Hosi, wena u tiva swilo hinkwaswu, wa swi tiva leswaku na ku rhandza.

Se Yesu a byele Pedru leswaku a hlayisa vanhu va yena a tlhela a tama a va mudjondzisiwa wa yena.