Fakaakoako ki Pelofeta Kolā ne Talia ne Latou a Mea Faiga‵ta ke Fai ei te Loto o Ieova

I TE auala fea e tai ‵pau ei tatou mo pelofeta i aso mua? I te lōmiga fou o te New World Translation 2013, e fakamatala mai eiloa i te “Glossary of Bible Terms,” a te uiga o te pati pelofeta: “Se tino telā e folafola atu ne ia a fuafuaga a te Atua. E fai eiloa a pelofeta e pelā me ne tukumuna a te Atua kolā e fakamatala mai ne latou a mea kolā ka ‵tupu i aso mai mua, e pelā foki mo akoakoga, tulafono, mo fakamasinoga a Ieova.” E tiga eiloa e se fakamatala atu ne tatou a mea kolā ka ‵tupu i aso mai mua, kae e folafola atu ne tatou a mea kolā e maua i te Muna a te Atua.—Mata. 24:14.

Se tauliaga gali eiloa ke fakailoa atu ne tatou ki nisi tino a mea e uiga ki te ‵tou Atua ko Ieova, kae ke akoako latou e uiga ki tena loto mō tino katoa! E ‵kau fakatasi eiloa tatou i te galuega tenei fakatasi mo “agelu e eva loa i te vanimonimo.” (Faka. 14:6) Kae e mafai o fakafesagai tatou mo mea faiga‵ta kolā e mafai o fai ei ke galo atu i a tatou a te tauliaga gali tenei. Ne a nisi mea faiga‵ta e fe‵paki mo tatou? E mafai o fakafesagai atu tatou ki te fi‵ta o te foitino mo te mafaufau, loto vāivāi, io me mafau‵fau i a tatou kose aoga. Tenā foki te mea ne tupu ki pelofeta fakamaoni i aso mua, kae ne seki ‵fiu eiloa latou. Kae ne fesoasoani atu eiloa a Ieova ke fakataunu ne latou a olotou galuega. Ke onoono nei tatou ki nisi fakaakoakoga, kae onoono ki te auala e mafai o fakaakoako ei tatou ki a latou.

NE GA‵LUE MALOSI LATOU MO TE LOTO FINAFINAU

I nisi taimi, e mafai eiloa o se ‵kau atu tatou ki te galuega talai, ona ko te fi‵ta i ‵tou galuega e fai i aso takitasi. E tonu, e ‵tau o isi se taimi fakamalōlō; tenā foki te mea ne fai ne Iesu mo ana apositolo. (Male. 6:31) Kae mafaufau la ki a Esekielu i Papelonia mo te galuega tāua telā ne fai ne ia mō tino Isalaelu kolā ne puke fakapagota mai i Ielusalema. Ne fai atu te Atua ki a Esekielu i se taimi e tasi ke puke ne ia se puliki kae ta i luga i ei a te fa‵kai o Ielusalema. Kae i se auala fakatusa, ne nikoi ne Esekielu a te fa‵kai, mai te takato atu ki te feitu fakamaui mō se 390 aso, kae oti ko toe takato ki tena feitu fakaatamai mō aso e 40. Ne fai atu a Ieova ki a Esekielu, penei: “Ka saisai ne au a koe ko te mea ke se mafai ne koe o ‵fuli mai i te suā feitu ki te suā feitu, ke oko ki te taimi e oti ei te pukega o te fa‵kai.” (Eseki. 4:1-8) Ne fakaofoofogia eiloa a te mea tenā ki tino Isalaelu kolā ne ave fakapagota. I se tausaga tupu, ne fakafesagai atu a Esekielu ki se galuega faigata. Ne mafai pefea o fakataunu ne te pelofeta a tena tofiga?

Ne malamalama a Esekielu i te pogai ne uga atu ei a ia e pelā me se pelofeta. I te taimi ne uga atu ei ne te Atua a Esekielu, ne fai atu a ia ki tou tagata, penei: “Faitalia me e faka‵logo atu ki a koe io me ikai, kae ke iloa ne latou me e isi se pelofeta ko oti ne oko atu ki a latou.” (Eseki. 2:5) Ne masaua faeloa ne ia a te pogai tonu o tena galuega. Tela la, i se auala fakatusa, ne fakaasi atu eiloa ne Esekielu a te auala ka nikoi ei a Ielusalema. Ne fai eiloa a ia pelā me se pelofeta tonu. Ne maua ne ia se lipoti mai se tino telā ne sao mai i Ielusalema: “A te fa‵kai ko oti ne ofa ki lalo!” Tenā te taimi ne iloa ei ne tino Isalaelu me isi se pelofeta ne ‵nofo mo latou.—Eseki. 33:21, 33.

I aso nei, e fakailoa atu ne tatou ki tino me ko pili mai a te fakaseaiga o te olaga masei tenei a Satani. E tiga eiloa e fi‵ta tatou i te feitu faka-te-foitino, e fakaaoga eiloa ‵tou malosi ke talai atu te Muna a te Atua, kae fai a toe asiga mo akoga faka-te-Tusi Tapu. Ona ko te mea ko pili o fakataunu a te valoaga e uiga ki te fakaseaiga o te olaga tenei, e lotoma‵lie eiloa tatou o fai pelā me ne “tino kolā e fakailoa atu ki tino a fuafuaga a te Atua.”

NE KUFAKI LATOU FAITALIA TE LOTO VĀI‵VAI

E ga‵lue eiloa tatou mo te loto finafinau fakatasi mo te fesoasoani o te agaga tapu o Ieova; kae i nisi taimi, e mafai o loto vāi‵vai tatou ona ko te auala e ‵saga mai ei a tino ki te ‵tou fekau. E ‵tau o masaua ne tatou a te fakaakoakoga a te pelofeta ko Ielemia. Ne fakafesagai a ia mo fakatauemuga mo fakamaseiga ona ko te mea ne folafola atu ne ia a te fekau a te Atua ki te kau Isalaelu. I se taimi e tasi, ne fai atu foki a Ielemia penei: “Ka fakapuli ne au a te Aliki [Ieova] kae se toe faipati i tena igoa.” E isi foki ne lagonaga o Ielemia, e pelā loa mo tatou. Kae e ui i ei, ne tumau eiloa i te folafola atu ne ia a te fekau a te Atua. Kaia? Ne toe fai mai a te pelofeta: “Ko tau fekau ka ‵ka pelā me se afi i loto i a au. E taumafai au o taofi i loto, kae e se mafai eiloa o taofi ne au.”—Iele. 20:7-9.

I se auala tai ‵pau, kafai e loto vāi‵vai tatou ona ko te auala e ‵saga mai ei a tino ki te ‵tou fekau, e mafai eiloa o taua atu tatou ki te lagonaga tenā mai te mafaufau ‵loto ki te fekau telā e folafola atu ne tatou. E fai eiloa a te fekau tenā e pelā me se ‘afi e ‵ka i loto i a tatou.’ A te faitau ki te Tusi Tapu i aso katoa se faifaiga e mafai o fai ei ke tumau te ‵ka o te afi tenā i loto i a tatou.

NE MANUMALO LATOU I LAGONAGA SĒ ‵LEI

A nisi Kelisiano kolā ne tuku atu ki a latou a galuega, e mafai eiloa o manava‵se ona ko te seiloa ne latou te auala e fai ei olotou galuega. Ne maua foki ne te pelofeta ko Hosea a lagonaga tai ‵pau penā. Ne fakatonu atu a Ieova ki a ia, penei: “Fano, avaga atu ki se fafine talitagata kae fai au tama‵liki i ei.” (Hose. 1:2) Mafaufau aka la māfai ko koe e fai tau avaga, kae fai atu te Atua me i tau avaga se fafine talitagata, ka pefea la ou lagonaga e uiga ki ei? Ne talia ne Hosea a te tofiga tenā. Ne avaga a ia ki a Komeli, kae ne fanau mai ne tou fafine se tamaliki tagata. Fakamuli ifo, ne fanau mai ne ia se tamaliki fafine, kae se leva, ko toe fanau mai foki ne ia te suā tamaliki tagata. E foliga mai, me i tama‵liki e tokolua konei a Komeli ne tama sala. Ne fai atu a Ieova ki a Hosea me i te fafine telā ka avaga a ia ki ei ka “tautali atu i tua o tino kolā e fiafai a ia ki ei.” Mafaufau ki te pati tenei—“tino kolā e fiafai a ia ki ei.” Kae fakamuli ifo, ne taumafai tou fafine o foki ki a Hosea. Tela la, moi ne fai koe ko te pelofeta tenā, e mata, ka toe talia ne koe tau avaga? Tenā eiloa te mea ne fakatonu atu a Ieova ke fai ne Hosea! Ne toe ‵togi eiloa ne te pelofeta a tena avaga ki te ‵togi telā e fetaui ‵lei.—Hose. 2:7; 3:1-5.

Kāti ne mafaufau a Hosea me se a te ikuga ‵lei e mafai o maua māfai e fakataunu ne ia te mea telā ne fakatonu atu te Atua ke fai ne ia. Kae mai tena fakamaoni, e fesoasoani mai eiloa a te fakaakoakoga a Hosea ke masaua ne tatou a te logo‵mae o Ieova e uiga ki te mea ne fai ne tino Isalaelu ki a ia. Kae e tonu me e isi eiloa ne tino Isalaelu loto ‵lei ne toe ‵foki atu ki te Atua.

E seki fai mai te Atua ki a tatou i aso nei ke ‘avaga ki se fafine talitagata.’ Kae e mata, e isi se akoakoga tāua e maua ne tatou mai te loto fiafia o Hosea o fai te galuega tenā? E tasi o akoakoga tāua mō tatou, ko te loto fia‵fia o folafola atu a te tala ‵lei o te Malo ki “tino e tokouke kae mai fale ki fale” faitalia te faigata. (Galu. 20:20) E mautinoa eiloa me e se faigofie a nisi vaega o te galuega talai o te Malo ki a tatou. E tokouke a tino kolā e suke‵suke fakatasi mo Molimau a Ieova ne fai mai me e fia‵fia latou o suke‵suke ki te Tusi Tapu kae e se mafai lele eiloa o olo atu latou i te galuega talai mai fale ki fale. Kae, ko oti ne kamata o aofia a te tokoukega o latou i te vaega tenā o te galuega talai telā ne mafau‵fau latou me se mea faigata. E mata, e isi se akoakoga e tauloto ne koe mai i ei?

E mafai foki o tauloto ne tatou se akoakoga mai te taliaga ne Hosea a te tofiga faigata tenā. Ne mafai eiloa o fai ne ana fakamasakoga e uke ke mo a ma aofia i te mea tenei. Kae e mafai la pefea o iloa ne nisi tino a te mea tenei moi ne fai e se tusi ne Hosea a te tala tenei? E fakafesagai foki tatou ki se tulaga tai ‵pau, maise loa māfai e maua ne tatou se avanoaga ke fai‵pati atu ki tino e uiga ki a Ieova kae e seai se tino e iloa ne ia a te mea tenā. Ne tupu eiloa te mea tenei ki a Anna, se tamaliki i te akoga lasaga lua i Amelika. Ne fakatonu atu tena faiakoga ke tusi ne tamaliki i tena vasega se tala e uiga ki se mataupu telā e tali‵tonu malosi latou ki ei. Ne mafai fua o fakaseaoga ne Anna a te avanoaga tenei ke talai atu. Kae ui i ei, ne iloa ne ia me i te mea tenei se avanoaga mai i te Atua. Ona ko te mea tenā, ne ‵talo atu a ia ki a Ieova, kae ne fanaka i loto i a ia se manakoga ke fakaaoga ne ia te avanoaga tenā. Tela la, ne tusi ne ia se tala telā e fakaulutala penei: “Evolution: Consider the Evidence.”

I te taimi ne faitau atu ne Anna tena tala ki te vasega, kae ne fai atu ne se tamaliki fafine telā e talitonu ki te evolusione a fesili e uke. Kae ne mafai eiloa ne Anna o tali atu ki fesili konā, ke ‵pulu aka ei tena talitonuga. Ne ofo eiloa tena faiakoga kae ne tuku atu ne ia se failoga ki a Anna ona ko te gali o ana fakamatalaga. Mai tua ifo, ne maua eiloa ne Anna se avanoaga ke sau‵tala mo te tamaliki fafine tenā e uiga ki te faitega o mea. Ona ko te talia ne tou fafine a te “tofiga” tenei mai i a Ieova, ne fai mai a Anna, penei: “Ko maua nei ne au te loto talitonu ke talai atu a te tala ‵lei e aunoa mo te mataku.”

E tiga eiloa a tatou e se ne pelofeta, kae e mafai o fakaakoako atu tatou ki a latou mai te talia o mea faiga‵ta. E pelā mo Esekielu, Ielemia, mo Hosea, e mafai foki ne tatou o fai a te loto o Ieova i aso nei! I taimi o tapuakiga a kāiga io me ko sukesukega totino, kaia e se fai ei ke fai‵tau tatou ki tala o nisi pelofeta i aso mua kae mafaufau ‵loto ki te auala e mafai ei o tau‵tali atu tatou ki olotou fakaakoakoga?