A te ‵Tou Tamana Faka-te-lagi se Vaegā Tino Pefea?

E FAI eiloa e pelā me se mea tauloto ne tino e tokouke a te ‵Talo a te Aliki, ko te ‵talo fakaakoako telā ne akoako ne Iesu ki ana soko. (Mataio 6:​9-​13) I taimi takitasi e fai ei ne latou te ‵talo tenā e fakasino atu latou ki te Atua e pelā me ko “Te Motou Tamana.” E tokofia la a tino e fai mai me e iloa ‵lei ne latou a ia?

Kae e a koe? E pefea te iloa ‵lei ne koe te Atua? E mata, e maua ne koe se fesokotakiga pili mo ia, e faipati atu ki a ia, kae fakaasi atu ki a ia a mea kolā e fakafiafia kae fakafanoanoa atu ki a koe? Ne a eiloa a mea kolā e aofia i te iloa ‵lei ne tatou a ia?

‘A Ieova ko Tena Igoa’

E mafai o iloa ne se pepe tena tamana e pelā me ko Papa. Kae i te taimi e gasolo aka ei o matua, e kamata o iloa ne ia te igoa mo uiga o tena tamana kae kāti ka fakamatamata tou tagata i tena tamana. Kae e a te Tino i te lagi telā ne tuku mai ne ia te ola. E mata, e iloa ne koe tena igoa totino mo tena uiga?

E tiga eiloa e fakafokifoki atu ne tino e tokouke a te fuaiupu “Ke tapu tou igoa” i te taimi e fai atu ei te ‵Talo a te Aliki, kāti e se iloa ne latou te tali māfai ko fesili atu, “Ko oi te igoa tenā?” A fetu i te lagi, ko mauga ma‵luga, mo akau lanu kese‵kese mo mea ola i olotou tafa​​—e tuku mai i ei a fakamaoniga me e isi se Atua. Kae e se taku mai ne latou tena igoa. Ke iloa aka te igoa tenā, e ‵tau o ‵suke atu tatou ki te Tusi Tapu. E fakaasi ‵tonu mai i ei e uiga ki te igoa o te Atua me, ‘ne masani sāle o ‵fuli taumua ki a Ieova.’​​—Kenese 2:​4, fakamatalaga fakaopoopo i te Tusitapu Tauloto.

E manako te Atua ke iloa ne tatou tena igoa, ko Ieova. Kaia? Me e fakaasi mai i tena igoa me i a Ia se vaegā tino pefea. E fakauiga loa te igoa tenā ki te “E Fai a Ia mo Fai so se Mea.” I nisi tugāpati, e fai a ia mo fai so se mea e manakogina ko te mea ke fakataunu ei tena fuafuaga. Mafaufau ki te auala tenei: Ko te mea ke tausi atu ki tena kāiga, e ‵tau o galue te tamana ke maua a tupe, e fai a ia pelā me se tino fakatonutonu, se famasino, se sokoga, se tino puipui, mo se faiakoga, telā e faka‵na eiloa ki manakoga mo fakanofonofoga o te kāiga. I te auala foki eiloa tenā, e fakatalitonu mai te igoa o Ieova ki a tatou me e mafai o fakataunu katoatoa ne te Atua tena loto telā ka maua ei ne tino katoa kolā e tavini atu ki a ia a fakamanuiaga, faitalia a mea ‵tupu i aso mai mua nei.

Ke na mafau‵fau tatou ki tulaga kese‵kese o te ‵tou Atua alofa, e ‵tusa mo te uiga o tena igoa. Ka fesoasoani atu ei ke iloa ne koe me ko Ieova se vaegā Atua pefea, e pelā foki mo te tauloto ki mea e ‵tau o fai ne koe ke fakapilipili atu ei ki a ia.

“Te Atua o te Alofa mo te Filemu”

Ne taku ne te apositolo ko Paulo te Tino ne faite ne ia tatou ki “te Atua o te alofa mo te filemu.” (2 Kolinito 13:11) Kaia? Ne fai atu Iesu mai mua atu i ei: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se gata mai.” (Ioane 3:​16) Ona ko te lasi o tena alofa ki tino, ne tuku mai ei ne te Atua tena Tama fagasele e pelā me se togiola, telā ne mafai ei o maua ne tino kolā e fakatuanaki ki a ia te ola telā e seai sena gataga, kae saoloto foki mai te fi‵ta mo te logo‵mae ne iku mai i te agasala. Tenā te pogai ne fai mai foki a Paulo: “Me i te taui o te agasala ko te mate ka ko te meaalofa faivasaga a te Atua; ko te ola se gata mai i a Keliso Iesu te ‵tou Aliki.” (Loma 6:​23) E mata, e se ‵tau o fakamalosi mai te mea tenā ke a‵lofa kae fakapili‵pili atu tatou ki te Atua?

E se fakaasi atu fua ne te Atua tena alofa ki tino katoa e pelā me se potukau kae e penā foki loa ki ana tino fakamaoni taki tokotasi. Ne fai mai Mose e uiga ki tino Isalaelu mua, kolā ne seki faka‵logo sāle: “Tino va‵lea, tino seai ne mafaufau; tenā te mea e ‵tau o fai ne koutou ki te Aliki? A ia ko te otou tamana, ko ia ne faite ne ia koutou, ne fai ne ia koutou mo malo.” (Teutelonome 32:6) E mata, e malamalama koe i te tāua o te mea tenā? E pelā me se tamana alofa, e atafai Ieova ki ana tino, faitalia olotou vāivāiga. Kae ne tausi atu a ia i mea katoa kolā e manakogina ne latou​​—i te feitu faka-te-foitino, mea tau te lagonaga, mo te feitu faka-te-agaga.

E ola tatou katoa i se olaga telā e uke a mea faiga‵ta e fe‵paki mo tatou kae i nisi taimi e fanoa‵noa, kae e mafai foki o māfatia ‵tou mafaufau. E ‵tau o fesoasoani mai se tino ke maua se kilokiloga ‵lei ki ‵tou tulaga mo fakalavelave. Ko oi e mafai o fesoasoani mai? E auala i tena Muna, ko te Tusi Tapu, e fakamaoni mai i ei me i a Ieova se Tino fakatonutonu mo se Tino tausi alofa. E fakamatala mai foki i te Tusi ‵Malu tenā a pogai e logo‵mae ei tatou mo te auala e mafai o kufaki i ei tatou mo te manuia. E pelā mo se tamana telā e fesoasoani atu mo te alofa ki tena tama telā ne siga kae pakia, e fakaasi mai ne Ieova tena alofa i te tukumaiga o te fesoasoani e ‵tau o maua ne tatou. E tonu, e mafai kae loto fiafia katoatoa a Ieova ke fesoasoani atu ki tino kolā e fakatuanaki ki a ia.​​—Isaia 59:1.

E fakaasi mai foki te alofa o te Atua ki a tatou i tena fai mo fai te ‘Tino fakalogologo ki ‵talo.’ (Salamo 65:2) E pefea la? E fakamatala mai ne te apositolo ko Paulo: “Sa manava‵se ki se mea, kae fakatagi atu ki te Atua i mea e ma‵nako koutou ki ei, kae fakatagi eiloa i te agaga fakafetai. Ka ko te filemu o te Atua, telā e sili atu i mea e iloa ne tatou, ke tausi faka‵lei ne ia otou loto mo otou mafaufau i a Keliso Iesu.” (Filipi 4:​6, 7) Mai te ‵fuli atu ki te Atua e auala i se ‵talo mo te loto kātoa kae tautali atu ki te takitakiga e tuku mai i tena Muna, e mafai foki o maua ne koe “te filemu o te Atua.”

“Se Atua e Iloa ne Ia Mea”

E fakamatala mai i te Tusi Tapu a Ieova te Atua e pelā me se “tinā tagata poto.” E pela me “se Atua e iloa ne ia mea,” e sili atu tena malamalama i uiga mo manakoga o tino i lō so se isi tino. (Iopu 36:4; 1 Samuelu 2:3) Ne fakailoa atu ne ia e auala i tena tavini ko Mose “me i te tagata e se ‵tau o fakalagolago fua ki meakai ke ola a ia, kae ke fakalagolago foki ki muna katoa e fai mai ne te Aliki [ko Ieova].” (Teutelonome 8:3; Mataio 4:4) E fakauiga te mea tenei me i te mauaga o te fiafia tonu, e ‵tau o uke atu a mea e maua i lō mea faka-te-foitino.

E tuku mai ne te ‵tou Mafuaga a takitakiga mo pati fakatonutonu tāua e auala i tena Muna, ko te Tusi Tapu. Kafai e suke‵suke tatou ki te Tusi Tapu kae fakagalue aka a pati fakatonutonu i ei i ‵tou olaga, e maua ne tatou a mea aogā “mai muna katoa e fai mai ne te Aliki [ko Ieova].” E pelā mo Susana, se fafine Kelisiano, ne fai ne ia a pati konei e uiga ki te olaga o tena kāiga: “Ne fakamalosi aka te ma fakaipoipoga ne te fai‵tau fakatasi ki te Tusi Tapu, te ‵kau fakatasi ki fakatasiga Kelisiano, mo te fakaasi atu o mea ne tauloto ne maua ki nisi tino. Ona ko akoakoga faka-te-agaga a te Atua, e ‵pau ma fakamoemoega kae maua foki se fesokotakiga malosi ‵ki.”

E fia maua ne koe a mea aogā mai i pati fakatonutonu mo takitakiga faka-te-agaga e tuku mai ne te Atua? Mai te sukesuke faeloa ki te Tusi Tapu mo te fakagalue aka o pati fakatonutonu i ei, e mafai ei o maua ne koe a fakamanuiaga faka-te-agaga e uke mai i a ia.​—Epelu 12:9.

Te “Atua, Telā e Fakasao ne Ia”

Ko ‵fonu eiloa te lalolagi i aso nei i fakalavelave. Ko se iloa atu foki me ne a mea ka ‵tupu i aso mai mua. Kafai e nofo atu koe i se fenua telā e fai ei a taua, kāti ko manako malosi koe ki te filemu. I nisi vaega o te lalolagi, e ola ma‵taku a tino i amioga solitulafono, amioga fakasauā, mo te sē tumau o te malosi o te tupe, mo amioga a tino takafia‵toa. Ko oi ka fakasao ne ia tatou mai mea katoa konei? Tenei eiloa te taimi ko ma‵nako malosi atu ei a tino ki se puipuiga mo se fakasaoga.

“A te [“igoa o Ieova,” Tusi Paia, Samoa] e pelā me se taoa malosi, te koga tenā e olo ki ei a tino amio‵tonu ke ‵sao latou,” ko muna a te Tusi Tapu. (Faataoto 18:10) A te iloaga mo te fakalagolago ki te igoa o te Atua e fai ei ke mafau‵fau tatou ki mea ko oti ne fai ne ia mo mea ka fai ne ia ke faka‵sao ei a tino kolā e fakatuanaki ki a ia. Ko oti eiloa ne fakamaoni faka‵lei mai ne Ieova te Atua me e mafai o faka‵sao ne ia ana tino. E pelā mo te faka‵saoga ne ia o tino Isalaelu mai te fakaseaiga o kaliota tau mo te kautau a Falao. Ne fakatalitonu atu ei ne Ieova me i a ia se Atua fakamaoni, te Atua telā e masaua ne ia a tino logo‵mae kae manako o fesoasoani atu ki a latou.​​—Esoto 15:​1-4.

E fakalagolago foki eiloa ‵tou ola se-gata-mai i aso mai mua ki te fakatuanaki ki a Ieova te Atua e pelā me ko te Fakaola. Ne fakaasi mai ne te tupu o Isalaelu mua ko Tavita, telā ne fepaki mo tulaga faiga‵ta e uke, a te vaegā fakatuanaki penā i te taimi ne tusi mai ei a ia e uiga ki a Ieova: “Me i a koe ko toku Atua, telā e fakasao ne ia a au.” (Salamo 25:5) Ne fai mai te apositolo ko Petelu mo te loto talitonu: “E iloa eiloa ne te Aliki [ko Ieova] o fakaola a tino amio atua mai i olotou tofotofoga.”​​—2 Petelu 2:9.

Ne tauto mai te Atua e uiga ki se tino telā e faka‵na ki a ia mō se fesoasoani: “E puipui foki ne au a latou kolā e iloa ne latou i au ko te Aliki [ko Ieova].” (Salamo 91:14) Ko oti eiloa ne fakamaoni aka ne tavini a te Atua i aso nei a te ‵tonu o te folafolaga tenā. Ko oti ne tavini atu a Henryk mo te fakamaoni ki a Ieova i Polani mō tausaga e 70, faitalia a fakalavelave mo fakasauāga. I te taimi ko 16 fua ei a tausaga o Henryk, ne ‵pei atu tena tamana ki te falepuipui fakasauā i Auschwitz. Ne tuku atu a Henryk mo tena taina matua i se falepuipui a te kau Nasi mō talavou. Mai tua ifo i ei, ne avatu ei tou tagata mai te falepuipui fakasauā e tasi ki te suā falepuipui. Ne fai mai a Henryk e uiga ki mea ne ‵tupu i aso konā: “I tulaga faiga‵ta katoa ne fe‵paki mo au, ne seki tuku tiaki lele eiloa au ne Ieova. Ne fesoasoani mai faeloa a ia ke tumau au i te fakamaoni, faitalia te uke o taimi toeitiiti ko mate au.” E tonu, e tuku mai ne Ieova ki ana tavini a te fakatuanaki mo te malosi ke kufaki latou.

Ko pili o fai te Atua mo Fakaola ki tino katoa kolā e fakatuanaki kae fakalago‵lago ki a ia ke faka‵sao latou. E folafola mai a ia: “Ko au tokotasi ko te Aliki, ko au fua e mafai ne au o faka‵sao koutou.” (Isaia 43:11) I te “taua i te aso lasi o te Atua e o ia te Malosi Katoatoa,” ka fakaseai atu ei ne ia a tino amio ma‵sei katoa mai te lalolagi kae faka‵sao a tino amio‵tonu. (Fakaasiga 16:​14, 16; Faataoto 2:​21, 22) E fakatalitonu mai Ieova ki a tatou: “Ka ko latou kolā e loto maulalo, ka fai mo latou te fenua, kae ka maua ne latou te manuia mo te filemu katoatoa.”​​—Salamo 37:11.

Ke Fai mo “Fanau a te Atua”

I aso o te pelofeta ko Malaki, ne fai atu tino Isalaelu me i a Ieova ko te lotou Tamana. Kae kafai ko oko ki te taimi ko ‵tau ei o fakaasi atu te fakaaloalo mo te tapuakiga ki a ia, ne ofo atu ne latou a taulaga falaoa ma‵sei mo manu kolā e ‵kivi kae ‵pili. Tenā te pogai ne fesili atu ei a Ieova ki a latou: “Au ko te otou tamana, ai a e se fakaaloalo mai ei koutou ki a au?”​​—Malaki 1:6.

Ke mo a ma fakaakoako ki te mea ‵se ne fai ne te kau Isalaelu sē fakamaoni. I lō te fai penā, e fakamalosi atu matou ki a koe ke tauloto e uiga ki a Ieova te Atua kae fakapilipili atu ki a ia. Ne fakamalosi mai te soko ko Iakopo: “Fakapili‵pili atu koutou ki te Atua, ko fakapilipili mai ei a ia ki a koutou.”​​—Iakopo 4:8.

A te faiga o Ieova e pelā me se Tamana e maua ei ne tatou a nisi tiute mautinoa. Kafai e taumafai koe ke fakaaloalo ki te Atua mai te ‵lago atu mo te fakamaoni ki ana tulafono i feitu katoa o tou olaga, ka se mafai eiloa o puli i a ia au taumafaiga. E ‵kese mai i ei, ka fesoasoani atu a ia ke sasale koe i te auala tonu ki te lalolagi fou telā ne folafola mai. I konā, “ka se toe iai ne loimata i olotou mata. Ka se toe iai se mate, se fanoanoa, se tagi io me se ‵mae.” (Fakaasiga 21:4) I te taimi tenā, a tino faka‵logo katoa ka fakasaoloto “mai te pologa mo te iku vale, ki te ‵kau fakatasi i te saolotoga ‵malu o te fanau a te Atua.”​​—Loma 8:​21.

[Fakamatalaga o te Ata i te itulau e 5]

E manako te Atua ke iloa ne tatou tena igoa, ko Ieova, telā e fakauiga tonu ki te “E Fai a Ia mo Fai so se Mea”

[Fakamatalaga o te Ata i te itulau e 6]

“I tulaga faiga‵ta katoa ne fe‵paki mo au, ne seki tuku tiaki lele eiloa au ne Ieova.”​—HENRYK

[Fakamatalaga o te Ata i te itulau e 7]

“Ne fakamalosi aka te ma fakaipoipoga ne te fai‵tau fakatasi ki te Tusi Tapu, te ‵kau fakatasi ki fakatasiga Kelisiano, mo te fakaasi atu o mea ne tauloto ne maua ki nisi tino.”​—SUSANA