Ke Ati Aka te Alofa Tela e se Mafai o Gata

‘A te alofa e kufaki ki mea katoa. E se mafai o gata a te alofa.’​—⁠1 KOLINITO 13:​7, 8.

1. (a) E fakamatala sāle mai pefea a te alofa? (e) Ko oi kae ne a foki a mea e a‵lofa malosi atu ki ei a tino e tokouke?

KO OKO eiloa i te uke o mea ko oti ne ‵lomi ki te mataupu e uiga ki te alofa. Ko oti eiloa ne tavaegina a te uiga tenei kae fakaaoga foki i pese fakafamau. A te alofa se manakoga fakavae o te tino. Kae ne fakaaoga sāle i tusi mo tamunei i tala fakafamau, kae ko se faka‵tau eiloa i te uke o vaegā mataupu penā e ‵togi atu ki tua. Kae ko te alofa tonu ki te Atua mo tuakoi ko gasolo ifo eiloa o seai. Ko lavea ne tatou a mea kolā ne ‵valo mai i te Tusi Tapu e uiga ki aso fakaoti. “Ko tino ka ma‵natu fakapito, kaima‵nako, . . . ka sili atu te lotou fia‵fia ki manakoga o te foitino i lō te Atua.”​​—⁠2 Timoteo 3:​1-5.

2. Se a te fakailoaga ke fakaeteete telā e tuku mai i te Tusi Tapu e uiga ki te alofa ‵se?

2 E maua ne tino a te atamai ke fakaasi atu te alofa, kae e fakailoa mai ne te Muna a te Atua ke fakaeteete tatou i te alofa ‵se. Kae e fakamatala mai i te Tusi Tapu a mea e ‵tupu māfai ko ‵mau te vaegā alofa tenā i te loto o se tino. (1 Timoteo 6:​9, 10) E mata, e masaua ne koe a mea ne tusi mai ne te apositolo ko Paulo e uiga ki a Tema? E tiga eiloa ne kau atu a ia ki a Paulo, ne fiafia malosi a Tema ki mea kolā ne ofo mai ne te lalolagi. (2 Timoteo 4:​10) Ne fakailoa atu ne te apositolo ko Ioane ki Kelisiano ke fakaeteete i te mea fakamataku tenei. (Faitau te 1 Ioane 2:​15, 16.) A te alofa ki te lalolagi mo mea kolā e se tumau i ei mo ana auala e se fetaui mo te alofa ki te Atua mo mea kolā e māfua mai i a ia.

3. Se a te tulaga faigata e fepaki mo tatou, kae ne a fesili e ‵sae aka i ei?

3 E se fai tatou mo fai ne vaega o te lalolagi tenei, kae koi ‵nofo eiloa tatou i ei. Tela la, e faigata eiloa ki a tatou a te ‵teke atu ki te kilokiloga ‵fuli fakakotua a te lalolagi ki te alofa. Se mea tāua ke mo a ma talia ke ‵po aka tatou ne te alofa ‵se kae fai fakaatea tenei. Tela la, ko oi e ‵tau o fakamalosi kae fakaasi atu ne tatou ki ei a te alofa fakavae tenei? Ne a fakatokaga ne mafai ei o fakamalosi aka ne tatou a te alofa telā e kufaki ki mea katoa kae e se mafai foki o gata? E aoga pefea ki a tatou a te auala tenei i aso nei mo aso mai mua? E ‵tau o maua ne tatou a tali mai i te kilokiloga a te Atua ko te mea ke mafai o takitakigina ei tatou.

Te Fakamalosiakaga o te Alofa ki a Ieova

4. E gasolo aka pefea ki luga te alofa ki te Atua?

4 Ke fakamalosi aka, e mafai o fakauiga ki te fakatoka mo te tausi atu ki te tupuakaga o se mea. Mafaufau ki se tino ‵toki lakau telā e galue malosi ke fakatoka te laukele kae ‵toki a fuaga. E fakamoemoe a ia ke ola mai a fuaga konā. (Epelu 6:⁠7) E penā foki loa, e ‵tau o tupu aka faeloa te ‵tou a‵lofa ki te Atua. Se a te mea e manakogina ko te mea ke tupu te mea tenei? E ‵tau o fakagalue ne tatou a te laukele ‵lei i ‵tou loto, telā ne ‵toki i ei a te fuataga o te munatonu o te Malo. E mafai o fai ne tatou a te mea tenei e auala i te sukesuke mo te loto finafinau ki te Muna a te Atua ko te mea ke momea aka te ‵tou iloaga e uiga ki a ia. (Kolose 1:​10) A te kau atu mo te faiga faeloa o tusaga i fakatasiga a te fakapotopotoga ka fesoasoani mai foki ke momea aka te ‵tou iloaga. E mata, e taumafai faeloa a tatou taki tokotasi ke ‵loto atu te ‵tou iloa?​—⁠Faataoto 2:​1-7.

5. (a) E mafai pefea o tauloto tatou ki uiga fakavae o Ieova? (e) Ne a mea e mafai o fai atu ne koe e uiga ki te fakamaoni, te poto, mo te malosi o te Atua?

5 E auala i tena Muna, e fakaasi mai ne Ieova ana uiga. A te sukesuke ki te Tusi Tapu mo te taumafai faeloa ke gasolo aka te ‵tou iloaga e uiga ki a Ieova, e mafai ei o momea aka te ‵tou loto fakafetai ki ana uiga​—⁠tena fakamaoni, malosi, poto, kae e sili atu i mea katoa, ko te alofa sili. E fakaasi mai ne Ieova a te fakamaoni i ana auala katoa mo tena tulafono ‵lei katoatoa. (Teutelonome 32:4; Salamo 19:⁠7) E mafai o mafaufau koe ki mea katoa ne faite ne Ieova kae ofo i te lasi o tena poto. (Salamo 104:24) E tuku mai foki a fakamaoniga i te lagi me i a Ieova ko te Pogai o te malosi sili mo te ‵mana ‵lei katoatoa.​—⁠Isaia 40:⁠26.

6. Ko oti ne fakaasi mai pefea te alofa o te Atua ki a tatou, kae ne pokotia pefea tatou i ei?

6 Ne a mea e mafai o fai atu e uiga ki te uiga fakavae o te Atua, ko tena alofa? Ko oko eiloa i te lasi kae e pokotia tatou katoa i ei. Ne fakaasi mai ne ia te alofa tenā i te taimi ne tuku mai ei ne ia a te togiola ke fakasaoloto ei a tino. (Faitau te Loma 5:⁠8.) E avanoa te fakatokaga tenei ki te lalolagi kātoa o tino, kae ko latou fua kolā e ‵saga atu ki te alofa o te Atua kae fakatuanaki ki tena Tama ka maua ne latou a mea aoga mai i ei. (Ioane 3:​16, 36) A te ofoatuga ne te Atua a Iesu e pelā me se taulaga mō ‵tou agasala e ‵tau o fakamalosi aka ei tatou ke a‵lofa foki ki te Atua.

7, 8. (a) Se a te mea e manakogina ke fai ne tatou ko te mea ke fakaasi atu ne tatou a te alofa ki te Atua? (e) Faitalia me ne a mea e ‵tupu kae koi faka‵logo eiloa a tino o te Atua ki ana fakatonuga?

7 E mafai pefea ne tatou o fakaasi atu ‵tou a‵lofa ki te Atua ona ko mea katoa ko oti ne fai ne ia mō tatou? E tāua ‵ki a te tali telā ne fakaosofia ke tusi mai: “Tenei te uiga o te alofa ki te Atua: ko te ­fakalogo ki ana fakatonuga. Ka ko ana fakatonuga e se na ‵mafa foki mō tatou.” (1 Ioane 5:⁠3) E tonu, a te alofa ki a Ieova te Atua e fakamalosi aka ei tatou ke faka‵logo ki ana fakatonuga. Tenā eiloa te pogai e tasi e molimau atu ei tatou e uiga ki tena igoa mo tena Malo, telā e aoga ki nisi tino. A te faiga o te mea tenā mai i ‵tou loto eiloa se fakamaoniga me e faka‵logo tatou ki te Atua mo se lagonaga ‵ma.​—⁠Mataio 12:⁠34.

8 E tumau eiloa a ‵tou taina i te lalolagi kātoa i te faka‵logo ki tulafono a te Atua faitalia a te sē fia‵fia mo te ‵teke tonu mai ki te fekau o te Malo. Ne seki taofi aka eiloa olotou taumafaiga ke fakataunu katoatoa te lotou galuega. (2 Timoteo 4:⁠5) E penā foki tatou, e fakamalosigina tatou ke fakaasi atu te ‵tou iloa e uiga ki te Atua ki nisi tino e penā foki loa mo te faka‵logo ki nisi fakatonuga katoa.

Te Pogai e A‵lofa ei Tatou ki te ‵Tou Aliki ko Iesu Keliso

9. Se a te mea ne kufaki i ei a Keliso, kae se a te mea ne fakamalosi atu ki a ia?

9 I tafa o te alofa ki te Atua, e uke a pogai e fakamalosi aka ei ne tatou a te alofa ki tena Tama. E tiga eiloa e seki lavea aka eiloa ne tatou a Iesu, i te taimi e tauloto ei tatou ki mea e uke atu e uiga ki a ia, e momea aka eiloa te ‵poko o ‵tou a‵lofa ki a ia. (1 Petelu 1:⁠8) Ne a nisi mea ne kufaki i ei a Iesu? I te taimi ne fai ei ne ia te loto o tena Tamana, ne takalialiagina a Iesu e aunoa mo se pogai, ne fakasauagina, ne ‵losi ‵se atu, kae pati maseigina foki. Ne logo‵mae foki a ia i nisi faifaiga sē āva. (Faitau te Ioane 15:25.) A te alofa o Iesu ki tena Tamana faka-te-lagi ne fakamalosi aka ei a ia ke kufaki i mea faiga‵ta konā. Kae ona ko tena alofa, ne tuku mai ei ne tena mate e pelā me se taulaga a te togiola mō tino e tokouke.​—⁠Mataio 20:⁠28.

10, 11. Ona ko te mea ne fai ne Keliso mō tatou, se a te ‵tou fakamoemoega?

10 E fakamalosi aka tatou ne te vaegā olaga o Iesu. I te taimi e mafau‵fau ei tatou ki mea ne fai ne Keliso mō tatou, e fakamalosi aka ei ‵tou a‵lofa ki a ia. Ke fai pelā me ne ana soko, e ‵tau mo tatou o taumafai ke ati aka kae ke tumau foki i te fakaasi atu o te alofa faka-Keliso ko te mea ke mafai o kufaki tatou i te faka‵logo ki tena fakatonuga ke molimau atu e uiga ki te Malo kae fai foki a soko.​—⁠Mataio 28:​19, 20.

11 I te saga atu ki te alofa o Keliso mō tino katoa, e fakamalosi aka ei tatou ke fakaoti ‵tou galuega a koi tuai o oko mai te gataga. (Faitau te 2 Kolinito 5:​14, 15.) A te alofa ne fakaasi atu ne Keliso ne fakavae eiloa ki te fakataunuga ne ia o te mea telā ne fuafua ne te Atua mō tino. A te alofa ne fakaasi atu ne Keliso ne fakavae ki ei te fakataunuga ne ia o mea kolā ne fuafua ne te Atua mō tino. Kae ko te fakaakoakoga ne tuku mai ne Keliso mō tatou ke tau‵tali fakapilipili atu ki ei e mafai o fai ei tatou ke isi ne ‵tou tusaga i te fuafuaga tenā a te Atua. E aofia i te mea tenei a te atiakaga mo te manuia o te alofa ki te Atua ki te mea e mafai ne tatou o fai. (Mataio 22:37) Mai i te faka‵logo ki mea ne akoako mai ne Iesu kae tausi ki ana fakatonuga, e fakaasi atu ei me e a‵lofa tatou ki a ia kae e fakaiku aka ke fakamaluga ne tatou te pulega sili a te Atua i so se taimi, e pelā mo te mea ne fai ne Iesu.​—⁠Ioane 14:​23, 24; 15:⁠10.

Te Kausaki Atu ki te ‵Toe Auala Sili o te Alofa

12. Se a te mea e fakauiga ki ei a Paulo i te fakaaogaga ne ia o te tugapati ko ‘te auala sili o te alofa’?

12 Ne fakaakoako atu eiloa a te apositolo ko Paulo ki a Keliso. Ona ko te tautali fakapilipili atu ki kalafaga o Keliso, ne mafai ei o fakamalosi atu a Paulo ki ana taina ke fakaakoako atu ki a ia. (1 Kolinito 11:⁠1) E tiga eiloa ne fakamalosi atu a ia ki Kelisiano i Kolinito ke tumau eiloa i te ‵sala atu mo te loto finafinau ki meaalofa o te agaga kolā ne fakaasi atu i te senitenali muamua, e pelā mo te faka‵leiga fakavavega mo te faipati ki ‵gana kese‵kese, ne fakaasi atu ne Paulo me e isi se mea telā e sili atu e ‵tau o kausaki atu ki ei. I te 1 Kolinito 12:​31, ne fakamatala atu a ia: “Kae ka fakaasi atu ne au ki a koutou a te auala e tafasili atu i te gali.” A te mataupu e faipati ki ei i fuaiupu kolā e ‵soko atu, e fakaasi mai i ei me i te mea tenei ko te auala tafasili o te alofa. Kaia e tafasili atu ei i te gali? Ne toe fakamatala mai ne Paulo a te mea ne fakauiga a ia ki ei. (Faitau te 1 Kolinito 13:​1-3.) Kafai ne mafai o maua ne ia a atamai tāua kae ne uke foki ana mea ne fai kae e seai sena alofa, se a la te aoga o mea konā? E seai! Ona ko te agaga o te Atua, ne fakamatala mai ei ne ia a te munatonu tāua tenei. Ko oko eiloa i te tāua o te auala ne tuku mai ei a te fakamalosiga tenei ki a tatou!

13. (a) Se a te tusi siki fakavae mō te tausaga ko te 2010? (e) Se a te mea e fakauiga ki ei me e se mafai o gata te alofa?

13 Ne toe fakamatala mai ne Paulo a mea kolā e aofia i te alofa mo mea kolā e se aofia i ei. (Faitau te 1 Kolinito 13:​4-8.) Nei la, ke fakaaoga faka‵lei a taimi ke iloilo aka a te auala e mafai ei ne koe o fakafetaui aka ki mea kolā e manakogina ne te alofa. Ke onoono fakalei aka ki te ‵toe vaega i te fuaiupu e 7 mo te laina muamua i te fuaiupu e 8: ‘A te alofa e kufaki ki mea katoa. E se mafai o gata a te alofa,’ telā ka fai mo fai te tusi siki fakavae mō te 2010. Masaua la me i te fuaiupu e 8, ne fai atu a Paulo me i meaalofa o te agaga, e aofia i ei a te ‵valo atu mo te faipati ki ‵gana kese‵kese​—⁠ne fakaaoga i te taimi koi foliki ei a te fakapotopotoga Kelisiano⁠​—⁠ka fakaseai atu. Ka fakagata atu eiloa a mea konā. Kae ka se mafai eiloa o gata a te alofa. A Ieova ko te alofa eiloa, kae e ola a ia ki te se-gata-mai. Tela la, e se mafai o takavale io me e gata a te alofa. Ka tumau eiloa ki te se-gata-mai e pelā me se uiga o te ‵tou Atua ki te se-gata-mai.​—⁠1 Ioane 4:⁠8.

A te Alofa e Kufaki ki Mea Katoa

14, 15. (a) E mafai pefea o fesoasoani mai a te alofa ke kufaki tatou i tofotofoga? (e) Kaia ne ita fitifiti ei se taina talavou ma gutugutulua a ia?

14 Se a te mea e fakamalosi atu ki Kelisiano ke kufaki faitalia a tofotofoga, tulaga faiga‵ta, mo fakalavelave e fe‵paki mo latou? A te ‵tonuga loa, ko te alofa eiloa. E sili atu a te vaegā alofa tenā i lō te tuku atu fua o mea faka-te-foitino. E fai ei tatou ke loto fia‵fia o tumau i te ‵tou fakamaoni kae ke oko foki eiloa ki te ‵mate o tatou mō te Keliso. (Luka 9:​24, 25) Ke mafaufau ki te olaga fakamaoni o Molimau kolā ne logo‵mae i falepuipui fakama‵taku, koga e fakagalue ‵mafa i ei a pagota mo falepuipui i te taimi mai tua ifo o te Taua i te Lua a te Lalolagi.

15 Ne fakamatala mai ne se talavou Siamani e igoa ki a Wilhelm a te mea tenei. I lō te gutugutulua, ne tumau a ia i te fakamaoni i te taimi ne fakafesagai atu ei a ia ki te mate i te fanafanaga a se potukau Nasi. I se tusi fakamāvae ki tena kāiga, ne tusi atu a ia: “E sili atu i mea katoa, e ‵tau mo tatou o a‵lofa ki te Atua, e pelā mo te mea ne fakatonu mai ne te ‵tou Takitaki ko Iesu Keliso. Kafai e ‵lago malosi atu tatou ki a ia, ka taui mai ne ia a tatou.” Fakamuli ifo, i se mataupu i se Faleleoleo Maluga, ne tusi mai se tino e tokotasi i tena kāiga: “I toe taimi faiga‵ta eiloa, ko oti eiloa ne lavea atu ne matou e pelā me se kāiga me e fakamuamua faeloa ne matou te motou a‵lofa ki te Atua.” Tenā foki a te vaegā kilokiloga e kufaki ei a taina e tokouke i falepuipui i Armenia, Eritrea, Kolea ki Saute, mo nisi fenua aka foki. E ‵mautakitaki eiloa a taina konei i te lotou a‵lofa ki a Ieova.

16. Ne a mea ne kufaki i ei ‵tou taina i Malawi?

16 I koga e uke, e tofotofo aka ne tofotofoga kese‵kese a te fakatuanaki mo te kufaki o ‵tou taina. Ne kufaki a Molimau a Ieova i Malawi i tausaga e 26 i fakataputapuga mai i te malo, ‵tekemaiga matagā, mo nisi fakalavelave faiga‵ta. Ne taui atu eiloa ki te lotou kufaki. I te taimi ne kamata ei a fakasauaga, e toko 18,000 a Molimau i te fenua tenā. I te tolusefulu tausaga mai tua ifo, ne silia atu fakalua te lotou aofaki, telā ko te toko 38,393. Ne tai penā foki loa a ikuga i nisi fenua.

17. Ne a mea ne fe‵paki mo nisi tino i kāiga kolā e mavae‵vae i te tapuakiga, kae kaia ne mafai ei o kufaki latou i faifaiga sē ‵lei?

17 Ne fai eiloa a fakasauaga kolā e fai ‵tonu atu ne tino ‵teke ki tino o te Atua mo fai se mea faigata e tasi. Kafai ko oko mai a ‵tekemaiga ki se Kelisiano mai i tino foki eiloa o te kāiga, e tai ‵kese eiloa a te mea tenā. E mafai o fakamāfua aka i ei a te loto fanoanoa ne se tino i te kāiga io me se kāiga pili. E mata, e seki fai mai a Iesu me e ‵tau o tupu a te mea tenei? Ao, kae ko oti eiloa ne fakamaoni aka ne tino e tokouke a te ‵tonu o ana muna. (Mataio 10:​35, 36) Ko oti ne kufaki a talavou i ‵tekemaiga mai i olotou mātua sē tali‵tonu. Ko oti ne fakatonu atu ki nisi o latou ke olo keatea mai i te fale, kae ne talimālō latou mo te atafai ne Molimau. Ne fakaseai atu a nisi o latou. Se a te mea ne fesoasoani atu ke kufaki ei a vaegā tino penā i faifaiga sē ‵lei? E se ko te lotou a‵lofa fua ki te kautaina, kae e sili atu i mea katoa, ko te lotou a‵lofa tonu ki a Ieova mo tena Tama.​—⁠1 Petelu 1:​22; 1 Ioane 4:​21.

18. E fesoasoani atu pefea a te alofa telā e kufaki ki mea katoa ki Kelisiano a‵vaga?

18 E uke foki a nisi tulaga i te olaga kolā e manakogina i ei a te alofa telā e kufaki ki mea katoa. I loto i te feagaiga o te fakaipoipoga, e mafai ne te alofa o fai a te tauavaga ke fakaasi atu te āva ki pati a Iesu: “A lāua kolā ko oti ne fakatasi ne te Atua, e seai se tino e mafai ne ia o ‵tala.” (Mataio 19:⁠6) Kafai ko “maua ne latou a fakalavelave faka te lalolagi,” e ‵tau mo Kelisiano a‵vaga o fakamasaua ifo eiloa ki a latou me i a Ieova ko te tino tāua i olotou fakaipoipoga. (1 Kolinito 7:​28) E fai mai tena Muna me i ‘te alofa e kufaki ki mea katoa,’ kae ko te tauavaga telā e maua ne lāua te uiga tenei e taumafai malosi ke ‵piki ‵mau te suā tino ki te suā tino kae ke fakatumau foki te lā fesokotakiga i te fakaipoipoga.​—⁠Kolose 3:​14.

19. Se a te mea ne tupu i va o tino o te Atua mai tua o fakalavelave o te natula?

19 E fesoasoani mai a te alofa ke kufaki tatou ki mea katoa i taimi o fakalavelave o te natula. Tenei eiloa te mea ne tupu i te pokoga o te mafuie i te feitu ki saute o Peru mo te Alikeni ko Katrina telā ne fakamasei i ei a nisi koga i te Gulf i te Iunaite Sitete. Ne ‵galo atu a fale io me ko kope o ‵tou taina e tokouke i kogā koga konā. Ne fakaosofia a te fakapotopotoga i te lalolagi kātoa ne te alofa ke fesoasoani atu i te ‵toe faitega o fale kae toe fakafou a Kingdom Halls. E fakamaoni atu ne vaegā faifaiga penā me e fakatau a‵lofa kae fakatau atafai ‵tou taina i taimi katoa kae mai lalo foki o so se fakanofonofoga.​—⁠Ioane 13:​34, 35; 1 Petelu 2:​17.

E se Mafai o Gata te Alofa

20, 21. (a) Kaia e sili atu ei a te tāua o te alofa? (e) Kaia e fakaiku aka ei ne koe ke kausaki atu ki te auala o te alofa?

20 I va o tino o Ieova i aso nei, e lavea ne tatou a te poto telā e kausaki atu ki te auala sili o te alofa. E tonu, e sili atu i so se tulaga. Mafaufau la ki te auala ne faka‵mafa mai i ei ne te apositolo ko Paulo a te munatonu tenā. Muamua la, ne fakasino atu a ia ki meaalofa o te agaga kolā ka palele atu kae ka gasolo aka foki o matua a te fakapotopotoga Kelisiano. Kae ne fakaoti mai penei, ana muna: “E iai a mea konei e tolu: te fakatuanaki, te fakamoemoe, mo te alofa; ka ko te alofa e tulaga muamua eiloa i mea konei.”​—⁠1 Kolinito 13:⁠13.

21 Fakamuli loa, a mea kolā ne fakatuanaki tatou ki ei ka fakataunu mai kae ka gata atu te fakatuanaki ki ei. A te fakamoemoe ki folafolaga kolā ko leva ne fia lavea atu te lotou fakataunuga ka se toe puke ‵mau ki ei māfai ko oti ne faka‵fou a mea katoa. Kae e a te alofa? Ka se mafai eiloa o gata atu. Ka tumau eiloa. A te mafaufau faeloa ki te ola se-gata-mai, e mautinoa eiloa me ka lavea kae momea aka foki te malamalama i vaega kese‵kese o te alofa o te Atua. Mai i te faiga o te loto o te Atua i te kausaki atu ki te auala sili o te alofa telā e se mafai o gata, e mafai o tumau ei koe ki te se-gata-mai.​—⁠1 Ioane 2:​17.

Ka Tali Mai Pefea ne Koe?

• Kaia e ‵tau ei o ‵kalo keatea tatou mai i te alofa ‵se?

• Ne a mea kolā e mafai o kufaki tatou i ei ona ko te alofa?

• Se a te uiga me e se mafai o gata a te alofa?

[Te Manatu Taua i te itulau e 27]

A te tusi siki fakavae mō te tausaga ko te 2010 ka fai penei: ‘A te alofa e kufaki ki mea katoa. E se mafai o gata a te alofa.’​—⁠1 Kolinito 13:​7, 8.

[Ata i te itulau e 25]

E fakamalosi aka tatou ne te alofa ki te Atua ke molimau atu

[Ata i te itulau e 26]

A te alofa tonu ne fai ei ‵tou taina mo tuagane i Malawi ke kufaki i tofotofoga