Māfai ko Galo Atu Sou Tino Pele i te Mate

“Ne seki ai eiloa saku mea ne mafai o fai i te taimi ne mate fakapoi i ei a toku tuagane matua. I masina mai tua ifo, ne masaua faeloa ne au a ia kae ne logo‵mae malosi au i ei, e pelā eiloa me se naifi e ‵suki ne ia toku fatu. I nisi taimi, au ko kaitaua. Kaia ne mate i ei toku tuagane? Ne sē ‵lei oku lagonaga me ne seki mafai o nofo fakatasi au mo ia i te taimi koi ola i ei a ia.” —Vanessa, i Ausetalia.

KAFAI ne galo atu sou tino pele i te mate, ka pokotia eiloa koe i lagonaga kese‵kese, mai te fanoanoa ki te sē sologa mo te seai o se malosi ke fai se mea. Kāti ka kaitaua koe, ma‵sei ou lagonaga, io me mataku. Kāti ka mafaufau ifo koe me seai se aoga o te olaga.

Ke fakamalosi koe me i te mafatia e sē se vāivāiga. Se fakaasiga fua o te lasi o te alofa o koe ki tou tino pele tenā. Kae e ui i ei, e mata, e mafai eiloa o fakafeoloolo aka a ou lagonaga logo‵mae kae fakafanoanoa konā?

TE AUALA NE KUFAKI I EI A NISI TINO

Faitalia e foliga mai me e se mafai o gata atu tou logo‵mae, ka mafai eiloa o fesoasoani atu a auala konei ke fakamafanafana atu ki a koe:

SE MEA GALI KE FAKAASI ATU KI TUA OU LAGONAGA FANOANOA

E kese‵kese a tino mo taimi e fanoa‵noa i ei latou. A te ‵tagi e isi eiloa se fesoasoani ke tai fakafeoloolo aka ei ou lagonaga konā. A Vanessa, telā ne taku mai muamua, ne fai mai, penei: “Nisi taimi e tagi fua au ke faka‵noga aka i ei a toku logo‵mae.” A Sofía, telā ne mate fakapoi foki tena taina, ne fai mai penei: “A te fakafesagai atu ki oku mafaufauga mo lagonaga fanoa‵noa e fakalogo‵mae ‵ki mai ki a au, e pelā eiloa mo te ‵fuluga ke ‵ma o se pakiaga lasi. Ko se mafai o fa‵ki te logo‵mae, kae ko te fai penā ne fai loa i ei ke feoloolo.”

KE FAKAASI ATU OU MAFAUFAUGA MO LAGONAGA

E sē se mea fou māfai e manako koe o nofo i a koe eiloa tokotasi i ne taimi. Kae ko te loto mafatia se amoga ‵mafa ke amo ne koe tokotasi. A Jared ko sefulu fitu ana tausaga, kae ne mate i ei tena tamana, ne fai mai, penei: “Ne fakaasi atu ne au oku lagonaga ki nisi tino. Kāti ne seki ‵tau o fakaasi atu ne au oku lagonaga ki tino, kae se mea ‵lei me ne fakaasi atu eiloa ne au ki tua i nisi tino.” A Janice, telā ne taku mai i te mataupu i te kamataga, ne fai mai ne ia se suā mea aoga: “A te sau‵tala mo nisi tino ne lasi ‵ki te fakamafanafana mai. Ne iloa ne au me e malamalama a nisi tino i oku lagonaga, kae ne seki mafai fua o kufaki ne au tokotasi.”

TALIA A FESOASOANI

E fai mai se tokita: “A te tino loto mafatia telā e talia ne ia a fesoasoani mai ana taugasoa mo kāiga i te taimi eiloa ne mate ei tena tino pele, ka mafai eiloa o fesoasoani atu ki a ia ke kufaki i tulaga kese‵kese e fepaki ei a ia mo lagonaga logo‵mae konā.” Ke fakaasi ki ou taugasoa a mea kolā e mafai o fai ne latou ke fesoasoani atu ki a koe; me e ma‵nako latou o fesoasoani kae ko te mea fua e se iloa ne latou me ne a olotou mea ka fai.—Faataoto 17:17.

KE FAKAPILIPILI MALOSI ATU KI TE ATUA

E fai mai a Tina: “I te taimi ne mate ei taku avaga ona ko te kenisa, ne seki toe mafai o fakaasi atu ne au oku lagonaga ki a ia, tenā ne fakaasi atu ne au a mea katoa ki te Atua! Ne kamata o fakamolemole atu ki ei i aso katoa ke fesoasoani mai ki a au ke tuku mai te malosi ke fai ne au a mea tāua e manakogina o fai. Kae ne lasi ‵ki tena fesoasoani mai.” A Tarsha, ko 22 ana tausaga kae ne mate i ei tena mātua, ne fai mai, penei: “A te faitau faeloa ki te Tusi Tapu i aso katoa ne fakamafanafana mai eiloa ki a au. Ne tuku mai i ei a fakamalosiga ke mafaufau au ki ei.”

KE MAFAUFAU KI TE FAKAMOEMOEGA KO TE TOETUGA

Ne toe fai mai a Tina: “Muamua loa, ne seki fakamafanafana mai ki a au a te fakamoemoega ki te toe‵tuga o tino mate ona me ne manakogina ne au taku avaga—aku tama tagata e manakogina foki ne latou te olotou tamana—telā ko galo atu. Kae e ui i ei ko tusa nei mo te fa tausaga, ne ‵piki mau eiloa au ki te fakamoemoega tenā. Ko toku ola eiloa tenā. E fakaataata ne au te taimi ka toe fetaui i ei mo ia, kae maua eiloa ne au te fiafia mo te filemu mai i ei!”

Ka se mafai o ‵lei fakavave ou lagonaga fakafanoanoa i te taimi eiloa tenā. E ui i ei, e fakamalosi loto eiloa a te tala o Vanessa. Ne fai mai tou fafine penei, “Ka mafaufau koe me ko sē mafai eiloa o ‵lei ou lagonaga, kae i te gasologa o taimi, ka gasolo eiloa o feoloolo.”

Ke masaua, e tiga e se mafai o fakapuli i a koe tou tino pele, kae koi aoga eiloa tou olaga. Fakatasi mo te fesoasoani atafai mai te Atua, ka mafai eiloa o fia‵fia koe fakatasi mo ou taugasoa kae maua se fakamoemoega i te olaga. E se leva nei ka toe faka‵tu eiloa ne te Atua a tino mai te mate. E manako a ia ke toe fetaui koe mo tou tino pele. Kae ko te logo‵mae i tou loto ka fakaseai atu ki te se-gata-mai!

Tusi Fai‵tau Mai te Tusi Tapu Kolā e Mafai o Fesoasoani Atu ki a Koe

E amanaia te Atua ki tou loto mafatia mo ou loimata.

E fai mai se tino tusitala i te Tusi Tapu, penei: “E tausi ne koe oku loimata i loto i tau fagu ne faite ki pa‵kili o manu. E a, e se tusi a mea konā i loto i tau tusi?”—Salamo 56:8.

E mafai o fakaasi atu ne koe a mea i tou loto ki te Atua.

“E ‵ligi atu ne au a mea e manavase au ki ei i ana mua . . . Au e kalaga atu ki a koe, e Ieova,a mō se fesoasoani.”—Salamo 142:2, 5.

E isi eiloa se fakamoemoega mō koe.

“Me ka toe‵tu mai a tino.”—Galuega 24:15.

E tauto mai te Atua me ka toe faka‵tu mai ne ia tino e tokouke kolā ne ‵mate, kae e manako malosi ke fai ne ia te mea tenā.b—Iopu 14:14, 15.

a Ieova ko te igoa o te Atua telā e fakaasi mai i loto i te Tusi Tapu.

b Ke maua a nisi fakamatalaga e uke atu e uiga ki te toetu, ke onoono ki te mataupu e 7 i te tusi ko te Ne a Mea e Mafai o Tauloto ne Tatou Mai te Tusi Tapu? telā ne ‵lomi ne Molimau a Ieova kae e mafai o ‵kopi e aunoa mo se ‵togi i luga i te motou fakatuatusi ko te www.pr2711.com.