‘Ke Fai te Mea e Loto ki ei te Atua’

1. Se a te matua o te polokalame o te fono fakapito mō te tausaga ko te 2012, kae kaia e fetaui ‵lei ei ke mafau‵fau tatou ki te mataupu tenei?

¹ Ona ko te loto o Ieova ne faite ei tatou. (Faka. 4:11) Tela la, e faigata eiloa o fakataunu tonu ne tatou a te pogai ne faite ei tatou, e aunoa mo te tauloto kae fai ne tatou a te loto o te Atua. E se faigofie sāle a te faiga o te mea tenei ona ko te mea e ‵tau o ‵teke malosi atu tatou ki “manakoga faka-te foitino” io me ko te faiga o amioga a “tino pouliuli” io me ko “tino kolā e tau‵tali ki manakoga faka te foitino.” (Efe. 2:3; 1 Pe. 4:3; 2 Pe. 2:10) E aunoa mo te fesoasoani mai te Atua, e mafai eiloa o ‵tu tatou i se tulaga fakamataku me e mafai o ‵po aka tatou ne te Tiapolo “ke fai tena loto.” (2 Timo. 2:26) A te polokalame o te ‵tou fono fakapito mō te tausaga faka-te-taviniga ko te 2012, ka fesoasoani mai ki a tatou taki tokotasi ke gasue‵sue e ‵tusa mo te manatu e tasi i manatu tāua e tolu kolā ne akoako mai ne Iesu i tena ‵talo fakaakoako, penei “ke fai te mea e loto koe ki ei i lalo nei, e pelā mo te faiga i te lagi.”—Mata. 6:9, 10.

2. Ne a fesili ka tali aka i te polokalame tenei?

² Fesili Kolā ka Maua a Tali ki ei: I te taimi e fakalogologo ei koe ki te polokalame, onoono ki tali ki fesili konei: Ne a nisi mea tāua e ‵tau o fai ne tatou i tafa o te fakalogologo fua ki te Muna a te Atua? E mafai pefea o momea aka a te ‵tou malamalama e uiga ki te loto o te Atua mō tatou? Kaia e ‵tau ei o loto fia‵fia tatou ke fesoasoani atu ki vaegā tino valevale? E mafai pefea o maua ne tatou se olaga gali kae fakafiafia? Talavou, ne a mea e ‵tau o fakamaoni atu ne koutou ki a Ieova? Ne a taui e maua ne tatou mai i te faiga o te loto o te Atua? Kaia e manakogina fakavave ei ke ati aka kae fakamalosi atu tatou ki nisi tino?

3. E mafai pefea o maua katoatoa ne tatou a mea aoga mai i te fakatokaga faka-te-agaga tenei?

³ Masaua ke kau atu koe kae ke fakalogologo faka‵lei ki te polokalame. Kāti ka fai eiloa se sui mai i te Peteli io me se ovasia faimalaga mo fai te failauga asiasi. Ke taumafai malosi koe mai mua mo io me mai tua o te polokalame, ke sau‵tala atu koe ki a ia mo tena avaga, māfai ko oti ne avaga tou tagata. Kafai e foki atu koe ki te fale, ke mo a ma fai koe mo fai se tino “fakalogologo fua ki ei ko puli ei i a ia, kae ke toe mafau‵fau ki te polokalame e pelā me se kāiga kae sau‵tala ki auala e mafai ei o momea aka te otou ga‵lue malosi e ‵tusa mo te loto o te Atua.—Iako. 1:25.

4. Kaia e tāua ei ke fakamuamua faeloa ne tatou a te faiga o te loto o te Atua?

⁴ Ko pili eiloa nei o fakaseai atu a tino kolā e ‵saga fua ki olotou manakoga kae ita fitifiti ma faka‵logo ki te loto o Ieova. (1 Ioa. 2:17) Tela la, e fakafetai tatou me ko oti ne fakatoka ne Ieova a fakamatalaga kolā e fetaui tonu ke fesoasoani mai ke fakamuamua faeloa ne tatou a te faiga o te loto o te Atua!