Te Fakatokaga a te Atua ke Faka‵sao ei a Tino

Ne tauto atu a te Atua ki a Apelaamo me i te “fanau” telā ne folafola mai, ka vau mai i tena gafa. E auala i te tino tenā, ka maua ei ne tino o “malo” katoa a fakamanuiaga. (Kenese 22:18) Ne fanatu fakamuli a te mokopuna o Apelaamo ko Iakopo ki Aikupito, telā ne gasolo aka ei o tokouke tena kāiga kae ne fai mo fai te atufenua mua o Isalaelu.

Fakamuli ifo, ne fakapologa ne se Falao fakasaua, i Aikupito, a tino Isalaelu ke oko ki te taimi ne fakatu aka ei ne te Atua a te pelofeta ko Mose, telā ne ‵taki atu ne ia ki tua a te atufenua mai i te fenua o Aikupito i loto i te Tai ‵Kula, telā ne ‵vae aka fakavavega. Mai tua ifo i ei, ne tuku atu ne te Atua ki tino Isalaelu a tulafono, e aofia i ei a Tulafono e Sefulu, ke takitaki kae puipui ei latou. E tuku mai i tulafono konā a taulaga fakapito mō te fakamagaloga o agasala. Ne fakaosofia a Mose ne te Atua ke fai atu ki tino Isalaelu me ka uga atu ne ia ki a latou a te suā pelofeta. A te pelofeta tenā ko te “fanau” telā ne folafola mai.

E sili atu i te 400 tausaga mai tua ifo, ne tauto atu ei te Atua ki te tupu ko Tavita me i te tino telā ka vau, ko te “fanau” telā ne ‵valo mai i Etena, ka pule mai i se malo telā ka tumau ki te se-gata-mai. A te tino tenā ka fai mo fai te Mesia, ko te Tino telā ne ‵tofi aka ne te Atua ke faka‵sao ne ia a tino kae toe fakafoki mai te Palataiso ki te lalolagi.

E auala i a Tavita mo nisi pelofeta, ne fakaasi malielie mai ne te Atua a fakamatalaga e uke atu e uiga ki te Mesia. Ne ‵valo mai ne latou me ka loto maulalo kae atafai a ia kae mai lalo i tena pulega, ka fakagata aka ei a te fiakai, faifaiga sē fakamaoni, mo taua. Ka maua ne tino katoa a te filemu i va o latou, penā foki loa mo manu. A masaki, logo‵maega, mo te mate​—kolā e se ne vaega o te fuafuaga muamua a te Atua​—ka ‵galo atu, kae ko tino ‵mate ka toe faka‵tu mai ki te ola i te lalolagi.

Ne ‵valo mai ne te Atua e auala i te pelofeta ko Mika me ka fanau mai te Mesia i Peteleema kae e fai mai foki e auala i te pelofeta ko Tanielu me ka tamate fakamuli a ia. Kae ka toe fakatu aka ne te Atua a te Mesia mai te mate kae ‵tofi aka mo fai te Tupu i te lagi. Ne lavea atu foki ne Tanielu me ka sui fakamuli ne te Malo faka-Mesia a nisi malo katoa ki te se-gata-mai. E mata, ne oko mai eiloa a te Mesia e pelā mo mea ne ‵valo mai?

​—E fakavae ki te Kenese mataupu e 22-50, pelā foki loa mo te Esoto, Teutelonome, 2 Samuelu, Salamo, Isaia, Tanielu, Mika, Sakalia 9:9.