Ogya a Wobesiw Ano Wɔ Fie

Wɔka sɛ Owurayere Patrick O’Leary nantwi bɔɔ kerosin kanea too fam wɔ ɔsan no mu na ɛno na ɛde Chicago ogya kɛse no bae wɔ 1871 mu no. Nneɛma ho ka ne wɔn a wowuwui no yɛ pii. Amanneɛbɔ bi kyerɛ sɛ, ogya no hyew nnipa 100,000 afie, ɛsɛee adan bɛboro 17,400 na ekunkum nnipa 250.

Ɛnnɛ, ɛno akyi 120 no, ɔkwan a wɔfa so dum ogya wɔ nnɛ mmere mu no aboa ma wɔasiw ogya akɛse ano. Nanso afie a ɛhyew da so ara yɛ asiane a ɛwɔ hɔ. NFPA (National Fire Protection Association) ka sɛ wɔ United States no, afie a ɛhyewee kunkum nnipa bɛyɛ mpem anum afe biako. Sɛnea wɔakyerɛw wɔ The Vancouver Sun no mu no, NFPA de kɔkɔbɔ ntiantia a ɛbɛboa ma wɔasiw ogya ano wɔ fie mae. Ne titiriw ni:

◻ Mma wɔnnom tawa wɔ fie hɔ. Asiane ahorow a sigaretnomfo a wɔnyɛ ahwɛyiye ma ɛba no da so araa yɛ ade a edi kan a ɛma nnipa wu wɔ afie a ɛhyew mu

◻ Nsɔ afiri a ɛma ɔdan mu yɛ hyew no nsi so a obiara nhwɛ anaa bere a woada

◻ Nsɔ anyinam ahoɔden nneɛma bebree wɔ hama biako pɛ so wɔ bere koro mu anaasɛ mfa anyinam ahoɔden hama a enni ahoɔden nni dwuma.Fa fus a ɛfata di dwuma.

◻ Mma fononoo ne wusiw akwan mu nyɛ fĩ. Hwɛ no afe biara.

◻ Hwɛ dɔn a ɛde ogya ho kɔkɔbɔ ma no sɛ eye bere nyinaa, na sesa mu baatre no afe biara. Hwɛ sɛ abusua no mufo nyinaa nim kɔkɔbɔ dɔn no nnyigyei.

◻ Hwɛ sɛ wɔn a wɔwɔ abusua no mu nyinaa nim beae a sɛ ogya tɔ fie no mu a wobeguan afa, na ma ɔkwan no mu nna hɔ.