Asuafo a Yɛbɛkyerɛ Wɔn Kwan Aba Ahyehyɛde a Egyina Hɔ Ma Yɛn Din no Mu
1 “Ɛyɛ asɛm a wɔka wɔ kasa bɛboro 200 mu. Ɛyɛ asɛm a wɔte no nsase bɛboro 210 so. Ɛyɛ asɛm a nnipa ankasa de kɔ baabiara a wobehu nkurɔfo. Ne nyinaa yɛ asɛnka ɔsatu a ɛsen biara a wiase no ahu pɛn no fã, asɛm a ɛreka nnipa ɔpepem pii abom wɔ wiase nyinaa. Wɔayɛ nhyehyɛe ama Yehowa Adansefo de ayɛ adwuma yi bɛboro mfe ɔha ni!”
2 Saa na wofi Jehovah’s Witnesses—The Organization Behind the Name video no mu nsɛm no ase. Ɛkɔ so bua nsɛmmisa a ɛne: Henanom ne Yehowa Adansefo ankasa? Ɔkwan bɛn so na wɔahyehyɛ wɔn dwumadi no? Wɔkyerɛ no kwan? Wɔboa wɔ sika fam? Nokwasɛm a ɛyɛ sɛ “wɔatete Yehowa Adansefo wɔ wiase nyinaa sɛ ahyehyɛde ma wɔaboa wɔn afipamfo ma wɔanya Bible mu gyidi no” kanyan wɔn a wɔhwɛ no pii, na ɛhyɛ wɔn nkuran ma wɔn ankasa hu ahyehyɛde a egyina hɔ ma yɛn din no. Bere a ɔbea bi a na ɔresua ade hwɛɛ video yi akyi no, ɔde anigye sui, na ɔde anisɔ kae sɛ: “Ɛbɛyɛ dɛn na obi ntumi nhu sɛ eyi ne nokware Nyankopɔn, Yehowa, no ahyehyɛde?”—Fa toto 1 Korintofo 14:24, 25 ho.
3 Ná ɔbea foforo atoto Bible no sua mu bere tenten, nanso na ontumi nnye nokwasɛm a ɛne sɛ Baasakoro yɛ atoro nkyerɛkyerɛ no ntom. Afei woyii yɛn video no kyerɛɛ ɔne ne kunu. Dwumadi no kanyan wɔn yiye ma wɔhwɛɛ no mprenu anadwo no ara. Wɔn adesua a edi hɔ no, ɔyere no kyerɛe sɛ ɔpɛ sɛ ɔyɛ Ɔdansefo. Ɔkae sɛ na ɔde n’adwene asi gyidi a ɔwɔ wɔ Baasakoro no mu so araa ma na ɔnhwɛ yɛn ahyehyɛde no ne nnipa a wɔwom no. Ɔnam video no so hui sɛ wahu Onyankopɔn nokware ahyehyɛde no. Ɔpɛe sɛ ofi afie afie asɛnka adwuma no ase amonom hɔ ara. Bere a wɔkyerɛkyerɛɛ nea ehia na ama wabɛyɛ ɔdawurubɔfo a wɔmmɔɔ no asu mu kyerɛɛ no no, ɔkae sɛ: “Mommma yɛnntwentwɛn yɛn nan ase.” Ogyaee n’asɔre fii asɛnka adwuma no ase, na ɔbɛyɛɛ obi a otumi pa Baasakoro nkyerɛkyerɛ no ho ntama yiye.
4 Ada adi pefee sɛ sɛ Bible asuafo hu Yehowa ahyehyɛde no na wɔne no bɔ a, wonya honhom fam nkɔso kɛse na wɔn ho kokwaw ntɛmntɛm. Nea ehia titiriw no, bere a wɔbɔɔ nnipa 3,000 asu Pentekoste da no, ‘wɔkɔɔ so kuraa asomafo no kyerɛ ne ayɔnkofa mu.’ (Aso. 2:42, NW ase hɔ asɛm) Ɛho hia sɛ yɛboa Bible asuafo ma wɔyɛ saa ara nnɛ. Yɛbɛyɛ dɛn atumi ayɛ saa?
5 Gye Asɛyɛde no Tom: Ɛsɛ sɛ obiara a ɔyɛ afoforo asuafo no hu sɛ ɛyɛ n’asɛyɛde sɛ ɔkyerɛ Bible asuafo kwan ba Onyankopɔn ahyehyɛde no mu. (1 Tim. 4:16) Ɛsɛ sɛ ɔfa bere a wɔde yɛ adesua biara sɛ anigye da a ɔfoforo no de nsu mu asubɔ bɛyɛ n’ahosohyira ma Yehowa no ho sɛnkyerɛnne no nnyinaso. Nsɛm a wobisa wɔ n’asubɔ no mu biako ne: “So wote ase sɛ w’ahosohyira ne asubɔ da wo adi sɛ Yehowa Adansefo no mu biako a ɛma wo ne ahyehyɛde a Onyankopɔn honhom kyerɛ no kwan no bɔ fekuw anaa?” Enti, ɛho hia sɛ ohu sɛ ɔrentumi nsom Onyankopɔn yiye bere a ɔmfa ne ho mmɔ nokware Kristofo asafo no.—Mat. 24:45-47; Yoh. 6:68; 2 Kor. 5:20.
6 Kɔ so kyerɛ osuani no ade fa mo asafo no ne amanaman ntam ahyehyɛde a egyina hɔ ma Yehowa Adansefo no ho. Yɛ eyi bere biara a mobɛyɛ Bible adesua, a nea edi kan no na wode befi ase. Fi mfiase pɛɛ to nsa frɛ osuani no sɛ ɔmmra asafo nhyiam horow, na kɔ so to nsa frɛ no.—Adi. 22:17.
7 Fa Nnwinnade a Wɔde Ma no Di Dwuma: Yɛn nhoma ahorow a ɛsen biara a yɛde yɛ ofie Bible adesua ne Dɛn na Onyankopɔn Hwehwɛ Fi Yɛn Hɔ? nhomawa no ne Nimdeɛ a Ɛde Kɔ Daa Nkwa Mu nhoma no. Ne nyinaa twe adwene si hia a ehia sɛ obi de ne ho bɔ asafo no so. Ahwehwɛde nhomawa no ti 5 no ba awiei sɛ: “Ɛho hia sɛ wokɔ so sua Yehowa ho ade na wudi n’ahwehwɛde ahorow so. Nhyiam horow a wobɛkɔ wɔ mo hɔnom Yehowa Adansefo Ahenni Asa so no bɛboa wo ma woayɛ saa.” Nimdeɛ nhoma no kɔ so hyɛ Bible asuafo nkuran sɛ wɔnkɔ nhyiam horow. Ti 5, nkyekyem 22 no de ɔfrɛ yi ma sɛ: “Yehowa Adansefo . . . [de] anigye hyɛ wo nkuran sɛ wo ne wɔn nsom Onyankopɔn wɔ ‘honhom ne nokware mu.’ (Yoh. 4:24)” Ti 12, nkyekyem 16 no ka sɛ: “Bere a wotoa adesua yi so na wode yɛ wo su sɛ wobɛkɔ Yehowa Adansefo nhyiam horow no, wo gyidi bɛyɛ den kɛse asen saa mpo.” Ti 16, nkyekyem 20 ka sɛ: “Fa yɛ wo su sɛ wobɛkɔ Yehowa Adansefo nhyiam horow.” Ɛde ka ho sɛ: “Eyi bɛboa wo ma woate Onyankopɔn ho nimdeɛ ase na afei wode adi dwuma wɔ w’asetra mu, na ɛde anigye abrɛ wo. Wiase nyinaa Kristofo nuayɛ no muni a wobɛyɛ no bɛboa wo ma woabɛn Yehowa.” Ti 17 no kyerɛkyerɛ sɛnea obi benya nokware ahobammɔ wɔ Onyankopɔn nkurɔfo mu pefee. Bere a yɛne afoforo sua ade no, ɛyɛ yɛn asɛyɛde sɛ yebesi nhoma no afã ahorow yi so dua.
8 Yehowa Adansefo—Wɔde Biakoyɛ Reyɛ Onyankopɔn Apɛde Wɔ Wiase Nyinaa nhomawa no yɛ adwinnade pa a wɔasiesie na ama ankorankoro ahu ahyehyɛde a aniwa hu koro pɛ a Yehowa de redi dwuma ma wɔayɛ n’apɛde nnɛ no. Yɛn som adwuma, nhyiam horow, ne ahyehyɛde no ho nkyerɛkyerɛmu a emu da hɔ a ekura no bɛhyɛ ɔkenkanfo no nkuran ma ɔde ne ho abɔ yɛn wɔ Onyankopɔn som mu. Wɔkamfo kyerɛ sɛ sɛ yefi Bible adesua ase pɛ a, ɛsɛ sɛ yɛde nhomawa yi bi ma osuani no na n’ankasa kenkan. Ɛho nhia sɛ yɛne no sua sɛnea na yɛyɛ no bere bi a atwam no.
9 Video ahorow a Asafo ti no ayɛ no bi yɛ nnwinnade a ɛkyɛn so a yɛde bɛkyerɛ Bible asuafo kwan aba ahyehyɛde a egyina hɔ ma yɛn din no mu. Ɛbɛyɛ papa sɛ wɔbɛhwɛ (1) The New World Society in Action no tĩ sini a wɔyɛɛ no 1954 mu a na ɛfa ɔkwampa ne ɔdɔ honhom a Yehowa ahyehyɛde no nam so di dwuma ho no mu; (2) United by Divine Teaching video no kyerɛkyerɛ biakoyɛ a asomdwoe wom a wɔada no adi wɔ yɛn amanaman ntam nhyiam horow a wɔyɛe wɔ Europa Apuei fam, Amerika Kesee fam, Afrika, ne Asia no ase mu; (3) To the Ends of the Earth video no twee adwene sii Ɔwɛn Aban Gilead Bible Sukuu no mfirihyia 50 no so, na ɛkyerɛ nkɛntɛnso a asɛmpatrɛwfo anya wɔ wiase nyinaa asɛnka adwuma no mu so; (4) Jehovah’s Witnesses Stand Firm Against Nazi Assault no ka akokoduru a Adansefo no daa no adi ne nkonim a wodii wɔ Hitler ɔtaa a emu yɛ den a ɔde baa wɔn so no mu ho asɛm; ne afei, (5) Jehovah’s Witnesses—The Organization Behind the Name.
10 Fa Nhyiam Horow Ho Botae a Ɛma Nkɔso Sisi Hɔ: Ɛsɛ sɛ wokyerɛkyerɛ mu kyerɛ osuani no sɛ yehia kokoam nkyerɛkyerɛ a wɔde ma wɔ ofie Bible adesua mu no ne sukuudan mu nkɔmmɔbɔ ahorow a wɔde ma wɔ asafo nhyiam horow ase no. (Yoh. 6:45) Ehia sɛ obi a ɔyɛ foforo no nya nkɔanim wɔ Kyerɛwnsɛm no ne ahyehyɛde no nyinaa ho. Ne saa nti, biribiara nni hɔ a obetumi de asi nhyiamkɔ ananmu. (Heb. 10:23-25) Fi ase to nsa frɛ onipa no bra asafo nhyiam horow ase amonom hɔ ara. Anigyefo afoforo bi fi ase kɔ nhyiam horow ansa na wɔne wɔn ayɛ daa ofie Bible adesua mpo. Nokwarem no, yɛpɛ sɛ yɛn ankasa yɛ nhwɛso pa denam nhyiam a yɛbɛkɔ no daa so.—Luka 6:40; Fil. 3:17.
11 Ka nhyiam horow ho nsɛm a ɛfata kyerɛ suani no ne sɛnea wɔyɛ no, sɛnea ɛbɛyɛ a obenya abotɔyam bere a ɔrekɔ ne nhyiam a edi kan no. Esiane sɛ ɛnyɛ mmerɛw mma nnipa pii bere a wɔrekɔ beae foforo bi nea edi kan no nti, ɛbɛyɛ papa sɛ wobɛka osuani no ho akɔ Ahenni Asa so bere a ɔkɔ ne nhyiam a edi kan no. Sɛ woka ne ho bere a ohyia asafo no mufo no a, ɔbɛte abotɔyam nka. Nea ɛsen ne nyinaa no, yɛ ɔhɔhogyefo pa ma wo hɔho no, na ma onnya abotɔyam ne awerɛkyekye.—Mat. 7:12; Fil. 2:1-4.
12 Hyɛ osuani no nkuran ma ɔnkɔ ɔmansin nhyiam, da koro nhyiam titiriw, anaa ɔmantam nhyiam bere a hokwan no bue nea edi kan no. Ebia wubetumi de no aka mo hyɛn ho nhyehyɛe ho.
13 Ma Onnya Komam Anisɔ: Nhyehyɛe a Wɔayɛ Ma Yɛde Awie Yɛn Som Adwuma no kratafa 92 no kyerɛkyerɛ mu sɛ: “Sɛ wo ankasa woda anisɔ kɛse adi ma Yehowa ahyehyɛde no wɔ wo ne anigyefo no nkɔmmɔbɔ mu a, ɛbɛyɛ mmerɛw ama wɔn sɛ wobenya anisɔ pii na ɛbɛka wɔn ma wɔanya nkɔso kɛse wɔ Yehowa a wobehu no no mu.” Ka mo asafo no ho asɛmpa bere nyinaa, na ɛnyɛ asɛmmɔne. (Dw. 84:10; 133:1, 3b) Wɔ mpae a wobɔ wɔ Bible adesua no mu no, bɔ asafo no din na ka hia a ehia sɛ wo suani no de ne ho bɔ asafo no daa no ho asɛm.—Efe. 1:15-17.
14 Akyinnye biara nni ho sɛ yɛpɛ sɛ wɔn a wɔyɛ foforo no nya komam anisɔ ma fekubɔ a ɛyɛ anigye ne honhom fam ahobammɔ a ɛwɔ Onyankopɔn nkurɔfo mu no. (1 Tim. 3:15; 1 Pet. 2:17; 5:9) Sɛ́ Yehowa Adansefo no, momma yɛnyɛ nea yebetumi nyinaa nkyerɛ Onyankopɔn Asɛm no asuafo kwan mmra ahyehyɛde a egyina hɔ ma yɛn din no mu.
[Asɛm a wɔafa aka wɔ kratafa 3]
Bible asuafo nya honhom fam nkɔso ntɛmntɛm bere a wɔn ankasa hu ahyehyɛde no
[Asɛm a wɔafa aka wɔ kratafa 4]
To nsa frɛ Bible asuafo ntɛm ma wɔmmra asafo nhyiam ahorow