Aisraeri e Kare Aienda ku Hondo —Ngei Isusu Tisikaendiwo?
“KANA umwe wenyu akaramba kurhwisa França kana Inglaterra, imwimwi mwese mucafa!” ndizvona zvakakhuira musurudado we Cinazii ku grupu re Apupuri a Djehovha. Masurudado e Cinazii ainga akagadzirira kurhwisana, asi apana Mupupuri wa Djehovha wakasiya kutenda kake Hondo Yecipiri ye Nyika Yese payaiitika. Kunyazi masurudado e SS ainga ano mapfuti munyara eciatsera nge padhuze, apana kana umwe we hama dzedu wakatendera . Wainga uri ushingi kamare! Muezaniso uu, unonyasa kupangidza maonero atinawo hinga Apupuri a Djehovha: Isusu tinoramba kurhwisa pa hondo dze nyika ino. Kunyazi ecitithyisidzira kuda kutiuraya, tinorumbwa tisina dii ratinotsigira.
Asi andiesepi anodziti Akristu anotenderana nazvo. Akawanda anotendera kuti Mukristu unoita uye unodikana kudziirira nyika yake. Pamweni anosorangarira kuti: ‘Aisraeri e kare ainga ari anhu a Mwari uye aienda korhwisana ku hondo; hino ngei Akristu asikadikani kuita izvona nyamasi uno?’ Maizozvidaira kudini? Zvaizodikana kupanganidza kuti mugariro we Aisraeri e kare wakasiyana maningi no mugariro we anhu a Mwari nyamasi uno. Ngatione musiyano mishanu.
1. ANHU ESE A MWARI NGEE DZINZA RIMWE BASI
Mu nguwa ye kare, Djehovha akaunganidza anhu ake kuti agare Dzinza rimwe basi—Israeri. Ayena akadainza Aisraeri hingana “pfuma yake inokosha pakati pemadzinza ese.” (Eki. 19:5) Mwari akaapasa mbuto yawo kamare ye kugara. Hino, Mwari paibvunza Aisraeri kuti aende ku hondo korhwisana no madzinza amweni, awona ainga asikarhwisani kana kutsakatisa hama dzawo, kana kuti kutsakatisa anhu amweni ainamatawo Djehovha.a
Nyamasi uno, anamati e cokwadi a Djehovha anobva ku “marasa ese, ku madzinza ese, anhu ese uye ku mireketero yese.” (Zvak. 7:9) Kana anhu a Mwari akaenda ku hondo, awona aizorhwisa—kana kuuraya kamare—hama dzawo dze kutenda.
2. DJEHOVHA AKAPASA MUTEMO KUTI AISRAERI AENDE KU HONDO
Mu nguwa yekare, Djehovha ndiye aireketa kuti a Israeri aizoenda kurhwisana rini uye ngei. Ngo muezaniso, Mwari akabvunza Aisraeri kuti aite utongi wake kuti arhwisa Akenani. Dzinza iri re akenani rainyasa kuziikanwa nge kunamata madhimoni, kuita useki wakanyanyisisa uye ku baira ana awo. Kusiya izvona, Akenani airarama mu nyika yainga yakapira Djehovha anhu ake, ndiyo ndaa Djehovha akapasa mutemo we kuatsakatisa, kuitira kuti zviro zvakashata zvaiizwa nawo zvisabate-bate Aisraeri. (Rev. 18:24, 25) Asi kunyazi mumasure mekuti Aisraeri apinda mu Nyika Yakapikirhwa, nguwa dzimweni, Mwari aitendera kuti awona arhwisane no madzinza aiazonda. (2 Sam. 5:17-25) Asi apana nguwa yakatendera Djehovha kuti aisraeri adzisanangurire oga kwenda ku hondo. Paaita izvona, kakawanda kakhona mugumisiro wawo wainga usiripi wakanaka.—Num. 14:41-45; 2 Mak. 35:20-24.
Nyamasi uno, Djehovha atenderi kuti anhu aende ku hondo. Anhu anorhwisana kuti adziirire zvaanoda haiwa zvinodiwa na Mwari. Awona anoita izvona pamweni ngekuda kukudza nyika yaanogara, kutunhudzira zviro zvaanazvo, kana ngekuda kudziirira zve matongerhwe e nyika. Hino ku aya anobhuya kuti arikurhwisana ngekuda kudziirira gereja rawo kana ngekuda kuuraya azondi a Mwari? Djehovha ndiye acadziirira anamati ake ecokwadi uye acatsakatisa azondi ake mu hondo ye ramangwana—hondo ye Amagedhoni. (Zvak. 16:14, 16) Mu hondo iyona, cikwata ce anyahondo a Djehovha cicaumbwa no zvisikwa zve kumwiya, haiwa no anhu anonamata Djehovha.—Zvak. 19:11-15.
3. AISRAERI AINGA ASIKAURAYI AYA AIPANGIDZA KUTENDA
Djehovha paairhwisa Djeriko, anyahondo ake akazwira usisi Rakabhi no mhuri yake, hino hondo dze mazuwa ano dziri kuzwira usisi here aya anopangidza kutenda?
Mu nguwa ye kare, anyahondo e Israeri aipangidza usisi kakawanda kese ku aya aipangidza kutenda kuna Mwari uye awona aitsakatisa anhu aya basi aibhuiwa na Djehovha kuti aidikana kuuraiwa. Onai miezaniso miiri. Djehovha akapasa mutemo kuti Djeriko ritsakatiswe, asi Aisraeri aazi kuuraya Rakabhi no mhuri yake nge ndaa ye kutenda kakapangidzwa no Rakabhi. (Djs. 2:9-16; 6:16, 17) Uye nokuhamba ke nguwa, mumasure mekuti Adjibhiyoni apangidza kuti anoreremedza Djehovha, apana akauraiwa ku thaundi rawo.—Djs. 9:3-9, 17-19.
Nyamasi uno, madzinza anoenda ku hondo azwiri usisi upenyu we aya anopangidza kutenda. Uye nguwa dzimweni, anhu asina ndaa anotouraiwawo pa hondo idzona.
4. AISRAERI AIDIKANA KUTEERERA MITEMO YA MWARI INOCOKUITA NO HONDO
Mu nguwa ye kare, Djehovha akapasa Aisraeri mutemo we kuteerera nhungamiriro dzake paanonga arikurhwisana ku hondo. Ngo muezaniso, Djehovha akabvunza kuti awona aidikana kuita “citenderano cerunyararo” asati arhwisana. (Dhe. 20:10) Djehovha aietserawo kuti masurudado e Aisraeri agare no mugariro wakacena, kutobatanidzawo musasa wese (Dhe. 23:9-14) Ngo muezaniso, anyahondo e nyika dzimweni aidzipa anakadzi e nyika dzairhwisa, asi Djehovha airambidza Aisraeri kuita izvona. Kubhuya zvazviri, awona aitenderhwa kucata no mwanakadzi wainga ari muranda, mumasure me mwedzi umwe we kuwina thaundi raaigara.—Dhe. 21:10-13.
Nyamasi uno, nyika dzinganani dzakaasinari citenderano ce nyika yese. Citenderano icona cinopasa mitemo minganani dzinodikana kuizwa mu hondo. Mitemo idzona dzinocokuita no kudziirira anhu asiripi masurudado, asi zvinotsukwarisa kuti mitemo idzi adziteererhwi nguwa dzese.
5. MWARI AKARHWIRA ANHU AKE
Kodi Mwari ano dzinza raanorhwira here hingana kutsigira kaakaita Aisraeri paakarhwisa Djeriko?
Mu nguwa ye kare, Djehovha akarhwira Aisraeri, kakawanda kakhona aiita kuti awona awine nge mushobo unoshamisa. Ngo muezaniso, Djehovha akabetsera kudini Aisraeri kuti akunde thaundi re Djeriko? Nge kuteerera mitemo ya Djehovha, anyahondo e Israeri “paakakhuwa no izwi re hondo, ukutira wakambwera” uye izvona zvakaita kuti zviite nyore kuwina thaundiro. (Djs. 6:20) Uye awona akakunda kudini Aamori? “Djehovha akaita kuti masanza makuru ecibva kudenga aagwire . . . Zvezvirokwazvo akawanda akauraiwa no masanza kudarika aya akauraiwa no supada ye Aisraeri.”—Djs. 10:6-11.
Nyamasi uno, Djehovha aabetseri nyika ipi hayo pakurhwisana. Umambo wa Mwari, na Djesu hingana Mambo, “auiti dii re nyika ino.” (Juau 18:36) Kubhuya zvazviri, Sathani ndiye uno masimba ku atongi ese e nyamasi ino. Utsinye unoitika pa hondo unopangidza pamhene mushobo wakashata iyena.—Ruka 4:5, 6; 1 Juau 5:19.
AKRISTU E ZVIROKWAZVO ANOITA KUTI PAGARE NO RUNYARARO
Hingana zvataona, mugariro wedu wakasiyana kamare no mugariro we Aisraeri ekare. Asi misiyano ii, andiyopi basi inoita kuti tisaende ku hondo. Ngo muezaniso, Mwari akabhuya kuti mu mazuwa ekupedzesera, aya aizofundiswa naye “aizofundirapizve kurhwa,” zvecibudisa pamhene kuti ainga asikazodzibatanidzi pa hondo. (Isa. 2:2-4) Kusiya izvona, Kristu akabhuya kuti afundi ake “aizogarapi dii re nyika”; kana kuti awona aizotsigirapi pa kurhwisana ke nyika.—Juau 15:19.
Asi Kristu akakohomedzesa ateeri ake kuti aite zvinopinda ipona. Ayena akaafundisa kuti awona asagare no unhu unoita kuti aige bundu, agare no shungu kana kuenda ku hondo. (Mat. 5:21, 22) Ayena akafundisazve ateeri ake kuti agare anhu “anoita runyararo,” kana kuti agare anhu ano runyararo no amweni uye ade azondi awo.—Mat. 5:9, 44.
Hino tingabhuyei pacedu kamare? Zvingabvira kuti isusu atina cido cokwenda ku hondo, asi mu mwoyo medu muno mazwire here e kukwikwidzana kana shanje, aizobara kusapindirana kana kuparadzana mu ungano? Tinoda kurumbwa tecipeta masimba kuti tisiyane no mazwire akadai.—Tig. 4:1, 11.
Isusu atipindiri hondo dze munyika, pane kuita izvona, tinopeta masimba kuti tigare no runyararo uye rudo pakati pedu. (Juau 13:34, 35) Patinonga tecietsera kuti Djehovha apedze hondo nokusikaperi, takashinga kurumbwa tisina dii ratinotsigira.—Pis. 46:9.
a Nguwa dzimweni, madzinza e Aisraeri airhwisana ari oga, asi izvona zvainga zvisikapfadzi Djehovha. (1 Mad. 12:24) Asi nguwa dzimweni Djehovha aitendera kuti arhwisane, ngekuti madzinza amweni ainga asiya kugondeka uye, ainga aita zvitema zvakakura.—Ato. 20:3-35; 2 Mak. 13:3-18; 25:14-22; 28:1-8.