Luka

TE FAAHAPA ˈTURA TE MESIA I TE MAU PHARISEA I TE ITE ORE I TE SABATI.

6 E tae aˈera i te sabati i parauhia i te piti o na sabati rarahi ra, haere atura Iesu na roto i te mau aua sitona, ua huhuti ihora te mau pǐpǐ na ˈna i te sitona, orooro ihora i te rima, amu ihora. 2 Ua parau maira te mau Pharisea ia ratou, Eaha outou i rave ai i tei ore e au i te ture ia rave i te sabati? 3 Ua parau atura Iesu ia ratou, na ô atura, Aitâ outou i taio i ta Davida i rave e tei amui atoa ia ˈna, a poia ˈi ratou ra; 4 e ua tomo oia i roto i te fare o te Atua, e rave atura, e amu ihora i te pane o te aro ra, e hopoi atura hoi na tei amui atoa ia ˈna ra; o tei ore hoi e au i te ture ia amu, maori râ o te feia tahuˈa anaˈe ra? 5 Ua parau aturâ hoi oia, O te Tamaiti a te taata te Fatu o te sabati. 6 E tae aˈera i te hoê sabati, tomo atura oia i roto i te sunago, haapii atura, tei reira te hoê taata, ua mǎrô to ˈna rima atau. 7 Te hiˈo ra te mau papai parau e te mau Pharisea ia ˈna, i te faaoraraa oia i te maˈi i te sabati, ia noaa ta ratou pariraa ˈtu ia ˈna. 8 Ua ite râ oia i to ratou manaˈo, e ua parau atura i te taata rima mǎrô ra, A tia, ei ropu nei tia ˈi. Ua tia aˈera oia i nia, tia ihora. 9 Ua parau atura Iesu ia ratou, E ui atu na vau ia outou; Eaha te au i te ture ia rave i te sabati? O te maitai anei, e o te ino? O te faaora anei, e o te taparahi? 10 Ua hiˈo atura oia ia ratou atoa e ati noa ˈˈe, ua parau atura i taua taata ra, A titoo na i to rima; e tei te na reiraraa ra, ora roa ˈˈera to ˈna rima mai te tahi atoa ra. 11 Î roa ˈˈera ratou i te riri, e ua paraparau ihora ratou ratou iho i ta ratou ravea ia Iesu.

12 I te reira pue mahana to ˈna haapairaa i nia i te hoê mouˈa e pure, e ao noa ihora te rui ia ˈna i te pureraa ˈtu i te Atua. 13 E ao aˈera, ua parau atura oia i ta ˈna mau pǐpǐ e haere mai ia ˈna ra, ua maiti ihora oia i e tino ahuru e ma piti, o ta ˈna ïa i mairi i te iˈoa, e aposetolo: 14 o Simona, ta ˈna i mairi atoa ia Petero, e tana taeae o Anederea; o Iakobo e o Ioane, o Philipa e o Baretolomea, 15 o Mataio e o Toma, o Iakobo a Alephaia ra, e o Simona tei parauhia, ia Zelote; 16 o Iuda te taeae o Iakobo, e o Iuda Isakariota, o tei riro ei haavare ra. 17 Ua pou maira oia i raro e ratou atoa, e faaea ihora i te vahi papu, tei reira te tahi pae pǐpǐ a ˈna e te taata atoa e rave rahi, no Ierusalema e no te mau vahi atoa i Iudea ra, e no te pae tahatai i Turia e Sidona, i haere mai e faaroo ia ˈna, e ia faaorahia ratou i to ratou maˈi; 18 e te feia atoa i haapeapeahia e te varua faufau ra, faaora-atoa-hia ihora ratou. 19 Ua titau maira taua feia rahi atoa ra e faatiaia mai ia ˈna, te pǔpû atura hoi te mana na roto ia ˈna e ora roa aˈera ratou atoa.

20 Ua hiˈo atura tana mata i ta ˈna ra mau pǐpǐ, e ua parau atura, E ao to outou, e tei haehaa, no outou hoi te basileia o te Atua ra. 21 E ao to outou, e tei poia i teie nei, e faaîhia hoi outou. E ao to outou, e tei oto i teie nei, e ata hoi outou. 22 E ao to outou ia riri mai te taata ia outou, e ia faataa ê ia outou, e ia tâhito mai, e ia faarue noa i to outou iˈoa ma te faaino, no te Tamaiti a te taata nei. 23 E oaoa i te reira mahana, e ouˈouˈa noa i te oaoa; ua ite hoi outou e e utua rahi ta outou tei te ao; i na reira mai hoi to ratou hui tupuna i te mau peropheta ra. 24 E ati râ to outou, e te feia taoˈa rahi! ua noaa hoi to outou oaoaraa. 25 E ati to outou, e te feia i î na! e poia hoi outou. E ati to outou, e te feia i ata i teie nei! e mihi hoi outou e e oto. 26 E ati to outou ia haamaitai mai te taata atoa ia outou! i na reira hoi to ratou hui tupuna i te mau peropheta haavare ra.

27 Teie râ tau parau ia outou e faaroo mai na, E aroha i to outou mau enemi, e hamani maitai atu i te feia i riri mai ia outou. 28 E faaora i te feia i tuhi mai ia outou, e pure hoi no te feia hamani ino mai ia outou. 29 O tei moto mai i to papariˈa na, e fariu atoa ˈtu i te tahi; e o tei rave mai i to ahu pu na, eiaha atoa e tapae i to pereue. 30 E horoa ˈtu i tei ani mai ia oe ra; e o tei rave i ta oe na taoˈa, eiaha e ani faahou atu. 31 E o ta outou e hinaaro ia vetahi ê ra, e na reira atoa ˈtu outou ia ratou.

32 O te feia i aroha mai ia outou, o ta outou â ïa e aroha ˈtu, eaha te haamaitairaa ia outou i reira te aroha atoa nei hoi te feia rave hara i tei aroha mai ia ratou. 33 E o te feia i hamani maitai mai ia outou, o ta outou â ïa e hamani maitai atu, eaha te haamaitairaa ia outou i reira? te na reira atoa nei hoi te feia rave hara. 34 E o te feia ta outou e manaˈo e noaa ta outou i reira, o ta outou â ïa e horoa ˈtu, eaha te haamaitairaa ia outou i reira? te horoa nei hoi te feia rave hara i te feia rave hara ia faito ta ratou ia roaa mai. 35 E aroha râ outou i to outou mau enemi; e hamani maitai, e horoa, eiaha noa ˈtu ei manaˈo hoo; e e utua rahi ïa ta outou; e riro hoi outou ei tamarii na te Teitei: e hamani maitai hoi to ˈna i te feia mauruuru ore e te taata ino. 36 E aroha atoa hoi outou mai to outou Metua e aroha maira. 37 Eiaha e faaino atu, e eita outou e faainohia mai; eiaha e faahapa ˈtu, e eita outou e faahapahia mai: e faaore atu i te hara, e e faaorehia mai ta outou: 38 e horoa, e e noaa hoi ta outou; e î te faito, e neneihia, e ueuehia, e manii noa ˈtu, na te taata e ninii i roto i to outou ahu. O taua faito hoi ta outou e faito ra, o te faito-faahou-hia mai ïa ta outou.

39 Ua parau atura oia i te parabole ia ratou, E tia anei i te matapo ia aratai i te matapo? e ore anei e hiˈa apipiti i roto i te apoo? 40 Aore te pǐpǐ i hau i tana ra orometua, o te pǐpǐ râ i haapii-hua-hia ra, e riro ïa i te faito atoa i tana orometua. 41 Eaha hoi oe i hiˈo ai i te pâpaa iti i roto i te mata o to taeae, aita hoi oe i ite i te raau rahi i roto i to oe iho mata? 42 E eaha oe e tia ˈi ia parau i to taeae, E tau taeae, ho mai na ˈu e iriti i te pâpaa iti i roto i to mata na; aore hoi oe i ite i te raau rahi i roto i to oe iho mata? E tera ra haavare e! e mata na i te iriti i te raau rahi i roto i to oe iho mata, ei reira oe e ite maitai ai ia iriti i te pâpaa iti i roto i te mata o to taeae. 43 E ere hoi i te raau maitai tei hotu mai i te maa ino; e ere hoi i te raau ino tei hotu mai i te maa maitai. 44 Te itea nei te mau raau atoa i to ˈna iho huero mau: e ere hoi i to nia i te raau taratara te suke ia noaa mai, e te vine hoi e ere ïa to nia i te tataramoa. 45 E tuu mai te taata maitai i te mea maitai no roto i te pueraa o te maitai ra o to ˈna aau; e tuu mai te taata ino i te mea ino no roto i te pueraa o te ino ra o to ˈna aau: no te î hoi o te aau i parau ai te vaha.

46 Eaha outou i parau mai ai ia ˈu nei, E te Fatu, e te Fatu, e aore outou i haapao i ta ˈu parau? 47 O te haere mai ia ˈu nei faaroo ai i ta ˈu parau, e haapao maite ihora, e faaite atu vau ia outou i to ˈna faaau: 48 e au oia i te taata i patu i te fare, e ô atura i raro roa, haamau ihora i te niu i nia i te pǎpǎ: e pape-pue-hia ihora, e te uˈana i te paururaa mai i taua fare ra, aore râ te fare i aueue i te reira; ua haamauhia hoi i nia i te pǎpǎ. 49 Area tei faaroo noa e aore i haapao, e au ïa i te taata i patu i nia i te repo aore e haamauraa; e uˈana maira te pape pue i te paururaa mai, mairi ihora, haruru rahi to taua fare ra i te mairiraa.