ЭСКЕРОН ПОННА 2-ТӤ СТАТЬЯ
19-ТӤ КЫРӞАН Ӝытан
Дась-а тӥ арлэн тужгес но кулэ луись пумиськонэзлы?
«Монэ буре вайыса, тае быдэсъялэ» (ЛУКА 22:19).
МИ ТОДОМЫ
Малы Тодэ ваён ӝытан ми понна туж кулэ луись пумиськон луэ, кызьы солы дасяськоно но кызьы юрттоно мукетъёсызлы та пумиськонэ лыктыны.
1. Малы Тодэ ваён ӝытан — арлэн тужгес но кулэ луись пумиськонэз? (Лука 22:19, 20).
ИЕГОВАЛЭН калыкез понна Христослэсь кулонзэ Тодэ ваён ӝытан — арлэн тужгес но кулэ луись пумиськонэз. Ӝытанэз пусйыны косӥз ачиз Иисус. (Лыдӟе Лукалэсь 22:19, 20.) Ми туж возьмаськомы та пумиськонэз. Ӝытанэз пусйыны милям трос мугъёсмы вань. Ойдолэ эскеромы соос пӧлысь куд-огъёссэ.
2. Вералэ мугъёсты, малы ми туж возьмаськомы Тодэ ваён ӝытанэз.
2 Тодэ ваён ӝытан юрттэ милемлы малпаськыны, макем дуно ми понна Иисуслэн аслэсьтыз улонзэ сётэмез. Со милемлы тодамы вайытэ, кызьы ми со понна Иисуслы тау карыны быгатӥськомы (2 Кор. 5:14, 15). Со сяна, та пумиськонэ люкаськыса, ми ог-огмес юнматӥськомы (Рим. 1:12). Котькуд ар Ӝытанэ лыкто трос агайёс но сузэръёс, кудъёсыз пумиськонъёсы ветлэмысь дугдӥзы. Куке соос адӟо, макем шуныт соосты отын пумитало, куд-огез соос пӧлысь берен Иегова доры берытско. Озьы ик Ӝытанэ лыкто куноос но. Троссэ соос пӧлысь паймытэ со, мае соос адӟо но кыло та пумиськонын, но соос Библиез дышетыны кутско. Веранэз ӧвӧл, Ӝытан ми понна туж дуно луэ!
3. Кызьы Тодэ ваён ӝытан быдэс дунне вылысь агайёсты но сузэръёсты огазея? (Озьы ик учке суредэз.)
3 Озьы ик ми туж возьмаськомы Тодэ ваён ӝытанэз, малы ке шуоно тодӥськомы, та нуналэ быдэс дунне вылысь агайёсмы но сузэръёсмы тазьы ик лэсьто шуыса. Пӧртэм шаеръёсын шунды пуксемъя Иеговалэн Адӟись-Ивортӥсьёсыз огазе люкасько та нимысьтыз пумиськонэ. Ми кылзӥськомы Библия вылэ пыкиськем речез, кудаз вераське, макем дуно луэ Иисуслэн ми понна улонзэ сётэмез, кык ушъян-данъян кырӟанъёсты кырӟаськомы но киысь кие нянь но вина сётъяськомы. Та пумиськонын ньыль пол вӧсясько. Котькуд вӧсяськон бере ми вань сюлмысьтымы «аминь» шуиськомы. Ог 24 час ӵоже быдэс дунне вылысь вань кенешъёсын тазьы ик лэсьто. Ми, одӥг калык кадь, ваньмы ӵош Иеговаез но Иисусэз данъяськомы. Малпалэ гинэ, макем соос шумпото, ми шоры учкыса!
Тодэ ваён ӝытан быдэс дунне вылысь агайёсмес но сузэръёсмес огазея. (Учке 3-тӥ абзацез.)f
4. Мае ми эскеромы та статьяын?
4 Та статьяын ми эскеромы таӵе юанъёсты: кызьы аслэсьтыд сюлэмдэ дасяно Тодэ ваён ӝытанлы? Кызьы юрттыны луоз Ӝытанэ лыктэм куноослы? Кызьы юрттыны луоз агайёслы но сузэръёслы, кудъёсыз пумиськонъёсамы ветлэмысь дугдӥзы? Та юанъёслы валэктонъёс юрттозы милемлы та нимысьтыз пумиськонлы дасяськыны.
КЫЗЬЫ АСЛЭСЬТЫД СЮЛЭМДЭ ДАСЯНО ТОДЭ ВАЁН ӜЫТАНЛЫ?
5. а) Малы милемлы кулэ малпаськыны дун тырон сярысь? (Псалтирь 48:8—10). б) Мае тӥ тодӥды «Малы Иисус кулӥз?» видеороликысь?
5 Ӝытанлы сюлэмез дасян понна, нырысь ик кулэ малпаськыны Иисус Христослэн мозмытӥсь дун тыронэз сярысь. Ми асьмеос сьӧлыклэсь но кулонлэсь ноку но мозмытскыны ӧй быгатысалмы. (Лыдӟе Псалтирез 48:8—10, озьы ик учке «Малы Иисус кулӥз?» видеороликезa.) Соин ик Иегова ми понна аслэсьтыз Пизэ сётӥз. Со туж бадӟым дун тырон вал Иегова понна но, Иисус понна но (Рим. 6:23). Макем тросгес ми малпаськиськомы со сярысь, мар лэсьтӥзы соос ми понна, сокем золгес ми дунъяськомы та дун тыронэз. Та статьяын ми эскеромы, мар со сыӵе дун тырон. Озьы ик тодамы ваёмы, мае чидано луиз Иегова но Иисус, со дунэз тырон понна.
6. Мар со сыӵе дун тырон но малы дун тыроно луиз?
6 Иисус ми понна аслэсьтыз улонзэ сётӥз. Со вал дун, кудзэ тыриз Иегова, берыктон понна сое, мае ыштӥз Адам. Нырысь Адам сьӧлыктэм вал, нош собере со сьӧлыказ. Соин ик со ачиз но пырак улыны ӧз быгаты ни, солэн нылпиосыз но. Берыктон понна сое, мае ыштӥз Адам, Иисус аслэсьтыз сьӧлыктэм адями улонзэ сётӥз. Музъем вылын улыкуз, Инмарлэн Пиез «нокыӵе но сьӧлык ӧз лэсьты, Солэн кылаз-ымаз чеберъяськонэз-ӧрекчаськонэз ӧй вал» (1 Пётр 2:22). Соин ик кулон азяз Иисуслэн улонэз быдэсак тупа вал улонлы, кудзэ ыштӥз Адам (1 Кор. 15:45; 1 Тим. 2:6).
7. Кыӵе шуг-секытъёсын пумиськылӥз Иисус, музъем вылын улыкуз?
7 Музъем вылын улыкуз, Иисус котьку кылзӥськиз инмысь Атаезлэсь, со котьку капчи ӧй вал ке но. Иисус сьӧлыктэм вордӥськиз, нош солэн анаез но атаез сьӧлыко адямиос вал, озьы ке но со соослэсь кылзӥськиз (Лука 2:51). Бадӟымгес будэм бераз пумиськылӥзы, дыр, адямиос, кудъёсызлэн потэ вал, со анай-атаезлэсь медаз кылзӥськы яке Инмарлэсь законъёссэ мед тӥялоз шуыса. Но Иисус котьку кылзӥськись вал. Нош бадӟым будэм бераз Шайтан солэсь визьзэ сынаны кутскиз. Солэн потэ вал, Иисус Инмарез мед вузалоз шуыса (Матф. 4:1—11). Шайтанлэн туж потэ вал, Иисус мед сьӧлыкалоз шуыса. Солэн малпанэз быдэсмысал ке, Иисус дун тырыны ӧй быгатысал.
8. Кыӵе эшшо шуг-секытъёсын пумиськылӥз на Иисус?
8 Ужаны-тыршыны кутскемез бере но Иисус шуг-секытъёсын пумиськылӥз. Тушмонъёсыз сое уйылӥзы-уллязы, кӧня ке пол виыны но турттӥзы (Лука 4:28, 29; 13:31). Со сяна, солы чидано вал дышетскисьёсызлэсь янгышъёссэс (Марк 9:33, 34). Иисусэз судъямзы бере сое сантэмазы, ултӥязы, мыскыл каризы. Нош собере йыруж лэсьтӥсез кадь юбо борды кортӵогазы (Евр. 12:1—3). Юбо бордын Иисус огназ курадӟиз — со дыре Иегова сое ӧз утьы (Матф. 27:46)b.
9. Кыӵе тӥляд шӧдонъёсты кылдо, Иисуслэн дун тыронэз сярысь малпаськыса? (1 Пётр 1:8).
9 Бен, дун тырон понна, Иисус трос курадӟоно луиз. Куке ми малпаськомы ваньмыз сярысь, мае Иисус ми понна чиданы дась вал, милям сюлэммы яратонэн но тау каронэн пачылме. (Лыдӟе 1 Пётрлэсь 1:8.)
10. Мае чидано луиз Иегова, дун тырон понна?
10 Мае чидано луиз Иегова, дун тырон понна? Иеговалэн но Иисуслэн туж матысь кусыпъёссы вал — Иегова туж яратӥз аслэсьтыз Пизэ, соос куспын кадь яратон нокинлэн но ӧвӧл ни (Мад. 8:30). Малпалэ гинэ, мае шӧдӥз Иегова, куке адӟиз, кӧня шуг-секытъёсын пумиське Иисус музъем вылын. Иеговалы туж вӧсь вал адӟыны, солэсь Пизэ юнме янгыше уськыто, солэсь уг кылзӥсько, верамзэ пелязы ик уг поно но туж курадӟыто шуыса.
11. Мар юрттоз валаны, кыӵе шӧдонъёсыз вал Иеговалэн, Пиез кулыку?
11 Котькуд анай-атай, кудӥзлэн нылпиез кулэ, туж умой тодэ, макем бадӟым куректон со вае. Ми улӟытонлы юн оскиськомы ке но, матысь адямимес ыштон туж вӧсь каре. Та пример юрттэ ӧжыт ке но валаны, мае шӧдӥз Иегова, куке со адӟиз, макем курадӟыса кулӥз солэн яратоно Пиез (Матф. 3:17)c.
12. Мар кароно Тодэ ваён ӝытанозь кылем дыре?
12 Тодэ ваён ӝытан дырозь дыр трос ик кылемын ӧвӧл ини. Умой луоз та кылем дыре тросгес тодыны дун тырон сярысь, ас поннад Библиез эскерыку яке семьяын йыбырттон дыръя. Со сярысь тросгес тодон понна, уже кутэ «Возьмаськон башнялэсь онлайн-библиотеказэ» яке мукет пособиостыd. Со сяна, одно ик лыдӟе Библиез графикъя, кудӥз сётэмын «Христиан улонмы но ужан-тыршонмы» ужан тетрадьын. Нош Ӝытан нуналэ эн вунэтэ учкыны нимысьтыз поттэм ӵукна йыбырттонэз. Ми сюлэммес шонер дасямы ке, ми быгатомы мукетъёсызлы но юрттыны валаны, макем кулэ Тодэ ваён ӝытан (Езд. 7:10).
КЫЗЬЫ ЮРТТЫНЫ ЛУОЗ КУНООСЛЫ?
13. Мар ми карыны быгатомы, адямиос Ӝытан сярысь мед тодозы шуыса?
13 Кызьы ми юрттыны быгатомы куноослы? Нырысь ик, соосты Ӝытанэ ӧтёно. Ми быгатомы Ӝытан сярысь вераны адямиослы, кудъёссэ пумиталомы, ӟеч иворез веракумы. Озьы ик луоз азьло ик малпаськыны, кинэ милям ӧтеммы потэ тодмоосмы пӧлысь. Кылсярысь, кинэ ми ӧтьыны быгатомы ӵыжы-выжыосмы, ӵош ужасьёсмы, ӵош дышетскисьёсмы пӧлысь? Печатлам ӧтёнъёсмы быризы ке, ми быгатомы ыстыны соослы электрон ӧтёнлы ссылкаез. Макем ми шумпотомы, соос ваньзы лыктӥзы ке! (Екк. 11:6).
14. Макем пайдаё адямиез нимысьтыз ӧтён?
14 Нимысьтыз ӧтён туж пайдаё луэ. Тани одӥг пример. Сузэр, кудӥзлэн картэз Иеговалы уг оскы вал, туж паймиз, куке картэз шумпотыса вераз солы, соин ӵош Ӝытанэ мыноз шуыса. Малы со сокем паймиз? Малы ке шуоно азьвыл со картсэ трос пол ӧтьылӥз ини Ӝытанэ ӵош мыныны, но картэз ноку соглаш ӧз кариськылы. Нош мар воштӥськиз? «Учкы, мыным ӧтён сётӥзы»,— вераз картэз. Тӧро, кудӥныз со тодмо вал, солы нимысьтыз ӧтён сётэм. Та пиосмурт, со аре сяна, эшшо трос аръёс ӵоже Ӝытанэ ветлылӥз на.
15. Мае лыдэ басьтоно, адямиосты Ӝытанэ ӧтьыкумы?
15 Лыдэ басьтоно, адямиослэн, кудъёссэ ми Ӝытанэ ӧтиськомы, трос юанъёссы луыны быгато шуыса — тужгес но соос пумиськонъёсамы ноку ӧй вал ке. Ми быгатомы малпаны, кыӵе юанъёссы соослэн кылдыны быгато, но азьвыл ик дасяськыны соослы валэктон сётыны (Кол. 4:6). Кылсярысь, кинлэн ке тодэмез потоз: «Кызьы ортче пумиськон? Мар кема со кыстӥське? Кызьы дӥсяськыса отчы мыноно? Пырон понна дун тыроно-а? Отчы лыктэмъёслэсь коньдон бичалозы-а?» Кинэ ке Ӝытанэ ӧтьыкумы, солэсь юаны луоз, вань-а солэн кыӵе ке юанъёсыз. Вань ке, юанъёсызлы валэктон сётоно. Озьы ик луоз возьматыны «Иисус Христослэсь кулонзэ тодэ ваён» но «Мар каро Эксэйлык юртын?» видеороликъёсты. Отысь адями тодоз, кызьы ортчо милям пумиськонъёсмы. Со сяна, солы возьматыны луоз куд-ог малпанъёсты, кудъёсыз гожтэмын «Пумтэм вапумъёс ӵоже шумпотыса улэ!» книгалэн 28-тӥ уроказ.
16. Кыӵе юанъёссы кылдыны быгато куноосмылэн Ӝытан бере?
16 Ӝытан бере куноосмылэн выль юанъёссы кылдыны быгато. Соослы валантэм луыны быгатэ, малы туж ӧжытэз нянез сиизы но винаез юизы яке воксё нокин ӧз но сиы, ӧз но юы. Оло нош, соослэн тодэмзы потоз, макем ӵем ми Ӝытанэз пусйиськомы но Иеговалэн Адӟись-Ивортӥсьёсызлэн вань пумиськонъёссы таӵе амалэн ортчо-а? Тросэз та пӧлысь валэктэмын луоз речьын, кудӥз верамын луоз Ӝытан дыръя. Но адямилы, кудӥз пумиськонэ нырысьсэ лыктэ, та сярысь пыр-почгес валэктоно луоз. Та юанъёслы валэктон шедьтыны юрттоз «Почему Свидетели Иеговы отмечают Вечерю Господню не так, как это принято в других религиях» статья. Ӝытан азьын, Ӝытан дыръя но Ӝытан бере милям потэ лэсьтэммы ваньзэ, мае ми быгатӥськомы, юрттон понна соослы, кинъёслэн зэмлыкез тодэмзы потэ (Ап. уж. 13:48, ВД).
КЫЗЬЫ ЮРТТЫНЫ ЛУОЗ ПУМИСЬКОНЪЁСЫ ВЕТЛЭМЫСЬ ДУГДЭМЪЁСЛЫ?
17. Кызьы тӧроос юрттыны быгато пумиськонъёсы ветлэмысь дугдэмъёслы? (Иезекииль 34:12, 16).
17 Кызьы Ӝытан азьын, Ӝытан дыръя но Ӝытан бере тӧроос юрттыны быгатозы агайёслы но сузэръёслы, кудъёсыз пумиськонъёсы ветлэмысь дугдӥзы? Соослы котькудзылы саклык висъялэ. (Лыдӟе Иезекиильлэсь 34:12, 16.) Быгатэмдыя Ӝытан азьын тырше ваньмыныз соосын герӟаськыны. Соос мед шӧдозы, тӥ соосты яратӥськоды но соослы юрттэмды потэ шуыса. Ӧте соосты Ӝытанэ. Нош соос Ӝытанэ лыктӥзы ке, шуныт пумиталэ соосты. Ӝытан бере но та дуно агайёсын но сузэръёсын кусып воземысь эн дугдэ, юнматэ соосты но юрттэ выльысь Иегова доры берытскыны (1 Пётр 2:25).
18. Кызьы котькудмы юрттыны быгатӥськомы пумиськонъёсы ветлэмысь дугдэмъёслы? (Римъёслы 12:10).
18 Кызьы котькудмы юрттыны быгатӥськомы пумиськонъёсы ветлэмысь дугдэмъёслы? Куке соос Ӝытанэ лыктозы, соосты шуныт пумитаса, яратэмдэс но гажамдэс возьматэ. (Лыдӟе Римъёслы 12:10.) Эн вунэтэ: та агайёслы но сузэръёслы пумиськонэ лыктыны капчи ӧй вал, дыр. Оло нош, соос кышказы, кызьы соосты кенешын пумиталозы, мар соос сярысь вералозы, мар малпалозыe. Соин ик эн сётъялэ соослы сыӵе юанъёс, кудъёсыз сэрен соослэн мылкыдзы куашканы быгатоз, вӧсь карись кылъёс эн вералэ соослы (1 Фес. 5:11). Та агайёс но сузэръёс — милям семьямы. Ми шумпотӥськомы выльысь соосын ӵош Инмарлы йыбыртъяны! (Пс. 118:176; Ап. уж. 20:35).
19. Кыӵе пайда вае Иисуслэсь кулонзэ тодэ ваён?
19 Ми туж тау кариськомы, Иисус аслэсьтыз кулонзэ котькуд ар тодамы вайыны косӥз шуыса. Ӝытанэз пусъён милемлы но пайда вае, мукетъёсызлы но (Ис. 48:17, 18). Милям Иеговаез но Иисусэз яратонмы юнма. Озьы ик ми возьматӥськомы, туж дунъяськомы шуыса сое, мае соос ми понна лэсьтӥзы. Со сяна, ми матэгес луиськомы агайёсынымы но сузэръёсынымы. Озьы ик ми юрттӥськомы мукетъёсызлы тодыны, кыӵе пайда ваёз соослы азьланяз Иисуслэн дун тыремез. Тодэ ваён ӝытан — арлэн тужгес но кулэ луись пумиськонэз. Ойдолэ лэсьтомы ваньзэ, мае быгатӥськомы та пумиськонлы дасяськон понна!
КЫЗЬЫ ТӤ ВАЛЭКТЫСАЛДЫ?
Кызьы аслэсьтыд сюлэмдэ дасяно Тодэ ваён ӝытанлы?
Кызьы юрттыны луоз Ӝытанэ лыктэм куноослы?
Кызьы юрттыны луоз агайёслы но сузэръёслы, кудъёсыз пумиськонъёсамы ветлэмысь дугдӥзы?
18-ТӤ КЫРӞАН Дун сётон понна тау кариськомы
a Та статьяын пумиськись статьяосты но видеороликъёсты шедьтыны луоз jw.org сайтысь.
b Учке 2021-тӥ арын оштолэзь понна поттэм «Возьмаськон башняысь» «Лыдӟисьёслэсь юанъёссэс».
d Учке «Мае эскерыны луоз» рамкаез.
e Учке суредэз но «Кызьы кенеш соосты пумитаз» рамкаез. Агай, кудӥз пумиськонъёсы ветлэмысь дугдӥз, уг дӥсьты Эксэйлык юртэ пырыны, но собере со кышканзэ ворме. Сое шуныт пумитало но, со шумпотыса вераське кенешысь агайёсын.
f СУРЕДЪЁСЫН. Куд-ог шаеръёсын Иеговалэн ужась-тыршисьёсыз Ӝытанэ люкаськизы ини, нош мукет шаеръёсысь соослэн агайёссы но сузэръёссы та нимысьтыз пумиськонлы дасясько гинэ ай.