Jẹ Oma Vwerhen Owẹ Kidie Jihova Rhiabọreyọ Owẹ

1. Die yen idibo ri Jihova evo re fuevun se vwo ẹwẹn ivivẹ kpahen?

MAVỌ yen ọ vwerhen oma te ra vwọ riẹn nẹ Jihova rhiabọreyọ ihwo rọyen eje! Baibol na tare nẹ: “Ọrovwohwo na vwo omavwehe vwẹ ihwo rọye.” (Un 149:4) Jẹ, ọkievo ofu se dje ihwo evo te ẹdia rẹ ayen mi roro nẹ, ‘Jihova ghini rhiabọreyọ ovwẹ?’ O ji vwo ọkievo rẹ idibo ri Jihova evo re fuevun ga vwẹ ọke awanre vwo nene oka rẹ iroro tiọyena muabọ.​—1Sa 1:6-10; Job 29:2, 4; Un 51:11.

2. Oka rẹ ihwo vọ yen Jihova rhiabọreyọ?

² Baibol na djere phephẹn nẹ ihworakpọ re gbaree se vwo aroesiri ri Jihova. Vwẹ idjerhe vọ? Ofori nẹ e vwo esegbuyota kpahen Jesu kristi ji bromaphiyame. (Jọ 3:16) Ọtiọyena, avwanre djephia vwẹ azagba nẹ e kurhẹriẹ nẹ imwemwu avwanre ji ve kẹ Ọghẹnẹ nẹ ọhọre rọyen yen e che ru. (Iru 2:38; 3:19) Oma vwerhen Jihova avwanre de ruẹ erọnvwọn nana rere avwanre vẹ ọyen se vwo vwo uvi rẹ oyerinkugbe. Avwanre da davwẹngba avwanre eje vwo ru nene ive rẹ omaẹvwọkpahotọ avwanre vwọ kẹ Jihova ọkieje, o che rhiabọreyọ avwanre ji ni avwanre kerẹ igbeyan re kẹrerẹ.​—Un 25:14.

3. Die yen a cha ta ota kpahen vwẹ uyono nana?

³ Kẹ, diesorọ ihwo evo vwo roro ọkievo nẹ, Ọghẹnẹ rhiabọreyọ ayeen? Idjerhe vọ yen Jihova vwo djephia nẹ ọyen rhiabọreyọ avwanre? Mavọ yen Onenikristi se vwo vwo imuẹro nẹ Ọghẹnẹ ghini rhiabọreyọ ọyen?

OBORESORỌ IHWO EVO VWO RORO NẸ JIHOVA RHIABỌREYỌ AYEEN

4-5. Imuẹro vọ yen e se vwo ọ da dianẹ e nẹ oma rẹ avwanre kueku?

⁴ Vwo nẹ ọke emọ rhe yen buebun avwanre vwo nẹ oma rẹ avwanre kueku. (Un 88:15) Oniọvo ọshare ọvo re se Adrián da ta: “Ọkieje yen mi vwo nẹ oma mẹ kueku. Me karophiyọ nẹ me vwọ ghwanra cha, me nẹrhovwo nẹ e jẹ orua mẹ dia Iparadaisi, dede nẹ o ghwe mu vwe ẹro nẹ mi fo ohwo rọ sa dia asan ọtiọyeen.” Tony ra yọnre ghwanre vwẹ orua re dia Inenikristii tare nẹ: “O vwo ẹdẹ vuọvo rẹ ọsẹ vẹ oni mẹ vwọ vuẹ vwẹ nẹ ayen vwo ẹguọnọ mẹ yẹrẹ oma mẹ vwerhen ayeen. Oborẹ ayen vuẹ vwẹ ọkieje yen, wo se ru yovwinphiyọ.”   

⁵ Ọ da tobọ dianẹ o vwo ọkievo rẹ avwanre vwo nẹ oma avwanre kueku, e jẹ a karophiyọ nẹ Jihova komobọ yen si avwanre te oma. (Jọ 6:44) Ọ mrẹ erhuvwu rọhẹ oma avwanre rẹ avwanre komobọ sa mrẹẹ, o ji vughe obo rehẹ ubiudu avwanre. (1Sa 16:7; 2Ik 6:30) Ọtiọyena, a sa vwẹrosuọ siẹrẹ ọ da tanẹ ọyen ni avwanre ghanghanre.​—1Jọ 3:19, 20.

6. Ẹro vọ yen ọyinkọn Pọl vwo ni imwemwu ro ru wanre?

⁶ Tavwen avwanre ke rhe mrẹ uyota na vughe, buebun avwanre ruẹ erọnvwọn sansan re je sa nẹrhẹ avwanre vwo ẹwẹn rẹ abe. (1Pi 4:3) Inenikristi re fuevun dede ji nene oka iroro ọtiọyena muabọ. Wo ji vwo ẹwẹn rẹ abe? Ọ da dia ọtiọyen, jẹ ẹwẹn wẹn gan kidie idibo ri Jihova re fuevun ji nene ọkpọ iroro tiọyen muabọ jovwo re. Kerẹ udje, ọyinkọn Pọl niro nẹ ọyen dia ohwo rẹ emuọvoo, ro vwo roro kpahen jẹgba rọyen. (Ro 7:24) Vwọrẹ uyota, Pọl kurhẹriẹ nẹ imwemwu rọyen ji bromaphiyame re. Ẹkẹvuọvo, ọ tare nẹ “mẹvwẹ yen ma hanvwe vwẹ usun rẹ iyinkọn na” nẹ ọyen orumwemwu “ọrẹsosuọ.”​—1Kọ 15:9; 1Ti 1:15.

7. Die yen ofori nẹ a karophiyọ kpahen imwemwu re ru wanre re?

⁷ Ọsẹ avwanre rọhẹ odjuvwu veri nẹ ọyen che vwo ghovwo avwanre siẹrẹ e de kurhẹriẹ. (Un 86:5) Ọtiọyena, ọ da dianẹ imwemwu rẹ avwanre ruru na ghene da avwanre, a sa vwẹroso Jihova nẹ o vwo ghovwo avwanre re kirobo ro veri.​—Kọl 2:13.

8-9. Mavọ yen e se vwo phi iroro rẹ, e che se ru te obo ri Jihova vwo rhiabọreyọ avwanree kparobọ?

⁸ Avwanre guọnọ ga Jihova vọnvọn vwo te asan rẹ ẹgba avwanre muru eje. Ẹkẹvuọvo, ihwo evo no nẹ ayen che se ru te obo ri Jihova vwo rhiabọreyọ ayeen. Oniọvo aye ọvo re se Amanda da ta: “Mi rorori jovwo nẹ, mi vwo ru asan rẹ ẹgba me teri mudiaphiyọ nẹ ọkieje yen mi che vwo ru bunphiyọ vwẹ ẹga ri Jihova. Ọtiọyena, ọkieje kọyen mi vwo ruẹ vroma. Jẹ ‘mi rhe se ru te obo me guọnọree,’ ki mi no nẹ mi ku oma mẹ phiyotọ nẹ Jihova ji no nẹ mi ku ọyen phiyotọ.”

⁹ Mavọ yen e se vwo phi iroro rẹ, e che se ru te obo ri Jihova vwo rhiabọreyọ avwanree kparobọ? Karophiyọ nẹ Jihova dia ohwo ro si ọrhaan. Ọ guọnọre nẹ e ru vrẹ asan ẹgba rẹ avwanre muruu. O vwo ọdavwaro kpahen oborẹ avwanre ruẹ ọ da dianẹ ọyen asan rẹ ẹgba avwanre muru. Vwọba, roro kpahen idje rẹ ihwo sansan vwẹ Baibol na re vwẹ udu ọsoso vwọ ga Jihova. Kerẹ udje, roro kpahen Pọl. Ọ wianre gangan vwẹ ikpe buebun, yan imaili uriorin buebun je vwẹ ikoko buebun vwo mu. Ẹkẹvuọvo, ọke rẹ akpeyeren rọyen vwo wene rẹ o rhe se ru te obo ro ruẹ vwẹ iruo aghwoghwo naa, kẹ onana mudiaphiyọ nẹ Ọghẹnẹ rhe rhiabọreyọọ? Ẹjo. O ru tẹ asan rẹ ẹgba rọyen muru ọkieje, ọnana da nẹrhẹ Jihovah bruba kẹ. (Iru 28:30, 31) Ọtiọyen ọ je hepha, oborẹ avwanre sa vwọ kẹ Jihova se wene ọkievo. Ẹkẹvuọvo, obo re ma ghanre kẹ yen obo ri mu avwanre vwo ruo. Enẹna, je roro kpahen idjerhe evo ri Jihova vwo djephia nẹ ọyen rhiabọreyọ avwanre.

MAVỌ YEN JIHOVA WAN DJEPHIA NẸ ỌYEN RHIABỌREYỌ AVWANRE?

10. Mavọ yen e se vwo “nyo” Jihova rọ tanẹ ọyen rhiabọreyọ avwanre? (Jọn 16:27)

¹⁰ Womarẹ Baibol na. Jihova djephia nẹ ọyen vwo ẹguọnọ rẹ ihwo rọyen nẹ oma rayen je vwerhọn. Baibol na djunute ẹdia ivẹ ri Jihova da vuẹ Jesu nẹ o vwo ẹguọnọ rọyen nẹ ọyen ji rhiabọreyọ. (Mt 3:17; 17:5) Wọ je guọnọ nẹ Jihova vuẹ wẹ nẹ ọyen rhiabọreyọ owẹ? Enẹna Jihova ta ota kẹ avwanre nẹ odjuvwu chaa, ẹkẹvuọvo womarẹ Baibol na. E de se eta rehẹ ẹbe ẹne rẹ ikuegbe akpeyeren ri Jesu, kọ ghwa họhọ nẹ avwanre “nyo” eta ri Jihova rọ vwọ vuẹ avwanre nẹ ọyen rhiabọreyọ avwanre. (Se Jọn 16:27.) Jesu vwẹrokere uruemu rẹ Ọse rọyen gbagba. Ọtiọyena e de se kpahen obo ri Jesu vuẹ idibo rọyen re fuevun nẹ ọyen rhiabọreyọ ayen dede nẹ ayen gbaree, kẹ a sa vwẹ ẹwẹn roro nẹ ọtiọyen yen Jihova vuẹ avwanre.​—Jọ 15:9, 15.

11. E de hirharoku edavwini kọyen o vwo mudiaphiyọ nẹ Jihova sen avwanre? (Jems 1:12)

¹¹ Womarẹ obo ro ruẹ. Jihova vwo owenvwe rọ vwọ cha avwanre uko, kerẹ ọ vwọ kẹ avwanre erọnvwọn ra guọnọre. Ọkievo, Jihova sa vwẹ uphẹn kẹ erọnvwọn ebrabra nẹ i te avwanre oma, kirobo re phia kẹ Job. (Job 1:8-11) Ebẹnbẹn de te avwanre oma, ọ dia ọyen o vwo mudiaphiyọ nẹ Ọghẹnẹ sen avwanree. Ukperẹ ọtiọyen, i rhie uphẹn phiyọ re vwo djephia nẹ e vwo ẹguọnọ rẹ Ọghẹnẹ, nẹ a je vwẹrosuọ. (Se Jems 1:12.) Ọtiọyena avwanre de hirharoku edavwini, a cha mrẹ obicha vẹ ẹroevwote rọyen rọ cha vwọ cha avwanre uko vwo chirakon.

12. Die yen e se yono nẹ obo re phia kẹ Dmitrii rhe?

¹² Roro kpahen oniọvo ọshare ọvo re se Dmitrii vwẹ Asia. Iruo rọyen va rọ abọ, ọ je mrẹ iruo ọfa ru emeranvwe buebun vwọ wan nu-u. Ọtiọyena, o de brorhiẹn ro vwo ru bunphiyọ vwẹ iruo rẹ aghwoghwo rọyen vwo djephia nẹ ọ vwẹroso Jihova. Emeranvwe buebun wanre, jẹ ọ je rhe mrẹ iruo vuọvoo. O de rhi she ro okpọga, o rhe se vrẹn nẹ ehwaa. Ọtiọyena, ko rhi vwo ẹwẹn ivivẹ sẹ ọyen ji muwan kerẹ omamọ rẹ ọshare kugbe ọsẹ, ji roro sẹ ọyen ji vwo aroesiri ri Jihova. Ovwọnvwọn rẹ ẹdẹ ọvo, ọmọtẹ rọyen de si obo rehẹ Aizaya 30:15 phiyọ ẹbẹre ọbe vwọ kẹ rọ tare nẹ: “Vwẹ oma ehwemuẹ kugbe ẹro ẹvwọsuọ ọye ogangan rẹ ovwan epha.” O de dje ẹbe na kẹ vwẹ akọkọ rẹ ehwa rọyen, ọ da ta: “Ọsẹ mẹ, siẹrẹ ofu de dje we wọ me karophiyọ ẹkpo ri Baibol nana.” Dmitrii mrẹ ọnana vughe ọ da kpẹvwẹ Jihova kidie orua rọyen vwo emu, iwun kugbe asan rẹ ayen dia. Ọ da ta: “Obo ro fori nẹ mi ru yen mi vwo hwe oma mu je vwẹroso Ọghẹnẹ mẹ ọkieje.” Ọ da dianẹ wo hirharokuẹ oka rẹ ọdavwini ọtiọyen, wọ je sa vwẹroso Jihova nẹ ọ cha vwẹrote we je cha wẹ uko vwo chirakon.

13. Amono yen Jihova se vwo djephia nẹ ọyen rhiabọreyọ avwanre, kẹ vwẹ idjerhe vọ?

¹³ Womarẹ Iniọvo Na. Jihova djephia nẹ ọyen rhiabọreyọ avwanre womarẹ iniọvo na. Kerẹ udje, ọ sa reyọ iniọvo na vwọ ta eta re sa bọn avwanre gan vwẹ ọke ro fori. Ọnana yen obo re phia kẹ oniọvo aye ọvo vwẹ Asia ọke rẹ o vwo hirharoku ofudjevwe ọgangan. Iruo rọyen va rọ abọ o de ji she ro okpọga. Vwẹ ẹdia yena rọ hepha na, ọshare rọyen de ru umwemwu ọgangan e de ji sio nẹ ọkpako. Ọ da ta: “Me nama vwo ẹruọ rẹ oboresorọ erọnvwọn nana vwọphiaa. Ki mi roro nẹ ọkiọvo mi ru obo re chọre mi gbi vwo aroesiri ri Jihova ọfaa.” Oniọvo na da rẹ Jihova nẹ ọ kẹ ọyen imuẹro nẹ ọyen vwo aroesiri rọyen. Die kọyen Jihova ruru? Ọ da ta: “Ekpako rẹ ukoko na cha vwẹ uko vwọ riẹn nẹ Jihova ji vwo ẹguọnọ mẹ.” Ọmọke evo vwọ wan nu, ọ da rhoma vuẹ Jihova nẹ ọ cha ọyen uko. Ọ da ta, “Vwẹ ẹdẹ yena vuọvo na, ẹko rẹ iniọvo evo vwẹ ukoko na de si ileta rhe vwe. Mi vwo se eta rẹ ọbọngan rayen na, ke me rhe mrẹvughe nẹ Jihova ghini nyo orẹ mẹ.” Vwọrẹ uyota, Jihova djephia ọkieje nẹ ọyen rhiabọreyọ avwanre womarẹ eta rẹ ọbọngan rẹ ihwo efa.​—Un 10:17.

14. Ọrhọ yen idjerhe ọfa ri Jihova vwo djephia nẹ ọyen rhiabọreyọ avwanre?

¹⁴ Jihova ji djephia nẹ ọyen rhiabọreyọ avwanre womarẹ ọ vwọ reyọ iniọvo na vwọ kẹ avwanre ọghwọku ra guọnọre siẹrẹ o de fo. Kerẹ udje, vwẹ ẹgbukpe ujorin rẹsosuọ, Jihova reyọ ọyinkọn Pọl vwo si ileta 14 vwo rhe iniọvo na. Vwẹ ileta yena, Pọl reyọ ọghwọku ri phiọgun vwọ kẹ iniọvo na vwẹ idjerhe rẹ ẹguọnọ. Diesorọ Jihova vwọ vuẹ Pọl nẹ ọ reyọ ọghwọku ọtiọyena vwọba ileta ro siri? Jihova ọyen omamọ rẹ Ọsẹ rọ ghwọkuẹ emọ ‘rẹ ivun rayen ma vwerhọn.’ (Isẹ 3:11, 12) Ọtiọyena a da vwẹ Baibol na vwọ ghwọku avwanre, e jẹ e no nẹ ivun avwanre miovwo Jihovaa. Ẹkẹvuọvo, ọyen odjephia nẹ o vwo ẹguọnọ rẹ avwanre. (Hib 12:6) Idjerhe efa vọ yen Jihova vwo djephia nẹ ọyen rhiabọreyọ avwanre?

IDJERHE EFA RI JIHOVA VWO DJEPHIA NẸ ỌYEN RHIABỌREYỌ AVWANRE

15. Ihwo vọ yen Jihova vwẹ ẹwẹn ọfuanfon rọyen kẹ, kẹ imuẹro vọ yen ọnana sa vwọ kẹ avwanre?

¹⁵ Ihwo ri Jihova rhiabọreyọ yen ọ vwẹ ẹwẹn ọfuanfon rọyen kẹ. (Mt 12:18) A sa nọ oma rẹ avwanre, ‘Mi se dje evo usun rẹ iruemu rẹ omamọ rẹ Ẹwẹn Ọfuanfon rẹ Ọghẹnẹ na phia vwẹ akpeyeren mẹ re?’ Wo niroso nẹ wo vwo odirin rẹ ihwo efa enẹna vrẹ obo ri jovwo wọ ke rhe riẹn Jihova? Vwọrẹ uyota, wo vwo dje iruemu rẹ omamọ rẹ Ẹwẹn Ọfuanfon rẹ Ọghẹnẹ na phia phiyọ ye, ko ji che muwẹro phiyọ nẹ Jihova rhiabọreyọ owẹ!​—Ni ekpeti na “Omamọ rẹ Ẹwẹn Ọfuanfon na Yen . . . ”

16. Ihwo vọ yen Jihova reyọ vwo ghwoghwo iyẹnrẹn esiri na, kẹ mavọ yen ọyena nẹrhẹ oma ru we? (1 Tẹsalonaika 2:4)

¹⁶ Oma vwerhen Jihova rọ vwọ vwẹ iyẹnrẹn esiri na kẹ ihwo ro rhiabọreyọ. (Se 1 Tesalonaika 2:4.) Vwo oniso rẹ oborẹ oniọvo aye ọvo re se Jocelyn vwọ mrẹ erere ro vwo ghwoghwo iyẹnrẹn esiri na vwọ kẹ ihwo efa. Ẹdẹ ọvo Jocelyn rhọnvwọn nẹ ehwa vẹ ẹwẹn rẹ ofudjevwe. Ọ da ta: “Mi niro nẹ o vwo emu vuọvo mi che se ruu, ẹkẹvuọvo mẹvwẹ ọkobaro, ọyen ẹdẹ mi ji vwo kpo iruo rẹ aghwoghwo. Ọtiọyena, me da nẹrhovwo ji kpo aghwoghwo.” Urhiọkẹ rẹ ẹdẹ yena, Jocelyn da yan kanre aye ọvo re se Mary ro rhiabọreyọ uyono ri Baibol. Emeranvwe evo vwọ wan nu, Mary da tanẹ, ọyen nẹrhovwo rhe Ọghẹnẹ nẹ ọ cha ọyen uko ọke ri Jocelyn vwọ vwẹ obọ hworo ẹchẹ rọyen. Jocelyn vwo roro kpahan obo re phiare na, ọ da ta: “Oma ru vwe kerẹsiẹ ra da mrẹ nẹ Jihova vuẹ vwẹ nẹ ‘Mi rhiabọreyọ owẹ.’ ” Vwọrẹ uyota, ọ dia ihwo eje yen cha rhọnvwe kerhọ rẹ ovuẹ rẹ avwanre ghwoghwo naa. Ẹkẹvuọvo, o se mu avwanre ẹro nẹ, oma vwerhen Jihova avwanre da davwẹngba vwọ vuẹ ihwo efa kpahen iyẹnrẹn esiri na.

17. Die yen wo yono vwo nẹ oborẹ Vicky ta kpahen ọtanhirhe na? (Une rẹ Ejiro 5:12)

¹⁷ Ihwo ri Jihova rhiabọreyọ yen mrẹ erere nẹ ọtanhirhe na cha. (1Ti 2:5, 6) Kẹ ọ da rha dianẹ e vwo esegbuyota kpahen ọtanhirhe na e ji bromaphiyame re, jẹ ẹwẹn avwanre ji brorhiẹn hwe avwanre nẹ Jihova rhiabọreyọ avwanree vwo? Karophiyọ nẹ, ọ dia ọkieje yen a sa vwọ vwẹroso iroro avwanree, ẹkẹvuọvo a sa vwẹroso Jihova. O ni ihwo ri vwo esegbuyota kpahen ọtanhirhe na kerẹ evwata, o ji ve nẹ o che bruphiyọ kẹ ayen. (Se Une rẹ Ejiro 5:12; Ro 3:26) Vicky mrẹ erere ro vwo roro kokodo kpahen ọtanhirhe na. Ẹdẹ ọvo, ro vwo roro kpahen ọtanhirhe na nu, ọ da rhe mrẹvughe nẹ: “O krire ri Jihova vwo vwo odirin mẹ re. . . . Dedena, kọ họhọ nẹ me vuẹ Jihova nẹ: ‘Wo che se vwo ẹguọnọ rẹ ohwo kerẹ omẹvwẹ naa. Izobo rẹ ọmọ wẹn che se phoro imwemwu mẹẹ.’ ” Ro vwo roro kokodo kpahen okẹ rẹ ọtanhirhe na, ọ da rhe mrẹvughe nẹ Jihova vwo ẹguọnọ rọyen. E de roro kpahen ọtanhirhe na, a cha mrẹvughe nẹ Jihova vwo ẹguọnọ rẹ avwanre nẹ o ji rhiabọreyọ avwanre.

18. Imuẹro vọ yen avwanre se vwo siẹrẹ e de vwo ẹguọnọ rẹ Ọsẹ rẹ avwanre rọhẹ odjuvwun ọkieje?

¹⁸ Dede nẹ a sa davwẹngba ra vwọ reyọ iroroẹjẹ re djunute vwẹ uyono nana vwo ruiruo, jẹ ofu ji se dje avwanre ọkievo e mi ji roro sẹ Jihova rhiabọreyọ avwanre. Ọyena da phia, karophiyọ nẹ Jihova rhiabọreyọ “ihwo ri vwo ẹguọnọ Rọyen ọkieje.” (Jem 1:12) Ọtiọyena, sikẹrẹ Jihova ọkieje ji vwo oniso rẹ idjerhe sansan ro vwo rhiabọreyọ owẹ. Karophiyọ ọkieje nẹ Jihova “sherabọ kẹ avwanre ohwo ọvuọvo-o.”​—Iru 17:27.