Moota Woopaka Mavekelo Ooloka

1. Yehova oniphavela wiira arumeyi awe apakeke exeeni? (Nwehe efootu.)

OKATHI muniphavela anyu omaalihiwa ni malakiheryo, ti pani muninvekela anyu? Hiyo ninnisuwela waakhuliwa wa nikoho nno. Nnoowerya omwaattamela Yehova Muluku, nipakaka nivekelo. Nto ti yeeyo Yehova oniphavela awe wiira nipakeke. Ninnisuwela eyo, maana Biibiliya onihimya wiira: “Nvekeleke voohihiyererya”, niire so, ovekela khula okathi. (1 aTes. 5:17) Eyo enitaphulela wiira, hiyo pooti olavula ni Yehova khula okathi nimphavela ahu ni onvekela malakiheryo okathi sinnikhumelela aya mixankiho mookumini mwahu. (Mir. 3:5, 6) Tthiri Yehova, Muluku oovaha. Hiyo ninnisuwela eyo maana yena onihimya wiira ninvekeleke ikwaha sootheene nimphavela ahu.

2. Mwaha ola, ninrowa othokorerya exeeni?

² Ovekela yoovaha ya efaita nirina ahu. Masi mwaha woowaatteliwa miteko, pooti ohikhalanaka okathi woovekela. Nave nyuwo pooti woonaka oreerela olokiherya mavekelo anyu. Moohakalaliha Biibiliya onoowerya onikhaliherya opaka eyo. Mwaha ola, nnooweha moota wookhalana okathi wiira nivekele nittharaka ntakiheryo na Yesu. Nave nnooweha itthu 5 ninreerela ahu wuupuwelelaka wiira nilokiherye mavekelo ahu.

YESU AANIIVAHA OKATHI WIIRA OVEKELE

3. Etthu xeeni Yesu aasuwela awe voohimya sa mavekelo?

³ Yesu aanisuwela wiira Yehova aanivaha efaita yinceene mavekelo. Maana ohinatthi orwa valaponi, Yesu aahinweha Tiithi awe aakhulaka mavekelo a arumeyi awe oororomeleya. Mwa ntakiheryo, owo aahinweha Yehova aakhulaka mavekelo a Ana, Davidi, Eliya ni arumeyi awe akina. (1 Sam. 1:10, 11, 20; 1 Mam. 19:4-6; Esal. 32:5) Ti nthowa naya Yesu aawiixuttinhe awe atthareli awe, ovekela moohihiyererya ni okupali wiira Yehova aamwaakhulaka mavekelo aya! — Math. 7:7-11.

4. Ntakiheryo xeeni Yesu onivanhe awe?

⁴ Mavekelo Yesu aapanke awe anniniixuttiha itthu sinceene ninreerela ahu otthara. Okathi aari awe valaponi, Yesu aanivekela moohihiyererya. Okhala wiira anaatteliwa miteko, ni aanikhala ni atthu anceene, Yesu aaniphavelasa okathi wiira ovekele. (Mar. 6:31, 45, 46) Owo aanivenya vahinatthi oxa wiira avekele mekhawe. (Mar. 1:35) Ekwaha emosa, ohinatthi opaka yoothanla yuulupale, Yesu aahiviriha ohiyu wootheene ovekelaka. (Luka 6:12, 13) Ohiyu aarowa awe wiiviwa, okhala wiira aanisuwela wiira aamukhalana mixankiho sinceene, Yesu aahivekela ikwaha sinceene. — Math. 26:39, 42, 44.

5. Ninrowa omutakiha sai Yesu okathi nimpaka ahu mavekelo?

⁵ Ntakiheryo na Yesu ninniixuttiha wiira, hata naatteliwaka miteko, nihaana waavya okathi wiira nivekele. Nave nimutakihaka Yesu nihaana waavya okathi wiira nivekeleke. Nnoowerya opaka eyo, nipeheryaka ovenya aahiiso opisa orupa ohiyu wiira nivekele. Okathi nimpaka ahu eyo, ninnimooniherya Yehova wiira ninnivaha efaita eparakha ya ovekela. Murokora mmosa oniitthaniwa Lynne onnuupuwelela moota aahakalanle awe nuumala wiixutta voohimya sa mavekelo. Owo ohimmye so: “Nuumala osuwela wiira kaahikhalana eparakha yoolavulaka ni Yehova khula okathi, kaahipacerya omoonaka Yehova ntoko mpatthani aka muulupale. Ti nthowa naya kaalakenle aka olokiherya enamuna kaapakaaka mavekelo aka”. Moohaanyiherya, anamunceene a hiyo nirina moonelo mmosaru. Masi vano nrowe niwehe itthu 5 nihinreerela ahu oliyala okathi nimpaka ahu mavekelo.

ITTHU 5 NIHINREERELA AHU OLIYALA OKATHI NIMPAKA AHU MAVEKELO

6. Moovarihana ni Wiisuupulula 4:10, 11, exeeni Yehova oniphwanela awe waakhela?

⁶ Onvuwiha Yehova. Yohani aahoonihiwa etthu yootikiniha, yeeyo aawenhe awe wiirimu axitokweene 24 amukokhorelaka Yehova. Awo yaaninvuwiha Yehova ahimyaka wiira owo onniphwanela waakhela ‘ovuwa ni nttittimiho, ni owerya’. (Mmusome Wiisuupulula 4:10, 11.) Nave malaikha oororomeleya aakhalana mathowa manceene aniwiiriha onvuwiha Yehova. Maana awo anikhala wiirimu vamosa ni Yehova ni annimusuwela saana. Tthiri malaikha awo annisuwela mikhalelo sa Yehova mwaha wa itthu sootheene onipaka awe. Mwaha waivaavo, awo annikhalana mathowa onvuwiha. — Yob. 38:4-7.

7. Mathowa xeeni anniiriha onvuwiha Yehova?

⁷ Hiyo nave ninniphavela onvuwiha Yehova okathi ninvekela ahu. Nnoowerya opaka eyo vakhala wiira nnoomuleela wiira ninnimphenta ni mathowa anniiriha omphenta. Okathi munimusoma anyu Biibiliya, mmananiheke osuwela mikhalelo sa Yehova sinoosivelani vanceene. (Yob. 37:23; aRom. 11:33) Nto mmuleeleke Yehova mathowa ene aniwiirihani osiveliwa aka ni mikhalelo sawe. Enamuna ekina nikhanle ahu onvuwiha Yehova, ori omuxukhurela mwaha wa itthu sootheene onniirela awe, ni onaapakela awe anna ni arokora. Tthiri Yehova khula okathi onninikhaliherya ni onikhapelela. — 1 Sam. 1:27; 2:1, 2.

8. Mathowa xeeni anniiriha omuxukhurelaka Yehova? (1 aTesaloonika 5:18.)

⁸ Omuxukhurela Yehova. Tthiri nookhalana mathowa manceene anniiriha omuxukhurela Yehova, okathi nninvekela ahu. (Mmusome 1 aTesaloonika 5:18.) Nave hiyo nihaana omuxukhurela Yehova mwaha wa itthu sootheene sooreera nirina ahu. Maana soovaha sootheene sooreera sinikhuma wa yena. (Yak. 1:17) Mwa ntakiheryo, hiyo pooti omuxukhurela mwaha wa itthu sootheene sooreera opattunxe awe. Nave nihaana omuxukhurela Yehova mwaha wa okumi onivanha awe, amusi ahu, apatthani ahu ni nlipelelo onivanhe awe na muhoolo. Nave-tho nihiliyaleke omuxukhurela Yehova mwaha wa eparakha onivanhe awe ya okhala apatthani awe.

9. Xeeni khula okathi ninreerela ahu omuxukhurelaka Yehova?

⁹ Nihaana wiimananiha vanceene wiira nuupuwelele mathowa anniiriha omuxukhurelaka Yehova. Mwaha wa xeeni? Maana atthu anceene olumwenku ola khanixukhuru. Awo anniimananiha ophavelasa itthu sikina ohiya oxukhurelaka itthu sirina aya. Vakhala wiira nnoohapuxiwa ni muupuwelo owo, ninrowa omakelaka ovekela itthu siniphavela ahu ohiya oxukhurela itthu nirina ahu. Wiira nihihapuxiwe ni muupuwelo owo, khula okathi nihaana wuupuwelaka itthu Yehova onniirela awe ni omuxukhurela. — Luka 6:45.

10. Moota xeeni omuxukhurela Yehova, waamukhalihenrye aya murokora mmosa ovilela mixankiho? (Nwehe efootu.)

¹⁰ Okhala atthu ooxukhuru onoonikhaliherya ovilela mixankiho. Niwehe ntakiheryo na murokora oniitthaniwa Kyung-sook, oniromoliwa erevista Owehaweha ya 15 a Janeiro a 2015. Mameediku yaahimuleela wiira yena ookhalana oretta wa kanser a mmasasuni, ahaarowa oweryaneya olooliwa. Murokora owo onihimya so: “Oretta ole waahikiriipiha murima vanceene. Nto kaahipacerya woova kuupuwelaka wiira kaahiyelela itthu sootheene”. Exeeni yaamukhalihenrye murokora ole, ovilela muxankiho awe? Murokora owo onihimya wiira, khula ohiyu ohinatthi orowa orupa, aaniwela vasulu va empa awe onanvekela Yehova moowiiwanyeya omuxukhurelaka itthu 5 sooloka saamwiiranenle nihiku nle. Nuumala-vo, owo aanimaaleleya ni aanimuleela Yehova wiira aanimphenta. Murokora ole ohoona wiira Yehova onnaakhaliherya arumeyi awe oororomeleya okathi sinaaphwanya aya mixankiho. Nave, ohoona wiira arumeyi a Muluku annikhalana mareeliho manceene ovikana mixankiho. Moolikanasa ni murokora ole, Kyung-sook, nookhalana mathowa manceene anniiriha omuxukhurelaka Yehova. Nto hata niinaano-va nirine ene mixankiho, nihiliyaleke omuxukhurela Yehova. Tthiri onvekela Yehova ni omuxukhurela, onoonikhaliherya ovilela mixankiho ni okhalana muupuwelo woomaaleleya.

11. Xeeni awiixutti a Yesu yaareerela aya okhala oolipa murima nuumala Yesu otthikela wiirimu?

¹¹ Munvekeleke Yehova olipa murima wiira nweryeke olaleerya. Yesu ohinatthi otthikela wiirimu, aahiwuupuxerya atthareli awe wiira yaahaana olaleya “oYerusalemu, oYudeya ni oSamariya wootheene, ni elapo yootheene ya vathi”. (Mit. 1:8; Luka 24:46-48) Nuuvira okathi vakhaani, ahooleli a etiini ya eYuda, yaahimutthukwela mukhatteya Pedru ni Yohani ni khumuroiha osineedrio. Ahooleli a itiini awo, yaahaakhottiherya arummwa otthikela olaleerya ni yaahiwoopopiha. (Mit. 4:18, 21) Nto Pedru ni Yohani, yoonenle sai?

12. Moovarihana ni Miteko 4:29, 31, awiixutti yaapanke exeeni?

¹² Nuumala ahooleli a etiini ya eYuda omoopopiha Pedru ni Yohani, awo yaawakhunle so: “Mutthokelele oratteene mmansinyu, yaari etthu ya xariya vamaithoni va Muluku, owiiwelelani nyuwo, ohiya omwiiwelela Muluku. Masi hiyo, khaninwerya ohiya olavula itthu noonale ahu ni niiwale ahu”. (Mit. 4:19, 20) Nuumala Pedru ni Yohani otaphuliwa mukhatteya, awiixutti yaahinvekela Yehova wiira aakhaliherye ohihiya opaka itthu sinimusivela. Awo yaavekenle so: “Munikhaliherye hiyo, arumeyi anyu, wira nihihiyererye olavula moolumo anyu, nihoovaka etthu”. Tthiri Yehova aahaakhula nivekelo nle. — Musome Miteko 4:29, 31.

13. Ntakiheryo na munna Jin-hyuk, ninniixuttiha exeeni?

¹³ Nnoowerya waatakiha arummwa nihihiyaka olaleerya hata makhulupale a mulaponi anikhoottiheryaka. Eyo ti etthu yaamwiiranenle munna oniitthaniwa Jin-hyuk. Owo aahitthukweliwa mukhatteya mwaha woohiirela mpantta myaha sa mulaponi. Mukhatteya mme owo aahikhalana eparakha ya waakhaliherya apereso akina. Masi makhulupale awo yaahimuleela wiira ahaana olavulana paahi apereso ale akhala wiira yamphavela okhaliheriwa. Nto munna ole aahikhoottiheriwa ni makhulupale ale wiira aahaana ohilavula myaha sikina hata myaha sa mbiibiliyani. Nuumala-vo, munna owo aahinvekela Yehova olipa murima wiira oweryeke waalaleerya atthu akina okathi wooreerela. (Mit. 5:29) Munna Jin-hyuk, onihimya so: “Yehova aahaakhula mavekelo aka okivahaka olipa murima ni ankhili. Nto kaahipacerya wiiriha soosoma sa Biibiliya minutu 5 paahi keemenle ene vamukhora wa khula ekhatteya. Nto ohiyu kaanilepa ikarta wiira kaavahe apereso ale vaxa vale”. Tthiri nikupaliki wiira Yehova onoonikhaliherya owerya olaleerya. Nto moolikanasa ni munna Jin-hyuk, hiyo nave nihaana ovekelaka olipa murima ni ankhili.

14. Exeeni enrowa onikhaliherya ovilela mixankiho sahu? (Esalimo 37:3, 5.)

¹⁴ Munvekeleke Yehova nikhaliheryo wiira nwerye ovilela mixankiho. Anna ni arokora aakhalana mixankiho sinceene. Ohiya paahi mixankiho sa weerutthuni masi-tho sa mmuupuweloni. Maana akina aakhweliwa mmusi yamphenta aya, aakhalana mixankiho vatthokoni, annilupatthiwa ni sinnaaphwanya mixankiho sikina. Nave-tho iretta soowaakuva wuulaana ni ikhotto sinnitepa oxankiha. Akhala wiira itthu iyo sihoophwanyani, mmutthukulele murima anyu Yehova mmuleelaka itthu sinooxankihani. Ntoko siisaale mwaarowa anyu omutthukulela murima mpatthani anyu. Nto mukupaliki wiira Yehova “onimokhaliheryani”. — Musome Esalimo 37:3, 5.

15. Mavekelo anrowa onikhaliherya sai ‘ovilela naahaawaka’? Nvahe ntakiheryo.

¹⁵ Etthu enrowa onikhaliherya ‘ovilela naahaawaka’ ori othipelela ovekela. (aRom. 12:12) Yehova onnisuwela itthu sinaaxankiha arumeyi awe ni ‘onniwiriyana okhuwela waya’. (Esal. 145:18, 19) Murokora mmosa yoowo ori pioneera, oniitthaniwa Kristie a iyaakha 29, ohoona wiira eyo ekeekhai. Owo aahipacerya owereiwa, nto oretta owo waanimuriipiha murima vanceene. Masi nuuvira okathi, owo aahisuwela wiira maama awe aahikhalana eretta ehinivoniwa. Kristie onihimya so: “Kaaninvekela Yehova voohihiyererya khula nihiku wiira okivahe ikuru wiira kiwerye ovilela mixankiho saka. Hata kaarina mixankiho iye, nkaahiyale orowela mithukumano ni kaanipaka yoosoma aka ya omwaneene. Nave mavekelo ti yaakikhalihenrye ovilela mixankiho iye kaarina aka. Kaanikupali wiira Yehova aari ni miyo okathi wootheene ni aamukikhaliherya. Osuwela eyo yaanikikhaliherya okhala oomaaleleya. Nnaamwi oretta aka wahaavinre moowaakuveya, woona wiira Yehova aanaakhula mavekelo aka eyo yaanikiphwanyiha murettele ni omaaleleya”. Nto nihikhala-khale niliyalaka wiira Yehova “onnisuwela owoopola mmaxakhani atthu ooreera murima”. — 2 Ped. 2:9.

16. Xeeni ninreerela ahu okhaliheriwa ni Yehova wiira nixintte sooweeha?

¹⁶ Munvekeleke Yehova nikhaliheryo wiira nwerye oxintta sooweeha. Okhala wiira naatthu oottheka, khula okathi nihaana wiimananihaka wiira nihipake itthu soohiloka. Nto Satana onoopakaka khula etthu eniwerya awe wiira oneehereryeke. Mwa ntakiheryo, matthekulelo oohiloka muraakho mmosa Satana onirumeela awe wiira oneehererye. Maana, matthekulelo awo pooti osariha mmuruni mwahu miyuupuwelo soohiloka. Miyuupuwelo iyo soohiloka, pooti oniirihaka opaka etampi yuulupale ni opweteiwa ompatthani ahu ni Yehova. — Mar. 7:21-23; Yak. 1:14,15.

17. Nuumala onvekela Yehova nikhaliheryo, exeeni nikhanle ahu oopaka? (Nwehe efootu.)

¹⁷ Naaphavelaka oxintta sooweeha, nihaana onvekela Yehova nikhaliheryo. Eyo ti etthu Yesu aavekenle awe oriki: “Muhinihiye nimoraka okathi oneehereriwa ahu, masi munaakiherye Mutakhali”. (Math. 6:13) Tthiri Yehova onniphavela onikhaliherya, nto hiyo nihaana onvekelaka nikhaliheryo. Nave ootheene ahu nipakeke itthu sootheene ninwerya ahu, wiira nisyakeke miyoonelo soohiloka sihireere wuulaana olumwenku ola wa Satana. (Esal. 97:10) Okathi nimmusoma ahu Biibiliya, ninnisariha mmuupuwelo mwahu itthu sooloka. Nave orowela mithukumano sa mmulokoni ni oluttuweliwa olaleerya, itthu iyo sinoonikhaliherya okhalana miyuupuwelo sooloka. Yehova onoomaleliha yooleiherya awe ya oheemererya onikhumelela etthu nihinwerya ahu ovilela. — 1 aKor. 10:12, 13.

18. Etthu xeeni ootheene ahu nihinreerela ahu ohiya opaka?

¹⁸ Khula mmosa a hiyo, ohaana onvekela Yehova wiira ohihiye okhala oororomeleya mahiku ala ookiserya ni ooxankiha. Nto nihaana wiivahaka okathi khula nihiku wiira nipakeke mavekelo ni murima ahu wootheene. Maana Yehova oniphavela wiira ‘nimuhimeryeke ovelavela wahu wothene’. (Esal. 62:9) Mmuxukhureleke ni munvuwiheke Yehova mwaha wa itthu sootheene onoopakelaaweni. Nave, munvekeleke Yehova olipa murima wiira nweryeke olaleerya, ovilela mixankiho ni oxintta sooweeha sinookhumelelani. Nto muhimweemererye mutthu nnakhala etthu yoohiihakani onvekela Yehova. Masi Yehova onaakhula sai mavekelo ahu? Mwaha onittharelana, nnimwaakhula nikoho nno.