IXUWAA WAATA XOONANA DANDDAYAY?

2 | Haluwaa Kiyoppa

Geeshsha Maxaafay Tamaarissiyoobaa:

“Ooninne intteyyo iitabaa oottikko, he urau iitabaa ootti zaaroppite. . . . Asa ubbaara sarotettan de7anau, intte baggaara, intteyyo danddayettidabaa ubbaa oottite. . . . Intte intte huuphen asau halo kessoppite. . . . Aissi giikko, Xoossaa maxaafai, “Godai, ‘Taani haluwaa kessana; taani kushiyaa zaarana’ yaagees.”—ROOME 12:17-19.

Hegee Woygiyoogee?

Issi uri nuna qohiyo wode hanqqettiyoogee wottin deꞌiyaaba gidikkonne, he uraa nuuni qohanaadan Xoossay koyenna. SHin I naaqo ubbaa mata wode xayssanawu qaalaa gelido gishshawu, nuuni danddayanchcha gidanaadan koyees.—Mazamure 37:7, 10.

Ay Oottana Danddayay?

Asay haluwaa kiyiyoogee, ixoy kaseegaappe yaa daranaadan oottees. Yaatiyo gishshawu, harati nena qohikko haluwaa kiyoppa, hanqqettoppa, qassi sarotettan zaaranawu baaxeta. Issi issitoo, merettida metuwaabaa dogiyiyoogee loꞌꞌo gidana danddayees. (Leemiso 19:11) SHin, merettida metuwaabaa yootana koshshiyo wodeekka deꞌees. Leemisuwawu, nena danobay gakkikko hegaabaa polisiyawu woy hara sunttatuyyo yootanawu koyana danddayaasa.

Neeni haluwaa kiyikko nena qohaasa

Issi metuwaa sarotettan giigissana danddayennaba milatikko, woy he metuwaa giigissanawu neeyyo danddayettida ubbabaa oottidaba gidikko shin? Haluwaa kiyoppa. Hegee metoy yaa daranaadan oottana danddayees. SHin neeni haluwaa kiyennan aggiyoogee, ixuwaa xoonanaadan maaddana danddayees. Xoossay meto ubbaa giigissanaagaa ammanettana danddayaasa. “An ammanetta; i neessi oottana.”—Mazamure 37:3-5.

Deꞌuwan Hanidabaa—ADRIYANA

Haluwaa Kiyanawu Koyiyoogaa Aggiis

Adriyani yelagatettan deꞌiyo wode makkalanchcha; qassi haluwaa kiyanawu koyiyo gishshawu, bana qohidaageetuura warettees. I hagaadan giis: “Taani darotoo haratuura massaariyaa oyqqada warettays; hegaappe denddidaagan suuxxada keehi qohettiyo gishshawu hayqqiis giidi ogiyan olidi boosona.”

Adriyani bawu layttay 16 gidiyo wode, Geeshsha Maxaafaa xannaꞌiyoogaa doommiis. I hagaadan giis: “Geeshsha Maxaafaa xannaꞌiyoogan ayyaanaaban diccada, issi issiban laamettana koshshiyoogaa akeekaas.” I ixxiyoogaanne makkalanchcha gidiyoogaa aggana koshshiis. Haluwaa kessana koshshennaagaa xeelliyaagan Roome 12:17-19y yootiyoobaa tamaaridoogee A keehi maaddiis. I hagaadan giis: “Pirdda pacaa Yihooway ba keerido wodiyan giigissanaagaa akeekaas. Taani loddan loddan makkaliyoogaa aggaas.”

Kase Adriyanaara eqettiya citan deꞌiya yelagati, issi galla omarssi A qohidosona. Eta halaqay ba qaalaa xoqqu oottidi, “Ane nena ashsha!” yaagiis. Adriyani, “Taani haluwaa kessanawu paacettaas” yaagiis. SHin I haluwaa kessiyoogaappe, Yihoowakko qanttan woossidi he sohuwaappe aggidi biis.

Adriyani gujjidi hagaadan giis: “Wonttetta gallassi he halaqaara gayttaas. Keehi yiillotada haluwaa kiyana koyaas; shin ta huuphiyaa naaganaadan Yihooway maaddana mala zaarettadakka ta wozanan woossaas. I taakko yiidi hagaadan gin garamettaas: ‘Zine omarssi oottidobawu tawu atto ga. Tumaa yootanawu, taanikka ne mala gidana koyays. Geeshsha Maxaafaa xannaꞌana koyays.’ He wode taani ta hanqquwaa mittido gishshawu keehi ufayttaas! Hegaappe denddidaagan, ikka Geeshsha Maxaafaa xannaꞌiyoogaa doommiis.”