Danddayaa—Hidootan Naagiiddi Gencciyoogaa

“WURSSETTA gallassi” metoy dari dari biyoogaa gaasuwan, Yihoowa asay awudeegaappenne aaruwan danddayana koshshees. (2 Xim. 3:1-5) Nuuni asay darotoo banttana siiqiyo, sigettennanne banttana naagenna alamiyan deꞌoos. Danddayennan aggiyoogee hegaa mala eeshshay deꞌiyoogeetussi meeze gidiis. Hegaa gishshawu, ubba Kiristtaaneti banttana hagaadan oychchana koshshees: ‘Alamiyaa asay danddayennaagee tanakka hegaadan oottidee? Tumuppe danddayanchcha gidiyoogee aybee? Qassi Kiristtaanetuppe koyettiya ha loꞌꞌo eeshshaa ubbatoo waata bessana danddayiyaanaa?’

DANDDAYAY AYBEE?

Geeshsha Maxaafay yootiyoogaadan, danddayay metiya hanotaa gencciyoogaa xalla gidenna. Danddayanchcha asi halchchidi genccees, hegee I hanotay keha gidana giidi hidootees giyoogaa. I babaa xallaa qoppenna; qassi ufayssennabaa oottida urawukka loꞌꞌobaa qoppees. Hegaa gishshawu, issi asi naaqqiyo wode woy hanqqetissiyo wode, danddayanchcha asi sigettanaagaa qoppidi hidootaa qanxxenna. Yaatiyo gishshawu, Geeshsha Maxaafay siiquwaappe pulttiya loꞌꞌo eeshshatu darotuppe koyruwan ‘danddayaa’ qonccissiyoogee garamissenna.a (1 Qor. 13:4) ‘Geeshsha ayyaanaa ayfiyawu’ issi macaray “danddayaa” gidiyoogaakka Xoossaa Qaalay yootees. (Gal. 5:22, 23) SHin, nuuni tumuppe danddayanchcha gidanawu ay oottana bessii?

WAANIDI DANDDAYANCHCHA GIDANA DANDDAYETTII?

Nuuni danddayanchcha gidanawu, Yihooway banan ammanettiyaageetussi immiyo A ayyaanay maaddana mala woossana bessees. (Luq. 11:13) He ayyaanay keehi wolqqaama gidikkonne, nuuni nu woosaara maayiyaabaa oottana koshshees. (Maz. 86:10, 11) Hegee he eeshshay nu wozanan xaphuwaa yeddana mala, danddayiyoogaa bessanawu ubba gallassi danddayettida ubbabaa oottana bessees giyoogaa. SHin yaatidikka, danddayay nuussi eeshsha gidanaadan harabaakka oottana koshshennan waayi aggana. Nuna maaddana danddayiya harabi aybee?

Yesuusi oottido wottiyoobi baynnabaa pilggiyoogaaninne kaalliyoogan nuuni danddayanchcha gidana danddayoos. Kiitettida PHawuloosi geeshsha ayyaanay denttettin ‘danddayaykka’ an gujettiyo “ooratta meretaa” qonccissi simmidi, ‘Kiristtoosi immiyo sarotettay nuna haaranaadan’ zoriis. (Qol. 3:10, 12, 15) Xoossay nuna qofissidabaa ba keerido wodiyan giigissanaagaa Yesuusaagaadan mintti ammaniyoogan, hegaa mala sarotettay nu wozanaa ‘haaranaadan’ oottana danddayoos. Nuuni Yesuusa leemisuwaa kaalliyo wode, nu yuushuwan aybi hanikkonne, yiillotidi danddayennan aggokko.—Yoh. 14:27; 16:33.

Xoossay qaalaa gelido ooratta alamiyaa beꞌanawu nuuni yeemotti naagikkonne, Yihooway nuna danddayiyoogaa wotti dentti qoppiyo wode, kaseegaappe aaruwan danddayanchcha gidiyoogaa tamaaroos. Geeshsha Maxaafay nuna hagaadan minttettees: “Issooti issooti qoppiyoogaadan, Godai ba oottana giidoogaa oottanau takkenna; shin ooninne ba nagaraappe simmanaadan koyeesippe attin, ooninne xayana mala koyenna gishshau, inttebaa genccees.” (2 PHe. 3:9) Yihooway nuna ay keena danddayidaakko qoppiyo wode, nuunikka kaseegaappe aaruwan harata danddayoos. (Roo. 2:4) Danddayana koshshiyo amarida hanotati aybee?

DANDDAYANA KOSHSHIYO HANOTATA

Nu deꞌuwan galla galla nuuni danddayana koshshiyo daro hanotati deꞌoosona. Leemisuwawu, neeni yootana koshshiyaabay deꞌiyaabadan qoppikko, harati haasayishin kelttiyaa gelenna mala neeni danddayana koshshennan aggenna. (Yaaq. 1:19) Eti oottiyoobay nena yiilloyiyo ne mala Kiristtaanetuura gayttiyo wodekka neeni danddayana koshshennan waayi aggana. Hegaa malaban yiillotiyoogaappe, nuuni mooriyo wode Yihoowaynne Yesuusi waatiyaakko qoppiyoogee loꞌꞌo. Eti nuuni mooriyo guuttabaa qorokkona. SHin, eti nu loꞌꞌo eeshshata akeekoosona; qassi nuuni giigissanawu baaxetiyoogaa danddayan xeelloosona.—1 Xim. 1:16; 1 PHe. 3:12.

Nuuni yootidoban woy oottidoban mooridoogaa issi uri nuussi yootiyo wodekka nuuni danddayana koshshees. Darotoo, nuuni elle hanqqettananne hegawu gaasuwaa yootana danddayoos. Gidoppe attin, Xoossaa Qaalay nuuni hegaappe dummatiyaabaa oottanaadan minttettees. Geeshsha Maxaafay hagaadan gees: “Ai yohuwaassi gidikkonne, doomettaappe wurssettai keha; qassi otoranchcha uraappekka danddayanchcha urai keha. Hanqqoi azallati haluwaa kiyanau go7ettiyo miishsha gidiyo gishshau, elle hanqqettoppa.” (Era. 7:8, 9) Hegaa gishshawu, nuna mootiyoobay worddo gidikkonne, nuuni danddayan yuushshi qoppidi zaarana bessees. Yesuusi harati A boriyo wode ha maaraa kaalliis.—Maa. 11:19.

Naatu xeelaa suurissanawunne iita amuwaa aggana mala eta maaddana koshshiyo wode, yelidaageeti danddayanchcha gidana koshshees. Awurooppan Beeteelen haggaaziya Maatiyaasa hanotaa qoppa. Maatiyaasa timirtte keettan A ammanuwaa gaasuwan naatettan daro qilliiccishin I gencciis. A aawaynne aayyiyaa koyro hegaa eribookkona. SHin, I ammaniyoobaa siriyoogaa doommidoogaa eti hegaappe simmin akeekidosona. Maatiyaasa aaway Gilisi “he hanotaa keehi danddayana koshshidoogaa” yootiis. Maatiyaasi hagaa mala oyshata oychchiis: “Xoossay oonee? Geeshsha Maxaafay Xoossaa Qaala gidana xayikko shin? Aybakka nuuppe koyiyay Xoossaa gidiyoogaa aybin eriyoo?” I ba aawaa hagaadankka oychchiis: “Taani intteegaadan qoppennanne ammanenna gishshawu, ooninne ta bolli ayssi pirddii?”

Gilisi hagaadan giis: “Nu naꞌay oychchiiddi issi issitoo hanqqettees; I ba aayee bolli woy ta bolli gidennan, deꞌoy baayyo keehi deexxanaadan oottidobadan I qoppiyo tumaa bolli hanqqettees.” Gilisi ba naꞌaa waati maaddidee? “Ta naꞌaynne taani issi utettan daro saatiyawu haasayoos. Taani awu siyettiyaabaanne A qofaa loytta akeekanawu darotoo I yootiyoobaa ezggaysinne issi issitoo oychchays. Issi issitoo nuuni haasayaa zaarettidi doommanaappe kase I issi gallassa gidiya wodiyawu qoppanabaa qonccissays. Haroode, I yootidobaa taani amarida gallassawu qoppana koshshiyoogaa yootays.” Hegaadan ubba wode tobbiyoogaappe denddidaagan, Maatiyaasi wozoy aybakko, qassi Yihooway nuna siiqiyoogaanne nuna haariyo maatay awu deꞌiyoogaa akeekiyoogaa doommiis. A aaway gujjidi hagaadan giis: “Hegawu daro wode koshshidabanne hegee darotoo deexxiyaaba gidikkonne, Yihoowa siiqiyoogee A wozanan loddan loddan dicciis. Ta machchiyaanne taani nu naꞌaa naatettan danddayan maaddidoogee ayfido gishshawunne A wozanaa denttettido gishshawu keehi ufayttoos.”

Gilisinne A machchiyaa bantta naꞌaa danddayan maaddiyo wode Yihooway kaafanaagaa ammanettidosona. Gilisi kasebaa hassayidi hagaadan giis: “Nuuni Maatiyaasa siiqiyoogaappe denddidaagan A aayyiyaanne taani I akeekanaadan Yihooway maaddana mala kaseegaappe mintti woossiyoogaa taani darotoo Maatiyaasawu yootays.” Ha aawaynne aayyiyaa danddayido gishshawunne hidootaa qanxxibeenna gishshawu keehi ufayttoosona!

Tumu Kiristtaaneti keehi sahettida so asaa yarata woy laggeta xeelliyo wode, ayyaanaaban maaddiyoogaa bolli siiquwan danddayana bessees. Awurooppan deꞌiya Elenibaab qoppa.

Hosppunaa gidiya layttappe kase, guuggiyaa qohiya sahoy Eleni azinaa sakkiis. Hegaappe denddidaagan, I qarettana, ufayttana woy azzanana danddayenna. He hanotaa gaasuwan Elenissi daafuray keehi dariis. A, “Hegawu keehi danddayananne darotoo woossana koshshiis” yaagaasu. A gujjada hagaadan gaasu: “Piliphphisiyuusa 4:13n deꞌiya, ‘[Xoossay] tau immido wolqqan, ubbabaa oottanau taani danddayais’ yaagiya xiqisiyaa taani dosays; qassi tana hegee minttettees.” Yihoowa wolqqaaninne maaduwan Elena he hanotaa danddayada genccaasu.—Maz. 62:5, 6.

DANDDAYIYOOGAN YIHOOWA LEEMISUWAA KAALLA

Danddayiyoogan Yihooway ooppenne aadhdhiya leemiso gidiyoogee qoncce. (2 PHe. 3:15) Yihooway keehi danddayidoogaa bessiya daro taarikee Xoossaa Qaalan deꞌees. (Nah. 9:30; Isi. 30:18) Leemisuwawu, Yihooway Sadooma katamaa xayssanawu kuuyidobaa xeelliyaagan Abrahaami A oychchido wode I waatidee? Abrahaami haasayishin Yihooway kelttiyaa gelibeenna. Yihooway Abrahaami oychchidonne A qofissida ubbabaa danddayan siyiis. Yaatidi, Yihooway Abrahaama qofissidabaa zaaretti yootiyoogan siyidoogaa bessiis; qassi Sadooma kataman tammu xillo asa xallay deꞌikkonne he katamaa xayssennaagaa yootiyoogan A minttettiis. (Doo. 18:22-33) Yihooway ubbatoo danddayan siyees; qassi mule coo hanqqettenna!

Danddayay ubba Kiristtaanetussi deꞌana bessiya ooratta asatettaa shaahotun keehi koshshiyaaba. Nuuni danddayanchcha gidanawu wozanappe baaxetikko, nuussi qoppiyaanne danddayanchcha gidida nu Aawaa, Yihoowa bonchchoos; qassi “Xoossai immana giidoogaa ammanuwaaninne genccan” laattiyaageetuppe issuwaa gidoos.—Ibr. 6:10-12.