Tou Fakamaʼuhigaʼi Ia Sehova ʼAki Tatatou Fakahā Te Fakaʼapaʼapa

‘Ko te ʼu gāue ʼa Sehova ʼe ʼalikisia pea mo taulekaleka.’—PES. 111:3.

1, 2. (a) ʼE kotou fakamahino feafeaʼi anai ia te kupu “ ʼalikisia”? (b) Koteā te ʼu fehuʼi ʼaē kā tou vakaʼi anai ʼi te ʼalatike ʼaenī?

ʼI TE kole age ʼaē ke ina fakamahino ia te kupu “fakaʼapaʼapa,” neʼe foimo tali fēnei e te kiʼi taʼahine ʼe taʼu hogofulu: “[Ko tona fakaʼuhiga] ke tou kofuʼi he ʼu teu ʼe fakapoipoi.” Neʼe mole lagi ʼiloʼi e te kiʼi taʼahine ʼaia ʼe ʼui ʼi te Tohi-Tapu ko te ʼAtua ʼe ‘kofu ʼaki te ʼalikisia.’ (Pes. 104:1) Maʼa te tagata, ko te fakahā ʼo te fakaʼapaʼapa ʼi ʼihi temi ʼe lagi fakaʼuhiga ki te kofuʼi ʼo he teu ʼe fakapoipoi. Ohagē lā, neʼe loto e te ʼapositolo ko Paulo ki te kau fafine Kilisitiano “ke natou teuteu ʼaki he teu ʼe lelei, ʼaki te agavaivai pea mo te fakapotopoto, ke ʼaua naʼa natou fai he ʼu fī ʼulu, peʼe ko he ʼaulo, mo ni ʼu mataʼi tofe, mo ni ʼu mutuʼi meʼa totogi kovi.” (1 Tim. 2:9) Kae ko te aga fakaʼapaʼapa ʼaē ʼe fakamaʼuhigaʼi ai ia te ‘ ʼalikisia pea mo te taulekaleka’ ʼo Sehova ʼe mole gata pē ia ʼi te teu.—Pes. 111:3.

² ʼI te Tohi-Tapu, ko te kupu Fakahepeleo ʼaē neʼe fakaliliu ʼaki te kupu “ ʼalikisia” ʼe feala ke toe fakaliliu ʼaki te ʼu kupu “taulekaleka,” “māfimāfi,” “kolōlia” pea mo “fakamaʼuhigaʼi.” ʼE fakamahino ʼi te tikisionalio ko te kupu “ ʼalikisia” ʼe ko “he tahi ʼe fakaʼapaʼapaʼia peʼe fakamaʼuhigaʼi.” Pea ʼe ko Sehova tokotahi pē ʼaē ʼe tuha ke fakamaʼuhigaʼi. Koia, ʼuhi ko tātou ko tana kau kaugana, ʼe tonu ke tou fakahā te fakaʼapaʼapa ʼi tatatou ʼu palalau pea mo tatatou ʼu aga. Kae he koʼē ʼe feala ki te tagata ke aga fakaʼapaʼapa? ʼE feafeaʼi hatatou sio mata ki te ʼalikisia pea mo te taulekaleka ʼo Sehova? ʼE tonu ke malave feafeaʼi kiā tātou ia te ʼalikisia ʼo te ʼAtua? Koteā ʼaē ʼe feala ke tou ako mai iā Sesu Kilisito ʼi tana fakahā ia te fakaʼapaʼapa ki te hahaʼi? Pea ʼe lava feafeaʼi hatatou fakahā ia te fakaʼapaʼapa fakaʼatua?

He Koʼē ʼe Feala Ke Tou Aga Fakaʼapaʼapa?

3, 4. (a) ʼE feafeaʼi anai hatatou tali ki te fakaʼapaʼapa ʼaē ʼe fai mai kiā tātou? (b) Ko ai koa ʼaē ʼe fai ki ai ia te ʼu palalau fakakikite ʼaē iā Pesalemo 8:5-9? (Vakaʼi ia te kiʼi nota ʼi te lalo pāsina.) (c) Ko ai ʼaē neʼe fakahā ki ai e Sehova te fakaʼapaʼapa ʼi te temi muʼa?

³ ʼUhi ʼaē neʼe faʼu ia te tagata ki te pāki ʼo te ʼAtua, koia ʼe feala ai ki te hahaʼi fuli ke natou fakahā ia te aga fakaʼapaʼapa. Neʼe fakaʼapaʼapa ia Sehova ki te ʼuluaki tagata ʼaki tana fakanofo ia ia ke tokaga ki te kele. (Sen. 1:26, 27) Logolā ia te agahala ʼaē ʼa te tagata, neʼe kei tuku pē e Sehova ke tokaga ia te tagata ki te kele. Koia ʼe ‘fakapale’ aipē e te ʼAtua ia te tagata ʼaki te fakaʼapaʼapa. (Lau ia Pesalemo 8:5-9.)a Koia ʼaki te taʼi fakaʼapaʼapa ʼaia ʼe fai mai kiā tātou, ʼe fakamaʼua ai ke tou fakaʼapaʼapa kiā Sehova, ʼo tou vikiʼi tona huafa māʼoluga ʼaki he fakaʼapaʼapa.

⁴ Neʼe fakahā tāfito e Sehova tana fakaʼapaʼapa kiā nātou ʼaē ʼe natou tauhi kiā te ia ʼaki he tauhi taputapu. Neʼe fakaʼapaʼapa ia te ʼAtua kiā Apele ʼaki tana tali ʼaē ia tana sākilifisio, kae neʼe mole ina tali ia te sākilifisio ʼaē neʼe momoli age e tona tehina ko Kaino. (Sen. 4:4, 5) Neʼe fakatotonu age kiā Moisese ke ina ‘fakahā he faʼahi ʼo tana fakaʼapaʼapa’ kiā Sosue, te tagata ʼaē neʼe ina fetogi ia ia moʼo takitaki ia Iselaele. (Fkau. 27:20) ʼO ʼuhiga mo Salomone, te foha ʼo Tavite, ʼe ʼui fēnei ʼi te Tohi-Tapu: “Neʼe haga ia Sehova ʼo hikihiki ia Salomone ke lahi ʼaupitō kiā mata ʼo Iselaele kātoa pea neʼe ina fakahā kiā ia he fakaʼapaʼapa fakahau neʼe mole heʼeki maʼu e he tahi age hau ʼi muʼa atu ʼi Iselaele.” (1 Fkma. 29:25) Neʼe fakahā e te ʼAtua he toe fakaʼapaʼapa makehe ki te kau Kilisitiano fakanofo ʼaē kua fakatuʼuake, ʼaē neʼe natou tala ʼaki te agatonu ia “te kolōlia ʼo te taulekaleka ʼo tona ʼafioʼaga.” (Pes. 145:11-13) Moʼo fakavikiviki kiā Sehova, ko te toe hahaʼi tokolahi ʼaē ʼe tuputupu ʼo te “tahi ʼu ovi” ʼa Sesu ʼe toe fai kiā nātou ia te fakaʼapaʼapa.—Soa. 10:16.

ʼE Tou Sio Mata Ki Te ʼAlikisia Pea Mo Te Taulekaleka ʼo Sehova

5. ʼE lahi feafeaʼi ia te ʼalikisia ʼo Sehova?

⁵ ʼI te hiva ʼaē ʼe fakakehekeheʼi ai ia te tauʼoluga ʼo te ʼAtua pea mo te veliveli ʼo te tagata, neʼe ʼui fēnei e te tagata fai pesalemo ko Tavite: “Ê Sehova totatou ʼAliki, ke māʼoluga ʼaupitō tou huafa ʼi te kele kātoa, ia koe ʼaē ʼe fakamatala tou ʼalikisia ʼi te fuga lagi!” (Pes. 8:1) Talu mai te temi ʼaē neʼe fakatupu ai ia “te lagi pea mo te kele” ʼo aʼu ki te fakahoko kātoa ʼo te fakatuʼutuʼu ʼa te ʼAtua ke liliu ia te kele ko he palatiso pea mo taki ia te tagata fuli ki te maʼuli haohaoa, talu mai he ʼu temi ʼe heʼegata ki he ʼu temi ʼe heʼegata, ko Sehova ʼAtua ʼe ko Ia ʼaē ʼe māʼoluga pea mo ʼalikisia tokotahi pē ʼi te ʼatulaulau.—Sen. 1:1; 1 Ko. 15:24-28; Fakh. 21:1-5.

6. He koʼē neʼe ʼui e te tagata fai pesalemo ko Sehova ʼe ina kofuʼi ia te ʼalikisia?

⁶ Neʼe lagi ōfo lahi ia te tagata fai pesalemo ʼaē neʼe manavasiʼi ki te ʼAtua ʼi tana mamata ʼi te pōʼuli ki te laulahi ʼaupitō ʼo te lagi fetuʼuʼia, ʼe mafola ai “te ʼu meʼa matalelei” gigila! ʼI tana ōfo ʼo ʼuhiga mo te haga ʼa te ʼAtua ‘ ʼo folahi te lagi ohagē ko he falelā,’ neʼe fakamatala e te tagata fai pesalemo ʼe kofuʼi e Sehova ia te ʼalikisia ʼuhi ko Tona poto lahi ʼaupitō ʼi te ʼu meʼa ʼaē neʼe ina fakatupu. (Lau ia Pesalemo 104:1, 2.) ʼE tou sio mata ki te ʼalikisia pea mo te taulekaleka ʼo te Tupuʼaga fakapulipuli mo māfimāfi ʼi tana ʼu gāue.

7, 8. ʼE tou sio mata feafeaʼi ki te ʼalikisia pea mo te taulekaleka ʼo Sehova ʼi te ʼatulaulau?

⁷ Ohagē lā, tou vakaʼi age muʼa ia te fakapupu ʼo te ʼu fetuʼu ʼaē ko te Voie Lactée. Ko te Kele ʼi te ʼu tuʼuga fetuʼu ʼaia, ʼe hagē ko he kihiʼi meʼa ohagē ko he kiʼi fisiʼi ʼone ʼi he toe mataʼone lahi. ʼE maʼu ʼi te Voie Lactée ia fetuʼu e 100 miliale tupu! Kapau ʼe feala ke kotou lau he fetuʼu e tahi ʼi te ʼu sekonita fuli, ʼo fai hoholo fēia lolotoga hola e 24, pea ʼe kotou lau anai ia fetuʼu e 100 miliale lolotoga taʼu e 3 000.

⁸ Kapau ko fetuʼu e 100 miliale ʼaē ʼe fakapupu ʼi te Voie Lactée pē, pea ʼe feafeaʼi age lā ia te toe ʼo te ʼatulaulau? Ko te hahaʼi sivi fetuʼu ʼe natou fakafuafua ko te Voie Lactée ʼe ko te tahi ʼi te ʼu 50 miliale peʼe 125 miliale ʼu fakapupu fetuʼu fēia. Ko fetuʼu koa e fia ʼi te ʼatulaulau kātoa? ʼE lahi fau te ʼu fetuʼu, ʼo mole feala ke tāʼofi e totatou ʼatamai. Kae ko Sehova “ ʼe ina ʼiloʼi peʼe ko fetuʼu e fia; ʼe ina pāuiʼi nātou fuli ʼaki tonatou ʼu higoa.” (Pes. 147:4) ʼI takotou mahino ʼaē ʼe kofuʼi Sehova ʼaki te ʼalikisia pea mo te taulekaleka, ʼe mole uga ai koa koutou ke kotou fakavikiviki ia tona huafa lahi?

9, 10. Ko te faʼahiga gaohi ʼaē ʼo te pane ʼe ina fakakolōliaʼi feafeaʼi ia te poto ʼo totatou Tupuʼaga?

⁹ Kua tou talanoa ki te ʼatulaulau māʼoluga kae tou talanoa age nei ki te tahi age meʼa kua tou māhani fuli pē kiai ʼe ko te pane. Ko Sehova ʼe ko “te Tupuʼaga ʼo te lagi pea mo te kele” pea ko “Ia ʼaē ʼe ina foaki mai ia te pane kiā nātou ʼaē ʼe fia kakai.” (Pes. 146:6, 7) Ko te “ ʼalikisia pea mo te taulekaleka” ʼo te ʼAtua ʼe hā ʼi tana ʼu gāue lalahi, ʼo kau kiai ia te fulumeto ʼaē ʼe fai ʼaki te pane. (Lau ia Pesalemo 111:1-5.) Neʼe akoʼi e Sesu tana kau tisipulo ke natou faikole fēnei: “Foaki mai ʼi te ʼaho nei tamatou pane ki te ʼaho ʼaenī.” (Mat. 6:11) Ko te pane neʼe ko he meʼa kai tāfito ʼaia ʼa te hahaʼi tokolahi ʼi te temi muʼa, ʼo fēia mo te kau Iselaele. Logolā ko te pane neʼe faigafua pē ia tona maʼu, kae ko tona gaohi ʼaē ke liliu ko he pane kano lelei ʼaki te natu fakatahi ʼo he ʼu faʼahiga meʼa kehekehe, ʼe mole ko he meʼa faigafua ia tona fai.

¹⁰ ʼI te temi ʼaē neʼe tohi ai te Tohi-Tapu, neʼe fakaʼaogaʼi e te kau Iselaele ia te falena ʼo te fulumeto peʼe ko te falena ʼo te olose pea mo te vai moʼo fai ʼaki ia te pane. ʼI ʼihi temi neʼe fakaʼaogaʼi ia te meʼa fakatupu moʼo fai ia te pane. Neʼe natu fakatahi ia te ʼu meʼa fuli ʼaia ke liliu ko he lapate moʼo fai ʼaki ia te pane. Ko te meʼa ʼaē ʼe hoko ʼi te temi ʼaē ʼe natu fakatahi ai te ʼu meʼa fuli ʼaia, ʼe mole heʼeki faʼa ʼiloʼi lelei. Tahi ʼaē meʼa, ko te kai pea mo te hifo lelei ʼo te pane ʼi te sino ʼe ko he tahi faʼahi ia ʼe fakaofoofo. Koia, ʼe mole tou punamaʼuli ai ʼi te hiva fēnei ʼa te tagata fai pesalemo: “ ʼE lahi tau ʼu gāue Ê Sehova! Neʼe ke fai tau ʼu gāue fuli ʼaia ʼaki te poto”! (Pes. 104:24) ʼE kotou toe fia vikiʼi fēia koa mo koutou ia Sehova?

ʼE Malave Feafeaʼi Kiā Koutou Ia Te ʼAlikisia Pea Mo Te Taulekaleka ʼo Te ʼAtua?

11, 12. ʼE feala ke malave feafeaʼi kiā tātou tatatou metitāsioʼi te ʼu meʼa ʼaē neʼe fakatupu e te ʼAtua?

¹¹ Tatau aipē peʼe mole tou popoto ʼi te sivi ʼo te ʼu fetuʼu kae ʼe tou ōfo ʼi tatatou mamata ki te lagi fetuʼuʼia, peʼe mole tou popoto ʼi te fakatahiʼi ʼo te ʼu meʼa ʼaē moʼo fai ʼaki te falena kae ʼe tou leleiʼia pē ia te pane. Kae ke tou fakafetaʼi ki te tauʼoluga ʼo totatou Tupuʼaga, ʼe tonu ke tou toʼo he temi ke tou metitāsioʼi ia te ʼu gāue ʼo tona ʼu nima. ʼE malave feafeaʼi ia te taʼi metitāsio ʼaia kiā tātou? Ko tona malave ʼaia kiā tātou ʼe tatau ʼosi pē mo tata metitāsioʼi ʼaē ia he tahi age ʼu gāue ʼa Sehova.

¹² ʼO ʼuhiga mo te ʼu gāue lalahi ʼaē neʼe fai e Sehova maʼa Tana hahaʼi, neʼe hiva fēnei e Tavite: “ ʼE au fia ʼiloʼi te taulekaleka fakakolōlia ʼo tou ʼalikisia pea mo te ʼu meʼa ʼo tau ʼu gāue fakaofoofo.” (Pes. 145:5) ʼE tou fakahā tatatou fia ʼiloʼi ia te ʼu gāue ʼaia ʼaki tatatou ako ia te Tohi-Tapu pea mo toʼo he temi moʼo metitāsioʼi ia te ʼu meʼa ʼaē ʼe tou lau ai. Koteā anai tona fua kiā tātou? ʼE tuputupu ai totatou loto fakafetaʼi ki te ʼalikisia pea mo te taulekaleka ʼo te ʼAtua. ʼE mahino ia, ʼe uga ai anai tātou ke tou kau fakatahi mo Tavite ki te fakamaʼuhigaʼi ʼo Sehova pea mo ʼui fēnei: “ ʼE au fia tala tou tauʼoluga.” (Pes. 145:6) Ko tatatou metitāsioʼi ia te ʼu gāue fakaofoofo ʼa te ʼAtua ʼe tonu ke fakamālohi ai tatatou ʼu felōgoi mo Sehova pea mo uga ai tātou ke tou palalau ʼo ʼuhiga mo ia ki te hahaʼi ʼaki he loto fiafia pea mo he tui papau. ʼE kotou faʼafai koa ʼo tala ia te logo lelei pea mo tokoni ki te hahaʼi ke natou loto fakafetaʼi ki te ʼalikisia, mo te taulekaleka, pea mo te māfimāfi ʼo Sehova ʼAtua?

ʼE Fakahā Lelei e Sesu Ia Te ʼAlikisia ʼo Te ʼAtua

13. (a) ʼO mulimuli kiā Taniela 7:13, 14, koteā ʼaē neʼe foaki age e Sehova ki tona ʼAlo? (b) ʼI tona ʼuhiga Hau, ʼe felōgoi feafeaʼi Sesu mo tana hahaʼi fakalogo?

¹³ Ko te ʼAlo ʼo te ʼAtua, ia Sesu Kilisito, neʼe faʼafai ʼi tana tala ia te logo lelei pea neʼe ina fakamaʼuhigaʼi ia te ʼalikisia ʼo tana Tamai ʼaē ʼe ʼi selō. Neʼe foaki e Sehova ki tona ʼAlo ʼulu tokotahi ia he ʼalikisia lahi ʼaki tana foaki age kiā te ia ia te ‘pule pea mo te puleʼaga.’ (Lau ia Taniela 7:13, 14.) Kae ko Sesu ia ʼe mole fialahi peʼe nofo mamaʼo ia mai te hahaʼi. ʼE mole fēia tona ʼulugaaga, heʼe ko ia ko te Hau ʼe manavaʼofa, ʼe mahino ki te ʼu tuʼakoi ʼo tana hahaʼi fakalogo pea mo fakaʼapaʼapa kiā nātou. Tou vakaʼi age ia te faʼifaʼitaki ʼe fakahā ai pe neʼe felōgoi feafeaʼi ia Sesu, te Hau ʼaē neʼe Fili, mo te hahaʼi ʼaē neʼe felāveʼi mo ia, tāfito lā ia nātou ʼaē neʼe liʼakina pea neʼe mole ʼofainaʼi.

14. Neʼe gaohi feafeaʼi ia te hahaʼi kilia ʼi te temi ʼo Iselaele?

¹⁴ ʼI te temi muʼa, ko te maʼuli ʼo te hahaʼi kilia ʼi te agamāhani neʼe fakaʼofaʼofa he neʼe tautuku māmālie pē. ʼAki te temi, neʼe kaina ia te ʼu koga ʼo te sino ʼo ia ʼaē neʼe mahaki. Ohagē pē ko te faigataʼa ʼo te fakatuʼuake ʼo he tahi kua mate, neʼe mole feala ki he tahi neʼe kilia ke fakamālōlō. (Fkau. 12:12; 2 Hau 5:7, 14) Neʼe tala ko te kau kilia ko he ʼu hahaʼi heʼemaʼa pea neʼe fehiʼaʼinaʼi nātou pea mo kapu nātou ʼi te kolo. Kā natou fakaovi ki te hahaʼi, neʼe tonu ke natou kalaga: “Heʼemaʼa, heʼemaʼa!” (Lev. 13:43-46) Ko he tahi neʼe kilia neʼe hagē pē ia ko he tahi kua mate. ʼI te ʼu tohi fakalapi, ʼe fakahā ai neʼe fakagafua ki he tagata kilia ke vaha mo he tahi iā teitei meta e 1,8. Neʼe ʼui ʼi te temi ʼaē neʼe sio ai ki he tahi neʼe kilia, tatau aipē pe neʼe tuʼu mamaʼo, ko te takitaki lotu neʼe ina tuki makaʼi ia ia ke mole fakaovi age.

15. Neʼe feafeaʼi ia te felōgoi ʼaē ʼa Sesu mo te tagata kilia?

¹⁵ Kae ʼe lelei ke tou tokagaʼi ia te meʼa ʼaē neʼe fai e Sesu ʼi te temi ʼaē neʼe ʼalu age kiā te ia ia te tagata kilia pea mo kolekole age ke ina fakamālōlō ia ia. (Lau ia Maleko 1:40-42.) Neʼe mole kapu e Sesu ia te tagata kilia, kae neʼe manavaʼofa pea mo fakaʼapaʼapa ki te tagata ʼaia ʼaē neʼe fehiʼaʼinaʼi. Ko te faʼahi ʼaē neʼe tokagaʼi e Sesu neʼe ko he tagata fakaʼofaʼofa pea neʼe ʼaoga ki ai ke fakafīmālieʼi. ʼI te ʼofa ʼaupitō ʼaē ʼa Sesu ki te tagata kilia, neʼe ina fakahā ai ia tona manavaʼofa, ʼo tokoni ai ki te tagata kilia ʼaia. Neʼe ina faoʼi atu tona nima, ʼo fāfā ki te tagata kilia pea mo ina fakamālōlō ai ia ia.

16. Koteā te ako neʼe kotou tāʼofi mai te felōgoi ʼaē ʼa Sesu mo te hahaʼi?

¹⁶ ʼI totatou ʼuhiga tisipulo ʼa Sesu, ʼe tou lava faʼifaʼitakiʼi feafeaʼi ia Sesu ʼi tana fakahā ia te ʼalikisia ʼaē ʼo tana Tamai? ʼE feala ke tou fai, ʼaki hatatou fakamoʼoni ʼe tāu mo te hahaʼi fuli pē ke tou fakamaʼuhigaʼi pea mo fakaʼapaʼapa kiā nātou, tatau aipē peʼe koteā tonatou tuʼulaga, tonatou maʼuli fakasino peʼe ko tonatou taʼu. (1 Pet. 2:17) Tāfito lā ia nātou ʼaē ʼe natou maʼu ia te pule, ohagē ko te ʼu tagata ʼohoana, te ʼu mātuʼa, pea mo te ʼu tagata ʼāfea Kilisitiano, ʼe tonu ke natou fakaʼapaʼapaʼi ia nātou ʼaē ʼe natou tōkakaga ki ai pea mo tokoni kiā nātou ʼaia ke natou taupau tonatou matagafua. ʼE fakahā lelei ʼi te Tohi-Tapu ʼe ko he fakamaʼua ʼaia ki te kau Kilisitiano fuli, heʼe ʼui fēnei ai: “ ʼO ʼuhiga mo te ʼofa fakatautēhina, ke kotou femaʼuʼaki he ʼofa ʼe loloto. ʼO ʼuhiga mo takotou fefakamaʼuhigaʼaki, kotou tuku he faʼifaʼitaki.”—Loma 12:10.

Tou Fakahā Te Fakaʼapaʼapa ʼi Tatatou Tauhi Kiā Sehova

17. Koteā te ako ʼe tou tāʼofi mai te Tohi-Tapu ʼo ʼuhiga mo te fakahā ʼo te fakaʼapaʼapa mokā tou fakaovi kiā Sehova ʼi tatatou tauhi?

¹⁷ ʼE tonu ke tou tōkakaga ʼo fakahā ia he fakaʼapaʼapa mokā tou fakaovi kiā Sehova ʼi tatatou tauhi. ʼE ʼui fēnei iā Tagata Tānaki 5:1: “Tokaga ki tou ʼu vaʼe mokā ke ʼalu ki te ʼapi ʼo te ʼAtua moʼoni.” Neʼe fakatotonu kiā Moisese pea mo Sosue ke nā toʼo tonā ʼu hoaʼi taka ʼi tanā tutuʼu ʼaē ʼi te koga meʼa taputapu. (Eke. 3:5; Sos. 5:15) Neʼe tonu ke nā fai ia te faʼahi ʼaia moʼo fakahā ʼaki ia tanā aga fakaʼapaʼapa. Neʼe tonu ki te kau pelepitelō Iselaele ke natou kofuʼi ia te ʼu kofu lino “moʼo fufū ia tonatou kakano telefua.” (Eke. 28:42, 43) Neʼe mole feala ai ke hoko he aga heʼe fakaʼapaʼapa ʼi te temi ʼaē neʼe natou gāue ai ʼi te ʼaletale. Neʼe tonu kiā nātou fuli ʼaē ʼe kau ki he fāmili fakapelepitelō ke natou mulimuli ki te ʼu lēkula fakaʼatua ʼo ʼuhiga mo te fakaʼapaʼapa.

18. ʼE tou fakahā feafeaʼi ia te fakaʼapaʼapa ʼi tatatou tauhi ʼaē kiā Sehova?

¹⁸ ʼE tonu ke tou aga fakaʼapaʼapa ʼi tatatou tauhi, ʼo tou fakamaʼuhigaʼi ia te hahaʼi. Ke tāu mo tātou he fakamaʼuhigaʼi pea mo fakaʼapaʼapa, ʼe tonu ke tou aga fakaʼapaʼapa. Ko te fakaʼapaʼapa ʼaē ʼe tou fakahā ʼe mole mālualoi peʼe ke hagē pē ko he kofu. ʼE mole gata pē ʼi te meʼa ʼaē ʼe sio kiai te tagata, kae ʼe tonu ia ke aʼu atu ki te meʼa ʼaē ʼe sio kiai te ʼAtua, ʼaē ko totatou loto. (1 Sam. 16:7; Taag. 21:2) ʼE tonu ke iā tātou ia te fakaʼapaʼapa pea mo hā ʼi tatatou ʼu aga, tatatou ʼu felōgoi mo te hahaʼi, ʼo fēia pē mo tatatou faʼahiga manatu ʼo ʼuhiga mo tātou totonu. Koia, ʼe tonu ai ʼi te temi fuli pē ke tou fakahā ia tatatou fakaʼapaʼapa pea iā faʼahi fuli ʼo tatatou ʼu palalau pea mo tatatou ʼu aga. ʼO ʼuhiga mo tatatou aga, tatatou faʼahiga faiteuteu pea mo te helu ʼo totatou ʼulu, ʼe tou mulimuli anai ki te ʼu palalau ʼaenī neʼe fai e te ʼapositolo ko Paulo: “ ʼE mole [tou] fai he meʼa ke fakatupu higa ki he tahi, ke ʼaua naʼa fatufatuʼi [tatatou] minisitelio, kae, iā meʼa fuli ʼe [tou] fakahā ko [tātou] ko te ʼu minisi ʼa te ʼAtua.” (2 Ko. 6:3, 4) ʼE tou “fakamataleleiʼi iā meʼa fuli pē ia te akonaki ʼo totatou Fakamaʼuli, ia te ʼAtua.”—Tito 2:10.

Tou Fakahā Tuʼumaʼu Ia Te Fakaʼapaʼapa Fakaʼatua

19, 20. (a) Ko te aga fea ʼaē ʼe tou fakahā ai ia tatatou fakaʼapaʼapa ki te hahaʼi? (b) ʼO ʼuhiga mo te fakaʼapaʼapa, koteā ʼaē ʼe tonu ke tou fakatotonu ke tou fai?

¹⁹ ʼE fakahā e te kau Kilisitiano fakanofo ia te fakaʼapaʼapa, ko nātou ʼaia ʼe ko “he ʼu tagata fakafofoga moʼo fetogi ʼo Kilisito.” (2 Ko. 5:20) Ko te “tahi ʼu ovi,” ʼaē ʼe natou lagolago agatonu ki te kau fakanofo, ʼe ko he hahaʼi ʼe tuha mo he fakaʼapaʼapa neʼe fekauʼi maʼa te Puleʼaga Fakamēsia. Ko he tagata fakafofoga peʼe ko he tagata fekau ʼe palalau ʼaki he lototoʼa pea mo he fakaʼapaʼapa ʼo ʼuhiga mo tona puleʼaga. Koia, ʼe tonu ai ke tou palalau ʼaki he aga fakaʼapaʼapa pea mo he lototoʼa moʼo lagolago ki te Puleʼaga ʼo te ʼAtua. (Efe. 6:19, 20) Pea kā tou fakahā ki te hahaʼi ia “te ʼu logo lelei ʼo he meʼa ʼe lelei age,” ʼe mole tou fakahā koa lā kiā nātou he fakaʼapaʼapa?—Isa. 52:7.

²⁰ ʼE tonu ke tou fakatotonu ke tou fakakolōliaʼi ia te ʼAtua ʼaki hatatou fai ia te aga ʼaē ʼe ʼalutahi mo tona ʼalikisia. (1 Pet. 2:12) Tou fakahā tuʼumaʼu ia he fakaʼapaʼapa lahi kiā te ia, ki tona tauhi, pea ki totatou ʼu tehina mo tuagaʼane. Pea ʼofa pē ke fiafia Sehova, ʼaē ʼe ina kofuʼi ia te ʼalikisia pea mo te taulekaleka, ʼi tatatou tauhi ʼaē kiā te ia ʼaki te aga fakaʼapaʼapa.

[Nota]

ʼE Kotou Tali Feafeaʼi Anai?

• ʼE malave feafeaʼi kiā tātou ia tatatou leleiʼia te taulekaleka ʼo te ʼalikisia ʼo Sehova?

• Koteā te ako ʼe tou lava tāʼofi ʼo ʼuhiga mo te fakaʼapaʼapa ʼi te felōgoi ʼaē ʼa Sesu mo te tagata kilia?

• ʼE tou lava fakamaʼuhigaʼi feafeaʼi ia Sehova ʼaki he fakaʼapaʼapa?