Abantu Abaselula Bayabuza . . .
Ngaba Ndifanele Ndibe Lilungu Leqela Labadlali Elimela Isikolo?
“Ukudlala kwakumnandi ibe kusonwabisa. Kwakundenza ndizive ndinguthile. Xa uselula uze ekugqibeleni ufumanise ukuba uyincutshe entweni ethile, akufuni kuyiyeka loo nto.”—URobert.
MHLAWUMBI nawe uyakunandipha ukudlala kumaqela athile kwezemidlalo. Uyawuthanda umthambo, unxulumano oluhle nabahlobo nokonwaba. Usenokude uphuphe uyintshatsheni, ubona isihlwele esinehlombe njengoko uphosa ibhola iyokungena emnyazini, uyibamba okanye uzibona ufaka inqaku elibangela iqela lakho liphumelele.
Enoba siyintoni na isizathu sokuthanda kwakho imidlalo, ulutsha oluninzi lunezizathu ezifanayo. Luthanda ngokukodwa ukudlala kumaqela athile kwezemidlalo, njengakumdlalo wombhoxo, ibhola ekhatywayo, ibhola yomnyazi, ibaseball nehockey. IThe Education Digest ithi: “Abafundi [baseUnited States] abangaphezu kwezigidi ezisisi-5,2 babebandakanyeke kugqatso lweembaleki zezikolo zemfundo ephakamileyo ebudeni bomnyaka wesikolo wowe-1986-87, nani elo elilelona liphakamileyo kwiminyaka emine. Kwakhona, izikolo zemfundo ephakamileyo ziye zongezelela imidlalo emitsha kwiminyaka eli-10 edlulileyo, emininzi elungiselelwe amantombazana.”
Isizathu Sokuba Ithandwe Kangaka
Ukuthandwa okukhulu kwemidlalo kwakukhe kwabhekiselwa kuko ngamazwi endoda esisilumko yakudala eyathi: “Isihombo samadodana ngamandla awo.” (IMizekeliso 20:29) Imidlalo ibangela ukukhutshwa okuhlaziyayo kwamandla agqithiseleyo umntu anawo kwiminyaka yakhe yobutsha. Inokuvelisa ucelomngeni olunik’ impilo emzimbeni nasengqondweni. Ukuba nenxaxheba emidlalweni kukwanokuvuyisa yaye konwabise, kunokunik’ isiqabu kumsebenzi wesikolo oqhelekileyo nakwimisebenzi yasemva kokuphuma kwesikolo.
Ukongezelela, bambi basenokuma ngelokuba ukudlala kwiqela elithile kwakha ubuntu bukabani. IThe High School Survival Guide, nguBarbara Mayer ithi: “Uqeqesho nemvakalelo yokuzinikela efunekayo emidlalweni ziya kukufundisa indlela yokuzimisela kusukelo lwakho oluxabiseke ngakumbi. . . . Ukuba nenxaxheba emidlalweni kunokukunceda ukuba ube yinkokeli.”
Noko ke, asilulo lonke ulutsha oluneentshukumisa eziphakame ngolo hlobo ngemidlalo. Uzuko, udumo nokuhlonelwa zikwazizinto ezilukhuthaza ngamandla. UReggie ukhumbula oku, “Ukuba wawulilungu leqela labadlali, wawugqalwa njengomnye wabona bafana bathandwayo kwabakhe bakho kweso sikolo.”
IBhayibhile iyavuma ukuba “ingqeqesho yomzimba inoncedo oluthile.” (1 Timoti 4:8, Today’s English Version) Ibe kusenokubonakala ukuba ukudlala kwiqela elimela isikolo kuya kuba yindlela yokufumana ingenelo elolo hlobo. Sekunjalo, ulutsha oluninzi luye lwafumanisa ukuba iinzima zokuba ngumdlali kwiqela elimela isikolo zingaphezu kweengenelo ezifumanekayo.
“Iingozi Zoku”
Iphephancwadi iSeventeen linikela le ngxelo: “Emidlalweni kukho icala elingalunganga, apho abantu bathi bazibhokoxe ekuphumeleleni. Kumqeqeshi, ukuphumelela kusenokukhokelela ekunyuselweni okanye ukuvela kumabonwakude. Kumzali, ukuphumelela komntwana wakhe kusenokuthetha ukuba nelungelo lokuqhayisa okanye abe nemvakalelo yokungathi nguye lo uphumelelayo. Kwimbaleki, ukuphumelela kusenokuthetha ukufumana imfundo yafele-fele, ukukhankanywa ezindabeni, ukunconywa ngabo ifunda nabo nangabamelwane.”
Iimbaleki zezikolo ezithile zikwaphupha nangokuhambela phambili zize zibe ngabadlali abahlawulwayo. UGerald oselula wathi, “Ndandiphupha ndidlala kwimidlalo yobuntshatsheli yamaqela eedolophu nawenqila ndize ekugqibeleni ndidlale kwahlawulwayo. Ndandizibona ndisiba sisityebi, igama lam libhalwe kwizibhengezo zentengiso, ndiphakathi kweendwalutho ezaziwayo, ndingumzekelo ophambili wokuxeliswa yaye ndithandana neyona mbelukazi esikolweni.”
Ngoko phantse ayimangalisi into yokuba imidlalo ezikolweni ezininzi ingumbandela wokufa nokuphila! Ulonwabo nokomeleza izihlunu zomzimba ziqalisa ukuba kwindawo yokugqibela. Kunjengokuba iSeventeen yahlabela mgama isithi: “Ngequbuliso ukuthi ti kukuphumelela kubangela ukuba ukunyaniseka, umsebenzi wesikolo, impilo, ulonwabo nezinye iinkalo ezibalulekileyo zobomi zingabi saxhalatyelwa. Eyona nto iphambili kukuphumelela, yaye abangakumbi nangakumbi baziva benyanzelekile ukuba baphumelele.”
Ngokwesamela kwesi simo sengqondo sokuphumelela nokuba sekumnyam’ entla, akumangalisi ukubona iingozi ezixhaphakileyo kwimidlalo yeembaleki zesikolo. Maxa wambi ugonyamelo olubangelwa ziimbaleki, ngababukeli kwanangabazali luqhelekile emidlalweni. Ibe ukusetyenziswa kweziyobisi ezandisa amendu embaleki, ezinjengeesteroids, kuya kusanda kwanaphakathi kweembaleki ezikwishumi elivisayo.
Ngoko, ngoxa ukudlala eqeleni elithile kusenokuba neengenelo ezithile ezilinganiselweyo, kusenokubangela umoya wokhuphiswano ogqithisileyo, ukucinga ngobutyebi obuninzi nomoya wokhuphiswano wokufuna uzuko. Ezi zinto ngokucacileyo azivisisani nesiluleko seBhayibhile ‘sokungabi ngabakhuphisanayo,’ sokungathandi mali yaye singasukeli uzuko lobuqu. (Galati 5:26, NW; IMizekeliso 25:27; 1 Timoti 6:10) Ukudlala kwiqela elimela isikolo kunokukubeka esichengeni seempembelelo ezimbi ngeyona ndlela icinezelayo.
Ingcinezelo Yoontanga
Abahlohli kwezemfundo badla ngokuwancoma amathuba imidlalo ewavulayo okwakha ubuhlobo obusondeleneyo noontanga. Into enzima kukuba, ikwaleli thuba elibangela ingxaki kulutsha olungamaKristu. IBhayibhile ithi: “Unxulumano olubi lonakalisa imikhwa elungileyo.”—1 Korinte 15:33, NW; 2 Korinte 6:14.
Ngeliphandle, lunxulumano olunjani osenokuba uzifaka kulo kwigumbi lokutshintshela leqela labadlali? Omnye oselula uyavuma: “Kwakukho izithuko ezininzi nokusetyenziswa kwentetho embi. Abafana babesoloko bencokola ngamantombazana yaye babesiza neencwadi ezibonisa amanyala ukuze zibukwe.” Ngapha koko, ngokuqhelekileyo ukwakha nokulondoloza umoya weqela kufuna ukuba unxulumane ngokuhlala namalungu eqela ngaphambi nangemva kwemidlalo nangamathuba okuqhelisela umdlalo.
Liyinyaniso elokuba, kusenokwenzeka ukuba seqeleni labadlali uze ungabandakanyeki kwimicimbi yalo yokuzonwabisa. Kodwa kunjengokuba enye intombazana ekwishumi elivisayo eneminyaka eli-14 ubudala ivuma isithi: “Ingcinezelo yoontanga inamandla kakhulu kuwe kunokuba nje udlale uze ugoduke.” Ngoko iBhayibhile iyabuza: “Umntu unokuwuthabatha na umlilo ase esifubeni sakhe, zingatshi na iingubo zakhe?” (IMizekeliso 6:27) Lucinezelwa ngamalungu eqela lalo, lumbi ulutsha luye lwazifumana lukumatheko ekusetyenziswa kuwo utywala neziyobisi, kungasathethwa ke ngomculo othoba isidima neemeko zokulalanisa nabesini esahlukileyo.
Khawucinge ngamava oselula ogama linguRobert. Uthi: “Emva kokuba ndingenele iqela labadlali, iingxaki zaba ninzi. Kwakukho ingcinezelo engamandla yokubandakanyeka kwisini sangaphambi komtshato, kwiziyobisi, ekuseleni nokuya kumatheko angalawulekiyo. Ndandingakholelwa nje ukuba izinto ezinjalo zinganxulunyaniswa nemidlalo yesikolo semfundo ephakamileyo. Kwibala lemidlalo nangaphandle kwalo, ulindelwe ukuhamba, ukuthetha yaye wenze kanye ngohlobo amanye amakhwenkwe enza ngalo.”
Enye into engenakutyeshelwa ngumphumo ukuba ngumdlali okunokuba nawo kwimisebenzi yakho yokomoya eqhelekileyo. (Hebhere 10:23-25) UGerald oselula uthi: “Ngokufuthi, ixesha lemidlalo nelokuyiqhelisela lalingqubana neleentlanganiso zamaKristu.”
Iindlela Ezizezinye Ezifanelekileyo
Kakade ke, ilungiselelo lokubaleka njengendlela yokuziqeqesha lusenokubakho ebudeni beeyure zesikolo njengenxalenye yezifundo eziqhelekileyo, yaye ngokuqhelekileyo ayichasekanga into yokuba umKristu oselula aye kwizifundo ezinjalo. Ngaphezu koko, iimeko ziyahluka kumazwe ngamazwe. Sekunjalo, ulutsha oluphakathi kwamaNgqina kaYehova ngokuqhelekileyo luyakuphepha ukubandakanyeka kwimidlalo yesikolo engaphandle kweeyure zesikolo. Ngoko, oku akuthethi ukuba njengomKristu oselula akunakuyinandipha imidlalo. Phofu ke, kuthetha ukuba kuya kufuneka uthabathe amanyathelo athile.
Ngokomzekelo, usenokuthetha nabazali bakho ngokuceba ukuya kubethwa ngumoya, njengokuya epikinikini. Oku kusenokuvelisa ithuba lokuba intsapho yakowenu nabahlobo bakho banandiphe iindlela ezithile zemidlalo enik’ impilo. Okanye usenokuzama ukumema iqela elithile lolutsha olungamaKristu ukuba nidibane nize nidlale ibhola okanye nibaleke nide nanele.
Noko ke, kubalulekile ukuwuphepha umoya ogqithiseleyo wokhuphiswano. Kukho usompempe, amaqela abadlali acwangciswe kakuhle adla ngokuphembelela umoya wokuphumelela nokuba sekumnyam’ entla kwanaxa bonke abadlali bengamaKristu. Ngoko idla ngokuba kokona kulunge kakhulu ukwenza umdlalo nje ongacwangciswanga kangako. Enyanisweni, ukuba neliso lothile okhulileyo ngokufuthi kuyimbono elungileyo.
Kuyavunywa ukuba, imidlalo engacwangciswanga isenokungonwabisi ngendlela eyonwabisa ngayo imidlalo yesikolo ecwangcisiweyo. Kodwa sekunjalo unokuzonwabisa. URobert wagqiba ukuba arhoxe kwiqela lesikolo sakhe. Kodwa uthi: “Ndisakunandipha kakhulu ukudlala imidlalo. Ndikunandipha kakhulu ngoku kunanini na ngaphambili. Xa ndidlala imidlalo ngoku, andisenamnqweno wokuphumelela nokuba sekumnyam’ entla, andizaliswanga nangumoya wokhuphiswano.”
Khumbula ukuba xa umpostile uPawulos waxelela umfana oselula uTimoti oku: “Eyeyomzimba ingqeqesho inceda kancinane,” wongezelela esithi, “ke kona ukuhlonela uThixo kunceda ngako konke.” Licacile elokuba, ukuba yimbaleki asiyonjongo yomKristu ebomini. Ngoko beka imidlalo kwindawo efanelekileyo. Kutheni uchitha ixesha ebeliya kusetyenziswa ngokuyingenelo ngakumbi ekwakheni ubumoya bakho? Khumbula oku: Ukuhlonela uThixo “kunedinga lobomi bakalokunje, nobobo buza kubakho.”—1 Timoti 4:8.
[Umfanekiso okwiphepha 18]
Umoya wokuphumelela nokuba sekumnyam’ entla ulawula imidlalo yesikolo emininzi