IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • g 3/12 iphe. 4-7
  • Kutheni Abantu Bevutha Kangaka Ngumsindo?

No video available for this selection.

Sorry, there was an error loading the video.

  • Kutheni Abantu Bevutha Kangaka Ngumsindo?
  • Vukani!—2012
  • Imixholwana
  • Amanqaku Afanayo
  • Umzekelo Omiselwa Ngabazali
  • Izixeko Ezixineneyo
  • Imeko Emaxongo Yoqoqosho
  • Ikhethe Nokungekho Sesikweni
  • Amajelo Ezolonwabo
  • Impembelelo Yemimoya Engendawo
  • Wuxhathise Umsindo
  • Ithini IBhayibhile Ngokuba Nomsindo?
    Imibuzo YeBhayibhile Iyaphendulwa
  • Umsindo—Uyintoni?
    IMboniselo Evakalisa UBukumkani BukaYehova—1987
  • Ngaba Kusoloko Kuphosakele Ukuba Nomsindo?
    Vukani!—1994
  • Ingxaki Ngokuba Nomsindo
    Vukani!—2012
Khangela Okunye
Vukani!—2012
g 3/12 iphe. 4-7

Kutheni Abantu Bevutha Kangaka Ngumsindo?

KUNZIMA ukubazi oonobangela bokucaphuka. Nezazinzulu ziyavuma ukuba ziyafunisela. Kodwa, iingcali zengqondo zivumelana zonke ukuba abantu “banezinto ezivusa umsindo.”

Umntu unokucaphuka kuba ephazinyiswa yinto ethile. Ezi zinto idla ngokuba kukungabikho kokusesikweni okanye impatho-mbi. Inokuba kukuthukwa okanye ukudelelwa. Isenokuba ngumntu ongalihloneliyo igunya esinalo.

Kakade ke, abantu “bacatshukiswa zizinto” ezahlukeneyo. Kuxhomekeka ekubeni ngamadoda okanye ngabafazi okanye ubudala babo kuquka imvelaphi yabo. Nalapho, bacaphuka ngendlela ezahlukeneyo. Abanye abafane babe nomsindo yaye bakhawuleza balibale ngoxa abanye becaphuka msinya, bacaphuke kangangeentsuku, iiveki iinyanga, nangaphezulu.

Zininzi ezinto ezicaphukisayo namhlanje. Ukongezelela, ziya zisiba nobuzaza. Konakele phi? Enye into kukungabacingeli abanye, ukucinga ngeziqu zethu okugqugqisileyo namhlanje. IBhayibhile ithi: “Ngemihla yokugqibela . . . abantu baya kuba ngabazithandayo, abathandi bemali, abazidlayo, abanekratshi, . . . abaneentloko ezilukhuni, abakhukhumele likratshi.” (2 Timoti 3:1-5) Ngaba oku akubachazi kakuhle abantu banamhlanje?

Enyanisweni, xa izinto zingahambi ngendlela abafuna ngayo, abantu abacinga ngeziqu zabo badla ngokuba nomsindo. Zikho nezinye izinto ezenza babe baninzi abantu abavutha ngumsindo. Nazi ezinye zazo.

Umzekelo Omiselwa Ngabazali

Umzali uba nempembelelo kubuntu bomntwana wakhe ukususela ebuntwaneni ukusa ekufikiseni. Ingcali ngengqondo uHarry L. Mills uthi: “Kwasebusaneni, abantu bafunda ukukhupha umsindo ngendlela abayibona kubantu ababangqongileyo.”

Xa umntwana ekhulela kubantu abacaphuka msinya nokuba akukho sizathu, naye ufunda ukucombulula iingxaki ngomsindo. Unokumfanisa nesityalo ebesinkcenkceshelwa ngamanzi anetyhefu. Eso sityalo sinokukhula, kodwa sinokukhula nzima okanye sonakale. Nawo ke umsindo ufana namanzi anetyhefu ibe umntwana okhulela phakathi kwawo uzeka mzekweni.

Izixeko Ezixineneyo

Ngowe-1800, malunga nabantu aba-3 ekhulwini kubemi bomhlaba bebehlala ezidolophini. Ngowama-2008, yaba sisiqingatha sabemi esihlala ezidolophini yaye ngowama-2050 kulindeleke babe ngama-70 ekhulwini. Njengokuba besanda abantu abathontelana kwizixeko ezixineneyo, kulindeleke ukuba nomsindo ube njalo. Ngokomzekelo, iSixeko saseMexico sesinye sezixeko ezikhulu nezixineneyo ehlabathini. Ukunyakazela kweemoto yingxaki enkulu exhalabisayo apho. Ekubeni esi sixeko sinabantu abakwizigidi ezili-18 nezigidi ezithandathu zeemoto, “simele sibe sesona sinabantu abaxinezelekileyo ehlabathini. Iimoto zixinene, nto leyo yenza abantu bahlale benomsindo.”

Izixeko ezixineneyo ziza nezinye izinto ezixinezelayo, kuquka umoya ongcolileyo nengxolo, ukunqongophala kwezindlu, ukungqubana kwezithethe nolwaphulo-mthetho oluninzi. Xa zisanda izinto ezixinezelayo, siyaxakaniseka, sibenomsindo yaye siphelelwe ngumonde.

Imeko Emaxongo Yoqoqosho

Ukudodobala kwezoqoqosho ehlabathini kuye kweza noxinezeleko namaxhala. Ingxelo yeInternational Monetary Fund neUnited Nations International Labor Organization (ILO) ngowama-2010 yathi: “Kuqikelelwa ukuba bangaphezu kwama-210 ezigidi abantu abadinga umsebenzi ehlabathini.” Okubuhlungu kukuba, inkoliso yabo iye yaphelelwa ngumsebenzi ingenayo nesenti eza kuyifumana okanye esebhankini.

La maxhala aphethe nabo baphangelayo. Ngokutsho kweILO, uxinezeleko oluza nomsebenzi “ngubhubhani osehlabathini lonke.” ULorne Curtis ongumcebisi wemisebenzi eOntario, eKhanada uthi: “Abantu boyikisela imisebenzi yabo yaye basoloko becinga ngokuphulukana nayo, bathanda ukuzithethelela nokuphikisana nabaphathi babo okanye abanye abasebenzi.”

Ikhethe Nokungekho Sesikweni

Cinga indlela ubuya kuvakalelwa ngayo xa ungenelela ugqatso kodwa ufumanise ukuba nguwe wedwa oza kubaleka ukhonkxwe imilenze. Izigidi zabantu zivakalelwa ngaloo ndlela xa zicalulwa okanye zibona izenzo zekhethe. Abantu bayacaphuka xa kukho imiqobo ebenza bangafumani msebenzi, imfundo, indawo yokuhlala nezinye izinto ezisisiseko.

Ezinye izenzo zokungekho sesikweni zinokumdimaza umntu abe kwintlungu engathethekiyo. Okubuhlungu kukuba, inkoliso ikwazi kakuhle ukuphathwa ngokungekho sesikweni. Kwiminyaka engaphezu kwamawaka amathathu eyadlulayo, uKumkani Solomon osisilumko wathi: “Khangela! iinyembezi zabo bacinezelweyo, kodwa bengenamthuthuzeli.” (INtshumayeli 4:1) Xa kugquba okungekho sesikweni kungekho mthuthuzeli, kunokuba lula ukuba nomsindo.

Amajelo Ezolonwabo

Kangangezihlandlo ezingaphezu kwewaka, kuye kwenziwa uhlolisiso kujongwa igalelo logonyamelo lukamabonwakude namanye amajelo. UJames P. Steyer, umseki weCommon Sense Media, uthi: “Abantu abakhule bechanabeke kugonyamelo oluninzi badla ngokuba neengcwangu, bangakwazi kuzibamba yaye bangabi naluvelwano.”

Yinyaniso ukuba, inkoliso yabantwana abachanabeka kugonyamelo lukamabonwakude abakhuli babe zizilwanyana ezineengcwangu. Sekunjalo, amajelo ezolonwabo adla ngokukuhombisa ukugqajukelwa ngumsindo akwenze kube yinto eyamkelekileyo yokumelana notshaba, yaye oko kuye kwavelisa isizukulwana esitsha esingaboni nto iphosakeleyo ngogonyamelo.

Impembelelo Yemimoya Engendawo

IBhayibhile ibonisa ukuba kukho izidalwa zomoya eziphembelela abantu babe nomsindo oyingozi namhlanje. Zikwenza njani oko? Ekuqaleni kwembali yabantu, isidalwa somoya esinemvukelo savukela uThixo uSomandla. Esi sidalwa somoya singendawo kuthiwa nguSathana, igama lesiHebhere elithetha “uMchasi,” okanye “uTshaba.” (Genesis 3:1-13) Kamva, uSathana walahlekisa nezinye iingelosi zaza zamlandela zavukela.

Ezo ngelosi zingathobeliyo, ekuthiwa ziidemon okanye oomoya abangendawo zipheleliselwe kulo mhlaba. (ISityhilelo 12:9, 10, 12) Ukongezelela, ‘zinomsindo omkhulu,’ kuba zisazi ukuba zisalelwe lixesha elifutshane. Ngoko, nakuba singayiboni loo mimoya ingendawo, siyayiva imiphumo yemisebenzi yayo. Njani?

USathana needemon zakhe basebenzisa utyekelo lwesono esinalo ngokusilinga ukuze sibandakanyeke ‘kubutshaba, iimbambano, amakhwele, ukugqajukelwa yimisindo, usukuzwano, izahlukano, oomona, nezinto ezinjengezi.’—Galati 5:19-21.

Wuxhathise Umsindo

Eneneni, xa sicinga ngazo zonke ezi ngxaki, iingcinezelo namaxhala, siyasiqonda isizathu sokuba abantu baxinezeleke kangaka njengoko bezama ukujamelana nezinto ezilucelomngeni mihla le.

Kusenokuba nzima ukuzibamba singagqajukelwa ngumsindo! Inqaku elilandelayo liza kusibonisa indlela esinokuzibamba ngayo xa sinomsindo.

[Ibhokisi ekwiphepha 5]

KUNGENZEKA UKUBA UNENGXAKI YOKULAWULA UMSINDO UKUBA . . .

▶ Uba nomsindo xa kufuneka ulinde emgceni evenkileni.

▶ Uhlala uxambulisana nabanye emsebenzini.

▶ Ukhe ungakwazi ukulala kuba ucinga ngezinto ezikucaphukise emini.

▶ Kuba nzima ukuxolela abantu abakonileyo.

▶ Kusoloko kunzima ukuzibamba.

▶ Uhlala usenza izinto ozisolayo ngazo emva kokuba nomsindo.a

[Umbhalo osemazantsi]

a Isekelwe kwinkcazelo yeMentalHelp.net.

[Ibhokisi ekwiphepha 6]

AMANANI OHLOLISISO LOMSINDO

IMental Health Foundation of London, eNgilani, yakhupha ingxelo eyayinomxholo othi Boiling Point—Problem Anger and What We Can Do About It. Izinto ezingundoqo kwezafunyaniswayo ziquka la manani:

Abantu abangama-84% baxinezeleka ngakumbi emsebenzini ngoku kunakwiminyaka emihlanu edluleyo.

Abangama-65% kubantu abasebenza eofisini bawazi kakuhle umsindo weofisi.

Abangama-45% kubasebenzi basoloko begqajukelwa ngumsindo emsebenzini.

Bafikelela kuma-60% abangaphangeliyo maxa wambi kuba bexinezelekile.

Abangama-33% kubemi baseBritani abathethisani nabamelwane babo.

Abangama-64% bayavuma ukuba abantu baya besiba nomsindo.

Abangama-32% bathi banabahlobo okanye ilungu lentsapho eloyiswayo kukulawula umsindo.

[Umfanekiso okwiphepha 5]

Ukugqajukelwa ngumsindo kunokubachaphazela njani abantwana bakho?

[Umfanekiso okwiphepha 6]

Ngaba imbono onayo ngomsindo neengcwangu ilawulwa ngamajelo okuzonwabisa?

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share