Abavakalisi BoBukumkani Bayabalisa

“Wazi Okuninzi NgeBhayibhile”

XA UYESU owayeneminyaka eli-12 ubudala wathetha ngenkalipho neenkokeli zonqulo eYerusalem, “bonke abo babemphulaphule bahlala bethe manga kukuqonda kwakhe naziimpendulo zakhe.” (Luka 2:47) Ngokufanayo namhlanje, abakhonzi abaselula bakaYehova abaninzi baba nenkalipho yokuthetha nabafundisi-ntsapho babo kwakunye nabo bafunda nabo ngoThixo nangeBhayibhile, yaye ngokufuthi baba nemiphumo evuyisayo.

UTiffany, oneminyaka eli-14 ubudala, wayeseklasini ekwakuxutyushwa kuyo ngesiprofeto seBhayibhile seeveki ezingama-70 zeminyaka, esifumaneka kuDaniyeli 9:24-27. Umfundisi-ntsapho wabetha nje koomofu malunga nezi ndinyana yaye ngokukhawuleza wawugqwagqwa nje lo mbandela.

Ekuqaleni, uTiffany wayemadolw’ anzima ekuphakamiseni isandla. Uthi: “Kodwa ngesizathu esithile, yayindikhathaza into yokuba ezi ndinyana zingacaciswanga kakuhle. Yaye ndingaqondanga, ndaphakamisa isandla.” Wothuka umfundisi-ntsapho kukubona kukho othile owayefuna ukuthetha okuthile ngalo mbandela, ekubeni inkoliso yabafundi kwakunzima ukukuqonda oku.

Xa wanikwa ithuba lokucacisa esi siprofeto, uTiffany waphakama waza wathetha engenanto ibhaliweyo. Wathi egqiba, kwabe kuthe nzwanga eklasini. UTiffany wayebungcangcazela. Yandula ke iklasi yaqhwaba kangangexesha elide.

“Wenze kakuhle gqitha, Tiffany, wenze kakuhle gqitha,” watsho umfundisi-ntsapho ephindaphinda. Wavuma ukuba wayesazi ukuba kumele ukuba kwakukho okungakumbi kwezi ndinyana, kodwa uTiffany wayengumntu wokuqala ukumcacisela ngokucace kangaka. Ekupheleni kwesifundo, wabuza uTiffany ukuba wenze njani ukuze azi izinto ezingaka ngeBhayibhile.

Waphendula esithi: “Kungenxa yokuba ndingomnye wamaNgqina kaYehova. Abazali bam kwafuneka bandicacisele eso siprofeto kangangezihlandlo eziliqela ngaphambi kokuba ndisiqonde.”

Nabo wayefunda naye babemangalisiwe lulwazi lwakhe lweBhayibhile. Omnye umfundi wathi kuTiffany: “Ngoku ndiyasazi isizathu sokuba nina maNgqina kaYehova ningena kwizindlu ngezindlu; kungenxa yokuba nazi okuninzi ngeBhayibhile.” Abanye bamthembisa ukuba abasokuze baphinde bamhleke ngenxa yeenkolelo zakhe.

Xa uTiffany waxelela abazali bakhe ngoku, bamcebisa ukuba aphathele umfundisi-ntsapho wakhe incwadi ethi Ulwazi Olukhokelela Kubomi Obungunaphakade. Xa wenjenjalo waza wabonisa umfundisi-ntsapho wakhe inxalenye ecacisa ngesiprofeto sikaDaniyeli, wayamkela ngovuyo loo ncwadi waza wambulela ngayo.

Enyanisweni, xa ulutsha olungamaKristu luthetha ngenkalipho ngoko abazali balo balufundise kona ngokuphathelele uThixo neBhayibhile, ludumisa luze luzukise uYehova yaye luzizisela iintsikelelo.—Mateyu 21:15, 16.