Ngaba IBhayibhile Ingqongqo Gqitha?

“NDISENGUMNTWANA, zange ndifundiswe nayiphi na imilinganiselo yeBhayibhile. Zange khe ndive nasembalini kuthethwa ngoThixo,” utsho njalo umfana waseFinland. Baxhaphake gqitha abantwana abakhuliswa ngolo hlobo namhlanje. Abantu abaninzi, ngakumbi abaselula, iBhayibhile bayijonga njengephelelwe lixesha nengqongqo gqitha. Abo bazama ukuyithobela bajongwa njengabacinezelekileyo, ubomi babo bulawulwa yimithetho eluxanduva. Ngoko, abaninzi bacinga ukuba kubhetele bayibeke bucala iBhayibhile bafune ukhokelo kwenye indawo.

Isizathu sokuba bayijonge ngolo hlobo iBhayibhile, ubukhulu becala, babangelwa yimbali ende yokucinezelwa kwabantu ziicawa zeNgqobhoko. Ngokomzekelo, kwixesha elibizwa ngokuba ngamaXesha Obumnyama ngabanye ababhali-mbali, iCawa yamaKatolika eYurophu yayilawula phantse zonke iinkalo zobomi babantu. Nabani na ophikisa icawa wayezibeka emngciphekweni wokungcungcuthekiswa nkqu nokubulawa. Neecawa zamaProtestanti ezavela kamva, zababandeza abantu inkululeko yabo. Namhlanje, xa besiva amabinzana athi “abalandeli bakaCalvin” okanye “amaPuritan (abo balandela umthetho ngokungqongqo)” abantu abaneli nje ukukhumbula abantu bonqulo oluthile kodwa bakhumbula nezohlwayo eziqatha zezo cawa. Ekubeni iicawa zazicinezela, ngokuphosakeleyo abantu bacinga ukuba ziimfundiso zeBhayibhile ezi zicinezelayo.

Kwiinkulungwane zakutshanje, kumazwe athile iicawa ziye zayeka ukuba nempembelelo kubomi babantu. Emva kokushiya iicawa ezaziwayo abantu baba nenkolelo yokuba bamele bazigqibele ngoko kulungileyo nokuphosakeleyo. Yaba yintoni imiphumo yoko? UAhti Laitinen, unjingalwazi kulwaphulo-mthetho, nobulungisa uthi: “Abantu baye bayeka ukuhlonela igunya, ibe kuya kungacaci ebantwini ukuba yintoni eyamkelekileyo nengamkelekanga.” Umnqa kukuba neenkokeli zecawa ziyavumelana nale ngcamango. Ubhishophu owaziwayo wamaLuthere wathi: “Ndiya ndingayikholelwa into yokuba abantu bamele baxelelwe yiBhayibhile okanye lunqulo indlela yokuziphatha.”

Ngaba Iyafuneka Inkululeko Engenamiqathango?

Isenokuvakala imnandi into yokungabi nemiqathango, ngakumbi kwabaselula. Bambalwa abantu abakuthandayo ukuzithoba okanye ukubekelwa imithetho yezinto abamele bazenze nabangamele bazenze. Kodwa ngaba intle into yokuba wonk’ umntu azenzele unothanda? Ukuphendula lo mbuzo, khawucinge ngalo mzekeliso. Cinga ngesixeko esingenayo imithetho yendlela. Akukho mfuneko yamaphepha-mvume okuqhuba okanye apho bahlolwa khona abaqhubi abatsha. Abantu banokuqhuba nakanjani, nokuba banxilile, ibe akukho sizathu sakuzikhathaza ngesantya ohamba ngaso, iindawo omele ume kuzo, iirobhothi, indlela eya calanye, okanye iindawo zabantu abanqumla ngenyawo. Ngaba iyafuneka “inkululeko” enjalo? Nakanye! Ibiya kwenza isidubedube, isiphithiphithi nentlekele. Nakuba imithetho yendlela iyibekela imiqathango inkululeko yabantu, siyaqonda ukuba le mithetho ikhusela abaqhubi nabo bahamba ngeenyawo.

Ngokufanayo, uYehova usalathisa indlela esimele siphile ngayo. Lusinceda gqitha olu lwalathiso. Ngaphandle kwalo, bekuya kufuneka sizibonele sifunde kabuhlungu, yaye xa kunjalo besiya kuzenzakalisa thina nabanye. Isiphithiphithi sokuziphatha esinjalo besingayi kuba sihle ibe besiya kuba yingozi efana nesixeko esingenamithetho yendlela. Inyaniso kukuba, siyayifuna imithetho ethile—isibakala esivunywa phandle yinkoliso yabantu.

‘Umthwalo Wam Ukhaphukhaphu’

Imithetho yendlela isenokuquka imiqathango eneenkcukacha ezingapheliyo—kumazwe athile kubakho uthotho lwemithetho oluchaza indlela yokumisa iimoto nje kuphela. Ngokwahlukileyo, iBhayibhile ayinalo olo dederhu lwemithetho. Kunoko, inemigaqo esisiseko, ibe ayiloxanduva okanye icinezele. UYesu Kristu wabamema wathi abo babephila ngomhla wakhe: “Yizani kum, nonke nina nibulalekayo nenisindwa ngumthwalo, yaye ndiza kunihlaziya. Kuba idyokhwe yam yeyobubele nomthwalo wam ukhaphukhaphu.” (Mateyu 11:28, 30) Kwincwadi eyayisiya kumaKristu aseKorinte, umpostile uPawulos wathi: “Apho ukhoyo umoya kaYehova, kukho inkululeko.”—2 Korinte 3:17.

Noko ke, leyo asiyiyo inkululeko enguvula-zibhuqe. UYesu wabonisa kakuhle ukuba kukho imiyalelo ethile kwizinto ezifunwa nguThixo. Ngokomzekelo, uYesu wathi kubafundi bakhe: “Nguwo lo umyalelo wam, wokuba nithandane kanye njengoko ndinithandileyo.” (Yohane 15:12) Cinga nje ukuba ngebunjani ubomi ukuba wonk’ umntu ebephila ngalo myalelo! Ngoko ke, iinkululeko yamaKristu asiyiyo inkululeko engenamiqathango. Umpostile uPetros wathi: “Yibani njengabantu abakhululekileyo, ukanti ningayithabathi inkululeko yenu, njengesigqubuthelo sobubi, kodwa njengamakhoboka kaThixo.”—1 Petros 2:16.

Nakuba amaKristu engalawulwa luthotho lwemithetho eneenkcukacha, akahambi ngayibonayo azigqibele ngoko kulungileyo nokubi. Abantu bafuna ukhokelo ibe nguThixo kuphela onokubanika olo khokelo. IBhayibhile itsho phandle ukuba: “Asikokomntu ohambayo ukwalathisa inyathelo lakhe.” (Yeremiya 10:23) Siya kuzuza lukhulu ukuba sithobela uThixo.—INdumiso 19:11.

Enye yezo nzuzo lulonwabo. Ngokomzekelo, umfana esithethe ngaye ekuqaleni wayelisela nexoki. Wayeziphethe kakubi gqitha. Wathi akufunda imilinganiselo ephakamileyo yeBhayibhile waguqula ubomi bakhe bavisisana nayo. Uthi: “Nakuba ekuqaleni kwakunzima ukuthobela yonke imilinganiselo yeBhayibhile, ndandikuqonda ukubaluleka kwayo. Indlela endandiphila ngayo ngaphambili zange indenze ndonwabe ngendlela endonwabe ngayo ngoku. Ukuphila ngemilinganiselo yeBhayibhile kukunceda uphile ubomi obulula. Ubona kakuhle apho uya khona utsho ukwazi okulungileyo nokungalunganga.”

Oku kwenzekile nakwezinye izigidi zabantu. Phakathi kwezinye izinto, ulwalathiso lweBhayibhile lubancede baphucula ubuhlobo babo nabanye, banembono efanelekileyo ngokusebenza, bayeka imikhwa eyingozi baza bonwaba ebomini. UMarkusa umfana owakha akaphila ngemilinganiselo yeBhayibhile wabuya waphila ngayo, uthi xa ethetha ngaye: “Ukuphila ngemilinganiselo yeBhayibhile kwandinceda ndakwazi ukuzihlonela.”b

Ukhetha Yiphi Wena Indlela?

Ngaba ke, iBhayibhile ingqongqo? Ewe injalo—ukuze isincede. Kodwa ngaba ingqongqo gqitha? Nakanye. Inkululeko engenamiqathango ikhokelela kwiingxaki kuphela. Imilinganiselo yeBhayibhile ilungelelene, ibe ikhuthaza impilo-ntle nolonwabo. UMarkus uthi: “Ukuhamba kwexesha kuye kwangqina ukuba bubulumko ukuthobela iLizwi likaThixo ebomini. Nakuba indlela endiphila ngayo yahlukile kweyabantu abaninzi, andikhe ndivakalelwe kukuba ndiyaphoswa.”

Xa uqala ukungcamla iintsikelelo zokuphila ngemilinganiselo yeBhayibhile, utsho ulixabise ngakumbi iLizwi likaThixo. Oku kukhokelela kwiintsikelelo ezingakumbi—utsho umthande naLowo livela kuye, uYehova uThixo. “Ukumthanda uThixo kuko ukuthi, siyigcine imiyalelo yakhe; kwaye ayinzima imiyalelo yakhe.”—1 Yohane 5:3.

UYehova unguMdali noBawo wethu wasezulwini. Ukwazi kakuhle oko kusifaneleyo. Kunokuba asibandeze okuthile, usinika ulwalathiso oluya kusinceda ebomini. Kwintetho ebumbongorha uYehova usibongoza athi: “Owu ukuba nje kuphela okunene ubunganikela ingqalelo kwimiyalelo yam! Ngoko uxolo lwakho beluya kuba njengomlambo, nobulungisa bakho njengamaza olwandle.”—Isaya 48:18.

[Imibhalo esemazantsi]

[Umfanekiso okwiphepha 9]

UYesu wathi imiyalelo kaThixo iya kusihlaziya

[Umfanekiso okwiphepha 10]

Ukuthobela uThixo kusenza sonwabe size sizihlonele