UYehova NguThixo Onoxabiso
“UThixo akanantswela-bulungisa ukuba angawulibala umsebenzi wenu nothando enalubonisayo ngegama lakhe.”—HEBHERE 6:10.
1. UYehova walubonisa njani uxabiso kumMowabhikazi uRute?
UYEHOVA uyixabisa gqitha imigudu yabo bazabalazela ukwenza ukuthanda kwakhe ngokunyaniseka, kwaye ubavuza kakhulu. (Hebhere 11:6) Indoda ethembekileyo uBhohazi wayelwazi olu phawu luhle lukaThixo, kuba wathi kumMowabhikazi uRute, owayenyamekela uninazala ongumhlolokazi: “Wanga uYehova angayivuza indlela owenza ngayo, yaye kwanga unganomvuzo ogqibeleleyo ovela kuYehova.” (Rute 2:12) Ngaba uRute wasikelelwa nguThixo? Ngaphandle kwamathandabuzo! Kaloku nebali lakhe libhalwe eBhayibhileni. Ukongezelela, watshata noBhohazi waza waba ngukhokokazi kaKumkani uDavide noYesu Kristu. (Rute 4:13, 17; Mateyu 1:5, 6, 16) Lo mzekelo ngomnye kwemininzi eseBhayibhileni ebonisa ukuba uYehova uyabaxabisa abakhonzi bakhe.
2, 3. (a) Yintoni echukumisayo ngamazwi kaYehova oxabiso? (b) Kutheni uYehova ekwazi ukubonisa uxabiso lokwenene? Yenza umzekelo.
2 UYehova ebeya kukugqala ingebobulungisa ukungabi naxabiso kwakhe. AmaHebhere 6:10 athi: “UThixo akanantswela-bulungisa ukuba angawulibala umsebenzi wenu nothando enalubonisayo ngegama lakhe, ngokuthi nilungiselele abangcwele yaye nisaqhubeka nibalungiselela.” Into ephawuleka ngakumbi kula mazwi kukuba uThixo ubonisa uxabiso kubantu abazinikeleyo nangona bengaboni yaye besilele kuzuko lwakhe.—Roma 3:23.
3 Ngenxa yokungafezeki, sisenokuvakalelwa kukuba izenzo zethu zokuzinikela kuThixo azibalulekanga ibe azinakusikelelwa nguThixo. Noko ke, uYehova uziqonda ngokupheleleyo iintshukumisa neemeko zethu, ibe uyixabisa gqitha inkonzo yethu yomphefumlo uphela. (Mateyu 22:37) Ngokomzekelo: Masithi umama ufumana isipho—isacholo esinexabiso eliphantsi—etafileni. Esi sipho usenokusijonga njengesingaxabisekanga aze asilahle. Noko ke, ikhadi elihamba nesi sipho lichaza ukuba sivela kwintombazana yakhe encinane, eye yaqwela bonke ubugcwabalalana bayo ukuze isithenge. Lo mama uqala asijonge ngendlela eyahlukileyo esi sipho. Mhlawumbi eyengezelisa iinyembezi, wanga intombi yakhe aze achaze indlela asixabisa ngayo.
4, 5. UYesu wamxelisa njani uYehova ekuboniseni uxabiso?
4 Ekubeni ezazi iintshukumisa zethu nokusikelwa kwethu umda, uYehova uyakuxabisa oko sikwenza ngamandla ethu ephela enoba kuncinane okanye kukhulu. UYesu wayemxelisa ngokupheleleyo uYise kule nkalo. Khumbula ingxelo yeBhayibhile yomhlolokazi owanikelayo nakuba eswele. “Njengoko [uYesu] wayekhangela wabona izityebi ziphosa izipho zazo kwizikhongozelo zobuncwane. Wandula ke wabona umhlolokazi othile osisisweli ephosa iingqekembe ezimbini ezincinane zexabiso elincinane kakhulu, waza wathi: ‘Eneneni ndithi kuni, Lo mhlolokazi, nangona elihlwempu, uphose ngaphezu kwabo bonke. Kuba bonke aba baphose izipho ngokuphuma kwintsalela yabo, kodwa lo mfazi ekusweleni kwakhe uphose konke abenokuphila ngako.’”—Luka 21:1-4.
5 Ewe, esazi imeko yalo mfazi—ukuba wayengumhlolokazi yaye elihlwempu—uYesu wayiqonda indlela esixabiseke ngayo isipho sakhe ibe wathetha amazwi oxabiso. Unjalo ke noYehova. (Yohane 14:9) Ngaba akukhuthazi ukwazi ukuba enoba injani na imeko yakho, uThixo wethu onoxabiso noNyana wakhe banokukholiswa nguwe?
UYehova Uvuza UmTiyopiya Owoyik’ UThixo
6, 7. Kwakutheni ukuze uYehova abonise uxabiso kuEbhedi-meleki ibe walubonisa njani?
6 IZibhalo zibonisa ngokuphindaphindiweyo indlela uYehova abonisa ngayo uxabiso kwabo benza ukuthanda kwakhe. Phawula indlela awaqhubana ngayo nomTiyopiya owoyik’ uThixo uEbhedi-meleki, owayephila ngexesha likaYeremiya nowayengumkhonzi endlwini kaKumkani wakwaYuda owayengathembekanga uZedekiya. UEbhedi-meleki weva ukuba iinkosana zakwaYuda zityabeke umprofeti uYeremiya ngesityholo sokuvukela zaza zamphosa equleni, ukuze abulawe yindlala. (Yeremiya 38:1-7) Esazi ukuba uYeremiya wayethiywe ngenxa yesigidimi asishumayelayo, uEbhedi-meleki wabeka ubomi bakhe esichengeni waya kuthetha nokumkani. Ngenkalipho, lo mTiyopiya wathi: “Owu nkosi yam kumkani, la madoda enze ububi kuko konke akwenzileyo kuYeremiya umprofeti, lowo amphose equleni, kangangokuba uya kufa apho akhoyo ngenxa yendlala.” Eyalelwa ngukumkani, uEbhedi-meleki wathabatha amadoda angama-30 waza wamhlangula umprofeti kaThixo.—Yeremiya 38:8-13.
7 UYehova wabona ukuba uEbhedi-meleki unokholo, olwamenza wanenkalipho. Ngenxa yoko, uYehova wabonisa uxabiso waza esebenzisa uYeremiya wathi kuEbhedi-meleki: “Yabona, ndiwenza abe yinyaniso amazwi am kwesi sixeko, abe yintlekele kungekhona ukulungelwa . . . Kwaye ndiza kukuhlangula ngaloo mini, . . . yaye akuyi kunikelwa esandleni samadoda lawo uwoyikayo. Kuba nakanjani na ndiya kukusindisa, yaye . . . ngokuqinisekileyo uya kuba lixhoba lakho umphefumlo wakho, ngenxa yokuba ukholose ngam.” (Yeremiya 39:16-18) Ewe, uYehova wamhlangula uEbhedi-meleki noYeremiya, kwiinkosana zakwaYuda ezingendawo ibe kamva nakumaBhabhiloni, awatshabalalisa iYerusalem. INdumiso 97:10 ithi: “[UYehova] uyayilinda imiphefumlo yabanyanisekileyo bakhe; uyabahlangula esandleni sabangendawo.”
“UYihlo Okhangela Emfihlekweni Uya Kukubuyekeza”
8, 9. Njengoko uYesu wabonisayo, luhlobo olunjani lwemithandazo uYehova ayixabisayo?
8 Obunye ubungqina bokuba uYehova uyakuxabisa ukuzinikela kwethu kuye, kunokubonwa koko iBhayibhile ikuthethayo ngomthandazo. Indoda esisilumko yathi: “Umthandazo wabathe tye [uThixo] uyakholiswa nguwo.” (IMizekeliso 15:8) Ngomhla kaYesu iinkokeli zonqulo ezininzi zazithandaza esidlangalaleni, kungekhona kuba zifuna ukukholisa uThixo, kodwa kuba zifuna ukubonwa ngabantu. UYesu wathi: ‘Seziwufumene ngokupheleleyo umvuzo wazo.’ Eyalela abalandeli bakhe wathi: “Noko ke, wena, xa uthandaza, ngena egumbini lakho langasese uze, wakuba uluvalile ucango lwakho, uthandaze kuYihlo osemfihlekweni; yaye uYihlo okhangela emfihlekweni uya kukubuyekeza.”—Mateyu 6:5, 6.
9 Kakade ke, uYesu wayengathi akufanelekanga ukuthandaza esidlangalaleni, kuba naye wayekwenza oko ngezihlandlo ezithile. (Luka 9:16) UYehova uyixabisa gqitha imithandazo yethu xa siyenza ngokunyaniseka, kungekhona ukucela injezu. Eneneni, imithandazo esiyenza ngasese, ikubonisa kakuhle ukumthanda nokukholosa kwethu ngaye. Ngoko, akumangalisi ukuba uYesu wayedla ngokufuna indawo engasese ukuze athandaze. Ngesinye isihlandlo oku wakwenza “ngonyezi, ngoxa kwakusemnyama.” Ngenye imini, “waya entabeni yedwa ukuze athandaze.” Ngaphambi kokuba akhethe abapostile bakhe abali-12, uYesu wachitha ubusuku bonke ethandaza yedwa.—Marko 1:35; Mateyu 14:23; Luka 6:12, 13.
10. Yintoni esinokuqiniseka ngayo, xa imithandazo yethu ibonisa indlela esifuna ngokunyaniseka ngayo ukukholisa uThixo?
10 Khawuthelekelele indlela amele ukuba uYehova wayephulaphula ngenyameko ngayo umthandazo woNyana wakhe osuk’ entliziyweni! Eneneni, maxa wambi uYesu wayethandaza “ngezikhalo ezinamandla neenyembezi, yaye waviwa ngokukholekileyo ngenxa yoloyiko lwakhe lobuthixo.” (Hebhere 5:7; Luka 22:41-44) Xa imithandazo yethu ibonisa indlela esifuna ngokunyaniseka ngayo ukukholisa uThixo, sinokuqiniseka ukuba uBawo wethu wasezulwini uyiphulaphula ngenyameko nangoxabiso. Ewe, “usondele uYehova kubo bonke abo . . . bambiza ngenyaniso.”—INdumiso 145:18.
11. UYehova uvakalelwa njani ngoko sikwenza ngasese?
11 Ukuba uYehova uyawuxabisa umthandazo wethu esiwenza ngasese, umele ukuba ukuxabisa gqitha ukusibona simthobela ngasese! Ewe, uYehova uyakwazi oko sikwenza emfihlekweni. (1 Petros 3:12) Eneneni, ukuthembeka nokuthobela kwethu xa singabonwa ngabanye kubonisa kakuhle ukuba ‘sinentliziyo epheleleyo’ kuYehova, eneentshukumisa ezinyulu nebambelele ngokuqinileyo kokulungileyo. (1 Kronike 28:9) Ikhondo elinjalo limvuyisa ngokwenene uYehova!—IMizekeliso 27:11; 1 Yohane 3:22.
12, 13. Sinokuzilondoloza njani iingqondo neentliziyo zethu size sibe njengomfundi othembekileyo uNathaniyeli?
12 Ngoko, amaKristu athembekileyo ayaziphepha izono ezenziwa ngasese, njengokubukela imifanekiso yamanyala nogonyamelo. Nangona ezinye izono zisenokungabonwa ngabantu, siyaqonda ukuba “zonke izinto zize yaye zibhencekile emehlweni alowo simele siphendule kuye.” (Hebhere 4:13; Luka 8:17) Xa sizabalazela ukuphepha izinto ezingamkholisiyo uYehova, siba nesazela esicocekileyo size sibe novuyo lokuba uThixo uyakholiswa sithi. Ewe, akukho mathandabuzo okuba uYehova umxabisa ngokwenene umntu ‘ohamba ngokungenasiphoso eqhelisela ubulungisa yaye ethetha inyaniso ngentliziyo yakhe.’—INdumiso 15:1, 2.
13 Noko ke, sinokuzilondoloza njani iintliziyo neengqondo zethu kweli hlabathi lizaliswe bububi? (IMizekeliso 4:23; Efese 2:2) Ukongezelela ekusebenziseni zonke izinto uYehova asilungiselele zona ngokomoya ukomeleza ukholo lwethu, simele senze umgudu wokugatya okubi size senze okulungileyo, sikwenze ngokukhawuleza oko ukuze umnqweno ongafanelekanga ungakhawuli uze uzale isono. (Yakobi 1:14, 15) Cinga indlela obuya kuvuya ngayo ukuba uYesu ebenokuwabhekisa kuwe amazwi awawathetha kuNathaniyeli esithi: “Yabona, [umntu] ekungekho nkohliso kuye.” (Yohane 1:47) Kamva, uNathaniyeli, okwabizwa ngokuba nguBhartolomeyu, wafumana ilungelo lokuba ngomnye wabapostile bakaYesu abali-12.—Marko 3:16-19.
“Umbingeleli Omkhulu Onenceba Nothembekileyo”
14. Ngokwahlukileyo kwabanye, uYesu wasabela njani koko kwenziwa nguMariya?
14 Ekubeni ‘engumfanekiso kaThixo ongabonakaliyo,’ uYesu usoloko emxelisa ngokugqibeleleyo uYise ekuboniseni uxabiso kwabo bakhonza uThixo ngentliziyo ecocekileyo. (Kolose 1:15) Ngokomzekelo, kwiintsuku ezintlanu ngaphambi kokuba anikele ngobomi bakhe, uYesu nabafundi bakhe abathile babendwendwele kwikhaya likaSimon waseBhethani. Ngobo busuku, uMariya udadeboLazaro noMarta, “wathabatha iponti yeoli yobulawu, inadusi yokwenene, exabiso likhulu kakhulu” (exabisa umvuzo wonyaka), waza wayigalela entloko nasezinyaweni zikaYesu. (Yohane 12:3) Abanye bathi: “Yinkcitho yantoni na le?” Noko ke, uYesu wakujonga ngendlela eyahlukileyo oko kwakusenziwa nguMariya. Wakujonga njengokuba nesisa kakhulu nento ebaluleke gqitha njengoko kwakusondela ukufa nokungcwatywa kwakhe. Ngenxa yoko, kunokuba amgxeke uMariya, uYesu wamzukisa. Wathi: “Naphi na apho ezi ndaba zilungileyo zishunyayelwa khona kulo lonke ihlabathi, oko lo mfazi akwenzileyo kuya kuba yinto aya kukhunjulwa ngayo.”—Mateyu 26:6-13.
15, 16. Singenelwa njani ngokuphila nokukhonza kukaYesu uThixo njengomntu?
15 Sinelungelo elikhulu ngokwenene lokuba neNkokeli enoxabiso, uYesu! Eneneni, ubomi bukaYesu njengomntu bamenza walungela umsebenzi uYehova ambekele wona—ukuba nguMbingeleli Omkhulu noKumkani, okokuqala owebandla labathanjiswa aze emva koko abe ngowehlabathi.—Kolose 1:13; Hebhere 7:26; ISityhilelo 11:15.
16 Kwangaphambi kokuba eze emhlabeni, uYesu wayesele enomdla onzulu ebantwini yaye ebathanda ngokukhethekileyo. (IMizekeliso 8:31) Ngokuphila kwakhe njengomntu, waziqonda ngakumbi iimvavanyo esizifumanayo ekukhonzeni kwethu uThixo. Umpostile uPawulos wathi: “Wayebophelelekile ukuba abe ‘njengabazalwana’ bakhe kwiinkalo zonke, ukuze abe nokuba ngumbingeleli omkhulu onenceba nothembekileyo . . . Kuba ekubeni yena ngokwakhe wabandezeleka ngokuvavanywa, unako ukubanceda abo bavavanywayo.” UYesu ‘unokuvelana nobuthathaka bethu’ kuba naye “wavavanywa ngandlela zonke njengathi, kodwa engenasono.”—Hebhere 2:17, 18; 4:15, 16.
17, 18. (a) Iincwadi eziya kumabandla asixhenxe aseAsia Minor zibonisa ntoni ngoxabiso lukaYesu? (b) Yintoni awayelungiselelwa yona loo maKristu athanjisiweyo?
17 Indlela uYesu aziqonda ngayo iimvavanyo abajamelana nazo abalandeli bakhe yacaca emva kokuvuswa kwakhe. Phawula iincwadi zakhe ezazisiya kumabandla asixhenxe aseAsia Minor, ezabhalwa ngumpostile uYohane. Kwibandla laseSmirna, uYesu wathi: “Ndiyayazi imbandezelo nobuhlwempu bakho.” Enyanisweni, apha, uYesu wayesithi, ‘Ndizazi kakuhle iingxaki zakho; ndiyabazi ngokwenene ubunzima otyhubela kubo.’ Ekubeni naye wayebandezelekile ukusa ekufeni, wandula ke ngovelwano waliqinisekisa ngala mazwi: “Zingqine uthembekile kude kuse ekufeni, mna ke ndokunika isithsaba sobomi.”—ISityhilelo 2:8-10.
18 Iincwadi eziya kula mabandla asixhenxe zinamazwi kaYesu abonisa ukuba uyaziqonda iingxaki zabafundi bakhe noxabiso olunzulu analo ngokugcina kwabo ingqibelelo. (ISityhilelo 2:1–3:22) Ukhumbule ukuba uYesu wayethetha namaKristu athanjisiweyo awayenethemba lokulawula naye ezulwini. Ngokufana neNkosi yawo, ayelungiselelwa ukufanelekela isikhundla sawo esiphakamileyo sokunceda uluntu olubandezelekileyo ngemfesane ukuze luxhamle kwidini lentlawulelo likaKristu.—ISityhilelo 5:9, 10; 22:1-5.
19, 20. “Isihlwele esikhulu” siye sabonisa njani ukuba siyamxabisa uYehova noNyana wakhe?
19 Kakade ke, uthando uYesu analo ngabalandeli bakhe abathanjisiweyo ulubonisa ‘nakwezinye izimvu,’ izigidi ezikhoyo zabo baza kubumba ‘isihlwele esikhulu esiphuma kuzo zonke iintlanga,’ esiya kusinda ‘kwimbandezelo enkulu’ ezayo. (Yohane 10:16; ISityhilelo 7:9, 14) Aba balandela uYesu kuba bayalixabisa idini lakhe lentlawulelo nethemba lokuphila ngonaphakade. Balubonisa njani uxabiso lwabo? Balubonisa ‘ngokunikela [kuThixo] inkonzo engcwele imini nobusuku.’—ISityhilelo 7:15-17.
20 Ingxelo yehlabathi lonke yonyaka wenkonzo wama-2006, ekwiphepha 27 ukusa kwelama-30, inikela ubungqina obucacileyo bokuba aba balungiseleli bathembekileyo ngokwenene banikela kuYehova “inkonzo engcwele . . . imini nobusuku.” Eneneni, ebudeni balo nyaka, bona neqela elincinane elisaseleyo lamaKristu athanjisiweyo baye bachitha isimbuku seeyure ezili-1 333 966 199 beshumayela—umlinganiselo weminyaka engaphezu kwe-150 000!
Qhubeka Ubonisa Uxabiso!
21, 22. (a) Kutheni amaKristu emele akuphaphele ngokukhethekileyo nje ukubonisa uxabiso namhlanje? (b) Yintoni eza kuxutyushwa kwinqaku elilandelayo?
21 UYehova noNyana wakhe baye babonisa uxabiso gqitha xa besebenzisana nabantu abangafezekanga. Noko ke, okulusizi kukuba, abantu abaninzi abacingi kangako ngoThixo, kunoko banikel’ ingqalelo kwizinto abazixhalabeleyo. Echaza abantu abaphila “ngemihla yokugqibela,” uPawulos wathi: “Abantu baya kuba ngabathandi beziqu zabo, abathandi bemali . . . abangenalo kwaphela uxabiso.” (2 Timoti 3:1-5, Phillips) Bahluke gqitha kumaKristu okwenyaniso, abonisa uxabiso kuko konke uThixo awenzele kona, ngokuthandaza ngokunyanisekileyo, ngokuthobela ngovuyo nangokunikela inkonzo yomphefumlo uphela!—INdumiso 62:8; Marko 12:30; 1 Yohane 5:3.
22 Kwinqaku elilandelayo, siza kuhlola amanye amalungiselelo okomoya uYehova asilungiselele wona ngothando. Njengoko sifunda ngezi ‘zipho zilungileyo,’ kwanga uxabiso lwethu lungakhula ngakumbi.—Yakobi 1:17.
Ungaphendula Uthini?
• UYehova uye wabonisa njani ukuba unguThixo onoxabiso?
• Sinokuyivuyisa njani intliziyo kaYehova kwanaxa singabonwa ngabantu?
• UYesu walubonisa njani uxabiso?
• Ukuphila njengomntu kwamnceda njani uYesu waba ngumlawuli onovelwano noxabiso?
[Umfanekiso okwiphepha 17]
Njengoko umzali evuyiswa sisipho esincinane asiphiwa ngumntwana wakhe, uYehova uba noxabiso xa simnika konke esinako