Ncedani Abantwana Bakhonze UYehova Ngokusuka Entliziyweni
1 USolomon wavakalisa ukuba “oonyana balilifa elivela kuYehova.” (INdu. 127:3-5, NW) Ngokwenene, balilifa elixabiseke ngendlela engathethekiyo. Abazali banembopheleleko abayinikwe nguThixo yokufundisa, ukuqeqesha nokohlwaya abantwana babo. Oku kuquka ukubaqeqesha kubulungiseleli, bebakhuthaza abantwana ukuba bathethe ngoYehova nangoBukumkani ngokusuka entliziyweni.—Efe. 6:4.
2 Abazali bafanele baluqalise olu qeqesho xa abantwana babo bebadala kangakanani? Impendulo enikelwa yiBhayibhile icacile: Lufanele luqaliswe kwasebusaneni. (2 Tim. 3:14, 15) Okukhona uqeqesho luqaliswa kuselithuba, kokukhona kuya kwenzeka ngakumbi ukuba abantwana babe nesiseko esiqinileyo enyanisweni baze ubulungiseleli babenze umsebenzi wabo. Kwakhona olu qeqesho lunikelwa kuselithuba luya kubakhusela ukuba bangacingi baze babe nesimo sengqondo sehlabathi.
3 Abantwana abaninzi abafunda kwizikolo zabantwana abancinane baye babonakalisa ingqondo ephangaleleyo yokufunda izinto ezintsonkothileyo. La mandla banawo okufunda besebancinane afanele asetyenziselwe ukubaqeqeshela ukuba nobuchule obubangela uYehova akholiswe ngabo. (wXO88 8/1 iphe. 15; wXO89 12/1 iphe. 31) Abantwana abaninizi baye benza inkqubela ukusa kwinqanaba lokuba babe ngabavakalisi abangabhaptizwanga. Bambi abantwana bayazahlulela baze babhaptizwe ngaphambi kokuba bangenele iminyaka yabo yeshumi elivisayo. Oku kuye kwabavulela ithuba lokukhonza njengoovulindlela abangabancedani kwanabathe ngxi ngaphambi kokugqiba esikolweni. Ukuze balufikelele olu sukelo, bafanele bafundiswe ukuncokola nabantu ngemibandela eyahlukahlukeneyo yeBhayibhile.
4 Bambi abantu abakhulu abatyekele ekugqaleni ulutsha lwanamhlanje luzizityhuthutyhuthu nolungenantlonelo basenokungabi namdla kangako ekuncokoleni nomntu oselula obatyeleleyo. Yintoni anokuyithetha umvakalisi oselula ukoyisa umqobo onjalo aze abangele umninimzi aphulaphule? Omnye umvakalisi oselula wasebenzisa amazwi afana nala: “Molo, igama lam ndingu ․․․․․․․․. Namhlanje ndihambela abamelwane bam kuba abaninzi balixhalabele ikamva. Njengomntu omkhulu, ngokuqinisekileyo unamava angakumbi kunam ngemibandela yobomi. Noko ke, nasi isibhalo esithuthuzelayo kuthi sonke.” Emva kokufunda iSityhilelo 21:3, 4, incoko isenokwalathiselwa kwiphecana elithi Ubomi Kwihlabathi Elitsha Loxolo.
5 Nantsi enye indlela ecebisekayo: “Bhota, igama lam ndingu ․․․․․․․․. Ndityelela ngokufutshane abamelwane kuba ndiyazi ukuba abantu abakhulu abaninzi balixhalabele ikhondo elibonakala lithatyathwa ngabantu abaselula abaninzi namhlanje. Maxa wambi abantu abaselula babonakalisa isimo sengqondo sokungabi nantlonelo, kwanesokuvukela. Kodwa ndabelana nabantu ngesibhalo esibonisa indlela abaya kuthi abantu bonke ngenye imini bafunde ukuphila kunye ngoxolo.” Ngoko funda INdumiso 37:11 uze ugqabaze ngokufanelekileyo. Xa abantu abakhulu abangabaninimzi besiva amazwi anyaniseke ngolo hlobo ethethwa ngabavakalisi abaselula, ngokuqinisekileyo abaninzi babo baya kuchukumiseka baze basabele kakuhle.
6 Amawakawaka abavakalisi abaselula ayaqhubeka enegalelo elihle kumsebenzi wokushumayela uBukumkani nowokwenza abafundi. Bafanele banconywe ngokufudumeleyo. Ulutsha oluqeqeshwe kwasebusaneni ngabazali abahlonel’ uThixo lusabela kakuhle kukhuthazo olunyanisekileyo lokusebenzela ukuba nesabelo esizele ngakumbi kuzo zonke iinkalo zobulungiseleli. Abo bahamba isikolo banethuba elikhethekileyo lokunikela ubungqina kwabafunda nabo nakubafundisi-ntsapho babo. Abaninzi baye banamava anelisayo ngenxa yokunikela ubungqina kule ntsimi ikhethekileyo.
7 Ngoko bancede abavakalisi abaselula abakwibandla okulo ukuba balisebenzise ngokuyingenelo ithuba lokukhonza uYehova ngamandla obutsha, bemdumisa ngokusuka entliziyweni.—INtshu. 12:1.