Ucwangciso Lwentlanganiso Yenkonzo
Iveki Eqala NgoJulayi 10
12 imiz: Izaziso zasekuhlaleni. Izaziso Ezikhethiweyo kuBulungiseleli Bethu BoBukumkani. Gqabaza ngengxelo yenkonzo yasentsimini yebandla lenu ka-Aprili. Phethulela ingqalelo kwibhokisi ethi “Khangela Kwiphepha Elingasemva,” uze wenze umboniso ngenye yeentshumayelo ezicetyisiweyo eziya kusebenza kakuhle kwintsimi yasekuhlaleni. Umveleli wenkonzo uxubusha amalungiselelo okugqibela entsimi engabelwanga bani—imihla, intsimi eza kusetyenzwa, indawo yokuhlala, amalungiselelo okuhamba noncwadi oluza kuhanjiswa. Hlolisisa ileta yomhla kaMeyi 30, 2000.
15 imiz: “Asinakuyeka Ukuthetha.” Yenza intshayelelo engaphantsi komzuzu, uze ulandelise ngengxubusho yemibuzo neempendulo. Bethelela izizathu zokuba sisithabathe nzulu isabelo sethu sokushumayela. Quka iingongoma ezibalulekileyo ezikwiMboniselo kaJanuwari 15, 1997, iphepha 23-4.
18 imiz: “Zonke Izinto Mazenzelwe Ukwakhana.” Abadala ababini baxubusha eli nqaku. Funda isiqendu ngasinye nezibhalo ezibonisiweyo. Balaselisa imigaqo ebandakanyekileyo. Bethelela imfuneko yokusebenzisa ukuqonda xa kusingathwa imibandela yezoshishino okanye yotyalo-mali. Hlolisisa isiluleko esikwiMboniselo kaMatshi 15, 1997, iphepha 18-19, 22.
Ingoma 15 nomthandazo wokuqukumbela.
Iveki Eqala NgoJulayi 17
15 imiz: Izaziso zasekuhlaleni. Ingxelo yemali. Chaza ngokufutshane indlela yokusebenzisa incwadana enemifanekiso ethi Igama LikaThixo ukuze kuncedwe umntu onomdla aqonde imfuneko yokwazi nokusebenzisa igama likaThixo lobuqu.—Bona incwadi ethi Ukuqiqa, iphepha 393-4.
10 imiz: “Ucwangciso Olutsha Lwendibano Yesiphaluka.” Imibuzo neempendulo. Chaza umhla wendibano yesiphaluka elandelayo, uze ubabongoze bonke ukuba babekho kuzo zombini ezi ntsuku. Bakhuthaze bonke ukuba benze umgudu okhethekileyo wokuba bameme izifundo zeBhayibhile. Ukuya endibanweni kunokuwukhawulezisa umnqweno wazo wokunxulumana nebandla ngokuthe rhoqo.
20 imiz: Ngubani Ofanele Abe Ngumzekelo Wakho? Ubawo uqhuba isifundo sentsapho nomntwana omnye okanye ababini abakwishumi elivisayo. Kutshanje uye waphawula ukuba iincoko zabo zizinze kakhulu kubantu ababalaseleyo kwezemidlalo, abadlali abadumileyo kwimifanekiso eshukumayo, abasasazi bakamabonwakude neemvumi ezaziwayo. Uxhalabile kuba olu hlobo lwentabatheko lubonisa umoya wehlabathi. Baxubusha uVukani! kaJuni 8, 1998, iphepha 12-14. Ulutsha luyaqonda ukuba kukho ingozi ngokunqula abantu behlabathi kwaye luyavuma ukuba ukubalasela ehlabathini akuwenzeli nto amaKristu. Luhlolisisa iingenelo zokondela kubazali, kubadala nakweminye imizekelo ebandleni—ngokukodwa kuYesu Kristu—njengomzekelo walo.
Ingoma 34 nomthandazo wokuqukumbela.
Iveki Eqala NgoJulayi 24
5 imiz: Izaziso zasekuhlaleni.
15 imiz: Sizincomela Njengabalungiseleli BakaThixo. Izicaka zolungiselelo ezibini zixubusha isiluleko esingokweZibhalo esikwiMboniselo kaDisemba 15, 1998, iphepha 19-20. Ziyayiqonda imfuneko yokuba izinto zizenze kakuhle njengezicaka zolungiselelo kwaye zihlolisisa oko zinokukwenza ukubonisa ukuba ziyaziphumeza izabelo zazo. Ziyayibona imfuneko yokuba zibe yimizekelo emihle kubulungiseleli basentsimini kwaye zixubusha iindlela ezinokuba luncedo ngayo kubadala ngokunikela uncedo lobuqu kwabanye. Ziyavuma ukuba zifuna ukwenza unako nako ukuze zincede ibandla liqonde ukungxamiseka kwamaxesha lize likhule lenze inkqubela ngokomoya.
10 imiz: Ukubhalela Abantu Esingakwaziyo Ukuqhagamshelana Nabo Iileta. Intetho nengxubusho nabaphulaphuli. Njengokuba kuya kusiba nzima ukubafumana abantu ekhaya, abanye abavakalisi bafumana imiphumo emihle ngokubhala iileta. Qwalasela olu khokelo. Iileta zifanele zibethe koomofu, zisekelwe eZibhalweni kwaye zibonakalise intlonelo. Musa ukuthumela iileta ezingachazwanga ukuba zivela kubani. Bhala okanye uchwetheze ngokucacileyo kwaye ifundeke. Mnike idilesi yeHolo yoBukumkani nexesha leentlanganiso zebandla nesimemo. Musa ukusebenzisa idilesi yoMbutho. Hlola amacebiso akwiNcwadi Yesikhokelo Yesikolo, kwiphepha 87-8, neSingxobo Semibuzo soBulungiseleli Bethu BoBukumkani bukaNovemba 1996.
15 imiz: Sebenzisa Iintshayelelo Eziphumelelayo. Khetha iintshayelelo ezimbini okanye ezintathu kwiphepha 9-15 lencwadi ethi Ukuqiqa, uze uxubushe iindlela ezinokusetyenziswa ngayo kwintsimi yasekuhlaleni. Cela abaphulaphuli bachaze ukuba, “Ziziphi iintshayelelo abazisebenzisayo xa bethetha nomntu esitratweni, ngokungacwangciswanga okanye ngezinye iindlela?” Ngokuvuma kwexesha yenza umboniso ube mnye okanye ibe mibini.
Ingoma 54 nomthandazo wokuqukumbela.
Iveki Eqala NgoJulayi 31
12 imiz: Izaziso zasekuhlaleni. Bakhumbuze bonke ukuba bangenise iingxelo zenkonzo yasentsimini kaJulayi. Iindaba Ezingokobuthixo. Cela abaphulaphuli ukuba babalise amava obuqu, abaye banawo kule nyanga xa bebehambisa iincwadana ezinemifanekiso.
15 imiz: Iimfuno zasekuhlaleni.
18 imiz: “Ngaba Uyawuxabisa Umonde KaYehova?” Imibuzo neempendulo. Quka amagqabaza abalulekileyo mayela nokuzeka kade umsindo kukaYehova.—Bona i-Insight, Umqulu 2, iphepha 263-4.
Ingoma 75 nomthandazo wokuqukumbela.
Iveki Eqala NgoAgasti 7
10 imiz: Izaziso zasekuhlaleni.
17 imiz: “Ngaba Ungumntu Oneentloni?” Imibuzo neempendulo. Balisa amava akhuthazayo akwiNcwadi Yonyaka Yowe-1997, iphepha 43-4.
18 imiz: Nibe Nobulumko Kamva. Intetho ngumdala. Abantu abaselula banqwenela ukunandipha ikamva elimyoli nabo babathandayo. Ngoxa oku kungokwemvelo, bafanele basebenzise isiluleko sobuthixo ukuba baza kuphumelela. (IMize. 19:20) Xa abantu beselula batsaleleka ngamandla kumntu wesini esahlukileyo. Ukuba azilawulwa ezi mvakalelo, imiphumo inokuba yetshabalalisayo. Kuvela imibuzo emininzi ngokuphathelele ubulumko bokubandakanyeka ngokweemvakalelo kwabeshumi elivisayo nabesini esahlukileyo, bekhulisa ulwalamano lothando oluphumela ekwenzeni amadinga. Hlolisisa isiluleko esikwincwadi ethi Imibuzo Yabantu Abaselula, iphepha 231-5. Balaselisa iingongoma eziziintloko kwiMboniselo kaNovemba 15, 1999, iphepha 18-23, ebonisa ukubaluleka kokuba ulutsha luzalise imbopheleleko yalo kuThixo. Khuthaza abakwishumi elivisayo ukuba basithabathel’ ingqalelo esi siluleko baze basixubushe nabazali babo ukuba banemibuzo.
Ingoma101 nomthandazo wokuqukumbela.