Imbono YeBhayibhile

“Imidlalo Eyingozi”—Ngaba Ufanele Uzijule Kuyo?

“KWEZI MINI UNINZI LWETHU LUYE LWAYEKA UKUBUKELA NJE LUSONG’ IZANDLA, SITSIBA KWIINQWELO-MOYA EZIBHABHAYO, SIHL’ EMAWENI SIBOTSHWE ZIINTANJANA NJE, ZIHAMBE NGAMAPHENYANE EZINGXANGXASINI SIZE SIZIPHOSE EMANZINI ANOOKREBE.”—IPHEPHANDABA I-“THE WILLOW GLEN RESIDENT”.

LA MAGQABAZA achaza isimbo esixhaphakileyo ngoku kwezemidlalo. Ukuthandwa ngokugqithiseleyo kwemidlalo efana neskydiving, ukuhl’ unyuka emkhenkceni, iparagliding neBASE jumpinga kubonisa indlela ihlabathi elithe ti ngayo kukwenza izinto ezinobungozi. Iisnowboards, iibhayisikile ezihamba ezintabeni, iiskateboards, neein-line skates zenza abantu badlulele ngaphaya kwemida yobuntu ngokuya ngabom kwezona ntaba ziphakamileyo, imiwewe ephakamileyo nokutsiba kwiindawo ezisezantsi. Ngokutsho kwephephancwadi iTime, oku kuthandwa kangaka “kwemidlalo eyingozi”—imidlalo abantu abazijulayo kuyo—kubonisa indlela izigidi zabantu ezikufuna ngayo ukuba nenxaxheba “kwimidlalo yamadela-kufa, apho abo badlala ngeempelaveki nabadlali abahlawulwayo bagaguzayo baze babonise ubuchule babo nokuba bona bangooxholovane abangoyiki ngokoyikiswa.”

Noko ke, oku kwanda kokuthand’ udumo kubangele iindleko eziphezulu. Intaphane yabantu iyenzakala xa ibaxa imidlalo ebisoloko ikhuselekile. Ngowe-1997 eUnited States, abantu ababengeniswa kwigumbi lonyango olungxamisekileyo besenzakaliswa ziiskateboard bathi kratya ngaphezu kwama-33 ekhulwini, abesnowboard banda ngama-31 ekhulwini kanti ababenyuka intaba banda ngama-20 ekhulwini. Imiphumo ide yangakumbi ke kweminye imidlalo, njengoko unokubona ngokwanda kokufa kwabantu ngokunxulumene nemidlalo eyingozi. Abo bazibalulayo kule midlalo bayabuqonda ubungozi bayo. Elinye ibhinqa elidlala ukutyibiliza okuyingozi lithi: “Into esoloko isithi qatha kukufa.” Ichule elivunyiweyo lesnowboard lithi xa lishwankathela, ukuba “awenzakali, loo nto ithetha ukuba akuzami ngamandla.”

Ngenxa yezi zibakala, umKristu ufanele akujonge njani ukuba nenxaxheba kule midlalo? IBhayibhile inokusinceda njani ekugqibeni enoba sifanele sibe nenxaxheba kwimidlalo eyingozi kusini na? Ukuqwalasela indlela avakalelwa ngayo uThixo ngobungcwele bobomi kuya kusinceda siphendule le mibuzo.

Indlela UThixo Abujonga Ngayo Ubomi

IBhayibhile isixelela ukuba uYehova ‘ungumthombo wobomi.’ (INdumiso 36:9) Ngaphandle kokuba eye wadala uluntu, kwakhona wabonisa inyameko enkulu ngokusinika oko sikufunayo ukuze sinandiphe ubomi. (INdumiso 139:14; IZenzo 14:16, 17; 17:24-28) Ngoko ke, kusengqiqweni ukugqiba ngelithi ulindele ukuba sikunyamekele oko asinike ngothando. Imithetho nemigaqo eyanikwa uhlanga lwakwaSirayeli isinceda siyiqonde loo nkalo.

UMthetho kaMoses wawufuna ukuba umntu athabathe amanyathelo okukhusela ubomi babanye abantu. Ukuba oku kwakutyeshelwa kuze kufe umntu, lowo wayenokuyithintela le ntlekele wayejongwa enetyala legazi. Ngokomzekelo, umntu onendlu wayeyalelwa ukuba akhe udongana okanye uthango, olubizwa ngokuba lungqameko, lujikeleze uphahla olusisithabazi lwendlu yakhe entsha. Ngaphandle koko, ityala legazi laliya kuba phezu kwaloo ndlu, ukuba umntu wayenokothuleka kolo phahla aze afe. (Duteronomi 22:8) Ukuba ngokungalindelekanga inkunzi yenkomo yayinokuhlaba umntu imbulale, umniniyo wayengayi kubekwa tyala. Kwelinye icala, ukuba le nkunzi yenkomo yayidume ngokuba nobungozi waza walunyukiswa nomniniyo kodwa akayigcina kakuhle le nkunzi yenkomo, yaza yahlaba umntu, umniniyo ke wayeba netyala legazi yaye wayebulawa. (Eksodus 21:28, 29) Ekubeni ubomi buxabisekile kuYehova, uMthetho wakhe wabonisa ukuxabiseka kokulondolozwa nokukhuselwa kobomi.

Abakhonzi abanyanisekileyo bakaThixo baqonda ukuba le migaqo yayibandakanya nokubeka ubomi esichengeni. Kwenye ingxelo yeBhayibhile, uDavide wavakalisa umnqweno wakhe ‘wokusela amanzi equla laseBhetelehem.’ Ngelo xesha iBhetelehem yayiphantsi kolawulo lwamaFilisti. Esakuva isicelo sikaDavide, amathathu kumajoni akhe angena ngenkani kwinkampu yamaFilisti, akha amanzi kwiqula laseBhetelehem aza eza nawo kuDavide. Wasabela njani uDavide? Akazange awasele loo manzi, wawachitha phantsi. Wathi: “Makube lee kum, ngokuphathelele uThixo wam, ukwenza oko! Ngaba igazi lala madoda ndifanele ndilisele ngokubeka esichengeni umphefumlo wawo? Kuba awazisa ngokubeka esichengeni imiphefumlo yawo.” (1 Kronike 11:17-19) UDavide wakubona kungekho ngqiqweni ukubeka ubomi esichengeni ukuze aneliseke.

UYesu wasabela ngendlela efanayo, xa ngokunokwenzeka embonweni, uMtyholi wamhendela ukuba aziphose kuqoqo lwetempile ukuze abone enoba iingelosi zazingenakumkhusela ekwenzakaleni kusini na. UYesu wathi: “Uze ungamvavanyi uYehova uThixo wakho.” (Mateyu 4:5-7) Ewe, uDavide noYesu baqonda ukuba kwakuphosakele emehlweni kaThixo ukubeka ubomi bomntu engozini ngokungeyomfuneko.

Sicinga ngale mizekelo, sinokuzibuza, ‘Sinokubona njani ukuba nguwuphi umdlalo oyingozi? Ekubeni nohlobo oluqhelekileyo lokuzihlaziya, lungeyongozi lona ngokwalo, lunokwenziwa lube nobungozi, sinokuwubeka phi ke thina umda?’

Ngaba Ngokwenene Ufanele Uzibeke Engozini?

Ukuwuhlolisisa ngenyameko nawuphi na umdlalo esisenokuba sicinga ngawo kuya kusinceda sifumanise impendulo. Ngokomzekelo, sisenokuzibuza, ‘Kunokuba yingozi kangakanani ukudlala lo mdlalo? Ngaba ndiwuqeqeshelwe okanye ndinazo kusini na izinto zokuzikhusela ekwenzakaleni? Ndakuthini ukuba ndiwile okanye ndiphose inyathelo ndisatsiba okanye ukuba izinto zam zokuzikhusela ziye zasilela? Ngaba loo nto iya kuba yinto nje engenamsebenzi okanye ndisenokwenzakala kakubi okanye ndife?’

Ukuzibeka engozini ngokungeyomfuneko kuba usithi uyazihlaziya kunokuluchaphazela ulwalamano oluxabisekileyo lomKristu wokwenyaniso noYehova kwakunye nokukufanelekela kwakhe ukufumana amalungelo akhethekileyo ebandleni. (1 Timoti 3:2, 8-10; 4:12; Tito 2:6-8) Ngokucacileyo, kwanaxa ezihlaziya, amaKristu aya kwenza kakuhle ukuhlolisisa imbono yoMdali ngobungcwele bobomi.

[Umbhalo osemazantsi]