Buza Kufika Nini UBukumkani BukaThixo?
“NKOSI, ububuyisela ngeli xesha na ubukumkani kuSirayeli?” (IZenzo 1:6) Kwakungathi abude bufike uBukumkani bukaYesu kubapostile bakhe. Namhlanje, emva kweminyaka emalunga nama-2 000, abantu basafuna ukwazi ukuba: Buza kufika nini uBukumkani bukaThixo?
Ngenxa yokuba uBukumkani yayingumxholo wentshumayelo kaYesu, umele ucinga ukuba wawuphendula kakuhle loo mbuzo. Unyanisile, wenza kanye ngolo hlobo! Wathetha izihlandlo ezininzi ngexesha eliqinisekileyo awalibiza ngokuba ‘bubukho’ bakhe. (Mateyu 24:37) Obo bukho bunxibelelene nokumiselwa koBukumkani bukaMesiya. Buyintoni obo bukho bakhe? Makhe siqwalasele iinkalo ezine ezityhila ubukho bukaKristu.
1. Ubukho bukaKristu babuza kuqala emva kwexesha elide uYesu wafayo. UYesu wakha wenza umzekeliso, ezifanisa nendoda ‘ehamba iye kwilizwe elikude ukuya kuzizuzela ngokunqabisekileyo igunya lakomkhulu.’ (Luka 19:12) Wazaliseka njani loo mzekeliso usisiprofeto? Kaloku, uYesu wafa waza wavuka; wandula ke waya “kwilizwe elikude” oku kukuthi ezulwini. Njengokuba uYesu waprofetayo kumzekeliso ofanayo, ukubuya kwakhe ekumandla obukumkani kwakuza kuza, kwenzeke “emva kwexesha elide.”—Mateyu 25:19.
Emva kweminyaka eliqela uYesu enyukele ezulwini, umpostile uPawulos wabhala wathi: “Lo mntu [uYesu] wanikela umbingelelo omnye wezono ngokungapheliyo waza wahlala phantsi ngasekunene kukaThixo, elindele ukuba zide iintshaba zakhe zibekwe njengesihlalo seenyawo zakhe.” (Hebhere 10:12, 13) Ngoko ke, uYesu walinda ixesha elide emva kokuba enyukele emazulwini. Laphela ixesha lokulinda xa uYehova uThixo wenza ukuba uNyana wakhe abe nguKumkani woBukumkani bukaMesiya ekudala bulindelwe. Kulapha ke baqala khona ubukho bukaKristu. Ngaba abantu basemhlabeni babeza kusibona esi siganeko siphawulekayo?
2. Ubukho bakhe abubonakali emehlweni abantu. Ungalibali kaloku, uYesu wathetha ngomqondiso wobukho bakhe. (Mateyu 24:3) Ukuba obu bukho bakhe bebubonakala kwiliso labantu ngaba umqondiso ubunokuba yimfuneko? Ngokomzekelo: Yiba nomfanekiso-ngqondweni ukuhambo oluya elwandle. Kukho imiqondiso eyalatha apho uya ukhona, kodwa wakufika elunxwemeni, umi kufutshane namanzi amaninzi afikelela apho anokubona khona amehlo, ngaba ulindele ukubona umqondiso ojongise phambili othi “Ulwandle”? Ngokuqinisekileyo akunjalo! Kutheni kunokufuneka umqondiso obonisa indawo oyibonayo ngamehlo akho?
UYesu wachaza imiqondiso yobukho bakhe, kungekhona into eyayibonisa ukuba babenokumbona ngamehlo, kodwa ukuze ancede babone oko kwakuza kwenzeka emazulwini. Ngoko ke uYesu wathi: “Ubukumkani bukaThixo abuzi ngembonakalo ephawulekayo.” (Luka 17:20) Le miqondiso yayiza kubonisa njani ukuba ubukho bukaKristu sele buqalile?
3. Ubukho bukaYesu buya kuphawulwa ngamaxesha anzima apha emhlabeni. UYesu wathi ubukho bakhe njengoKumkani ezulwini babuya kuphawulwa ziimfazwe emhlabeni, iindlala, iinyikima zomhlaba, iindyikityha zokufa nolwaphulo mthetho. (Mateyu 24:7-12; Luka 21:10, 11) Yintoni ngoku eyayiza kubangela lo mbhodamo? IBhayibhile icacisa ukuba uSathana, “umlawuli weli hlabathi,” uligqabi ngumsindo ngenxa yokuba esazi ukuba iintsuku zakhe zibaliwe njengokuba sele buqalisa ubukho bukaKristu njengoKumkani. (Yohane 12:31; ISityhilelo 12:9, 12) Kule mihla siphila kuyo buyintabalala ubungqina obubonisa ukuba uSathana uligqabi ngumsindo nokuba ubukho bukaKristu sele buqalisile. Ingakumbi ukususela ngowe-1914, unyaka ababhali-mbali abathi kwapatyalaka ibhobhile kwimicimbi yehlabathi, yaye lo nyaka uphawula ukubonakala kobu bungqina ngomlinganiselo omkhulu.
Konke oku kunokuvakala ngokungathi ziindaba ezimbi, kodwa akunjalo. Oku thetha ukuba uBukumkani bukaMesiya buyalawula emazulwini ngoku sithethayo. Kungekudala, lo rhulumente uza kubonakalisa igunya lakhe ngokulawula umhlaba uphela. Nantsi into efik’ ixake, baza kwazi njani abantu ngobu Bukumkani ukuze babamkele baze babe ngabalawulwa babo?
4. Enye into ephawula ubukho bukaYesu ngumsebenzi wokushumayela owenziwa ehlabathini lonke. UYesu wathi ubukho bakhe babuza kufana ‘nemihla kaNowa.’a (Mateyu 24:37-39) UNowa wayengengomakhi nje womkhombe kodwa wayekwa ‘ngumshumayeli wobulungisa.’ (2 Petros 2:5) UNowa walumkisa abantu ngelokuba umgwebo kaThixo wawusondele. UYesu wathi abalandeli bakhe basemhlabeni babeza kwenza into efanayo ebudeni bobukho bakhe. Waprofeta wathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.”—Mateyu 24:14.
Njengokuba sibonile kwinqaku elandulela eli, uBukumkani bukaThixo buza kutshabalalisa bonke oorhulumente bomhlaba. Umsebenzi wokushumayela ulumkisa abantu ukuba urhulumente wasezulwini akafikanga ugalelekile, yaye kuvuleka ithuba lokuba abantu basinde kwintshabalalo ezayo baze babe ngabalawulwa boBukumkani bukaThixo. Eyona nqontsonqa kukuba, Uza kusabela njani wena?
Ngaba UBukumkani BukaThixo Buziindaba Ezimnandi Kuwe?
Isigidimi esasishunyayelwa nguYesu sasilithemba eliqaqambileyo. Emva kwemvukelo yase-Eden, kangangeenkulungwane ezadlulayo, uYehova uThixo wamisela urhulumente owayeza kulungisa izinto, kubuyiselwe uluntu oluthobelayo kwimeko uThixo owayenenjongo yayo kwasekuqaleni—ukuphila ngonaphakade kwiparadesi apha emhlabeni. Yintoni enye esinokuba siyayifuna ngaphezu kokwazi ukuba lo rhulumente kudala kuthethwa ngaye uyalawula emazulwini? Asiyontsomi nje engenasihlahla, kodwa uyinto yokwenene!
Kanye ngoku, uKumkani omiselwe nguThixo uyalawula phakathi kweentshaba zakhe. (INdumiso 110:2) Kweli hlabathi lichasene noThixo, uMesiya uzalisekisa umnqweno kaYise wokufunisisa bonke abafuna ukwazi ngoThixo njengaye baze bamnqule “ngomoya nangenyaniso.” (Yohane 4:24) Ithemba lokuphila ngonaphakade phantsi koBukumkani bukaThixo livuleleke kuzo zonke iintlanga, ubudala nemvelaphi. (IZenzo 10:34, 35) Siyakubongoza ukuba ulisebenzise kakuhle eli thuba. Funda ngoBukumkani bukaThixo ngoku, ukuze nawe unandiphe ukuphila phantsi kolawulo lobulungisa ngonaphakade!—1 Yohane 2:17.
[Umbhalo osemazantsi]
a Amazwi kaYesu alungisa amakhwiniba adla ngokufumaneka kwiinguqulelo zeBhayibhile ezahlukeneyo ngendlela yokuguqulela igama elithi “ubukho.” Ezinye iinguqulelo ziliguqulela eli gama ngokuthi “kukuza,” “ukufika,” okanye “ukubuya,” nakuba loo magama enentsingiselo yesiganeko somzuzwana. Kwakhona phawula ukuba uYesu akazange afanise ubukho bakhe noMkhukula womhla kaNowa, isiganeko esenzeka ebudeni bexesha, kodwa “nemihla kaNowa,” incopho kwisihlandlo sexesha. Ngokufana nqwa neso sihlandlo, ubukho bukaKristu buya kuba sebudeni bexesha xa abantu beya kuxakeka ngooni nooni kwimicimbi yabo yemihla ngemihla de banganikeli ngqalelo kweso silumkiso.
[Imifanekiso ekwiphepha 8, 9]
Iindaba ezimbi esiziva umhla nezolo zingqina ukuba kuza ixesha elimyoli
[Inkcazelo]
Antiaircraft gun: U.S. Army photo