Abaphumelele Kwiklasi Ye-132 Yesikolo SaseGiliyadi

Iintshatsheli Zenyaniso

NGOMATSHI 10, 2012, yayilusuku olukhethekileyo kwiziko lemfundo lamaNgqina kaYehova elisePatterson, eNew York. Amawakawaka abantu ababenxibe kakuhle, kuquka neendwendwe ezazivela kumazwe asemzini, ayeze kumsitho wokuthweswa kwezidanga kwabo baphumelele kwiklasi ye-132 yeSikolo seBhayibhile seWatchtower saseGiliyadi. Abaninzi bathontelana kwiholo esePatterson, baza abanye bayibukela kwividiyo kumakhaya aseBheteli. Bebonke abantu ababekho koloo cwangciso babengama-9 042.

Bonke babekhangele phambili. Ngokungafaniyo nabo babeye kwiiklasi zangaphambili zabathunywa bevangeli, bonke abafundi bale klasi bebesele bekuhlobo oluthile lwenkonzo ekhethekileyo—abanye bebekhonza eBheteli, bengoovulindlela abakhethekileyo, abaveleli abahambahambayo okanye abathunywa bevangeli—nangona bengazange baqeqeshwa eGiliyadi ngaphambili. Yintoni ababenokuyifundiswa aba mpondo zihlanjiwe?

Abaphulaphuli babengazukulinda uhalala ngaphambi kokuba bazi impendulo yaloo mbuzo. UGerrit Lösch, owayengusihlalo wocwangciso wanikela intetho yengabula zigcawu. Wabuza umbuzo oxhokonx’ iingcinga othi, “Ngaba Uyintshatsheli?” Wathi amaKristu ziintshatsheli zenyaniso, akhusela zonke iimfundiso zobuKristu. Ukugcina inyaniso akuquki ukuyifundisa abanye kodwa nokubanceda ukuba bayithande.

Umzalwana uLösch wabuza ukuba, “sazi njani ukuba sinayo inyaniso?” Wathi ubungqina abufumaneki kumanani abantu abamkela inyaniso. Nangona izigidi zabantu namhlanje ziye zalamkela unqulo olunyulu, ngePentekoste yowama-33 C.E, babelibathwana abayamkelayo. Wadwelisa iingongoma ezintlanu esazi ngazo ukuba sinayo inyaniso: (1) Siyahlala kwimfundiso kaYesu, (2) siyathandana, (3) sibambelela kwimilinganiselo kaThixo yokuziphatha, (4) asithathi cala kwiingxubakaxaka zehlabathi yaye (5) sibizwa ngegama likaThixo.

“Landela Uze Uthobele Ulwalathiso”

Abaphulaphuli bazibuza ukuba kuza kwenzeka ntoni xa umzalwana uGeoffrey Jackson esiya eqongeni ephethe ityesi! Umxholo wentetho yakhe othi “Landela Uze Uthobele Ulwalathiso,” osekelwe kuIsaya 50:5. Le vesi ithetha ngokuprofetayo ibhekisela kuYesu Kristu isithi: “Mna andibanga nemvukelo. Andijikelanga kwicala elahlukileyo.”

Umzalwana uJackson wabongoza abafundi ukuba baluthobele ngokukhawuleza ulwalathiso olunikelwa nguYehova ngomoya oyingcwele, iBhayibhile nangentlangano yakhe. Kumzekeliso weetalente, okuMateyu 25:14-30, khoboka ngalinye lanikwa imali elinganayo, ikhoboka ngalinye lanikwa ngokwamandla alo. Kwakulindeleke ukuba ngalinye lisebenze ngamandla alo onke. Amabini kuloo makhoboka abizwa ngokuba “ngamakhoboka alungileyo nathembekileyo.” Ukuthembeka akuxhomekekanga kwimiphumo kodwa ekulandeleni nasekuthobeleni ulwalathiso.

Ikhoboka lesithathu labizwa ngokuba ‘lingendawo yaye lidangele.’ Yayiyintoni ingxaki yalo? Layingcwaba italente yalo. Italente yayingeyongqekembe, kodwa yayingumlinganiselo olingana needenariyo ezingama-6 000, ezazinobunzima obuzikhilogram ezingama-20. Obo bunzima buphantse bulingane nobo bamkelekileyo betyesi yomntu ohamba amazwe ngamazwe. Bekuza kuba ngumgudu ukombela into elingana netyesi. Ngoko ke, ikhoboka lenza okuthile—ukombela italente—kodwa leyo yayingeyonto elaliyalelwe ukuba liyenze. Ngokufanayo, umthunywa wevangeli usenokuxakeka—kodwa uza kuxakeka yintoni? Ukubhala iileta, ukuchitha ixesha kwi-Intanethi, ebutha okanye eshishina? Inokuphela loo mini loo mntu edinwe eyimfe emva kokwenza ezo zinto, kodwa abe engakwenzanga oko ebeyalelwe ukuba akwenze. Umzalwana uJackson waqukumbela ngokuthi: “Ngalo lonke ixesha hlalani nilandela ulwalathiso!”

“Musa Ukuvumela Amathandabuzo”

Lowo yayingumxholo wentetho ka-Anthony Morris weQumrhu Elilawulayo. Wathi: “IBhayibhile ayizange khe ibonise ukuba ukholo namathandabuzo zihamba kunye. Ukholo luchasene namathandabuzo.” USathana waphumelela ekutyaleni amathandabuzo kwibhinqa elalifezekile, uEva, nakwezethu iingqondo usenokutyala amathandabuzo. Umzalwana uMorris wahlabela mgama wathi: “Yondla ukholo lwakho, yaye amathandabuzo aya kuphela.” Watsalela ingqalelo kwingxelo kaPetros, ‘owahamba phezu kwamanzi’ kodwa, emva koko, “akukhangela kwisaqhwithi somoya,” woyika waza waqalisa ukutshona. Emva kokumhlangula, uYesu wambuza: “Kutheni uthandabuza nje?” (Mateyu 14:29-31) “Ekubeni nina bathunywa bevangeli nixakekile kwinkonzo yexesha elizeleyo, abanye basenokuchukunyiswa kuko konke enikwenzayo, ngokungathi benihamba phezu kwamanzi, kodwa xa isaqhwithi somoya sihlasela, ze ningabi namathandabuzo.”

Umzalwana uMorris waqhubeka wathi, njengoko nityhubela isaqhwithi ngokungathi kunjalo kusenokuba nzima, kodwa ekugqibeleni siyadamba. Xa kufika amaxesha obunzima, wabongoza abafundi ukuba bakhumbule oko kwenziwa nguPawulos noSilas xa babevalelwe entolongweni eFilipi. IZenzo 16:25 zithi: “Malunga naphakathi kobusuku uPawulos noSilas babethandaza, bedumisa uThixo ngengoma; yaye amabanjwa ayebeva.” Phawula eli solotya: Abazange baphelele nje ekuthandazeni, kodwa bacula. Babecula kakhulu kangangokuba namanye amabanjwa abeva. Umzalwana uMorris wathi abanye bethu abanawo amazwi aqeqeshelwe ukucula, kodwa asimele sibe neentloni ukucula ngokukodwa xa sityhubela amaxesha anzima. Umzalwana uMorris waqukumbela ngokufunda amazwi athi “Ukunyamezela Kuse Ekupheleni” eculo-135 kwincwadi yamaculo ethi Culela UYehova.

Ezinye Iintetho Ezikhuthazayo

“Ngaba Uza Kuyithanda Imihla Eyaneleyo?” lowo yayingumxholo wentetho kaRobert Luccioni, weSebe Lokuthenga. Umxholo wakhe wawuthatyathwe kumazwi kaKumkani uDavide abhalwe kwiNdumiso 34:12. Intetho kamzalwana uLuccioni yayithetha ngendlela yokusingatha amaxesha obunzima kwangaxeshanye ulondoloze ulwalamano lwakho oluhle noYehova. Kuninzi onokukufunda kwisahluko sama-30 kweyoku-1 kaSamuweli. Ngoxa uDavide, amadoda ayehamba naye neentsapho zawo zazisaba kuKumkani uSawule, zahlala elubhacweni eTsikelage. Xa iintsapho zawo zathinjwa ngabaphangi bama-Amaleki, la madoda alibeka kuDavide ityala aza afuna ukumxuluba ngamatye. Wasabela njani uDavide? Akazange adimazeke kunoko “wazomeleza ngoYehova uThixo wakhe.” (1 Samuweli 30:6) Wafuna ulwalathiso kuYehova waza wafuna ukwenza ngokuvisisana nalo. Isithethi saqinisekisa abo bafundi sathi, ukuba bakholosa ngendlela efanayo ngoYehova baze bathobele ulwalathiso lwakhe, baya kuyithanda imihla eyaneleyo ukuze babone ukulunga. Baya kuchulumanca ebomini kwilungelo elixabisekileyo abanikwe lona.

“Tsolisa Amehlo Akho Ngaphaya Kwemilindo Yasebusuku.” Lowo yayingumxholo owanikelwa nguMichael Burnett, omnye wabahlohli besiKolo saseGiliyadi. AmaSirayeli ayabohlula ubusuku ukususela ekutshoneni kwelanga ukusa ekuphumeni kwalo bube yimilindo emithathu ngamnye wawuziiyure ezine. Owokugqibela kuyo, wawungentsimbi yesibini ezinzulwini zobusuku ukusa kwintsimbi yesithandathu kusasa, yayingowona umnyama nowawubanda kakhulu nekwakunzima ukuhlala uthe qwa kuwo. Umdumisi wayecamngca ngamazwi kaYehova ukuze xa ingumlindo wokugqibela wobusuku, angabiwa bubuthongo. (INdumiso 119:148) Umzalwan’ uBurnett wathi kubafundi: “Kuza kufuneka niphaphe. Kuza kubakho amaxesha anzima ngaphambili yaye niza kuyibona imiphumo yokuba kwihlabathi elibandayo nelingenalo uthando. Kufuneka nazi kwangaphambili ukuba niza kwenza ntoni.” Wandula wabakhuthaza ukuba bafunde imixholo yeBhayibhile enzulu neneenkcukacha ukuze bahlale bephaphile ngokomoya. Umzalwan’ uBurnett wayizekelisa ngale ndlela le ngongoma: “Suku ngalunye uthandaza kuYehova kuba ufuna abe ngumhlobo wakho. UYehova njengomhlobo wakho mvumele athethe nawe yonke imihla ngeBhayibhile. Ubusuku sele buhambile, ceba indlela oza kuzisebenzisa ngayo iintsuku kwangaphambili, ngaloo ndlela uza kuhlala uphambili kwimilindo yasebusuku.”

“Ukuqeqeshelwa Umsebenzi Ongaphambili,” yayingumxholo osekelwe kweyoku-1 kaPetros 5:10, owakhethwa nguMark Noumair ongumhlohli waseGiliyadi. Wababuza lo mbuzo abafundi: “Ekubeni ningabalungiseleli abanamava, kwakutheni ukuze nimenyelwe kwiZiko leMfundo leWatchtower?” Impendulo: “Kungenxa yokuba ningoomakhwekhwetha kubizo lwenu. Oomakhwekhwetha abaninzi badla ngokuya kwiiklasi ezithile ukuze balole izakhono zabo. Kwezi nyanga zintlanu zidluleyo, uYehova ‘ebeniqinisa’ ‘enomeleza’ ngokufunda ngokucokisekileyo iLizwi lakhe nangentlangano yakhe ukuze nikwazi ukwenza imisebenzi enzima eniza kudibana nayo. Amaplanga omeleleyo awagobi okanye ahexe xa esindwa. Umphumo woqeqesho oye walufumana uya kubonakala njengoko usebenza nabazalwana noodade. Ngaba ingcinezelo iza kwenza uphambuke kwimigaqo yobuthixo okanye ngaba uza kubambelela ngokuqinileyo ngokuvisisana noko ukufundiswe kwiLizwi likaThixo iBhayibhile? Into eyomeleleyo inokuwuthwala umthwalo. Ukomelela kweplanga kuxhomekeke kwimicu engaphakathi kulo. Ukomelela kwakho kuxhomekeke kumntu onguye ngaphakathi. UYehova ukuzise apha ukuze womelele, uthembeke yaye ukwazi ukwenza umsebenzi okulindileyo. UThixo uyenzile indima yakhe, indaba inendodana uyise akanatyala ngoko ke sithandazela ukuba nawe wenze indima yakho uze uvumele ‘uMyaleli wakho oZukileyo’ agqibezele uqeqesho lwakho.”

Amava Nodliwano-ndlebe

Kwimisitho yaseGiliyadi yokuthweswa kwezidanga kusoloko kuhlaziya ukuva amava avela kubafundi, nakwesi sihlandlo asikhange siphoxeke. Kwenye inxalenye yocwangciso, abafundi baye babonisa indlela ebebeshumayela ngayo. Ngokomzekelo, esinye isibini esithetha isiFrentshi, salinda iiyure ezintandathu kwisikhululo seenqwelo moya xa sasisiya kwisikolo saseGiliyadi. Kwivenkile yokutyela, saqalisa incoko namadoda amabini awayelinde eyawo inqwelo-moya. Xa enye yaloo madoda yathi ivela eMalawi, bathetha nayo ngesiChichewa. Imangalisiwe, yababuza ukuba balazi njani ulwimi lwayo. Bayichazela ukuba bebengabathunywa bevangeli eMalawi. Xa enye indoda yathi yeyaseCameroon, bathetha nayo ngesiFrentshi, ayizange ikholelwe. Omabini la madoda awaphulaphula ngenyameko ngamaNgqina kaYehova yaye abathunywa bevangeli bawashumayeza.

UNicholas Ahladis, wesebe leNkonzo Zokuguqulela wadlan’ indlebe nezibini ezibini. Esinye isibini siye sashiya iOstreliya saza safudukela e-East Timor edlakazwe yimfazwe. Esinye isibini sashiya iKorea saya kukhonza eHong Kong. Zozibini ezi zibini zazijonge phambili ukubuyela kwizabelo zazo ezikumazwe asemzini ukuze zisebenzise oko ziye zakufunda esikolweni.

Emva kokuba abafundi befumene iziqinisekiso zabo, omnye wabafundi owayemela iklasi wafunda ileta ebonisa uxabiso abanalo ngemfundo abaye bayifumana. Emva koko, umzalwana uLösch waqukumbela intetho yakhe ngezafobe ezimnandi, ezinye zazo zazisithi: Inyaniso intle njengomnyama, njengendawo enamanzi entlango nanjengeankile kulwandle olunesaqhwithi. Wathi, “Kuyintsikelelo engathethekiyo ukwazi inyaniso. Yiba yintshatsheli yenyaniso uze uncede abanye nabo babe ziintshatsheli.”

[Isicangca/Imaphu ekwiphepha 31]

INKCAZELO NGABAFUNDI

12 inani lamazwe abavela kuwo

36 umlinganiselo weminyaka yobudala

20 umlinganiselo weminyaka bebhaptiziwe

15 umlinganiselo weminyaka bekwinkonzo yexesha elizeyo

[Imaphu]

(Ukuba ufuna inkcazelo ehlahlelwe kakuhle, yiya kwimpapasho)

Abafundi bathunyelwe kumazwe aboniswe ngezantsi:

IZABELO ZABATHUNYWA BEVANGELI

BELIZE

BENIN

CAMBODIA

CAMEROON

CAPE VERDE

CÔTE D’IVOIRE

DOMINICAN REPUBLIC

EAST TIMOR

ECUADOR

GABON

GEORGIA

GUINEA

HONG KONG

LIBERIA

MADAGASCAR

MALAWI

PERU

SAMOA

SÃO TOMÉ AND PRÍNCIPE

UNITED STATES OF AMERICA

ZIMBABWE

[Umfanekiso okwiphepha 31]

Iklasi Ye-132 Yabaphumeleleyo Kwisikolo SaseGiliyadi

Kuludwe olungezantsi, kuqalwa ukusuka kuluhlu olungaphambili ukusa kolungasemva yaye amagama adweliswe ukusuka ekhohlo ukusa ekunene kuluhlu ngalunye.

(1) Iap, R.; Iap, J.; Ng, T.; Ng, P.; Laurino, F.; Laurino, B.; Won, S.; Won, S.

(2) Morales, N.; Morales, M.; Zanutto, J.; Zanutto, M.; Rumph; Rumph, J.; Germain, D.; Germain, N.

(3) Atchadé, Y.; Atchadé, Y.; Thomas, C.; Thomas, E.; Estigène, C.; Estigène, P.

(4) Ehrman, D.; Ehrman, A.; Bray, J.; Bray, A.; Amorim, M.; Amorim, D.; Seo, Y.; Seo, Y.

(5) Simon, J.; Simon, C.; Seale, C.; Seale, D.; Erickson, J.; Erickson, R.

(6) McCluskey, D.; McCluskey, T.; Brown, A.; Brown, V.; Mariano, D.; Mariano, C.; Loyola, Y.; Loyola, C.

(7) Rutgers, P.; Rutgers, N.; Foucault, P.; Foucault, C.; Wunjah, J.; Wunjah, E.