Ukutshayelela Incwadi Iphulo Loluntu Lokufuna UThixo
1 Abaninzi namhlanje bavakalelwa kukuba unqulo abazikhethele lona lungumbandela wobuqu. Ngenxa yoko, kunokuba lucelomngeni ukuthetha nabamelwane bethu ngalo mbandela. Kodwa ngoku sinencwadi ethi Iphulo Loluntu Lokufuna UThixo, eye yangqineka iluncedo olukhulu ekushumayeleni kubantu abaneemvelaphi zonqulo ezahlukahlukeneyo.
2 Uya kuthini ukuze uvuse umdla kumninimzi wokufunda le ncwadi? Ziziphi iingongoma okanye iinkalo oya kuzibalaselisa eziya kubangel’ umdla kwabo bathi bangamaKristu? kwabo baneenkolelo ezingezozabuKristu? okanye kwabo bangenalukholo? Amacebiso alandelayo aya kusinceda sikulungele ukubonisa abamelwane bethu imfuneko ‘yokufuna uYehova’ ‘neyokumbiza esekufuphi.’ (Isa. 55:6) La macebiso anokuvisisaniswa neemeko zasekuhlaleni.
3 Kutheni Sifanele Senze Uphando Ngoko Sikuthethayo?: Ekubeni abaninzi besithi unqulo lwabo lubalungele yaye abanamdla wakuluguqula, kusenokufuneka ukuba siyihlengahlengise intshumayelo yethu ukuze sincede umninimzi akuhlolisise ngengqondo ephangaleleyo oko sikuthethayo.
4 Emva kokubulisa ngendlela efanelekileyo, unokuthi:
◼ “Njengoko sithetha nabamelwane bethu, siphawula ukuba abantu abaninzi banelisekile ngonqulo lwabo yaye abanamdla wakuluguqula. Kodwa ukuba abantu bazipha ixesha lokuhlolisisa oko kukholelwa ngabanye, ngaba ucinga ukuba oku kunokukhokelela ekubeni abantu baqondane kakuhle kuze kuyinciphise intiyo ehlabathini? [Mnike ithuba lokuphendula umninimzi.] Phawula oko iBhayibhile ikuthethayo ngabo bathanda uThixo nendlela abafanele bavakalelwe ngayo ngabanye.” Emva kokufunda IZenzo 17:26, 27, yalathisel’ ingqalelo kwisiqendu 15 nese-16 kwiphepha 10 lencwadi ethi Iphulo Loluntu Lokufuna UThixo.
5 Abaninzi bafumanise ukuba ukutyhila incwadi kwisahluko esixubusha ngonqulo lomninimzi kuya kuyitsala ingqalelo yakhe. Phawula indlela okunokwenziwa ngayo oku.
6 Emva kokuzazisa, usenokuthi:
◼ “Ekubeni zininzi kangaka iinkonzo namhlanje, ngaba wakha wazibuza enoba sinokufumanisa njani enoba unqulo lwethu lwamkelekile kuThixo?” Emva kokuba umninimzi ephendule, yalathisel’ ingqalelo yakhe kwibhokisi ekwiphepha 377 lencwadi ethi Iphulo Loluntu Lokufuna UThixo, ebonisa iindlela ezilishumi zokufanisa unqulo lokwenyaniso, ubek’ umnwe ngokukodwa kwingongoma yesi-7. Mbuze umninimzi enoba uyavuma kusini na ukuba umntu oqhelisela unqulo lokwenyaniso ufanele avakalelwe ngaloo ndlela ngezinye izizwe neentlanga. Ukuba ixesha liyavuma, qwalasela izibhalo ezibini ezibonisiweyo. Wandule ke uqukumbele ngokuchaza ukuba nezinye izizathu ezisithoba ezinikelweyo zixhaswa ngendlela efanayo ngeZibhalo.
7 Ezinye Iindawo Eziluncedo: Nesalathiso sombandela esinenkcazelo nesingasekupheleni kwencwadi sinokusetyenziswa. Ngokomzekelo, kuthekani ukuba abantu abaninzi kuloo ntsimi banoluvo lokuba zonke iinkonzo ziindlela nje ezahlukahlukeneyo eziya kuThixo? Ngoko khangela phantsi komxholo othi “uNqulo” apho kukho umxholwana othi “‘zonke iinkonzo ziyafana’: 12.” Oku kusibonisa indlela enokusinceda ngayo sibe neengongoma esinokuthetha ngazo. Xa sithetha nabo bangakholelwayo kuThixo, sisenokubabonisa isiqendu 1 nesesi-2 kwiphepha 329, ezigwadla umbandela wokungabikho kokholo namhlanje. Yomihlanu “Imibuzo Efuna Impendulo” ekwiphepha 17-18 isenokubangel’ umdla ngokukodwa kwabo bathandabuzayo enoba iBhayibhile ifundisa oko iinkoliso yeenkonzo ikufundisayo kusini na.
8 Ngokukuguquguqula ngokunempumelelo oko sikuthethayo sitshayelela le ncwadi ethi Iphulo Loluntu Lokufuna UThixo, sisengakwazi ukubanceda abantu esithetha nabo bafune uThixo omnye wenyaniso, uYehova.