Ufundisiso Lobuqu—Umbandela Esifanele Siwuxhalabele
1 Ziziphi izinto ezisixhalabisa ngokunzulu? Sifanele sixhalatyiswe kukwakha nokuhlala sinolwalamano olusondeleyo noYehova. Ufundisiso lobuqu lunendima ebalulekileyo ekwakheni olo lwalamano. Namhlanje, bambalwa kuthi abaneemeko ezibavumelayo bachithele ixesha ekucamngceni nasekufundisiseni. Ukanti, ukuba asilifundisisi rhoqo iLizwi likaThixo, sinokutyhafa side siphelelwe ngamandla okuchasa umoya wehlabathi neminqweno yalo yenyama.
2 Yakha Ulangazelelo LweLizwi: Xa sasiqala ukuva ngeenjongo zikaThixo, mhlawumbi sasikulangazelela ukufumana ulwazi olungakumbi. Noko ke, ekuhambeni kwexesha, umdla wethu wokuzondla ngokomoya usenokuba uye wehla. Kusenokuba kufuneka ‘sakhe ulangazelelo’ ngokudla kokomoya. (1 Pet. 2:2) Sinokulwakha njani olo langazelelo?
3 Ivumba lokutya okuthandayo liya kukulambisa ngenxa yeenkumbulo ezimyoli. Amathutyana ofundisiso lobuqu asenokusichaphazela ngokufanayo ngokomoya. Ukucuntsula nje kukudla kokomoya okumnandi kusenokusenza silambele iinyaniso ezinzulu ngakumbi. Ukwaneliswa kukufunda kusenokusikhuthazela ukuba sembe nzulu ngakumbi eLizwini likaYehova.
4 Yiba Nocwangciso Oluphumelelayo Kuwe: Abanye babekela ecaleni ingokuhlwa ethile yonke ukuze benze ufundisiso lobuqu, ngoxa abanye bekhetha amaxesha amafutshane ahlukeneyo athe rhoqo okufundisisa. Ukuba ufumanisa ukuba unokunikela ingqalelo ngakumbi kwiiyure zasekuseni, usenokugqiba kwelokuba ufundisise ngaphambi kwesidlo sakusasa. Ukuba uhlaziyeka ngakumbi ngokuhlwa, usenokukhetha ukufundisisa ngaphambi kokuba ulale. Enoba wenza njani na, eyona nto ibalulekileyo kukuba nocwangciso oluthe rhoqo olufanele iintswelo zakho uze ubambelele kulo.
5 Xa sikhuthazwa ukuba senze ufundisiso lobuqu oluthe chatha, sisenokukhawuleza sithi sele sixakeke gqitha. Noko ke, sonke simele sithembeke xa sihlolisisa indlela esilichitha ngayo ixesha lethu. Ngaba sichitha iiyure ezininzi suku ngalunye sibukele iinkqubo zikamabonwakude? Ngaba sikulungele ukuncama ezinye izinto esinomdla kuzo ngokobuqu? Ukuhlolisisa ngenyameko indlela esilisebenzisa ngayo ixesha lethu mhlawumbi kuya kusibonisa amaxesha esinawo suku ngalunye esinokuwasebenzisela ufundisiso lobuqu ngokuyingenelo ngakumbi.—Efe. 5:15, 16.
6 Ukufundisisa iLizwi likaThixo kufuna ingqalelo yethu epheleleyo. Akungenelwa kangako xa uzama ukwenza enye into ngoxa ufundisisa. Ukuba sinomkhwa wokufundisisa ngoxa sisitya, siphulaphule unomathotholo, okanye sibukele umabonwakude, asinakufane similisele ingqondo koko sizama ukukufunda. (1 Tim. 4:15) Ngoko kufuneka sahlukane nezinto ezisiphazamisayo.—Bona Incwadi Yesikhokelo Yesikolo, iphepha 33-4.
7 Ukufundisisa nokusebenzisa isiluleko seBhayibhile imihla ngemihla kubalulekile kuba leyo yindlela esifumana ngayo ulwalathiso oluvela kuYehova. Zenzele usukelo lokufaka entliziyweni yakho inyaniso esencwadini. Xhakamfula onke amathuba, kungakhathaliseki ukuba mafutshane kangakanani na, ufunde, uhlolisise, okanye ucamngce ngezinto zokomoya.—Dut. 6:6-8; Kol. 1:9, 10.