Mwaakhalihere Mwawaakuveya Ale Anoonihera Odhiveliwa ni Ihapari Dhooreera

1. Atthu akina anoonela dhai ihapari dhooreera? (Miteko 13:47, 48; 16:14, 15)

ATTHU awaatta a eseekulu yoopacera, yaahaakhulela ihapari dhooreera dha Omwene ekwaha yoopacera yaalaleeriwa awa. (Nsome Miteko 13:47, 48; 16:14, 15.) Nitho olelo-va, atthu awaatta annihakalala vaavo aniiwa awa ihapari dhooreera evaara yoopacera. Hata atthu akina ehaakhulelaka evaara yoopacera ihapari dha Omwene, nuuvira okathi awo pooti otthuna ohudha voohima dha Yehova. Ndho eseeni ninreerela nhu opaka vaavo ninimphwanya nhu ntthu ontthuna wiiwa ihapari dhooreera?

2. Nteko wa waapaka ahudheri onlikana dhai ni nteko wa nlimi?

² Nteko wa waapaka ahudheri onoolikana ni nteko wa nlimi. Mwa ntakihero, okathi nlimi onoona iye wiira nttaikho mmodha wookhalana ifuruta ittokontthe, owo onnirukula mwawaakuveya. Masi owo khanhiya olima ni okhapelela idhe nlelo ihilikanne. Emodha-modharu, okathi ninimphwanya nhu ntthu onoonihera odhiveliwa ni ihapari ninlaleya nhu, nihaana onkhalihera mwawaakuveya wiira akhale nhudheri a Kiriistu. Masi khaninhiya waakhalihera ale nlelo ahoonihenre odhiveliwa ni ihapari dhooreera wiira yoone efaita iraawana itthu anhudha awa mbiibiliyani. (Yohani 4:35, 36) Wiilipihera odhuwela akhala wiira ntthu mmodha onnidhiveliwa ni ihapari dhooreera aahiidho naari, onoonikhweihera ophwanya inamuna dhooreerela wiira ninkhalihere. Yoosoma ela, nin’ya woona etthu ninreerela nhu opaka okathi wa ovaanela woopacera wiira naakhalihere ale anoonihera odhiveliwa ni ihapari dhooreera. Nitho ninawoona moopora nikhanle nhu waakhalihere ohihiya orowa vahoolo.

MUN’YA ONKHALIHERA DHAI NTTHU OONIHENRE ODHIVELIWA NI IHAPARI DHOOREERA?

3. Eseeni ninreerela opaka vaavo ninimphwanya nhu ntthu oonihenre odhiveliwa? (1 aKorinto 9:26)

³ Vaavo ninimphwanya nhu ntthu oonihera odhiveliwa ni ihapari dhooreera nteko woolaleerya, nihaana onkhalihera mwawaakuveya ninhudhihaka voohima dha Yehova wiira apacere omwaattamela. Tivondho evaara yoopacera ninvaanela nhu nuuwo, nihaana onvaha yoosoma ya Biibiliya ni onlaleya wiira are oone mithukumano dhihu.—Munsome 1 aKorinto 9:26.

4. Nlotte yawiiraneya ya ntthu mmodha oonihenre odhiveliwa ni aatthuna opacera onsoma Biibiliya mwawaakuveya.

⁴ Nvahe yoosoma ya Biibiliya. Atthu akina ninvaanelanhuna annitthuna opacera yoosoma ya Biibiliya mwaawaakuveya. Mwa ntakihero, nihiku nimodha neesese, mwali mmodha a oCanadá aahaattamela opuro aalaleerya nrokora mmodha ni ekarinyo akusa ebroxuura Mphwanye Ekumi Yoohimala!. Nrokora aalaleerya ni ekarinyo, aahinleela mwali ole wiira arumeelaka ebroxuura ele aanwerya okhalana yoosoma ya Biibiliya ya mahala. Mwali ole aahaakhulela, nuumala-vo evahana manummeru. Nuuvira okathi vakhaani, nihiku nenne mwali ole aahimunviyarela mensaaxe nrokora ole ankohaka nihiku yaaya awa opacera osoma. Nuumala nrokora ole waakhula mensaaxe ale anleelaka wiira aamphiya owannye wuumalani wa esumana, mwali ole aahaakhula airaka: “Nnoonela dhai okhala meelo? Miyo kinookhalana okathi.” Ndho nrokora ole aahipacera onsomiha neethanu aahiidho cuumwa. Nitho esumana yeele, mwali ole aahoona nthukumano wa wuumalani wa esumana ni aahirowa vahoolo mwawaakuveya.

5. Eseeni ninreerela opaka wiira niwiirihe atthu akina otthuna opacera onsoma Biibiliya? (Moone-tho ifootu.)

⁵ Kahiyo wiira atthu ootheene ninaalaleerya nhu, anawaakhulela onsoma Biibiliya mwawaakuveya nkhama mwali ole. Ivaara dhikina, atthu akina pooti ovira okathi wawaatta wiira yoonihere odhiveliha. Hiyo ninoowerya waakhalihera atthu owo nilottaka miyaha dhinaadhivela. Ndho akhala wiira ninookhala moonelo wooloka ni ninawoonihera waathokorerya saana atthu, woonawene nuuvira okathi elo pooti owiiriha waakhulela onsoma Biibiliya. Masi eseeni ninreerela nhu olotta vaavo nininvaha nhu ntthu yoosoma ya Biibiliya? Nirowe noone ele anna ni arokora onaakhweela opaceriha yoosoma ya Biibiliya alontte awa voohima dha mwaha owo.

6. Moolumo seeni ninreerela nhu olotta wiira ntthu oonihenre odhiveliwa aakhulele otthikela ovaanela ni hiyo?

⁶ Anna ni arokora a ilapo dhikina, alontte wiira vaavo ninninvaha nhu yoosoma ya Biibiliya ntthu mmodha, nihaana oxaka olotta moolumo nkhama “yoosoma,” “kuursu a Biibiliya” aahiidho “miyo kikaamoosomihani.” Ohiya-vo, anna ni arokora awo ahoona wiira orumeela moolumo nkhama “ovaanela”, “woopa mwaha” aahiidho “omwiiwasasa Biibiliya”, pooti omwiiriha ntthu waakhulela onsoma Biibiliya. Wiira ntthu owo aakhulele otthikela ovaanela ni nyuwo, nyuwo pooti olotta wiira: “Tivootikiniha woona moopora Biibiliya onaakhula iye makoho ootepa otthuneya a mweekumini,” aahiidho “Biibiliya kahiyo pahi eliivuru ya atthu aneettela etiini, masi onnivaha miruku dhooreera ikhanle onikhalihera khuta nihiku.” Nitho pooti onleela ntthu owo wiira: “Nyuwo khamunrowa oviriha okathi wawaatta. Mpuwa wa minuutu 10 aahiidho 15, nnoowerya ohudha itthu dhawaatta dhin’ya wookhaliherani mweekumini mwinyu.” Ndho wiira nhintutuse ntthu owo, nhaana oxaka olotta moolumo nkhama “nihaana osoma mahiku ootheene nin’ya nhu wiiwanana” aahiidho “esumana yootheene.”

7. Eseeni yaakhalihenre atthu akina woona evaara yoopacera, wiira itthu yaahudha awa dhaari dheekhweeli? (1 aKorinto 14:23-25)

⁷ Munlaleye ntthu owo wiira oone nthukumano. Woonawene okathi wa nrummwa Paaulu, atthu akina yaahoona wiira itthu yaahudha awa dhaari dheekhweeli nuumala orowa woona nthukumano evaara yoopacera. (Munsome 1 aKorinto 14:23-25.) Nitho ti yeelo eniiraneya olelo-va. Anaskola awaatta a Biibiliya annirowa vahoolo nuumala opacera woona mithukumano dhihu. Okathi seeni munreerela nnyu onlaleya ntthu oonihenre odhiveliwa wiira areele nthukumano? Yoosoma 10 ya eliivuru Mphwanye Ekumi Yoohimala! yookhalana enamuna yooreera ya onlaleya ntthu wiira oone mithukumano dhihu. Masi khamuntthuneya olipelela ophiya yoosoma elo wiira munlaleye ntthu owo. Evaara yoopacera munvaanela nnyu ni ntthu, pooti onlaleya wiira oone nthukumano wa wuumalani wa esumana. Woonawene nyuwo pooti onleela ntthu owo muru wa mwaha on’ya olottiwa esumana elo aahiidho epontu emodha yoodhivenleni en’ya othokoreriwa yoosoma ya Wiikocela.

8. Itthu seeni dhimpakiwa nthukumanoni ninreerela nhu onleela ntthu nininlaleya nhu oreela woona mithukumano? (Yesaya 54:13)

⁸ Okathi nninlaleya nnyu ntthu oonihenre odhiveliwa, munleele moopora mithukumano dhihu dhiri awa dhoovirikana ni idhe woonawene otanke iye woona itiini dhikina. Nuumala nthiyana mmodha woona Yoosoma ya Wiikocela evaara yoopacera, aahitikiniheya mpakha onkoha nrokora aansomiha Biibiliya wiira: “Niire munna ole onnidhuwela madhina a atthu ootheene?” Nrokora ole aahinleela wiira nkhama dhiidhaale nindhuwela nhu madhina a amudhi nhu, hiyo ninniilipihera odhuwela madhina a anna ni arokora. Nuumala nthiyana ole aalontte wiira atthu awaatta a ekerexa-ye khandhuwelana madhina. Nitho etthu ekina ninreerela nhu onleela, yoolakela yuulupale ya mithukumano dhihu. (Munsome Yesaya 54:13; Tradução do Novo Mundo da Bíblia Sagrada) Hiyo ninnithukumana wiira ninkokhorele Yehova, ohudha voohima dha veene, ni wiira nilipihane nkina ni nkhwe. (aHeb. 2:12; 10:24, 25) Tivondho mithukumano dhihu dhinkociheriwa wiira inikhalihere ohudha itthu ni khidhaana dhoolema. (1 aKor. 14:40) Ohiya-vo, Empa ya Omwene entekiwa wiira nikahudhamo ni khanaaceriwa itthu. Nitho okhala wiira khanniirela mphantta epoliitika, khaninkhalihera nnakhala epartiitu emodha aahiidho manyakunyaku nivahaka miyoonelo dhihu. Etthu ekina ori omoonihera vahinatthi ntthu owo eviidiyu eni: Eseeni Eniireya Empa ya Omwene?. Opaka elo, enoonkhalihera orowa onthukumanoni adhuwelaka etthu en’ya wiireya.

9-10. Eseeni ninreerela nhu onleela ntthu onoovelela oreela mithukumano dhihu? (Moone-tho efootu.)

⁹ Atthu akina annoovelela oreela mithukumano dhihu yuupuwelaka wiira anookhala “Namoona a Yehova.” Munleele ntthu owo wiira onninidhivela owaakhela atthu ootheene anreela woona mithukumano dhihu ni kanninivekela ntthu olotta aahiidho opaka etthu okathi wa mithukumano aahiidho onkhanyerera okhala Namoona a Yehova. Nitho imudhi dhootheene dhinnaakheliwa, waahela mpuwa anaahima. Okathi owo, anaan’yari khanvalaanyiwa ni ana, masi ankilaathi naawo wiira ekahudha vamodha. Ndho elo ennaakhalihera waakhapelela ana okathi wa mithukumano ni odhuwela etthu anhudha awa. (Otum. 31:12) Hiyo khaninsokha nsurukhu aahiidho oviriha ephace khuta opuro nivekaka orahelelimo nsurukhu. Ohiya-vo, nintthara yooruma ya Yeesu eni: ‘Nyuwo nvahiwe mahala, ndho nvahe mahala.’ (Math. 10:8) Nitho nyuwo pooti onleela ntthu owo wiira khantthuneya owara ikuwo dha nsurukhu wawaatta wiira areele nthukumano. Muluku onoona nrima wa ntthu, ohiya makhalelo a ota.—1 Sam. 16:7.

¹⁰ Akhala wiira ntthu owo onoora onthukumanoni, mmwiirihe okhala ootaphuwa. Mundhuwelihe asitokweene vamodha ni anna ni arokora akina. Ndho akhala wiira onawoona wiira onnithokoreriwa saana, elo pooti omwiiriha otthuna otthika nihiku nikina. Akhala wiira ntthu owo khaana Biibiliya, mmwaattamele wiira akawerya otthariha dhawaatikhiwa dha mbiibiliyani dhinromoliwa vamodha ni nyuwo. Ohiya-vo, munkhalihere ntthu owo otthariha mwaha onlottiwa aahiidho eliivuru enthokoreriwa.

MUN’YA ONKHALIHERA DHAI NTTHU OPACENRE ONSOMA BIIBILIYA?

11. Mun’ya woonihera dhai wiira munnittittimiha okathi wa naskola nnyu?

¹¹ Eseeni ninreerela nhu wuupuwelela okathi nimpacera nhu onsomiha ntthu Biibiliya? Moonihere wiira munnittittimiha okathi wa naskola nnyu ni itthu ontthuna iye ovara. Mwa ntakihero, mwaiwanana ewoora yoosoma nuuwo, mpeherye, nhaana opaka elo moohixikha akhala wiira atthu a nttetthe nnyu akhalana yoolema ya waatarasari. Ohiya-vo, woonawene pooti okhala etthu yooreera nihiku mumpaceriha nnyu yoosoma oviriha okathi vakhaani. Anamalaleerya arina dhawiiraneya dhawaatta, alontte wiira ti vooreera omaliha yoosoma mwawaakuveya, hata ntthu owo alottaka wiira nivikanihe. Nxake olotta vawatta. Masi munhiye ntthu alotte mootaphuwa.—Mir. 10:19.

12. Yoolakela nhu ekhale evi vaavo nimpaceriha nhu yoosoma ya Biibiliya?

¹² Okathi mumpacera nnyu onsomiha, yoolakela nnyu yuulupale okhale onkhalihera naskola nnyu ondhuwela Yehova ni Yeesu ni wunnuwihera waapheta awo. Enamuna emodha nkhanle nnyu opaka elo, ori waakhalihera anaskola nnyu munrumeelaka Biibiliya, ohiya orumeela odhuwela winyu. (Mit. 10:25, 26) Nrummwa Paaulu oovaha ntakihero nooreera. Okathi owo aahudhiha iye atthu, aalotta wiira Yeesu aahuura valaponi wiira anikhalihere ondhuwela Yehova ni opacera ompheta. (1 aKor. 2:1, 2) Ohiya-vo, Paaulu ohoonihera wiira tivootthuneya waakhalihera anaskola wunnuwihera mikhalelo dhooreera dheidho dhinlikanyihiwa ni ewooru, eparatha ni maluku awaarya. (1 aKor. 3:11-15) Mikhalelo idho, dhinhela mpuwa waamini, akhili, odhuwela ni omoova Yehova. (Esal. 19:9, 10; Mir. 3:13-15; 1 Ped. 1:7) Tivondho ntthare enamuna Paaulu aahudhiha iye wiira mwaakhalihere anaskola nnyu a Biibiliya okhalana waamini woolipa ni waataana wooloka ni Tiithi-ya oopheta a wiirimu.—2 aKor. 1:24.

13. Nin’ya woonihera dhai opisa nrima ni wiiwasasa vaavo nininkhalihera nhu naskola nhu a Biibiliya? (2 aKorinto 10:4, 5) (Moone-tho efootu.)

¹³ Okathi munhudhiha nnyu muntakihe Yeesu, nkhalaka oopisa nrima ni awiiwasasa. Nxake ompakela makoho ntthu, akhanle omwiiriha wuuliwa muru. Akhala wiira naskola nnyu onninlipherya waakhulela aahiidho wiiwasasa etthu emodha, ntuphe epontu elo ni ntthikele olotta voohima dha mwaha owo okathi nkina. Ohiya onkhanyerera naskola nnyu waakhulela yoohudhiha emodha ya mbiibiliyani, munvahe okathi wiira ekhweeli yinnuwe vanrimani-ve. (Yohani 16:12; aKol. 2:6, 7) Biibiliya onnilikanyiha dhoohudhiha dhawootha ni ‘itthu dhoolipa’ dheidho nintthuneya nhu ‘opwesa.’ Mbiibiliyani nuulumo na ekereku nirumeeliwe nva, nintaphulela empa yoolipa yeelo entthuneya opwesiwa. (Munsome 2 aKorinto 10:4, 5.) Woonawene pooti onliperya naskola a Biibiliya ohiya mwawaakuveya dhookhupali-dhe dha khalai. Tivondho woopacerani nhaana onkhalihera naskola nnyu oteka empa yoolipa, niire dho, onkhalihera onroromela Yehova. Mwapaka elo, nnoonkhalihera naskola nnyu ohiya mwawaakuveya dhookhupali-dhe dha khalai ni ompaka Yehova okhala Ntthawelo-ne.—Esal. 91:9.

MUN’YA ONKHALIHERA DHAI NTTHU OPACENRE OREELA MITHUKUMANO?

14. Naathokorerya dhai ale apacenre oreela mithukumano dhihu?

¹⁴ Yehova ontthuna wiira nihaathanye atthu masi naathokorerye atthu ootheene moopheta ni mooreera nrima, moohixikha yoolema ya elapo-ya, makhalelo-ya ni akhala wiira amasikhini aahiidho oothaaciri. (Yak. 2:1-4, 9) Ndho, nin’ya woonihera dhai wiira ninnaapheta ale apacenre oreela mithukumano dhihu?

15-16. Eseeni ninreerela nhu opaka wiira niwiirihe ale anreela woona mithukumano dhihu woona wiira ahaakheliwa saana?

¹⁵ Atthu akina annireela woona mithukumano dhihu wiira yoone etthu nimpaka nhu aahiidho okhala wiira aroolaleiwa ni ntthu mmodha a muloko nkina. Vaavo mummoona nnyu ntthu mpheya Empa ya Omwene, nvaanele nuuwo ni mmwaakhele moohakalala. Masi nxake opaka elo mwa enamuna ekhanle omwiiriha ohikhala saana. Nyuwo pooti okilaathi vamodha nuuwo, onrumeela Biibiliya ni iliivuru dhinyu, aahiidho onvaha iliivuru-dhe. Ohiya-vo, mwaadhye inamuna dhikina nkhanle nnyu opaka wiira mmwiirihe ntthu owo okhala ootaphuwa. Moone yawiiraneya ya nlopwana mmodha aareenle woona mithukumano dhihu Empa ya Omwene evaara yoopacera. Nlopwana owo aahinleela munna aamwaakhenle wiira aanuuliwa muru mwaha wa ikuwo aawanre iye. Munna ole aahinkhalihera nlopwana ole okhala ootaphuwa anleelaka wiira hata niwaraka saana okathi nin’ya nhu onthukumanoni, hiyo Anamoona Yehova ninoolikana ni atthu ootheene. Nuuvira okathi, nlopwana ole aahirowa vahoolo, apatisiwa. Masi nlelo owo khaliyanle moolumo aalontte munna aamwaakhanle. Tivondho okathi ninlotta nhu ni ntthu onnisekurya dhihinatthi aahiidho nuumala mithukumano, nihaana woonihera wiira ninnithokorerya saana, masi nihilotte miyaha dha omwaneene.—1 Ped. 4:15.

¹⁶ Nitho yookhala enamuna ekina ninreerela nhu opaka wiira ale anreela mithukumano dhihu ekhale ootaphuwa. Okathi munvaanela nnyu, ovaha ikomentaariyu aahiidho opaka mphantta nkina mmulokoni, onvekela olotta voohima dha atthu ahininrumeela Yehova, mpake elo mwa nttittimiho. Nxake olotta moolumo aahiidho opaka etthu ekhanle omwiiriha ntthu woona onananara ni ohitthuna-tho otthikela woona mithukumano dhihu. (Tito 2:8; 3:2) Mwa ntakihero, nihaana oxaka olotta voonanara dhookhupali dha atthu akina. (2 aKor. 6:3) Nitho anna onlotta miyaha anroiheliwa atthu ootheene, ahaana okhalana ephoole voohima dha mwaha ola. Awo annoonihera waathokorerya atthu, ethokiheraka moolumo aahiidho itthu woonawene ale anisekurya ahindhuwela awa.

17. Eseeni ninreerela nhu opaka vaavo ninaaphwanya nhu atthu ‘arina nrima wooloka wiira ephwanye ekumi yoohimala’?

¹⁷ Khuta nihiku, nteko wa waapaka ahudheri onootepa otthuneya ovariwa ninvayi. Hiyo khaninhiya owaadhya ‘ootheene ale arina nrima wooloka wiira yaakhele ekumi yoohimala.’ (Mit. 13:48) Tivondho vaavo nimpaka nhu elo, nihoovelele waavaha dhoosoma dha Biibiliya atthu ninaalaleerya nhu ni waalaleya woona mithukumano dhihu. Napaka elo, ninawaakhalihera opacera weetta ‘ephuro emphwanyiha ekumi.’—Math. 7:14.