Malifalensi ga Pologalamu ja Utumiki ni Umi Wetu Wachiklistu
SEPETEMBA 1-7
CHIPANJE CHAKUSIMANIKWA M’MALOŴE GA MLUNGU
Akaneje Yijiganyo Soni Miyambo Jakutindana ni Baibulo
CHISANGALALO—Jili Ndamo Jakusatupa Mlungu
Chindu chine champaka chitukamuchisye konjechesya chisangalalo chetu, chili kulimbichila pakumtumichila Yehofa. (Sal. 35:27; 112:1) Ligongo chichi? Ligongo lyakuti twapanganyidwe kuti ‘tumjogopeje Mlungu, soni tusunjeje malamusi gakwe. Pakuŵa yeleyi ni yakusosekwa kutenda ŵandu wosope.’ (Mlal. 12:13) Kuŵecheta kwine, m’weji twapanganyidwe kuti tutendeje lisosa lya Mlungu. M’yoyo patukutumichila Yehofa, tukusakola chisangalalo chisyesyene paumi wetu.
Yisyesyene Yakwe Yakwamba Ŵandu Ŵawe
13 Naga ngakumanyilila chenene pakwamba ya msyungu winewakwe kuti naga uli wangakamulana ni Malemba, amŵende Yehofa kuti ŵape lunda. (Aŵalanje Yakobo 1:5.) Kaneko, awungunye mu mabuku getu. Naga kuli kwakomboleka, ŵawusye achakulungwa ŵa mumpingo. Ngaŵa kuti chachasalila yakusosekwa kutenda, nambo chachakamuchisya kupata yiwundo ya m’Baibulo. Yine mwa yiwundoyi ayisasile munganiji. Pakulinga kutenda yeleyi, yikusaŵa kuti akwiganya “machili gawo gakumanyilila” soni machiliga gachakamuchisya ‘kulekanganya chambone ni chakusakala’.—Aheb. 5:14
“Une Chinjijenda mu Usyesyene Wawo”
12 Ndamo nambosoni yitendo yangamchimbichisya Mlungu. Ŵandu ŵamwiŵasa mwetu, achimjetu ŵakumasengo, soni achimjetu ŵakusukulu mpaka atukanganichisyeje kuti tutendeje nawo yindimba mpela kusangalalila lisiku lyakupagwa soni maholide. Ana mpaka tuŵambale chamtuli misyungu soni maholide gangamchimbichisya Yehofa? Mpaka tutende yeleyi mwakwendelechela kuyiwona yindu yeleyi mwakusayiwonela Yehofa. Kulolasoni ngani m’mabuku getu syaŵasilembile syakusala kukwatyochele yindu yeleyi mpaka kutukamuchisye. Patulikumbwisye magongo ga m’Malemba gagakusatutendekasya kuti tukatendaga nawo yindimba yeleyi, tukusaŵa ŵakusimichisya kuti tukwenda palitala ‘lyakusalijitichisya Ambuje.’ (Aef. 5:10) Kumjegamila Yehofa soni Maloŵe gakwe ga usyesyene kuchitukamuchisya kuti tuŵambale “kogopa ŵandu.”—Mis. 29:25.
Mfundo syakamuchisya
“Tunonyelaneje Yisyesyene mu Yitendo Yetu”
11 Twayamichileje abale ŵetu kutyochela pasi pamtima. Ŵane patesile yambone twayamichileje, ligongo maloŵe gakuyamichila gali “gakulimbikasya.” (Aef. 4:29) Nambotu twayamichileje kutyochela pasi pamtima. Ngam’yamichila mundu kutyochela pasi pamtima nikuti tukumlambusya. Mtima welewu mpaka utulepelekasye kumkamuchisya mundu kuti ajongolele yineyakwe naga pakusosechela. (Miy. 29:5) Kum’yamichila mundu pangope nambo kumbali ni kum’nyosyaga chili chinyengo chelecho. Ndumetume Paulo jwatupele chisyasyo chambone pangani ja kuyamichila. Kuyamichila kwakwe kwalosyaga chinonyelo chisyesyene. Mwambone, Paulo ŵayamichile Aklistu ŵa ku Kolinto kutyochela pasi pamtima pa yambone yaŵatendaga. (1 Akoli. 11:2) Nambo pa yindu yaŵalemwesyaga, ŵajamukaga mwachinonyelo.—1 Akoli. 11:20-22.
SEPETEMBA 8-14
CHIPANJE CHAKUSIMANIKWA M’MALOŴE GA MLUNGU
“Akamba Une Usawuchi Kapena Chipanje”
Ana Chinonyelo Chachikusayikasya Kusangalala Kusyesyene Chili Chamti Uli?
10 Yili yisyene kuti mbiya sili syakusosekwa. Sikusatukamuchisya nditu. (Mlal. 7:12) Nambo ana mundu mpaka aŵe jwakusangalala yisyene ali akwetepe yindu yakusosekwa paumi? Kwabasi! (Aŵalanje Mlaliki 5:12.) Aguli mwanache jwa Yake jwalembile kuti, “Akasamba une usawuchi kapena chipanje. Nambo agambeje kumba chakulya changusosechela.” Wosopewe mpaka tupikanichisye ligongo lyakwe Solomoni nganasakaga kuti aŵe jwakulaga mnope. Jwalakwe jwasasile kuti usawuchi ukamtendekasisye kutanda kwiŵa ni kulisakasya lina lya Mlungu. Nambi ligongo chichi ŵapopesile kuti akampa chipanje? Jwalakwe jwalembile kuti, “Kuti ngajikuta mnope ni kwakana ŵalakwe kuti, ‘Yehofa ali ŵanisoni?’” (Miy. 30:8, 9) Mwine mpaka tuganichisyesoni ya ŵandu ŵane ŵakusaŵika nganisyo syawo syosope pa chipanje ngaŵaga Mlungu.
11 Ŵandu ŵakusanonyela mnope mbiya yikusaŵa yakusawusya kumsangalasya Mlungu. Yesu jwasasile kuti, “Kapolo ngaŵa mkutumichila achambuje ŵaŵili, pakuŵa chachiŵengana ni jumo ni kumnonyela jwinejo, kapena chachiŵa jwakulupichika kwa jumo ni kumnyosya jwinejo. Nganaŵa akombwele kumtumichila Mlungu soni Chipanje pandaŵi jimo.” Nambo mkanasale yeleyi jwatite, “Aleche kuliwunjichila chipanje pachilambo chapasi, pele yijosolo ni mkuwo mpaka yijonanje, nambosoni pele ŵawiyi mpaka aposokole ni kwiŵa. Nambo awunjicheje chipanje chawo kwinani, kwele yijosolo ni mkuwo nganiyiŵa yijonasile, kwelesoni ŵawiyi nganaŵa aposokwele ni kwiŵa.”—Mat. 6:19, 20, 24.
12 Ŵandu ŵajinji ayiweni kuti kutama ni umi wangasaka yejinji ngakukusagamba kumtendekasya mundu kuŵa jwakusangalalape, nambo kukusakamuchisyasoni kuti umtumichileje Yehofa mwakutamilichika. Jack, jwakusatamaga ku United States, jwasumisye nyumba soni kampani jakwe pakumanyilila kuti kutenda yeleyi chikumkamuchisye kuti akombole kutenda upayiniya yalumo ni ŵamkwakwe. Jwalakwe jwatite, “Kwaliji kwakusawusya kusumisya nyumba jakusalala soni malo getu gambone. Kwa yaka yejinji munyumamo, naŵaga jwakutenguka ligongo lya yakusawusya yakumasengo. Nambo ŵamkwangu ŵali mpayiniya jwakutamilichika, ndaŵi syosope ŵaŵaga ŵakusangalala. Mwamti ŵatiga, ‘Une ngwete bwana jwambone mnope!’ Pakuŵa apanopano ndili mpayiniya, nombene ngumalila ndaŵi jejinji kutumichila bwana jujojo, jwali Yehofa.”
w17 05 26 ¶15-17
“Ana Mkusanonyela Une Kupunda Ayi?”
15 Ŵandu ŵajinji masiku agano akwete mtima wakusachilila kola yindu yapenani, mpela yakuwala yakudula, mafoni ni yine yejinji. M’yoyo, Mklistu jwalijose akusosekwa kuliwungunya mwakuliwusya yiwusyo mpela ayi, ‘Ana ngusayiwona yindu yakuchilu kuŵa yakusosekwa mnope mwamti ngusamalila ndaŵi jejinji ndili mkuwungunya ya magalimoto soni yakuwala yasambano kulekangana ni ndaŵi jangusakosechela misongano jampingo? Ana ndandite kuganichisya mnope ya umi wangu wa lisiku ni lisiku mwamti ngusamalila ndaŵi jamnono pakupopela soni kuŵalanga Baibulo?’ Naga tuyiweni kuti tutandite kunonyela mnope yindu yakuchilu kupunda Klistu, tukusosekwa kuganichisya maloŵe ga Yesu gakuti, “Mkalamuche ni kumbila mnope kwa mtundu wuliwonse.” (Luk. 12:15) Ligongo chichi Yesu ŵasasile chikalamusyo chelechi?
16 Yesu ŵaŵechete kuti “kapolo ngaŵa mkutumichila achambuje ŵaŵili.” Jwalakwe ŵajonjechesye kuti, “Nganaŵa akombwele kumtumichila Mlungu soni Chipanje pandaŵi jimo.” Yeleyi yili m’yoyo ligongo lyakuti ‘achambuje’ wosopewo chachisaka kuti tulipelecheje mnope kwa jemanjajo. M’yoyo, ‘tuchiŵengana ni jumo ni kumnonyela jwinejo’ kapena ‘tuchiŵa jwakulupichika kwa jumo ni kumnyosya jwinejo.’ (Mat. 6:24) Mpela ŵandu ŵangali umlama, wosope tukusasosekwa kulimbana ni “yakumbila yetu ya chilu” yayikupwatikapo kunonyela yindu yakuchilu.—Aef. 2:3.
17 Ŵandu ŵajinji akusaŵika nganisyo syawo pa kupata yakumbila yawo mwamti yikusiyasawusya kola nganisyo syakuŵajilwa pa ngani ja yindu yakuchilu. (Aŵalanje 1 Akolinto 2:14.) Akusalepela kulekanganya chakusakala ni chambone ligongo lyakuti ngakusaganisya chenene. (Ahe. 5:11-14) Yakuyichisya yakwe, ŵajinji akusasachilila mnope yindu yakuchilu, nambo ngakusajikutila nayo. (Mlal. 5:10) Nambo, kuŵalanga Maloŵe ga Mlungu mwakutamilichika mpaka kutukamuchisye kuŵambala kumbila mnope yindu yakuchilu. (1 Pet. 2:2) Kuganichisya ya Yehofa kwamkamuchisye Yesu kuŵambala yakulingwa. Mwakulandanamo, kukuya songa sya m’Baibulo mpaka kutukamuchisye kuti tulimbane ni kumbila yindu yakuchilu. (Mat. 4:8-10) Patukutenda yeleyi, tukusamlosya Yesu kuti tukusamnonyela mnope kupundana ni yindu yakuchilu.
w11 6/1 10 ¶4
Ana Mpaka Yikomboleche Uli Kukamulichisya Masengo Mbiya Syatukwete Mwalunda?
Asunjeje mbiya sine panandi. Atamose kuti mpaka yiwoneche kuŵa yachikala kusunga mbiya panandi mkanitusume yindu yine, nambo mpaka yiŵe yakamuchisya pandaŵi jakusawusya. Kutenda yeleyi kukusakamuchisya ŵandu kuŵambala ngongole. Yikusakamuchisyasoni kuti tukasumaga yindu pangongole yampaka yisosekwe kupeleka mbiya jine jakonjechesya pachindu chilichose chatusumile. Baibulo jikusalosya kuti mbamba sili ‘syalunda’ ligongo sikusasunga “yakulya mundaŵi jakutyosya yindu yakumigunda” ni chakulinga chakuti sikamulichisye masengo msogolo.—Misyungu 6:6-8; 30:24, 25.
Yampaka Tutende Kuti Tupitilisye Kuŵa Achalendo ŵa Yehofa
18 Jwalijose mpaka atende chenene kuganichisya mwakusasiwonela mbiya. Akusosekwa kuliwusya kuti, ‘Ana ngusatamila kuganichisya ya mbiya nambosoni yindu yampaka sume? Ana panjasime mbiya, ngusachelewa kuwusya paganisya kuti mundu jwanamjasimejo ngakusisaka? Ana kola mbiya kukusandendekasya kuliwona kuŵa mundu jwakusosekwa mnope, nambo nikulepelaga kwakamuchisya ŵandu ŵane? Ana ngusinawona abale ni alongo ŵane kuti ali ŵakunonyela yindu yakuchilu ligongo lyakuti akwete mbiya? Ana ngusakamulana mnope ni ŵandu ŵakwete mbiya ni kwaŵambalaga ŵandu ŵakulaga?’ Yili yakusosekwa mnope kuliwusya yiwusyo yeleyi ligongo lyakuti tukwete upile wakuŵa achalendo mu chitenti cha Yehofa. Myoyo, naga tukusaka kupitilisya kuŵa achalendo mu chitenti cha Yehofa, tukusosekwa kuŵambala kusinonyela mnope mbiya. Naga tukutenda yeleyo, Yehofa ngasatuleka.—Aŵalanje Ahebeli 13:5.
Mfundo Syakamuchisya
w09 4/15 17 ¶12-13
Yachilengedwe Yikusalosya Lunda lwa Yehofa
12 Ana mpaka tulijiganye chichi kutyochela ku njechele? Chandanda, kanyamaka kakusatenda yindu mwakusamala kuti kalichenjele kwa adani. Kakusakamulichisya masengo meso gakwe gagakusalola adani ali pakutalichila, nambosoni kakusatama chiŵandika ni lisimbo lyakwe ni chakulinga chakuti katilileko pakusaka kulupusya umi wakwe. Mwakulandana ni kanyamaka, m’wejisoni tukusasosekwa kuŵa mesope mwausimu kuti tulikulupusye ku yindu yakogoya m’chilambo cha Satanachi. Ndumetume Petulo jwakalamwisye Aklistu kuti: “Mŵeje ŵaganisya chenene, soni mŵeje mesope. Satana, jwali mdani jwenu, akwendajenda aku nakuku mpela lisimba lyakutongola, kupita mchisosasosa jwakuti amlye.” (1 Pet. 5:8) Yesu pajwaliji pachilambo chapasi jwapitilisye kuŵa mesope, kuti aŵambale yakulingwa yakutyochela kwa Satana yayikamtendekasisye kuti akaŵa jwakulupichika. (Mat. 4:1-11) Kusala yisyene Yesu jwapeleche chisyasyo chambone kwa ŵakumkuya ŵakwe.
13 Litala limo lyampaka tulosye kuti tuli mesope lili kukamulichisya masengo yindu yausimu yele Yehofa ŵatupele kuti yituteteyeje. Tukusosekwa kuŵalangaga Maloŵe ga Mlungu soni kusimanikwa pamisongano ja Chiklistu ndaŵi syosope. (Luka 4:4; Ahe. 10:24, 25) Nambosoni mwakulandana ni njechele syele sikusakula chenene ligongo lyakutama pagulu, tukusasosekwa kutama pampepe ni Aklistu achimjetu ni chakulinga chakuti “tulimbikasyaneje” jwine ni mjakwe. (Alo. 1:12) Naga tukukamulichisya masengo chiteteyo chakusapeleka Yehofa, tukusalosya kuti tukukamulana ni yajwalembile jwamasalimo Daudi kuti, “[Yehofa] ali ŵakusunga, ni ŵakunjinjilichisya ŵangu, ali ŵakungulupusya, Mlungu jwangu, ni lwala lwangu kungusatilila une, mwa ŵelewo une ndili mu mtendele.”—Sal. 18:2.
KULIPELEKA MU UTUMIKI WA MUMGUNDA
ijwbq ngani na. 102
Ana Kuchesa Juga Kuli Kulemwa?
Yajikusasala Baibulo
Atamose kuti Baibulo jangasalaga yejinji pangani jakuchesa juga, nambope mfundo sya m’Baibulo mpaka situkamuchisye kumanyilila kuti Mlungu akusakuwona kuchesa juga kuŵa kulemwa.—Aefeso 5:17.
Ŵandu akusachesa juga ligongo lyaumbombo, wele Mlungu akusaŵengana nawo. (1 Akolinto 6:9, 10; Aefeso 5:3, 5) Ŵandu ŵakusachesa juga akusajembecheya kuti chapate mbiya kutyochela kwa ŵandu ŵalusile yindu yawo. Nambo Baibulo jikusalekasya kukumbila katundu jwa ŵandu ŵane.—Ekisodo 20:17; Aloma 7:7; 13:9, 10.
Kuchesa juga atamose panandi, mpaka kumtendekasye mundu kutanda kunonyela mnope mbiya.—1 Timoteyo 6:9, 10.
Ndaŵi syejinji ŵandu ŵakusachesa juga akusakulupilila yamasenga kapena yaupile. Myoyo, Mlungu akusayiwona yindu yeleyi kuŵa mpela kukulupilila milungu jakusepa, yayili yakutindana ni kulambila kwakwe.—Yesaya 65:11.
Baibulo jikusatulimbikasya kuti tukamuleje masengo mwakulimbichila mmalo mwakudalila kupata yindu yakuti nganitukamulilapo masengo. (Jwakulalichila 2:24; Aefeso 4:28) Ŵandu ŵakusakuya malangiso ga m’Baibulo mpaka “alyeje yakulya yayipatile panyuma pakukamula masengo.”—2 Atesalonika 3:10, 12.
Juga mpaka jitandikasye ukangani, wawuli msimu wele Baibulo jikusalekasya.—Agalatiya 5:26.
SEPETEMBA 15-21
CHIPANJE CHAKUSIMANIKWA M’MALOŴE GA MLUNGU
Yatukulijiganya pa Malangiso Gaŵapeleche Nangolo
w11 2/1 19 ¶7-8
Ŵajiganyeje Ŵanache Ŵawo Ndamo Syambone
Ŵasalileje yosope yakwayana ni gonana. Kwakalamusya ŵanache pangani syagonana kuli kwakusosekwa mnope. (1 Akolinto 6:18; Yakobo 1:14, 15) Nambope, Baibulo jukusasala kuti kugonana uli mtuka wakutyochela kwa Mlungu, ngaŵa mpela chitega cha Satana. (Misyungu 5:18, 19; Nyimbo ja Solomo 1:2) Myoyo kwasalila ŵanache ŵetu ŵachinyamata yakusakalape pangani jagonana mpaka kwatendekasyeje kuganisya mwakulemwecheka panganiji soni mwangakamulana ni Malemba. Msikana jwine jwa ku France lina lyakwe Corrina jwatite “Achinangolo ŵangu ŵanonyelaga kusalila yakusakalape kwa gonana, myoyo yeleyi yandendekasisye kuganisya kuti gonana kuli kwakusakala ndaŵi syosyope.”
Alolechesyeje kuti ŵanache ŵawo ŵasalile mbali syosope syakwayana ni yagonana. Jwamkongwe jwine jwa ku Mexico, lina lyakwe Nadia jwasasile kuti “Pangukambilana ni ŵanache ŵangu ngani syakwayana ni yagonana, ndaŵi syosyope ngusinasalila kuti gonana kuli kwambone ligongo ni mwaŵatupanganyichisye. Yehofa Mlungu ni jwaŵalinganyisye kuti ŵandu agonaneje nambosoni kuti asangalaleje. Nambope ngusinasalila kuti ŵandu ŵalombanepe ni ŵakusasosekwa kuti agonaneje. Myoyo mundu mpaka asangalaleje naga akukuya dongosolo ja Yehofa panganiji, nambosoni mpaka asimane ni yakusawusya naga nganakuya dongosoloji.”
ijwhf ngani na. 4 ¶11-13
Ŵakamuchisyeje Ŵanache Ŵawo pa Ngani ja Ukana
Atandisyeje wawojo kukambilana nganiji. Jwamlume jwine jwa ku Britain lina lyakwe Mark jwasasile kuti: “Ukana ukusiwasokonasya mnope ŵanache. Lisiku line namwusisye mwanache jwangu jwamlume jwayaka 8 kuti asale nganisyo syakwe naga kumwa ukana kuli kwambone kapena iyayi. Naŵechetanaga najo mwagopoka, yeleyi yakamuchisye kuti asale nganisyo syakwe mwagopoka pangani ja ukana.”
Naga akusanonyela kukambilana kaŵilikaŵili yakogoya kwakumwa mnope ukana, yichakamuchisya ŵanache ŵawo kujipikanichisya chenene nganiji. Myoyo pakujigalila msingu wa mwanache jwawo, pakukambilana ngani syakogoya kwa ukana apwatichejeposoni ngani mpela sya mwampaka aŵambalile ngosi syapamsewu nambosoni ngani syakwayana ni yagonana.
Aŵeje chisyasyo chambone. Ŵanache ali mpela litonji. Naga liŵichidwe mmesi, chinga geswela kapena geŵilile, likusajigalila mtundu wa mesigo. Mwamti ŵakuwungunya apatile kuti ŵanache akusajigalila mnope yindu yele achinangolo ŵawo akusanonyela kutenda. Yeleyi yikugopolela kuti naga akusawuwona ukana kuŵa litala lyambone lyakunandiyila yakusawusya yakusimana nayo, nombe mwanache jwawo chachijigalila iyoyo. Myoyo akusosekwa kuti aŵeje chisyasyo chambone. Akusosekwa amweje ukana mwakuŵajilwa.
Ŵajiganyeje Ŵanache Ndamo Jakulinandiya
Amjiganyeje kwakamuchisya ŵane. Amkamuchisyeje mwanache jwawo kumanyilila kuti “kupeleka kukusamtendekasya mundu kuŵa jwakusangalala kulekangana ni kupochela.” (Masengo 20:35) Ana mpaka atende yeleyi mwamti uli? Mpaka asagule ŵandu ŵane ŵakusosekwa chikamuchisyo mpela kwasumila yindu, kajende soni kwalinganyila chindu chine chakwe ali yalumo ni mwanache jwawo. Kaneko, amjigaleje mwanachejo pakwawula kwa ŵanduwo kuti akakamuchisye. Mwanache jwawo pakwawona wawojo ali mkusangalala soni kuŵa ŵakwikutila ligongo lyakwakamuchisya ŵane, mpaka yimkamuchisyesoni kulijiganya chenene ndamo jakulinandiya.—Lilemba lyakamuchisya: Luka 6:38.
Mfundo Syakamuchisya
Yampaka Atende Achalume Pakwachimbichisya Achiŵamkwawo
7 Ŵayamichileje. Jwamlume jwakusiŵachimbichisya ŵamkwakwe akusaŵecheta maloŵe gakwalimbikasya. Akusatenda yeleyi mwakwayamichila ŵamkwakwewo pa yosope yakusatendaga pakwakamuchisya ŵalumewo. (Akolo. 3:15) Jwamkongwe akusasangalalaga naga ŵamkwakwe akusamlapilila. Mwamti akusalipikana kuti ali jwakuteteyeka, akunonyeledwa soni akupochela uchimbichimbi.—Mis. 31:28.
SEPETEMBA 22-28
CHIPANJE CHAKUSIMANIKWA M’MALOŴE GA MLUNGU
Apitilisye Kuwujiganya M’bado Wakuyichisya
“[Yindu] Yeleyi Mwajiganyeje Achalume Ŵakulupichika”
3 Ŵajinjiwe tukusaganonyela masengo gatukusatenda soni tukusasaka tuli mkwendelechelape kugatenda mpaka kalakala. Nambo chakutesya chanasa chili chakuti, kutandila ndaŵi ja Adamu, ŵandu akusakalambala ni kutanda kulepela kutenda yindu yaŵatendaga ali ŵachinyamata. (Mlal. 1:4) Yeleyi yitendekasisye kuti paŵe yakusawusya yine pasikati pa Aklistu ŵasyesyene. Mwambone, apanopano masengo gakulalichila gakusile mnope, soni likuga lya Yehofa likukamulichisya masengo matala gasambano kuti lyayichile ŵandu ŵajinji ni ngani syambone. Nambo ndaŵi sine yikuŵaga yakusawusya kuti ŵachikulile ŵane alijiganye kamulichisya masengo matala gasambanoga. (Luk. 5:39) Konjechesya pelepa, ŵachikulile akusakola machili gamnono kulekangana ni ŵachinyamata. (Miy. 20:29) M’yoyo, yili yakusosekwa mnope kuti ŵachikulile ŵajiganye ŵachinyamata kuti chaŵajilwe kupochela maukumu gekulungwakulungwa.—Aŵalanje Salimo 71:18
4 Abale ŵakwete maukumu mpaka yasawusye kuti apeleche maukumu gane kwa ŵachinyamata. Ŵane akusajogopa kuti chatyoche pa ukumu waŵawunonyelaga mnope. Ŵane akusaganisya kuti naga akwalechela ŵachinyamata kuti alongoleleje nganaŵa atesile chenene masengogo. Ŵanesoni akusaliwona kuti nganakola ndaŵi jakumjiganyila jwine. Pandaŵi jakulandanajo, ŵachinyamata akusosekwa kuŵa ŵakuwusimana mtima pangakupochela maukumu gane.
Mfundo Syakamuchisya
Ŵachinyamatamwe, Mkupanganya Jwenu Akusasaka Kuti Msangalaleje
14 Solomo juŵaliji jwamsichile soni jwamachili kupunda mundu jwalijose pachilambopa, jwalinjile kutenda yeleyi. Jwalakwe jwalembile kuti, “Linje yakulinonyelesya, nalisangalasye namsyene.” (Jwak. 2:1-10) Jwalakwe jwataŵile nyumba, jwapanganyisye migunda ja maluŵa, soni jwakwete chilichose chaŵachisakaga paumi wakwe. Ana kaneko jwalipikene uli mumtima? Ana jwaliji jwakusangalala soni jwajikutile? Kwanga kwa yiwusyo yeleyi ngatukusosekwa kulaga kuganichisya. Solomo msyenejo jwalembile kuti, “Sambano natandite kuyiganichisya yosope yinatesile . . . , nayiweni kuti yosope yeneyo yangali mate . . . Pangali chindu chakuti mundu ni kupindula nacho.” (Jwak. 2:11) Ana mpaka mlijiganye kanekakwe kutyochela pa yaŵawungunyisye Solomoyi?
SEPETEMBA 29–OKOTOBA 5
CHIPANJE CHAKUSIMANIKWA M’MALOŴE GA MLUNGU
Alimbisyeje Ulombela Wawo
ijwhf ngani na. 10 ¶2-8
Tukakunda Kuti Yipangiso Yamakono Yitusokonasye Paumi Wetu
● Kamulichisya masengo yipangiso yamakono mwalunda, mpaka kulimbisye ulombela wawo. Mwachisyasyo, ŵalombane ŵane akusakamulichisya masengo yipangiso yamakono pakuŵechetana naga mjawo atalichile.
Jonathan jwaŵechete kuti, “Kautenga kakuti ngusinamnonyela kapena nguganisya ya m’mwejo, kakusandendekasya kulipikana kuti ŵamkwangu akusanonyela.”
● Kamulichisya masengo yipangiso yamakono mwangali lunda mpaka kujonanje ulombela wawo. Mwachisyasyo, ŵandu ŵane akusamalila ndaŵi jejinji pakukamulichisya masengo yipangiso yamakono mmalo mwakunguluka ni ŵamkwawo.
Julissa jwaŵechete kuti, “Ngukumbuchila kuti ndaŵi sine ŵamkwangu ŵasakaga kuti akungulucheje ni une nambo nganiyikombolekaga ligongo lyakuti namalilaga ndaŵi syejinji ndili mkukunguluka pa foni.”
● Ŵandu ŵane akusasala kuti mpaka akambilaneje ni ŵamkwawo yindu yakusosekwa pandaŵi jijojosoni ali mkukamulichisya masengo yipangiso yamakono. Nambo mundu jwine jwamlijiganye ya ndamo ja ŵandu lina lyakwe Sherry Turkle jwasasile kuti “yili yangakomboleka kutendaga yindu yingapo pandaŵi jimo.” Atamose kuti ŵandu akusaganisya yeleyi, nambo yisyesyene yakwe yili yakuti nganiŵa yikomboleche. Jwalakwe jwasasilesoni kuti, “Naga tukutenda yindu yejinji pandaŵi jimo nganituŵa tuyitesile chenene.”
Sarah jwatite, “Ŵamkwangu pakukunguluka ni une ngusaŵa jwakusangalala kulekangana ni kuti atendejesoni yindu yine pa ndaŵi mpela jeleji. Naga ŵamkwangu akutenda yindu yine pa ndaŵi jatukunguluka, yikusaŵa mpela akusalila kuti chindu chakusosekwa mnope kwa ŵelewo chili chipangiso chamakonocho ngaŵaga unejo.”
Mfundo jakusosekwa mnope: Mwakusatendela pakamulichisya masengo yipangiso yamakono, mpaka yilimbisye ulombela wawo kapena kusokonasya.
Atendeje Yakuti “Lilamba Lya Ya” Likasima mu Ulombela Mwawo
12 Ana ŵalombane mpaka alijiganye chichi kwa Akula ni Pulisika? Aganichisye ya yindu yakusasosekwa kutenda wawojo soni ŵamkwawo. Ana nganaŵa alinganyisye yakutendela yalumo ni ŵamkwawo yindu yeleyo mmalo mwakuyitenda jikape? Mwachisyasyo, Akula ni Pulisika ŵalalichilaga yalumo. Ana akusalinganya yakuti alalichileje yalumo mpela muŵatendelaga jemanjaji? Akula ni Pulisika ŵakamulagasoni masengo yalumo. Mwine wawojo ni ŵamkwawo ngakusakamula masengo gakulandana, nambo mpaka alinganye yakuti akamulileje yalumo masengo gakusamalila panyumba. (Jwak. 4:9) Naga akulinganya yakukamulila yalumo masengo mpaka yakamuchisyeje kuti aŵeje ŵakamulana soni kola upile wakuŵechetana. Robert ni Linda atemi mu ulombela kwa yaka yakupunda 50. Jwamlumeju jwatite, “Kusala yisyene nganitukola ndaŵi jejinji jakutendela yindu yakusangalasya. Nambo pangukamusyangana kuchapa mbale ni ŵamkwangu kapena patukamusyangana kulima ngusaŵa jwakusangalala mnope. Kutendela yindu yalumo kukusatukamuchisya kuŵa ŵakamulana soni yeleyi yikusalimbisya chinonyelo chetu.”
13 Nambope akusosekwa kukumbuchila kuti kwamba kuŵa yalumo pajika nganikuŵa kutendekasisye ŵalombane kuŵa ŵakamulana. Jwamkongwe jwine jwa ku Brazil jwatite, “Masiku agano ŵandu tukusatanganidwaga mnope, mwamti mpaka yiŵe yangasawusya kuganisyaga kuti tukupata ndaŵi jakunguluchila yalumo ligongo lyakuti tukusatama m’nyumba jimpepe. Myoyo nayiweni kuti ngusosekwa kutenda yejinji kupunda pakwamba kuŵa yalumo.” Alole yaŵatesile Bruno ni ŵamkwakwe lina lyawo Tays kuti alosyeje kuganichisyana jwine ni mjakwe. Jwamlumeju jwatite, “Patukukunguluka tukusalolechesya kuti tutyosisye mafoni kuti gakatusokonasya.”
14 Nambi uli naga wawojo ni ŵamkwawo ŵangasangalalaga pali yalumo? Komboleka yeleyi mpaka yitendekwe ligongo lyakuti akusanonyela yindu yakulekangana, kapena akusakangala kutandana. Naga mwelemu ni mwayiŵelele ni jemanja, ana mpaka atende uli? Aganichisye ya moto watukusajotaga. Moto pawugambile kupambidwa kwene wangayichila kolela mwamachili. Kuti ukolele mwamachili tukusasosekwa kwisililaga ni sasu syekulungwakulungwa. Mwakulandana ni yeleyi, jemanjasoni mpaka atende chenene kutanda kunguluchilaga yalumo kwakandaŵi kamnono lisiku lililyosye. Alolechesyeje kuti akutenda kane kakwe kampaka kasangalasye ŵamkwawo. Aŵambaleje kutenda yindu yampaka yitandikasye kangana. (Yak. 3:18) Myoyo, mwakutanda mwapanandipanandi mpaka akombole kutandilasoni kunonyelana mnope.
Atendeje Yakuti “Lilamba Lya Ya” Likasima mu Ulombela Mwawo
3 Kuti “lilamba lya Ya” likasima mwiŵasa, ŵalombane akusasosekwa kulimbisya unasi wawo ni Yehofa. Ana kutenda yeleyi mpaka kulimbisye chamtuli ulombela? Naga ŵalombane akusawuwona unasi wawo ni Yehofa kuŵa wakusosekwa mnope yikusaŵa yangasawusya kuti akamulichisyeje masengo malangiso gakusapeleka jwalakwe. Yeleyi yikusiyakamuchisya kuŵambala soni kumalana ni yakusawusya yampaka yitendekasye chinonyelo chawo kunandipa. (Aŵalanje Jwakulalichila 4:12.) Ŵandu ŵali paunasi wambone ni Yehofa akusatenda yiliyose yampaka akombole kuti amsyasyeje jwalakwe. Mwamti akusajigalila ndamo syakusalosya jwalakwe mpela kwatendela ŵane yambone, kwalosya chanasa, soni kwakululuchila. (Aef. 4:32–5:1) Naga ŵalombane akulosya ndamosi yikusaŵa yangasawusya kuti chinonyelo chawo chikule. Mlongo jwine lina lyakwe Lena atemi peŵasa kwa yaka yakupunda 25. Jwalakwe jwatite, “Yikusaŵa yangasawusya kumchimbichisya soni kumnonyela mundu jwakusalipeleka mnope pakumtumichila Yehofa.”
Mfundo Syakamuchisya
Yili Yakomboleka Kutama ni Umi Mpaka Kalakala
7 Yehofa ŵatupanganyisyesoni m’litala lyakuti tusachilileje kutama ni umi mpaka kalakala. Pakwamba ya ŵandu, Baibulo jikusasala kuti Mlungu “ŵapele ŵandu mtima wakusachilila kutama ni umi mpaka kalakala.” (Jwak. 3:11, NWT.) Alitu lili ligongo limo lyalikusatutendekasya kuchiwona chiwa kuŵa mdani jwetu. (1 Akoli. 15:26) Naga tulwasile mnope, ana tukusagamba kutama ni kwembecheyaga kuwa basi? Iyayi. Ndaŵi syosope tukusajawulaga kuchipatala kuti tukapate mtela wampaka utukamuchisye kuti tuŵesoni chenene. Tukusatenda yampaka tukombole pakuliwambasya ku chiwa. Nambosoni naga mundu jwatukusamnonyela awile, chinga ali mwanache kapena jwachikulile yikusatupweteka mnope. (Yoh. 11:32, 33) Myoyo, tukusakola mtima wakusachilila kutama ni umi kwangamala ligongo lyakuti Mlungu jwetu jwatupanganyisye m’litala lyakuti tutameje ni umi mpaka kalakala. Nambotu pana magongo gane gejinji gampaka gatutendekasye kulupilila kuti Mlungu jwatupanganyisye kuti tutameje ni umi mpaka kalakala. Kwende tulole yindu yine yaŵatesile Yehofa kala soni yakutenda masiku agano yayikusalosya kuti nganachenga chakulinga chakwe.
OKOTOBA 6-12
CHIPANJE CHAKUSIMANIKWA M’MALOŴE GA MLUNGU
Ana mpaka Tulosye Chamti uli Kuti Tukusamchimbichisya Mnope Mlungu?
w08 8/15 15-16 ¶17-18
Amchimbichisyeje Yehofa
17 Patukumtumichila Yehofa tukusasosekwa kumpa uchimbichimbi wapadela. Lilemba lya Jwakulalichila 5: 1 likusati “Msamaleje ni yamkutenda pamli ku nyumba ja Mlungu jusyesyene.” Mose ni Yoswa ŵalamulidwe kuti awule sapato syawo pandaŵi jiŵaliji pamalo geswela. (Eks 3:5; Yos 5:15) Jemanjaji ŵasosekwaga kutenda yeleyi pakulosya ulemu. Ayisalayeli ŵaŵaliji ŵambopesi ŵalamulidwaga kuwala makabudula gamkati ni chakulinga “chakuti asiŵeje umakonope wawo.” (Eks 28:42, 43) Yeleyi yakamuchisyaga kuti awaleje mwakuŵajilwa pakutumichila pamalo gakupelechela mbopesi. Mundu jwalijose jwakutyochela mu liŵasa lya ŵakutaga mbopesi ŵasosekwaga kukuya malamusi ga Mlungu gakwamba ya kulichimbichisya.
18 Myoyo patukumtumichila Mlungu tukusasosekwa kulosya uchimbichimbi mu yakutendekwa yosope. Kuti ŵane atuchimbichisyeje tukusasosekwa kulosya kuti tukusitwachimbichisya. Tuŵambaleje ulemu wachinyengo, nambo uŵeje wakutyochela mumtima ligongo lyakuti Mlungu akusalola yayili mumtima. (1 Sam. 16:7; Mis. 21:2) Ndaŵi syosope tukusosekwa tuŵeje ŵaulemu, mu yakutenda yetu, mwatukusatendela yindu ni ŵandu ŵane nambosoni ni mwatukusaliwonela achimsyewe. Kusala yisyene, ndaŵi syosope uchimbichimbi ukusasosekwa kuwonechela mu yindu yatukusaŵecheta soni kutenda. Pakwamba ya ndamo syetu, kawale soni kalisalalisye ketu yikusosekwa yikamulaneje ni yaŵaŵechete ndumetume Paulo kuti, “M’weji ngatukutenda chilichose chakwakuŵasya ŵane, ni chakulinga chakuti ŵandu akawupatila magongo utumiki wetu.” (2 Akoli. 6:3, 4) Mwakutenda yeleyi ‘tukusanonyelesya chijiganyo cha Mkulupusyo jwetu, Mlungu.’—Tit 2:10.
w09 11/15 11 ¶21
Kulijiganya Baibulo Mpaka Kwakamuchisye Kuti Mapopelo Gawo Gaŵeje Gambone
21 Yesu jwapopelaga mwauchimbichimbi soni mwachikulupi. Mwachisyasyo mkanamjimusye Lasalo, Yesu ŵalolite kwinani ni kuŵecheta kuti, “Atati, ngwayamichila ligongo ambikene. Ngumanyilila kuti wawojo akusambikana ndaŵi syosope.’” (Yoh 11:41, 42) Ana mapopelo gawo gakusalosya ulemu soni chikulupi mpela chelechi? Pakuŵalanga chenene lipopelo lyachisyasyo liŵapeleche Yesu, chayiwone kuti likusasala mnopemnope ya kuchimbichikwa kwa lina lya Yehofa, kwika kwa Uchimwene wakwe soni kukwanilichikwa kwa yakusaka yakwe. (Mat. 6:9, 10) Aganichisyesoni yakwamba mapopelo gawo. Ana gakusalosya kuti wawojo akusachilila Uchimwene wa Yehofa, akutenda yakusasaka jwalakwe soni akusasaka kuti lina lyakwe liŵe lyeswela? Mapopelo gawo gakusosekwa galosyeje yeleyi.
Ana Ali Ŵakoseka Kulipeleka kwa Yehofa?
5 Ana mundu mpaka alipeleche chamtuli kwa Yehofa? Akusamsalila Yehofa mwipopelo kuti chachimtumichilaga jwalakwe soni kuti chachiŵikaga yakusasaka Yehofa pamalo gandanda paumi wakwe. Patesile yeleyi yikusaŵa kuti atesile chilanga kwa Yehofa chakuti chachipitilisya kumnonyela jwalakwe ‘ni mtima wawo wosope, ni umi wawo wosope, ni nganisyo syawo syosope soni ni machili gawo gosope.’ (Maliko 12:30) Mundu akusalipeleka kwa Yehofa pali kwajika. Mwakulekangana ni yeleyi, kubatisidwa kukusatendekwa pameso pa ŵandu, kwalosya jemanjajo kuti ŵalipeleche kwa Yehofa. Kulipeleka kwawo chili chilanga chakusosekwa mnope kwa Yehofa. Mwamti Yehofa akusajembecheya kuti wawojo chatendeje yindu mwakamulana ni chilanga chawo.—Jwak. 5:4, 5.
Mfundo Syakamuchisya
Yampaka Tutende Ŵane Patutendele Yangali Chilungamo
1 YESU jwasasile chisyasyo cha jwamkongwe jwamasije jwajwaŵendaga kwa jwakuwelusya kuti amkamuchisye ligongo lyakuti mundu jwine ŵamtendelaga yindu mwangali chilungamo. Ŵakulijiganya ŵa Yesu ŵapikanichisye mwaŵapikanilaga jwamkongweju, ligongo pa ndaŵiji ŵandu ŵajinji ŵatendeledwaga yangali chilungamo. (Luk. 18:1-5) M’wejisoni masiku agano mpaka tupikanichisye yeleyi, ligongo wosopewe tukusasimanaga ni yindu yangali chilungamo.
2 Masiku agano pachilambopa ŵandu ŵajinji ali ŵalusagu, ŵangali chanasa soni ŵa umbombo. Myoyo, ngatukusasimonga ŵane pakututendela yangali chilungamo. (Jwak. 5:8) Komboleka ngatukusajembecheya kuti abale ni alongo mpaka atutendele yindu yangali chilungamo, nambotu yeleyi mpaka yitendekwe. Abale ni alongo ŵetu ŵangasakaga kututendela yangali chilungamo mpela mwakusatendela ŵandu ŵakusatulagasya soni kutusisya. Nambotu mpaka atende yeleyi ligongo ali ŵangali umlama. Mpaka tulijiganye yejinji kutyochela pa yindu yaŵatesile Yesu pandaŵi jele ŵandu ŵakusakala ŵamtendele yangali chilungamo. Naga tukusakombola kuŵa ŵakuwusimana mtima ŵakusisya pakututendela yangali chilungamo, nikuti mpaka yiŵe yangasawusya kutenda yakulandanayo kwa abale ni alongo ŵetu. Ana Yehofa akusapikana uli patutendeledwe yangali chilungamo chinga ni Aklistu achimjetu kapena ŵandu ŵanganaŵa Aklistu? Ana jwalakwe yikusamkwayaga?
OKOTOBA 13-19
CHIPANJE CHAKUSIMANIKWA M’MALOŴE GA MLUNGU
‘Ajawuleje Kunyumba Jamalilo’
it “Kulila Malilo” ¶9
Kulila Malilo
Ndaŵi Jakulila. Lilemba lya Jwakulalichila 3:1, 4 likusati “pana ndaŵi jakulila soni ndaŵi jakuseka; ndaŵi jakulila mnope soni ndaŵi jakuŵina.” Paganichisya mwayikusaŵelaga mundu pawililwe, mundu jwalunda ukusajawula ku “nyumba jamalilo” kulekangana ni kwawula ku nyumba japwando. (Jwak 7:2, 4; alolesoni Mis. 14:13.) Myoyo mundu jwalunda akusakamulichisya masengo upile welewu pakulosya chanasa soni kwalimbikasya ŵawililwe. Jwalakwe jwangalepela kwawula kunyumba jamalilo pakusaka kuti ajawule kuyisangalalo. Yeleyi yikusamkamuchisya jwalakwe kumanyilila kuti lisiku line chachiwa soni kuti ndaŵi syosope atendeje yambone pameso pa Mlungu jwakwe.
Twakamuchisyeje Ŵane Kuti Akombole Kumalana ni Kulagasika Nganisyo
15 William, jwele ŵamkwakwe ŵajasiche jwatite, “Ngusayamichila mnope kwapikana ŵandu ŵane ali mkusala yindu yambone yaŵatendaga ŵamkwangu. Chelechi chaliji chikamuchisyo chambone mnope kwa une. Maloŵe gaŵaŵechetaga ŵanduŵa gandondoyaga, ligongo ŵamkwanguŵa ŵaliji ŵakusosekwa mnope kwa une, tugambe kuti ŵaliji mbali jimo ja umi wangu.” Ŵandu ŵane paŵambalanjilaga Malemba soni kupopela yalumo ni une, yandondoyaga. Yangamuchisyaga mnope pandaŵi jele jemanjaji ŵaŵechetaga yakwamba ŵamkwangu soni ŵambikanichisyaga panguŵecheta ya ŵamkwanguŵa.”
“Alile Pampepe ni Ŵakulila”
16 Mapopelo getu mpaka gakamuchisyesoni Aklistu achimjetu ŵawililwe. Mpaka tupopele tuli yalumo ni mundu jwawililwejo. Atamose kuti kutenda yeleyi mpaka kuŵe kwakusawusya, nambo kulila soni kakoposye ka maloŵe gawo mpaka yiŵe yakumtondoya mnope mundujo. Dalene ŵaŵechetesoni kuti, “Ndaŵi sine naga alongo ayiche kukundondoya, nasalilaga kuti naga akusaka mpaka apeleche lipopelo. Pakutanda kupopela ŵalagaga kuŵecheta nambo kaneko maloŵe gawo gapikanikaga gamachili ni ŵapopelaga kutyochela pasi pamtima. Chikulupi chawo, chinonyelo chawo soni kunganichisya kwawo yiŵele yakulimbikasya mnope kwa une.”
“Alile Pampepe ni Ŵakulila”
17 Nganiyiŵa yikomboleche kumanyilila ndaŵi jisyesyene jele chanasa chakwete mundu jwawililwe chichimala. M’yoyo, amjendeleje, ngaŵape pandaŵi jele achimjakwe soni ŵachibale ŵakwe ali pamlangopo, nambo atamose pandaŵi jele ŵanduwo awujile msimangwawo. Baibulo jikusasala kuti “Mjetu jusyesyene akusatunonyela ndaŵi syosope, soni jwalakwe ali mlongo mjetu juŵapagwile kuti atukamuchisyeje patusimene ni yipwetesi.” (Miy. 17:17) Mklistu mjetu pawililwe tukusosekwa kumtondoya mpaka pandaŵi jele chanasa chakwe chichimala.—Aŵalanje 1 Atesalonika 3:7.
18 Tukumbuchileje kuti pana yindu yine yampaka yimtendekasyeje mundu juŵawililwe kola chanasa ndaŵi ni katema. Yindu yakwe yili mpela kumbuchila lisiku lya chindimba cha ulombela wakwe, nyimbo jine jakwe, yiwulili, yindu yaŵatendelaga yalumo, kapena liwungo line lyakwe lya yindu, soni nyengo jine jakwe ja pachaka. Mundu jwawililwe pakutenda yindu yine pajika kwandaŵi jandanda mpela kwawula ku msongano wamkuli kapena ku Chikumbuchilo, yikusaŵa yakupweteka mnope. M’bale jwine jwele ŵamkwakwe ŵajasiche ŵasasile kuti, “Najembecheyaga kuti palichiyika lisiku lyatwakumbuchilaga chindimba cha ulombela wetu yichimbweteka mnope, soni nganiyiŵa yakunguluka. Nambo palisikulyo abale ni alongo ŵaninganyichisye chindimba yalumo ni achimjangu ni chakulinga chakuti ngaŵa jika.”
19 Akumbuchilejesoni kuti mundu jwawililwe akusasaka kumlimbikasya ndaŵi syosope ngaŵape pa yakutendekwa yapajika. Junia ŵasasile kuti, “Chikamuchisyo soni chilimbikasyo chakupelechedwa pandaŵi jakuti pangali chakutendekwa chapajika chili chakamuchisya mnope. Yeleyi yikusaŵa yakutondoya mnope.” Kusala yisyene, nganituŵa tukombwele kumasya chanasa chosope cha mundu chakwika ligongo lya chiwa cha jwakunonyelwa jwakwe, nambo mpaka tukombole kumtondoya kupitila mu yakutenda yetu. (1 Yoh. 3:18) Gaby ŵasasile kuti, “Ngusinam’yamichila mnope Yehofa ligongo lya achakulungwa ŵa mumpingo ŵaŵele ali mkungamuchisya pa yakusawusya yangu yosope. Jemanjaji atendekasisye kuti nalipikaneje kuti Yehofa angumbatile.”
Mfundo Syakamuchisya
“Wosope Chachimanyilila Kuti Mli Ŵakulijiganya Ŵangu”
18 Ndaŵi sine mpaka tuyiwoneje kuti mpaka yiŵe chenene kuŵechetana ni mundu jwatuleŵele. Nambo mkanitutende yeleyi tukusosekwa kuliwusya yiwusyo yakuyichisyayi: ‘Ana ngwete maumboni gosope ga nganiji?’ (Mis. 18:13) ‘Ana munduju atesile mwamelepe?’ (Jwak. 7:20) ‘Ana uneji nganindendeje chakulemwa mpela chelechi?’ (Jwak. 7:21, 22) ‘Ana kuja kambilana ni munduju chikukamuchisye kuti nganiji jimale kapena chikugambe kukusya nganiji?’ (Aŵalanje Misyungu 26:20.) Kuganichisya yiwusyo yeleyi mpaka kutukamuchisye kuti tugambe kujiliŵalila nganijo.
KULIPELEKA MU UTUMIKI WA MUMGUNDA
Ana pamalilo ga Mboni sya Yehofa pakusatendekwa yamti uli?
Malo: Liŵasa lyaliwililwe ni lyalikusasagula malo gakuti mwambo wa malilo ukatendechele. Ŵane mpaka asagule ku Nyumba ja Uchimwene, kunyumba jawo, malo gakochela mitembo kapena kumalembe.
Mwambo wa maliro: Pamwambowu pakusaŵechetedwa ngani jajikusalondesya yajikusasala Baibulo pangani jachiwa soni yakuti ŵawe chachijimuka. (Yohane 11:25; Aloma 5:12; 2 Petulo 3:13) Jwakuŵecheta nganiju mpaka asalesoni ndamo syambone syaŵakwete mundu jwawilejo nambosoni yindu yine yampaka ŵandu ŵane alijiganyepo.—2 Samuyele 1:17-27.
Pamwambowu mpaka pajimbidwesoni nyimbo jakutyochela m’Malemba. (Akolose 3:16) Mwambowu ukusamala ni lipopelo lyakulimbikasya.—Afilipi 4:6, 7.
Malipilo: Ŵakuwilwa ngatukusasalila kuti apeleche mbiya syakumlipila mundu jwaŵechete ngani ja malilo. Nambosoni mwakulandana ni mwatukusatendela pamisongano jetu, ngatukusajendesya mbale ja yakupeleka pamwambo wamaliro.—Mateyu 10:8.
Ŵandu ŵampaka asimanikwepo: Mwakulandana ni mwayikusaŵela ni misongano jetu, ŵandu wosope atamose ŵanganaŵa ŵa Mboni mpaka ayiche pamwambo wa maliro wawukutendechela mu Nyumba ja Uchimwene.
OKOTOBA 20-26
CHIPANJE CHAKUSIMANIKWA M’MALOŴE GA MLUNGU
Ayiwoneje Yakusawusya Yawo Mwakuŵajilwa
w13 8/15 14 ¶20-21
‘Akasamtumbilila Yehofa’
20 Amanyilileje chachitandikasisye yakusawusyayo. Ligongo chichi tukusosekwa kutenda yeleyi? Ligongo yakusawusya yine tukusaliyikachisya achimsyewe. Myoyo tukusosekwa tumanyilileje yeleyo. (Agal. 6:7) Akamjimbaga magambo Yehofa ligongo lya yakusawusya yakusimana nayo. Ligongo chichi kutenda yeleyi mpaka kuŵe kuloŵela? Tuwanichisye kuti mundu akwendesya galimoto jakuwutuka mnope. Payiche pamalo gakuti akote, jwalakwe ni pakuwutusya mnope galimotojo mwamti mpaka akutenda ngosi. Ana munduju mpaka ajijimbe magambo kampani jajapanganyisye galimotojo? Iyayi, yeleyi nganiyiŵa yikomboleche! Mwakulandana ni yeleyi, Yehofa ŵatupanganyisye mu litala lyakuti tukomboleje kusagula yakutenda. Nambosoni jwalakwe ŵatupele malangiso gakutukamuchisya kusagula chenene yindu. Myoyo, ngatukusosekwa kumjimba magambo Mlungu naga tusimene ni yakusawusya ligongo lyakuti tulepele kukuya malangiso.
21 Nambope, ngaŵa kuti ndaŵi syosope tukusasimana ni yakusawusya ligongo lyakuti m’weji tulemwisye yineyakwe. Ligongo lyakuti ndaŵi sine “yindu yangayijembecheya,” mpaka yitutendechele. (Jwak. 9:11) Myoyo, tukumbuchileje kuti Satana ni jwakusatendekasya yakusawusya yejinji pachilambopa. (1 Yoh 5:19; Chiw. 12:9) Jwalakwe ni jwali mdani jwetu ngaŵaga Yehofa.—1 Pet. 5:8.
Ŵandu Ŵakulinandiya Ali Ŵakusosekwa kwa Yehofa
10 Kulinandiya kukusatukamuchisyasoni kola umi wambone. Kusala yisyene, ndaŵi sine mpaka tusimane ni yindu yampaka tuyiwone kuti yili yangali chilungamo. Mwenye jwalunda Solomoni jwatite, “Naweni achikapolo ali mkwenda pa mahachi, nambo ŵakulamulila ali mkwenda pasi mpela achikapolo.” (Jwak. 10:7) Ndaŵi sine ŵandu ŵalunda mnope ŵangapochela uchimbichimbi. Soni ndaŵi sine ŵandu ŵanganakola lunda akusapochela uchimbichimbi wekulungwa. Atamose kuti yili myoyo, Solomoni jwasasile kuti luli lunda kwitichisya mwayiŵelele yindu. (Jwak. 6:9) Naga tuli ŵakulinandiya, yichiŵa yangasawusya kwitichisya mwayiŵelele yindu paumi wetu.
w11 10/15 8 ¶1-2
Ana Yakusangalasya Yakusatendaga Yili Yakamuchisya?
PATUKUŴALANGA Baibulo, tukusayiwona kuti Yehofa akusasaka kuti tusangalaleje ngaŵa kwamba kutama ni umipe. Mwachisyasyo, pa Salimo 104:14, 15 pakusati Yehofa akusatendekasya kuti paŵe “yakulya pachilambo. Ŵapanganyisye finyo jwajukusatendekasya mtima wa mundu kusangalala, mawuta gagakusatendekasya ngope ja mundu kutipitila, soni yakulya yayikusapeleka machili kwa mundu.” Yisyene, Yehofa akusatendekasya kuti mbeju sikule, paŵe pana mawuta, soni finyo nichakulinga chakuti tutameje ni umi. Nambope finyo jukusatendekasyasoni “mtima wa mundu kusangalala.” Myoyo jukusatendekasya kuti umi wetu uŵeje chenene nambosoni kuti tusangalaleje. (Jwak. 9:7; 10:19) Kusala yisyene, Yehofa akusasaka kuti yindu yitujendeleje chenene soni kuti mitima jetu “jisangalaleje.”—Mase 14:16, 17.
2 Myoyo, tukaliwonaga kuti tulemwisye naga ndaŵi sine tulinganyisye yakuti tukasangalale. Mwambone mwine mpaka tulinganye yakuti tukalole “yijuni yamwinani” nambosoni “maluŵa gamwitinji” kapenasoni kutenda yindu yine yampaka yisangalasye umi wetu. (Mat. 6:26, 28; Sal. 8:3, 4) Kukola umi wakusangalala uli “mtuka wakutyochela kwa Mlungu.” (Jwak. 3:12, 13) Kumanyilila kuti ndaŵi jakusangalala uli mtuka yichitukamuchisya kuti tujikamulichisyeje masengo ndaŵiji mwakumsangalasya jwaŵatupele mtukawu.
Mfundo Syakamuchisya
Ana chikusatendekwa chichi mundu pawile?
Yesu jwalandenye chiwa ni lugono. Mundu jwagonile mnope, jwangamanyililaga yindu yayikutendekwa. Ana chiwa chikusalandana chamtuli ni lugono? Mundu pawile, jwangapikana kupweteka. Konjechesya pelepa, atamose kuti jwanonyelaga mnope achimjakwe soni ŵamwiŵasa mwakwe, nambo pawile lyangamtendaga lipowo. Baibulo jikusati, “Ŵawe ŵangamanyilila chilichose.”—Aŵalanje Jwakulalichila 9:5.
OKOTOBA 27–NOFEMBA 2
CHIPANJE CHAKUSIMANIKWA M’MALOŴE GA MLUNGU
Asangalaleje ni Umi Wambone
g 3/15 13 ¶6-7
Ana Kambepo Kambone Soni Lyuŵa Yili Mtela?
Lyuŵa likusawulagasoni tulombo twakutandisya yilwele. Magasini jine jasasile kuti “tulombo twejinji twatukusatandisya yilwele mpela mawundika, tukusawaga patugombedwe lyuŵa.”—Journal of Hospital Infection
Ana mpaka tuwukamulichisye masengo chamti uli upile welewu? Pakuŵa tuyiweni kuti kambepo kambone soni lyuŵa yili mtela, ngatukusosekwa kwambaga kutama mnyumbape. Ndaŵi sine tunonyeleje kutama pasa ni chakulinga chakuti tujotele lyuŵa soni kuti kambepo kambone katupite. Kutenda yeleyi mpaka kutukamuchisye kuti tukalwalagalwalaga.
Ayamichileje Mtuka wa Umi Waŵapeleche Mlungu
6 Atamose kuti Baibulo nganijiŵa buku jakusala yampaka tutende kuti tuchisamalileje chilu chetu kapena mwampaka tusagulile yakulya, nambope jikusatusalila yejinji pakwamba mwakusayiwonela Yehofa yindu yeleyi. Mwachisyasyo, jwalakwe akusatulimbikasya ‘kuliŵambasya ku yakupweteka,’ yampaka yijonanje chilu chetu. (Jwak. 11:10) Kulya mnope soni kukolelwa mpaka yijonanje chilu chetu soni atamose kutuwulaga kwene. (Mis. 23:20) Yehofa akusasaka kuti tuliŵichileje malile pangani ja winji wa yindu yatukusaka kulya kapena kumwa.—1 Akoli. 6:12; 9:25.
7 Mpaka tusagule yindu yakulosya kuti tukusayamichila umi waŵatupele Mlungu mwakukamulichisya masengo lunda lwetu lwakuganisya. (Sal. 119:99, 100; aŵalanje Misyungu 2:11.) Mwachisyasyo, mpaka tutende yeleyi mwakusagula mwalunda yindu yatukusaka kulya. Tukusaŵambala kulya yakulya yampaka yitutendekasye kuti tulwale atamose yili mkuti tukusayinonyela mnope. Tukusalosyasoni kuti tuli ŵaganisya chenene mwakutenda yakomboleka kuti tugoneje mwakwanila, kutenda maseŵela gakulimbisya chilu ndaŵi syosope, nambosoni kulolechesya kuti ndaŵi syosope yilu soni pamlango petu yili yachasa.
‘Mtendeje Yagakusaŵecheta Maloŵe’
2 Ŵakutumichila ŵa Yehofawe tuli ŵandu ŵakusangalala. Ligongo chichi yili myoyo? Pana magongo gejinji. Nambo ligongo limo lili lyakuti tukusaŵalanga Maloŵe ga Mlungu mwakutamilichika soni tukusalingalinga kuti tukamulichisyeje masengo yatulijiganyisyeyo.—Aŵalanje Yakobo 1:22-25.
3 Yindu yikusatujendela chenene ‘patukutenda yagakusaŵecheta maloŵe’ ga Mlungu. Tukusamanyilila kuti kutenda yeleyi kuli kwakusosekwa mnope ligongo tukusaŵa kuti tukumsangalasya Yehofa soni yikusatutendekasya kuŵa ŵakusangalala. (Jwak. 12:13) Patukamulichisya masengo yatukusalijiganya m’Maloŵe ga Mlungu, yikusatukamuchisya kuti tuŵe ŵakamulana ni ŵandu ŵa mwiŵasa mwetu soni Aklistu achimjetu. Ngatukukayichila kuti mwelemu ni mwayiŵelele ni wawojo. Konjechesya pelepa tukusaŵambala yakusawusya yejinji yakusasimana nayo ŵandu ŵele ngakusakuya malamusi ga Yehofa. Kusala yisyene, tukusakamulana ni yaŵaŵechete Mwenye Daudi. Ali asasile ya malamusi soni majiganyo ga Yehofa, Daudi jwamalisisye nyimbo jakwe mwakusala kuti, ‘Pangugasunga ngusapochela mbote jajikulungwa.’—Sal. 19:7-11.
Mfundo Syakamuchisya
g07.11 11 ¶2-3
Ana Ŵani Ŵaŵalembile Baibulo?
Atamose kuti Baibulo jalembedwe ni Mlungu, yeleyi ngayikugopolela kuti ŵandu ŵaŵalembilewo nganakamulichisya masengo luso lwawo. Jemanjaji ŵasosekwaga kukamulichisya masengo luso lwawo kuti alembe Maloŵe ga Mlungu. Mwachisyasyo, juŵalembile buku ja Jwakulalichila jwasasile kuti: “jwawungunyisye maloŵe gakusangalasya, soni jwalembile maloŵe gakulondola ga yindu yayili yisyesyene.” (Jwakulalichila 12:10) Kuti alembe ngani jakwe jambili jakala, Esala jwawungunyisye m’mabuku chiŵandika 14, mpela “buku ja mbili ja yakutendekwa ya mu ndaŵi ja mwenye Daudi” soni “Buku ja Mamwenye ga ku Yuda soni ga ku Isalayeli.” (1 Mbili 27:24; 2 Mbili 16:11) Luka jwele jwalembile Ngani Syambone ‘jwawungunyisye chenene yindu yosope soni jwaliji jwakusachilila kuyilemba mwakamulana ni muyatendechele.’—Luka 1:3.
Mabuku gane ga m’Baibulo gakusalosya chenene mundu jwaŵalembile. Mwachisyasyo, Mateyu Lefi, juŵaliji jwakomesya misongo mkanaŵe kuŵa jwakulijiganya jwa Yesu, jwanonyelaga yindu yamanambala. Myoyo mwa ŵandu wosope ŵaŵalembile Ngani Syambone, Mateyupe ni jwaŵasasile kuti Yesu jwapelechedwe ni “mbiya 30 sya silifa.” (Mateyu 27:3; Maliko 2:14) Luka, juŵaliji dokotala, jwalondesisye chenene ngani sya yilwele. Mwachisyasyo, pakulondesya yamawulwele ga ŵandu ŵane ŵele Yesu ŵaposisye, Luka jwasasile maloŵe mpela, “chilu chili chikolele mnope moto” nambosoni “matana chilu chosope.” (Luka 4:38; 5:12; Akolose 4:14) Myoyo, Yehofa ŵakundile kuti ŵakulemba Baibulo alondesye chenene yindu pakamulichisya masengo luso lwawo soni mmaloŵe gawogawope. Nambope jwalakwe jwalongolelaga kuti alembe utenga wakwe mwakulondola.—Misyungu 16:9.