“[Yindu] Yeleyi Mwajiganyeje Acalume Ŵakulupicika”
“[Yindu] yeleyi mwajiganyeje acalume ŵakulupicika ŵele panyuma pakwe cacikombola kwajiganya ŵane.”—2 TIM. 2:2.
1, 2. Ana ŵandu ŵajinji akusagawona mwatuli masengo gawo?
NDAŴI syejinji ŵandu akusalikolanga mwakamulana ni masengo gakusakamula. Ŵajinji akusaliwona kuŵa ŵakusosekwa mnope kapena ŵangali mate ligongo lya masengo gakusakamula. M’mikuli jine, pakusaka kummanyilila mundu, akusanonyela kum’wusyasoni kuti, “Ana mkusakamula masengo gatuli?”
2 Ndaŵi sine Baibulo jikusakolangasoni ŵandu mwakamulana ni masengo gaŵakamulaga. Mwambone, jikusasala ya “Mateyu, jwakomesya msongo,” “Simoni, jwakupalapata mapende,” soni “Luka, dokotala jwakunonyelwa.” (Mat. 10:3; Mase. 10:6; Akolo. 4:14) Ŵandu akusamanyikasoni ni undumetume wakusatenda. Mwambone, Baibulo jikusasala ya Mwenye Daudi, jwakulocesya Eliya, soni ndumetume Paulo. Acalume ŵeleŵa ŵawuwonaga undumetume wawo kuŵa wakusosekwa mnope. M’wejisoni naga tukwete upile wa undumetume, tukusosekwa kuwuwonaga kuŵa wakusosekwa mnope.
3. Ligongo cici ŵacikulile akusosekwa kwajiganya ŵacinyamata? (Alole ciwulili cacili penanipa.)
3 Ŵajinjiwe tukusaganonyela masengo gatukusatenda soni tukusasaka tuli mkwendelecelape kugatenda mpaka kalakala. Nambo cakutesya canasa cili cakuti, kutandila ndaŵi ja Adamu, ŵandu akusakalambala ni kutanda kulepela kutenda yindu yaŵatendaga ali ŵacinyamata. (Mlal. 1:4) Yeleyi yitendekasisye kuti paŵe yakusawusya yine pasikati pa Aklistu ŵasyesyene. Mwambone, apanopano masengo gakulalicila gakusile mnope, soni likuga lya Yehofa likukamulicisya masengo matala gasambano kuti lyayicile ŵandu ŵajinji ni ngani syambone. Nambo ndaŵi sine yikuŵaga yakusawusya kuti ŵacikulile ŵane alijiganye kamulicisya masengo matala gasambanoga. (Luk. 5:39) Konjecesya pelepa, ŵacikulile akusakola macili gamnono kulekangana ni ŵacinyamata. (Miy. 20:29) M’yoyo, yili yakusosekwa mnope kuti ŵacikulile ŵajiganye ŵacinyamata kuti caŵajilwe kupocela maukumu gekulungwakulungwa.—Aŵalanje Salimo 71:18.
4. Ligongo cici ŵane yikusiyasawusya kupeleka maukumu kwa ŵacinyamata? (Alole libokosi lyakuti “Yayikusiyalepelekasya Ŵane Kupeleka Maukumu.”)
4 Abale ŵakwete maukumu mpaka yasawusye kuti apelece maukumu gane kwa ŵacinyamata. Ŵane akusajogopa kuti catyoce pa ukumu waŵawunonyelaga mnope. Ŵane akusaganisya kuti naga akwalecela ŵacinyamata kuti alongoleleje nganaŵa atesile cenene masengogo. Ŵanesoni akusaliwona kuti nganakola ndaŵi jakumjiganyila jwine. Pandaŵi jakulandanajo, ŵacinyamata akusosekwa kuŵa ŵakuwusimana mtima pangakupocela maukumu gane.
5. Ana citutagulilane yiwusyo yapi munganiji?
5 Kwende tutagulilane mbali siŵili syakusosekwa mnope pangani jakupeleka maukumu kwa ŵane. Candanda, ana ŵacikulile mpaka ŵakamucisye catuli ŵacinyamata kuti aŵajilwe kupocela maukumu gakonjecesya, soni ligongo cici yeleyi yili yakusosekwa? (2 Tim. 2:2) Caŵili, ligongo cici ŵacinyamata akusosekwa kola nganisyo syambone pakwakamucisya abale ŵakumanyilila yejinjiŵa soni pakulijiganya kwa jemanjajo? Kwende kaje tulole mwele Mwenye Daudi ŵamkosecelesye mwanagwe kuti cakombole kutenda masengo gakusosekwa mnope.
DAUDI ŴAMKOSECELESYE SONI KUMKAMUCISYA SOLOMO
6. Ana Mwenye Daudi ŵasakaga kutenda cici, soni ana Yehofa ŵamsalile cici?
6 Panyuma pakutama umi wakutilatila kwa yaka yejinji, Daudi ŵaŵele mwenye soni ŵatandite kutama m’nyumba jambone mnope. Nambo pakuyiwona kuti paliji pangali nyumba jakumlambilila Yehofa, jwalakwe ŵasacile kuti ataŵe. M’yoyo ŵamsalile jwakulocesya Natani kuti, “Une ngutama m’nyumba jepanganyidwe ni yitela ya mkungusa nambo libokosi lya cilangano lya Yehofa lili mkutama m’citenti canguwo.” Natani ŵamjanjile kuti, “Mtende yiliyose yayili mumtima mwenu, ligongo Mlungu jwakuwona ali namwe.” Nambope, Yehofa nganasaka kuti Daudi atende yeleyi. M’yoyo ŵamsalile Natani kuti akamsalile Daudi kuti, “Nganim’ŵa m’mwejo jucimcindaŵila nyumba jakuti ndamejemo.” Atamose kuti Yehofa ŵamlagucisye Daudi kuti cacijendelecela kumjaliwa, nambo ŵasagwile kuti Solomo mwanace jwa Daudi cataŵe nyumbajo. Ana Daudi ŵatesile wuli paŵapikene yeleyi?—1 Mbiri 17:1-4, 8, 11, 12; 29:1.
7. Ana Daudi ŵatesile cici paŵapikene yaŵasakaga Yehofa?
7 Daudi nganatenguka pakulola kuti upile wakutaŵa nyumba ja Mlungujo upite kwa jwine. M’malo mwakwe jwalakwe ŵakamucisye mnope pamasengogo. Jwalakwe nganadandawula kuti nyumbajo jicimanyikwaga ni lina lya mundu jwine. Sonitu pajataŵidwe nyumbajo jamanyikwaga ni lina lya Solomo ngaŵaga lya Daudi. Daudi ŵapatile ŵandu ŵakukamula masengogo ni kwaŵika m’makuga. Ŵasongenyesoni yisyano, kopa, silifa, golidi, soni matabwa ga mkungusa. Konjecesya pelepa, jwalakwe ŵamlimbikasisye Solomo kuti, “Sambano, mwanangu, Yehofa aŵe ni m’mwejo, soni yindu yimjendele cenene ni kutaŵa nyumba ja Yehofa Mlungu jwenu, mpela mwasalile jwalakwe pakwamba ya m’mwejo.”—1 Mbiri 22:11, 14-16.
8. Ligongo cici Daudi akaganisisye kuti Solomo ngakuŵajilwa kutaŵa nyumba ja Mlungu, nambo ana ŵatesile cici?
8 Aŵalanje 1 Mbiri 22:5. Daudi akaganisisye kuti Solomo ngakuŵajilwa kulolela masengo gakusosekwa mnopega. Sonitu nyumba ja Mlungujo jaliji jakuti tijiŵe ‘jakusalala mnope,’ nambo pandaŵiji Solomo ŵaliji ‘mwanace soni nganamanyililaga yejinji’. Nambope, Daudi ŵayimanyi kuti Yehofa camkamucisye Solomo kuti agakombole masengogo. M’yoyo jwalakwe ŵatesile yaŵakombwele kuti amkamucisye Solomo pakosecela masengogo.
ASANGALALEJE NI KWAJIGANYA ŴANE
Yikusaŵa yakusangalasya kwawona abale ŵacinyamata ali mkupocela maukumu gekulungwakulungwa (Alole ndime 9)
9. Ana cici campaka cakamucisye abale ŵacikulile kuti asangalaleje kupeleka kwa ŵane maukumu gakwete? Apelece cisyasyo.
9 Abale ŵacikulile ngakusosekwa kutenguka pajikwanile ndaŵi jakuti apelece maukumu gaŵatendaga kwa ŵacinyamata. Nambo, akusosekwa kumanyilila kuti masengo mpaka gajendeje cenene naga ŵacinyamata ajiganyidwe ni kuŵajilwa kupocela maukumu. Acalume ŵa maukumu akusosekwa kwikutila pakwawona ŵacinyamata ŵaŵajiganyisye ali aŵajilwe kupocela maukumu. Aganicisye ayi. Tuwanicisye kuti pana mnyamata jwalijiganyisye kwendesya galimoto. Paŵaliji mwanace, komboleka kuti ŵagambaga kulola yaŵatendaga babagwe pakwendesya galimoto. Kaneko paŵakulaga, babagwe ŵala ŵamlondecesyaga yakutenda. Pambesi pakwe mnyamatajo payice msingu wakwendesya galimoto, akwawula kukulijiganya ni kupata yikalata yakumkunda kwendesya galimoto. Kaneko mnyamatajo akutanda kwendesya galimoto nambo kwineku babagwe ŵala ali mkwendelecela kumkamucisya. Ndaŵi sine mpaka acenganeje ni babagwewo kwendesya galimotojo. Nambo mkupita kwandaŵi, babagwewo pacekulwipe, mnyamatajo ni jwampaka ajendesyeje galimotojo ndaŵi ni katema soni mwine ndaŵi syosope. Mtati jwalunda mpaka asangalale pakuyiwona kuti mwanagwe akukombola kumjendesya pagalimoto. Mwakulandanamo, acalume ŵacikulile ŵakwete maukumu akusasangalala paŵajiganyisye ŵacinyamata ni kuŵajilwa kupocela maukumu m’likuga lya Yehofa.
10. Ana Mose ŵajiwonaga mwatuli ngani jakola ukumu soni ucimbicimbi?
10 Abale ŵakwete maukumu akusosekwa kuŵambala mtima wa wiwu. Aganicisye yaŵatesile Mose paŵapikene kuti Ayisalayeli ŵane atandite kutenda yindu mpela ŵakulocesya. (Aŵalanje Numeri 11:24-29.) Yoswa, juŵaliji jwakumkamucisya Mose jwasakaga kwalekasya ŵanduwo. Jwalakwe ŵaganisyaga kuti jemanjajo akusumula ukumu soni ucimbicimbi wa Mose. Nambo Mose ŵamsalile kuti, “Ana mkwatendela ŵane wiwu ligongo lya une? Iyayi mkasimtenda yeleyo. Ngasacile kuti ŵandu ŵa Yehofa wosope aŵe ŵakulocesya soni kuti Yehofa ŵape msimu wakwe.” Mose ŵayiweni kuti Yehofa ni juŵatendekasisye yeleyi. Jwalakwe nganalisacila jika ucimbicimbi, nambo ŵalosisye kusacilila kwakwe kuti ŵakutumicila ŵa Yehofa wosope akole mtuka wausimu welewu. Mpela Mose, ana ngatukusasangalala ŵane papocele undumetume wele mwinemwakwe wawonekaga kuti cituwupocele m’weji?
11. Ana m’bale jwine ŵasasile yatuli pakwamba ya kupeleka ukumu kwa ŵandu ŵane?
11 Masiku aganosoni, pana yisyasyo yejinji ya abale ŵaŵele ali mkutumicila mwamtawu kwa yaka yejinji soni ŵaŵakamucisye abale ŵane kuti aŵajilwe kupocela maukumu gakonjecesya. Mwambone, m’bale jwine lina lyakwe Peter ŵatesile undumetume wa ndaŵi syosope kwa yaka yakupunda 74, soni yaka 35 mwa yaka yeleyi ŵaŵele ali mkutumicila pa ofesi ja nyambi ku Europe. Jwalakwe ŵaliji jwakulolela Dipatimenti ja Undumetume mpaka m’yaka yapacangakaŵapa. Apano, m’bale jwine jwacinyamata juŵatumicilaga najo kwa yaka yejinji lina lyakwe Paul, ni jwakutumicila pa ukumu welewu. Ana Peter ŵasangalele ni kucenga kweleku? Elo. Jwalakwe ŵatite, “Ngusangalala mnope ligongo lyakuti pana abale ŵane ŵajiganyidwe kuti atumicileje m’maukumu gekulungwakulungwa soni ŵakutenda cenene m’maukumu gelega.
TWAWONEJE ŴACIKULILE KUŴA ŴAKUSOSEKWA MNOPE
12. Ana tukulijiganya cici kutyocela ku cisyasyo ca m’Baibulo ca Lehobowamu?
12 Solomo paŵawile, mwanagwe, Lehobowamu ŵaŵele mwenye. Jwalakwe paŵasacile kumanyilila mwampaka atendele cenene ukumu wakwewu, jwawusisye lunda kwa acakulungwakulungwa. Nambope jwalakwe nganakuya yaŵamsalile acakulungwawo. M’malo mwakwe, ŵakuyiye yaŵamsalile ŵacinyamata ŵaŵakusile nawo yalumo, ŵele pandaŵiji ŵaliji ali mkumtumicila. Yakuyicisya yakwe yaliji yakogoya mnope. (2 Mbiri 10:6-11, 19) Ana tukulijiganya cici pelepa? Tukulijiganya kuti yili yakamucisya mnope kuŵenda lunda kwa ŵandu ŵacikulile ligongo akusamanyilila yindu yejinji. Atamose kuti ŵacinyamata ngakusosekwa kulikanganicisya kuti atendeje yindu yosope mpela muyatendecelaga kala, nambo ngakusosekwa kuwutucila kuganisya kuti yacasale ŵacikulilewo yili yangakamucisya.
13. Ligongo cici ŵacinyamata akusosekwa kuwusyaga lunda kwa ŵacikulile?
13 Komboleka kuti apanopano, abale ŵane ŵacinyamata akulolela masengo gakusakamula ni ŵacikulile ŵakwe. Atamose kuti jemanjaji akwete ukumu welewu, mpaka atende cenene kuwusyaga lunda kwa ŵacikulilewo mkanasagule yakutenda. Paul jwatumkolasile jula ŵasasile kuti, “Napataga ndaŵi jakuwusya lunda kwa Peter soni nalimbikasyaga ŵane mu dipatimentijo kuti atendeje yakulandanayo.”
14. Ana tukulijiganya yatuli pakulola yaŵatite Paulo ni Timoteyo pakamula masengo yimpepe?
14 Timoteyo, paŵaliji jwacinyamata, jwakamwile masengo yimpepe ni Paulo kwa yaka yejinji. (Aŵalanje Afilipi 2:20-22.) Paulo ŵalembele Aklistu ŵa ku Kolinto kuti, “Ngumtumisya Timoteyo kwa jemanja, ligongo ali mwanangu jwakunonyelwa soni jwakulupicika mwa Ambuje. Jwalakwe camkumbusye jemanja mwangusatendela yindu pangumtumicila Klistu Yesu, mpela mwele unesoni ngwajiganyila ŵandu kulikose, mumpingo uliwose.” (1 Akoli. 4:17) Yaŵasasile Pauloyi yikulosya kuti jwalakwe ŵakamulanaga mnope ni Timoteyo. Paulo ŵaliji ali amjiganyisye Timoteyo “mwaŵatendelaga yindu pakumtumicila Klistu Yesu.” Timoteyo ŵalijiganyisye cenene soni Paulo ŵamnonyelaga mnope jwalakwe. Paulo ŵaliji jwakusimicisya kuti Timoteyo cakasamalile cenene yakusoŵa yausimu ya abale ni alongo ŵa ku Kolinto. Celecitu cili cisyasyo cambone cele acakulungwa ŵa mumpingo akusosekwa kucikuya pakwajiganya ŵane kuti aŵajilwe kuŵa ŵakulongolela mumpingo!
WOSOPEWE TUKWETE MBALI JATUKUSOSEKWA KUTENDA
15. Ana camuko caŵapelece Paulo kwa Aklistu ŵa ku Loma mpaka citukamucisye catuli undumetume wetu paucenjile?
15 Tukutama mu ndaŵi jakusangalasya mnope. Mbali japacilambo capasi ja likuga lya Yehofa jikukula m’matala gejinji. M’yoyo, yindu ciyisosekweje kucenga. Naga kucengaku kutukwayiye, tukusosekwa kuŵa ŵakulinandiya ni kuŵikaga nganisyo syetu pa yakusaka Yehofa ngaŵaga yetu. Kutenda yeleyi kukusakamucisya kuti tuŵe ŵakamulana. Paulo ŵalembele Aklistu ŵa ku Loma kuti, “Ngumsalila jwalijose jwa jemanja kweleko kuti mkasimliganicisyaga mwakupundanganya, nambo mganicisyeje m’litala lyakuti m’ŵe ŵaganisya cenene mwakamulana ni mwele Mlungu ŵampelele jwalijose cikulupi. Pakuŵa mpela mwele cilu cikwete yiŵalo yejinji, nambo yiŵaloyo ngayikusakamula masengo gakulandana, m’yoyosoni m’weji, atamose kuti tupali ŵajinji, tuli cilu cimo mwakamulana ni Klistu.”—Alo. 12:3-5.
16. Ana ŵacikulile, ŵacinyamata, soni acakongwe mpaka akamucisye catuli kuti mu likuga lya Yehofa muŵe mtendele soni mkamulano?
16 Cinga yindu yili wuli ni m’weji, kwende wosopewe tukamuleje mwamtawu masengo gakwawusya pasogolo ya Ucimwene wa Mlungu. Ŵacikulile akusosekwa kwakamucisya ŵacinyamata kuti aŵajilwe kupocela maukumu gakutenda jemanjajo. Ŵacinyamata, akusosekwa kunda kupocela ukumu, kuŵa ŵakulinandiya soni kwacimbicisya ŵacikulile. Soni acakongwe akusosekwa kuya cisyasyo ca Pulisikila, ŵamkwakwe Akula juŵakamucisyaga mwakulipicika ŵamkwakwewo yindu payacenjile pa umi wawo.—Mase. 18:2.
17. Ana Yesu ŵakulupililaga kuti ŵakulijiganya ŵakwe cacitenda yatuli, soni ana ŵajiganyisye kuti akamule masengo gapi?
17 Yesu ali cisyasyo cambone mnope pangani jakwajiganya ŵane kuti aŵajilwe kola maukumu gakonjecesya. Jwalakwe ŵayimanyi kuti ndaŵi jakwe jakutenda undumetume wapacilambo capasi jicimala soni kuti pacisosekwa ŵane kuti ajendelecele kutenda undumetumewo. Atamose kuti ŵakulijiganya ŵakwe ŵaliji ŵangali umlama, jwalakwe ŵakulupililaga jemanjajo soni ŵasalile kuti cacitenda masengo gamakulungwa kupunda gaŵatesile jwalakwejo. (Yoh. 14:12) Yesu ŵajiganyisye cenene jemanjajo, mwati ŵakombwele kulalicila ngani syambone m’mikuli jejinji.—Akolo. 1:23.
18. Ana kusogoloku tukwembeceya cici, soni ana tukusosekwa kutenda cici apanopano?
18 Yesu paŵawile, Mlungu ŵamjimwisye ni jwajawile kwinani. Kweleko ŵapocele masengo gamakulungwa soni ulamusi ‘wakupunda boma jilijose, ulamusi uliwose soni macili gosope ni acambuje wosope.’ (Aef. 1:19-21) Naga tukuwa tuli ŵakulupicika mkanijiyice Alamagedo, Mlungu cacitujimusya kuti citutameje m’cilambo casambano cakulungama, mwatucitendaga masengo gakusangalasya gejinji. Nambo sambano jino, pana masengo gakusosekwa mnope gele jwalijose akusosekwa kujigala nawo mbali. Masengoga gali gakulalicila ngani syambone soni kupanganya ŵakulijiganya. Kwende wosope, ŵacinyamata soni ŵacikulile, ‘tukole yakutenda yejinji m’masengo ga Ambuje.’—1 Akoli. 15:58.