路加福音
21 耶穌抬頭,見到一啲有錢人將捐款放入寶庫嘅錢箱, 2 跟住又見到一個窮寡婦,放咗兩文小錢*入去, 3 就話:「我好肯定噉話俾你哋知,呢個窮寡婦放入去嘅,比佢哋所有人放嘅仲多。 4 人人都係喺淨低嘅錢當中攞一啲出嚟,作為捐款放入去,而呢個寡婦雖然好窮,但係佢將自己賴以為生嘅一切放晒入去。」
5 後嚟有人講起聖殿,讚嘆聖殿用華美嘅石頭同奉獻嘅禮物嚟裝飾。 6 耶穌話:「時候會到,你哋而家見到嘅,到時唔會有一塊石頭留喺石頭上面,全部都會被拆毀。」 7 佢哋問耶穌:「老師,呢啲事幾時會發生呢?到時會有乜嘢徵象?」 8 耶穌話:「你哋要小心,唔好俾人誤導,因為會有好多人冒我嘅名嚟到,話『我就係基督』,又話『指定嘅時候就快到嘞』。但係你哋唔好跟從佢哋。 9 當你哋聽到有戰爭同暴亂發生嘅時候,唔使驚。呢啲事一定會發生咗先,不過末日唔會即刻嚟到。」
10 耶穌又話:「民族會攻打民族,國家*會攻打國家, 11 仲會有大地震,一個接一個地方會有糧食短缺同瘟疫。人會見到恐怖嘅事同埋天上奇異嘅景象。
12 「喺呢一切發生之前,啲人會落手迫害你哋,將你哋交去會堂,韞入監。你哋為咗我嘅名,會俾人帶到君王同總督面前。 13 結果,你哋就有機會作見證嘞。 14 所以,你哋要下定決心,唔需要預先練習點樣辯護, 15 因為我會賜智慧俾你哋,等你哋知道應該點樣講*,使所有反對你哋嘅人加埋都抵擋唔住,反駁唔到。 16 你哋嘅父母、兄弟、親戚、朋友都會出賣你哋*,結果你哋有啲人會被殺。 17 你哋會因為我嘅名,俾所有人憎恨。 18 但係你哋連一條頭髮都唔會受損*。 19 你哋只要忍耐,就能夠保全生命。
20 「你哋見到軍隊喺耶路撒冷周圍紮營圍城,就知道呢座城就快荒涼嘞。 21 到時,喺猶地亞嘅就應該逃走上山,喺城裡面嘅就應該出嚟,喺鄉下嘅唔好入城, 22 因為嗰個係伸張正義*嘅時候,噉聖經寫嘅說話就會全部應驗。 23 喺嗰段時期,懷孕嘅同餵奶嘅有禍嘞!將會有大難降臨呢個地方,有烈怒降臨呢個民族。 24 佢哋會死喺刀劍之下,或者被俘擄到列國。耶路撒冷會俾列國*踐踏,直到列國*嘅既定時期滿咗。
25 「太陽、月亮、星辰會顯出奇異嘅景象,地上嘅國家都會因為海洋咆哮翻騰,覺得不知所措,非常之痛苦。 26 啲人一諗到世上將會發生嘅事,就會驚到頭暈眼花。天上嘅力量都會動搖。 27 到時,人會見到人子喺天雲帶住力量,充滿榮耀噉嚟到。 28 一有呢啲事,你哋就要挺身昂首,因為你哋就快得救嘞。」
29 耶穌同佢哋講咗個比喻:「你哋睇吓無花果樹同其他樹。 30 你哋見到樹木發芽,就知道夏天就快到嘞。 31 同樣,當你哋見到呢啲事發生,就知道上帝嘅王國就快到嘞。 32 我好肯定噉同你哋講,呢一切會發生咗先,呢一代人先至會消逝。 33 天地都會消逝,但係我嘅說話絕對唔會消逝。
34 「你哋要小心,你哋嘅心千祈唔好俾貪食、縱酒同埋生活嘅憂慮重重壓住。噉嗰一日突然嚟到嘅時候,你哋都唔會好震驚, 35 好似突然跌入陷阱一樣。住喺地上嘅人冇一個可以逃避到嗰一日。 36 你哋要時刻警醒,經常懇切祈求,噉你哋就能夠逃過呢一切要發生嘅事,可以企喺人子面前。」