OFakazi BakaJehova Nezisebenzi Zezokwelapha Bayabambisana

NGO-1945, oFakazi BakaJehova baqonda ukuthi ukumpontshelwa igazi kwakuwukusetshenziswa kwegazi okungasekelwe embhalweni. Njengoba kwakuhlanganisiwe eMthethweni kaMose, lokhu kwenqatshelwa kwadluliselwa emiBhalweni YamaKristu YesiGreki. IzEnzo 15:28, 29 zithi: “Kwaba-kuhle kuMoya oNgcwele nakithi ukuba singanithwesi umthwalo omkhulu ngaphandle kwalezizinto ezifunekayo zokuthi niyeke okuhlatshelwe izithombe‚ negazi‚ nokuqumbeleneyo‚ nobufebe; uma nizilinda kulezozinto‚ noba nenza kahle. Salani kahle.” (Bheka uLevitikusi 17:10-12.) Ukwenqaba koFakazi ukwamukela ukumpontshelwa igazi kwaholela ekuphikisaneni okuningi nezinye zezisebenzi zezokwelapha.

AmaKomiti Okuxhumana Nezibhedlela

Ukuze isekele oFakazi ekwenqabeni kwabo ukwamukela igazi, icacise ukungaqondi kahle kodokotela nezibhedlela, futhi ukuze yenze kube nomoya wokubambisana ngokwengeziwe phakathi kwezinhlangano zokwelapha neziguli ezingoFakazi, iNdikimba Ebusayo yoFakazi BakaJehova yamisa amaKomiti Okuxhumana Nezibhedlela. Njengoba akhiwa oFakazi abavuthiwe abaqeqeshelwe ukuba basebenzelane ngokuqonda nodokotela nezibhedlela, lamakomiti aye axazulula izimpikiswano, futhi enza kwaba nomoya wokubambisana ngokwengeziwe. Kusukela emakomitini anjalo ambalwa ngo-1979, inani lawo liye landa lafinyelela kwangu-850 emazweni angu-65. Lokho kusho ukuthi izinkonzo zawo eziwusizo manje zitholakalela oFakazi BakaJehova abangaba izigidi ezingu-3,5.

Abadala abangaphezu kuka-4 500 emabandleni oFakazi BakaJehova baye baqeqeshelwa ukukhuluma nodokotela ukuze babasize ukuba babone kuzo kanye izincwadi zezokwelapha zonke izinto ezingase zenziwe ngaphandle kokuphendukela ekumpompeleni igazi. Ezimweni lapho kunesidingo esikhethekile khona, izihloko ezifanelekayo zithunyelwa esibhedlela ngokuqondile nge-fax ukuze zisize odokotela bakwazi ukwelapha oFakazi ngaphandle kokusebenzisa igazi. Noma lamakomiti ahlela ukuxoxisana nabanye odokotela ababambisana nawo ukuze basungule izindlela zokwelapha noma ukuhlinza ezingalisebenzisi igazi.

Ngokwesibonelo, ezimweni eziningi lapho ukulahlekelwa igazi kuye kwaholela ekuntulekeni okukhulu kwamangqamuzana abomvu, lapho odokotela bathi khona kudingeka kumpotshelwe igazi ukuze kukhushulwe isilinganiso samangqamuzana abomvu, amalungu amaKomiti Okuxhumana Nezibhedlela aye akwazi ukuhlanganyela izihloko ezivela ezincwadini zezokwelapha ezibonisa ukuphumelela kwe-erythropoietin (EPO) eyinhlanganisela ekwenzeni into efanayo. Le-hormone yokwenziwa isebenza njenge-erythropoietin yemvelo etholakala ezinsweni zethu futhi eyenza ukuba umnkantsha osemathanjeni uthumele amangqamuzana abomvu amasha egazini.

Abanye odokotela baye baba nomuzwa wokuthi i-EPO ngeke isebenze ngokushesha ngokwanele ukuze ihlangabezane nesidingo, kodwa izimo eziningi ezihilela oFakazi BakaJehova ziye zabonisa indlela esheshe ibe nemiphumela ngayo. Ngesinye isikhathi, ngalo kanye usuku isiguli esanikezwa ngalo i-EPO, isilinganiso samangqamuzana abomvu amasha kakade sase singaphezu kwesivamile ngokuphindwe kane! Ngosuku olulandelayo isiguli sasimama, futhi ngosuku lwesine, isilinganiso samangqamuzana abomvu saqala ukukhuphuka. Ezinsukwini ezimbalwa ezalandela, sasikhuphuka ngokushesha. Isiguli salulama. Ngalendlela odokotela kanye nesiguli bazuza emisebenzini yalamaKomiti Okuxhumana Nezibhedlela.

E-Australia lapho odokotela bethi babengenakukwazi ukusindisa ukuphila kwesiguli esiwuFakazi ngaphandle kokusebenzisa igazi ekwelapheni isifo esingavamile sasezindaweni ezishisayo, babuza iKomiti Yokuxhumana Nezibhedlela yendawo ukuthi lukhona yini usizo eyayingalunikeza ngokuqondene nokuthola ukwaziswa okuphathelene nendlela yokwelapha engasebenzisi igazi. Ihhovisi legatsha loFakazi BakaJehova lase-Australia laziswa ngalesidingo. Laxhumana noMnyango Wokwaziswa Okuphathelene Nezibhedlela emahhovisi endlunkulu yomhlaba wonke yoFakazi BakaJehova eBrooklyn, eNew York. Lacwaninga nge-computer enokwaziswa kwezokwelapha. Izihloko eziwusizo zathunyelwa nge-fax e-Australia. Ngemva nje kwamahora angu-11 kuphela liphumile ehhovisi likadokotela, ilungu leKomiti Yokuxhumana Nezibhedlela yase-Australia lase libuyile nezihloko ezazidingeka. Lezizihloko zasebenza, futhi isiguli salulama. Ukwaziswa kwezokwelapha okuthunyelwa nge-fax kuye kwathunyelwa kusuka eNew York kuya ezindaweni ezikude njengaseNepal.

Ukucwaninga Okusezingeni Eliphezulu Nosizo

Izinga lokucwaninga okwenziwa oFakazi BakaJehova ezincwadini zezokwelapha liphakeme kakhulu futhi lihambisana nesikhathi. Umhlengikazi obhaliswe ngokusemthethweni oyisekela lomqondisi emnyangweni wokuhlinza esibhedlela sase-Oregon, e-U.S.A., wathi esihlokweni esisencwadini yezokwelapha yabaphathi bamagumbi okuhlinzela: “[O]Fakazi [Ba]kaJehova . . . [ba]thuthuke kakhulu kunathi. Banolwazi oluningi kakhulu ngokuphathelene nezinye izindlela zokwelapha ngaphandle kwegazi nemikhiqizo yegazi futhi ngokuvamile basinikeza izincwadi ngaphambi kokuba sizwe nokuzwa ngazo.”—OR Manager, January 1993, ikhasi 12.

Abanye odokotela abavelele nezikhungo zokwelapha ezinabantu abakwaziyo ukwelapha ngaphandle kokusebenzisa igazi elivela kwabanye abantu baye bavuma ukuba kuxoxwe nabo ngokuphathelene nezindlela nezinqubo abazisebenzisayo. Ukusabela kwabo ngomusa kulesidingo kuye kwasiza ekusindiseni ukuphila, njengoba kubonakala ekwelapheni ngokuphumelelayo i-leukemia nasezinhlotsheni ezihlukahlukene zokuhlinza. Lokhu kuxoxisana kwezokwelapha ngokuvamile kwakwenziwa ngezingcingo ezifinyelela emhlabeni wonke.

Okunye okubonisa izinga oFakazi BakaJehova abaye bafinyelela kulo ukuze basize labo abadinga usizo lapho bebhekene nesimo sokwelapha esibekela ukholo inselele kuye kwaba ilungiselelo lokususa isiguli kwesinye isibhedlela siyiswe kwesinye, ukusuka engxenyeni ethile yezwe kuya kwenye, ngisho nokusuka kwelinye izwe kuya kwelinye. Nazi ezinye izibonelo: Isiguli esingumuntu omdala sasuswa ngendiza eSuriname sathunyelwa ePuerto Rico; esinye sasuswa ngendiza eSamoa sathunyelwa eHawaii; usana, lwasuswa e-Austria lwayiswa eFlorida, e-U.S.A.

Odokotela Abengeziwe Babambisana Nabo

Intuthuko esimweni soFakazi BakaJehova ingabonakala nasenanini elandayo lodokotela abazimisele ukubambisana nabo kulendaba, kusukela kwabangaba ngu-5 000 eminyakeni emihlanu edlule kuya kwabangaphezu kuka-30 000 manje emazweni angu-65. Lelonani lodokotela abanekhono liye lenza kwaba nenye intuthuko enhle—ukumiswa kwezikhungo zokwelapha nokuhlinza ngaphandle kwegazi ezingaphezu kuka-30 emazweni ahlukahlukene.

Ngakho, ezinsukwini zanamuhla, okungenani eNyakatho Melika, umuntu akasezwa ngemizamo yokuphoqelela ukumpontshelwa igazi kumuntu omdala, futhi amanye amazwe amaningi athuthukela kulelozinga. Izinkinga eziningi manje zihilela izinsana ezisanda kuzalwa futhi ikakhulukazi abantwana abazelwe ngaphambi kwesikhathi. Labantwana abazalwe ngaphambi kwesikhathi bavela benezinkinga eziningi ezihlobene nezitho ezingakakhuli ngokwanele ezingasebenzi kahle, njengamaphaphu nezinso. Kodwa odokotela bathola izindlela zokulapha lezizimo ngaphandle kokumpompela igazi. Ngokwesibonelo, ingxube yokwenziwa eyenza amaphaphu anganamathelani iyatholakala ukuze iqede isifo esihlobene nezinkinga zokuphefumula. Ukusetshenziswa kwe-EPO kwamukelwa kabanzi ngokuqhubekayo ekulwisaneni nokuntuleka kwamangqamuzana abomvu okubangelwa ukuzalwa kwengane ngaphambi kwesikhathi.

Usizo Olutholwa Izisebenzi Nezikhulu Zezokwelapha

Ukuze kusizwe odokotela babantwana abakhulakhulile nabezinsana ezisanda kuzalwa ukuba balaphe izingane zoFakazi BakaJehova ngaphandle kokumpontshelwa igazi, uMnyango Wokwaziswa Okuphathelene Nezibhedlela uye wanyathelisa umqulu onohlu lwezihloko oluhlukene izigaba ezintathu onezihloko ezingu-55 ezivela ezincwadini zezokwelapha ezibonisa ukuthi yini engase yenziwe ngaphandle kokusebenzisa igazi ekuxazululeni izinkinga eziningi zezinsana ezisanda kuzalwa.

Ukuze amajaji, izisebenzi zezenhlalakahle, izibhedlela zabantwana, odokotela bezinsana ezisanda kuzalwa, nodokotela babantwana asebekhulakhulile, bonke bafinyelelwe ngokwaziswa okuphathelene nezinye izindlela zokwelapha ngaphandle kwegazi, oFakazi BakaJehova ngokukhethekile baye banyathelisela lezisebenzi nezikhulu zezokwelapha umqulu onamakhasi angu-260 othi Family Care and Medical Management for Jehovah’s Witnesses.a Uyincwadi enamakhasi aphuma kalula ukuze uhlale uthuthukiswa. Njengoba kuye kwaba nokungaqondwa kahle kokuphila komkhaya phakathi koFakazi BakaJehova, ubuye ucacise uthando abazali abanalo ngabantwana babo esimweni esizuzisa ngempela, nesokunakekela esibangelwa indlela yokuphila ekhuthazwa imfundiso yeBhayibheli.

Yamukelwa kanjani leyoncwadi? Ngemva kokuhlola ekuqukethe, isekela likamongameli wesibhedlela sabantwana ePennsylvania, e-U.S.A., lathi lalilindele ukuba izisebenzi ezingaphansi kwalo ziyifunde zizindle ngayo futhi ziyisebenzise. Lanezela: “Uma ibuya amakhasi engagobekile emachosheni futhi isesimweni esikahle, ngiyofuna ukwazi isizathu!” Kakade amanye amajaji aye alungisa imiyalo yawo enkantolo ukuba ifune ukuba odokotela bazame zonke izindlela ezihlukile ezingasebenzisi igazi ngaphambi kokuba basebenzise igazi. Abantwana baye belashwa ngaphandle kwegazi futhi baphindela ekhaya beluleme.

Ukusabela okubonisa okufanayo kwakungokwejaji lezindaba zabantwana e-Ohio, e-U.S.A. Lahlatshwa umxhwele kakhulu umqulu othi Family Care kangangokuba la-odela elisebenza nabo amanye amakhophi ayisikhombisa. Manje liguqula imiyalo yalo yenkantolo ukuze lenze ukukhathalela kukadokotela namalungelo abazali kulingane, lokhu likwenza ngezindlela ezimbili. Emyalweni walo likubeka ngokucacile ukuthi (1) odokotela kumelwe baqale bazame zonke ezinye izindlela ezihlukile zokwelapha ngaphambi kokusebenzisa igazi; nokuthi (2) odokotela kumelwe baliqinisekise ukuthi igazi abazolisebenzisa lihloliwe nokuthi alinayo ingculaza nesifo sokusha kwesibindi. Emiyalweni emithathu eyakhishwa selokhu liqalile ukuyishintsha, bobathathu abantwana belashwa ngokuphumelelayo ngaphandle kokumpontshelwa igazi.

UDkt. Charles H. Baron, uprofesa wesifundo sezomthetho eBoston College Law School, waletha iphepha ngonyaka odlule emhlanganweni wamalungu enhlangano yemfundo eYunivesithi yaseParis. Isihloko sakhe sasithi “Igazi, Isono, Nokufa: OFakazi BakaJehova Nenhlangano YaseMelika Evikela Amalungeno Eziguli.” Kuleliphepha, isigaba esilandelayo sasho lokhu ngokuqondene nomsebenzi wamaKomiti Okuxhumana Nezibhedlela oFakazi:

“Aye akwazi ngisho nokwenza inhlangano yezokwelapha yaseMelika ukuba ibuye izicabangele izinkolelo zayo ngenxa yobufakazi obengeziwe esinabo. Phakathi nalesisikhathi, wonke umphakathi waseMelika uye wazuza. Akubona oFakazi BakaJehova kuphela, kodwa neziguli zizonke, namuhla cishe azimpontshelwa igazi ngokungadingekile ngenxa yomsebenzi wamaKomiti Okuxhumana Nezibhedlela oFakazi. Iziguli zizonke zijabulela inkululeko ethé xaxa yokukhetha ezinqumweni zokunakekela impilo eziningi kakhulu ngenxa yomsebenzi woFakazi njengengxenye yenhlangano evikela wonke amalungelo eziguli. Futhi izimbangela zenkululeko evamile nenkululeko engokwenkolo ngokuyinhloko zithuthukiswe ukumelana koFakazi ngokuzimisela nemizamo yokubaphoqelela ukuba bathathe isinyathelo esingavumelani nezinkolelo zabo ezingokwenkolo.”

Wonke lomsebenzi owenzisa amaKomiti Okuxhumana Nezibhedlela ungase ungabi ukushumayela ngokuqondile izindaba ezinhle zoMbuso kaNkulunkulu, kodwa ngokuqinisekile unikeza impendulo enseleleni eyabekelwa ukukhulekela kwethu kulokho indikimba ebusayo yekhulu lokuqala eyakubiza ngokuthi enye ‘yezinto ezifunekayo’ enkonzweni yethu engcwele. (IzEnzo 15:28, 29) Nokho, ngokuthakazelisayo umzamo wethu esiwenza ngokuqiniseka kodwa ngesizotha wokuxhumana nabanye uye wavula indlela yokuba abanye ochwepheshe bezokwelapha basabele esigijimini soMbuso. Amalungu amaningana amaKomiti Okuxhumana Nezibhedlela aye aqalisa izifundo zeBhayibheli nodokotela ababathola lapho benza lomsebenzi wekomiti, ababili bodokotela abanjalo muva nje baye babhapathizwa.

Ngakho ngosizo lwelungiselelo leKomiti Yokuxhumana Nezibhedlela, oFakazi BakaJehova bayasizwa ukuba balalele umthetho kaJehova ophelele ophathelene nokugwema igazi, bengayekethisi ebuqothweni babo kuyilapho beqhubeka bethola ukunakekela okudingekayo kwezokwelapha. (IHubo 19:7) Ngempela kuye kwaphumelela kahle ngokuqhubekayo ekuvaleni igebe elake laba khona. Odokotela nezibhedlela manje bazi kangcono ukuthi bangazisebenzisa kanjani izindlela ezikhona zokwelapha ezingasebenzisi igazi. Ezigulini, izihlobo, abantu abakholwa kanye nabo, izisebenzi zasesibhedlela, lokhu kuveza lokho wonke umuntu akufunayo—ukululama okunempilo kwesiguli.—Inikelwe uMnyango Wokwaziswa Okuphathelene Nezibhedlela endlunkulu yomhlaba wonke ye-Watch Tower Society.

[Umbhalo waphansi]

[Isithombe ekhasini 25]

IKomiti Yokuxhumana ixoxa nodokotela

[Isithombe ekhasini 26]

I-“Family Care”