Sondela KuNkulunkulu
“Izinto Zangaphambili Ngeke Zikhunjulwe”
IZINKUMBULO zingaba yisibusiso. Ukucabanga ngezikhathi ezimnandi esizichitha nabantu esibathandayo kungasithokozisa. Kodwa ngezinye izikhathi izinkumbulo zingabonakala ziyisiqalekiso. Ingabe ukhathazwa izinkumbulo ezibuhlungu zezinto ezibuhlungu ezakwehlela? Uma kunjalo, ungase uzibuze, ‘Ingabe lezi zinkumbulo ezingibangela usizi ziyoke zilibaleke engqondweni?’ Sithola impendulo eduduzayo emazwini alotshwa umprofethi u-Isaya.—Funda u-Isaya 65:17.
UJehova uhlose ukususa imbangela yezinkumbulo ezibuhlungu. Kanjani? Ngokuqeda leli zwe elibi nabo bonke ubuhlungu elibubangelayo, esikhundleni salo kube nokuthile okuhle okuyohlala njalo. Esebenzisa u-Isaya, uJehova uyathembisa: “Bheka ngidala amazulu amasha nomhlaba omusha.” Ukuqonda lesi sithembiso kungagcwalisa izinhliziyo zethu ngethemba.
Ayini amazulu amasha? IBhayibheli lisinika izinto ezimbili ezingasisiza sithole impendulo. Okokuqala, nabanye abalobi ababili beBhayibheli bayakhuluma ngamazulu amasha, futhi kuzo zombili izindawo la magama ahlobene nezinguquko ezinkulu eziyokwenzeka emhlabeni. (2 Petru 3:13; IsAmbulo 21:1-4) Okwesibili, eBhayibhelini igama elithi “amazulu” lingamelela ukubusa noma uhulumeni. (Isaya 14:4, 12; Daniyeli 4:25, 26) Ngakho, amazulu amasha awuhulumeni omusha oyokwazi ukuletha izimo ezinokulunga emhlabeni. Munye kuphela umbuso okwazi ukwenza konke lokho—uMbuso kaNkulunkulu, uhulumeni wasezulwini uJesu asifundisa ukuwuthandazela. Lowo Mbuso uyokwenza ukuba intando kaNkulunkulu elungile yenziwe emhlabeni wonke.—Mathewu 6:9, 10.
Uyini umhlaba omusha? Cabangela amaqiniso amabili eBhayibheli asisiza ukuba sifinyelele esiphethweni esifanele. Okokuqala, eBhayibhelini igama elithi “umhlaba” ngezinye izikhathi libhekisela kubantu, hhayi embulungeni ewumhlaba. (IHubo 96:1) Okwesibili, iBhayibheli labikezela ukuthi ngaphansi kokubusa kukaNkulunkulu, abantu abathembekile bayofunda ukulunga okuyogcwala umhlaba wonke. (Isaya 26:9) Ngakho, umhlaba omusha ubhekisela emphakathini wabantu abazithoba ngaphansi kokubusa kukaNkulunkulu, baphile ngezindinganiso zakhe zokulunga.
Ingabe uyayibona indlela uJehova ayoqeda ngayo imbangela yezinkumbulo ezibuhlungu? Maduze nje uJehova uzosigcwalisa ngokuphelele isithembiso sakhe samazulu amasha nomhlaba omusha, alethe ubulungisa emhlabeni omusha.a Kulowo mhlaba omusha, izimbangela zezinkumbulo ezibuhlungu—ukuhlukumezeka ngokomzimba, ngokwengqondo nangokomzwelo—ziyoba izinto esezadlula. Abantu abathembekile bayojabulela ukuphila ngokugcwele futhi bazazise izinkumbulo ezimnandi zosuku nosuku.
Kuthiwani-ke kodwa ngobuhlungu obusezinhliziyweni zethu njengamanje? Isithembiso sikaJehova ngo-Isaya siyaqhubeka: “Izinto zangaphambili ngeke zikhunjulwe, futhi ngeke zifike enhliziyweni.” Noma yibuphi ubuhlungu esike sabuzwa kuleli zwe elidala buyophela kancane kancane. Ingabe lesi sithembiso siyakujabulisa? Uma kunjalo, sicela uthole ukuthi ungasondela kanjani kuNkulunkulu othembisa ikusasa elihle kangaka.
Izahluko zeBhayibheli ongazifunda ngo-March:
[Umbhalo waphansi]
a Ukuze uthole ukwaziswa okwengeziwe ngoMbuso kaNkulunkulu nalokho ozokwenza maduze, bheka izahluko 3, 8, no-9 zencwadi ethi Lifundisani Ngempela IBhayibheli? enyatheliswa oFakazi BakaJehova.
[Amazwi acashunwe esihlokweni ekhasini 19]
UJehova uhlose ukususa imbangela yezinkumbulo ezibuhlungu