ODeveli Abasinayo Baseyare

KWAKUSESEMINI yasekuseni kodwa lase likhipha inhlanzi emanzini. Njengoba sibukela iqembu lamadoda avunule aconsa ngezendabuko, sasizibuza ukuthi akubekezelela kanjani lokhu kushisa okukhipha umkhovu etsheni! Sasivakashele idolobha elincane lezolimo eSan Francisco de Yare, eVenezuela. La madoda avunulile kwakungama-Diablos Danzantes de Yare odumo, oDeveli Abasinayo BaseYare.

Iningi labantu eVenezuela lingamaKatolika futhi lithi liyakholelwa eBhayibhelini. Noma kunjalo, sekudlule izizukulwane eziningi ukusina okuwumkhuba okulingisa amademoni kufeza ingxenye ebalulekile emasikweni endawo. ISonto LamaKatolika aliyishalazeli nje le ndlamu kodwa eqinisweni liyayigqugquzela. Kunjalo nangoDeveli Abasinayo BaseYare.

Lapho sesifikile eYare, sabamba ongezansi lapho sibona ukuthi indlunkulu yakule ndawo ye-Brotherhood of the Most Holy Sacrament, inhlangano yamaKatolika, iphinde ibe indlunkulu yalabodeveli abasinayo. Lesi sakhiwo sibizwa ngokuthi i-Casa de Los Diablos (Indlu YoDeveli). KwakungoLwesithathu, usuku olungaphambi kwedili lamaKatolika iCorpus Christi, futhi kwakunabathwebuli bezithombe abaningana ababelinde ngaphandle. Ngokungazelele kwabe sekuzwakala umsindo omkhulu wezigubhu, kwathi amadoda amaningana agqokise okwamademoni aqala ukusina.

Izingubo ZoDeveli Abasinayo

Umuntu ngamunye osinayo wayegqoke iyembe elibomvu, ibhulukwe elibomvu, amasokisi abomvu nezimbadada. Ngamunye wayefake irosali, isiphambano nendondo yamaKatolika entanyeni. Esinye isiphambano sasiboshelwe ezingutsheni. Ngamunye wayephethe i-maraca ebukeka njengekaDeveli, kwesinye ephethe isiswebhu esifushane. Kodwa okwakuphawuleka kakhulu kwakuyizifihla-buso ezinkulu, ezethusayo, ezinemibalabala, ezinezimpondo, izimbumbulu zamehlo futhi ngokuvamile zinamazinyo asinekile. Isifihla-buso ngasinye sasinamatheliswe endwangwini ende esasigqoko ebomvu.

Sathola ukuthi kunezinhlobo ezihlukene zabasini. I-capataz enkulu, noma igosa, yaziwa nangokuthi i-diablo mayor, noma udeveli omkhulu. I-mask yakhe inezimpondo ezine. Ngokuvamile ikhethwa ngenxa yesikhathi sayo eside eqenjini. Isekela legosa, noma i-segundo capataz, linezimpondo ezintathu, kanti abasini abavamile abangenazikhundla banezimbili. Abanye abasini bangama-promeseros, abantu abagcina isithembiso sokuthi bazosina kanye ngonyaka iminyaka ethile, noma ukuphila kwabo konke. Lesi sithembiso, noma isifungo, ngokuvamile senziwa abantu abakholelwa ukuthi uNkulunkulu uphendule isicelo sabo esikhethekile.

Kuyiwa Esontweni

Emini bebade, laba basini bayaphuma endlunkulu yabo baphikelele esontweni lendawo beyothola imvume yompristi kulo mgidi wabo. Odeveli abasinayo bahlangana nompristi ngaphandle kwesonto. Babe sebeguqa ukuze bathole isibusiso. Bese besina emigwaqweni yedolobha, ngezinye izikhathi basine endlini ngendlu. Ngokuvamile abaninikhaya bababingelela ngoswidi, iziphuzo nokunye ukudla. Lo mgidi uqhubeka intambama yonke.

Ngakusasa ekuseni lapho kuqala iMisa esontweni, abasini bayahlangana futhi e-Casa de Los Diablos. Banyakazisa ama-maraca abo kanye kanye bese besuka lapho behamba besina belibangise emathuneni, behambisana nesigqi sezigubhu. Sekwakhiwe i-altare emathuneni, phambi kwalo badumisa abangane abathandekayo asebafa. Phakathi nalo mkhosi izigubhu ziyanensa. Ngemva kwalokho, ngenxa yokwesaba okusekelwe kuyinkolelo-ze, baphuma nyovane emathuneni, baqikelele ukuthi abalifulatheli i-altare. Uma besuka lapho baya esontweni, balinde iMisa ukuba liphele.

Isibusiso Sompristi

Ekupheleni kweMisa, umpristi uyaphuma abusise abasini, abasuke beguqile futhi begebise amakhanda, izifihla-buso zabo zilenga ezindwangwini, okuwumfanekiso wokunqoba kokuhle kunqoba okubi. Umpristi uhlala eduze kukadeveli omkhulu. Bobabili balalela izifungo zama-promesero amasha, ezichaza izizathu zokwenza kwazo izifungo zokusina nokuthi zizosina iminyaka emingaki.

Abashayi bezigubhu baqala ukuzishaya basheshe, bese odeveli abasinayo benanela ngokunyakazisa imizimba nama-maraca abo ngamandla behambisana nejubane elinyukayo. Abesifazane nabo bayasina kodwa hhayi ngezingubo zodeveli. Bagqoka iziketi ezibomvu, amayembe amhlophe futhi bashuqule imishuqulo emhlophe noma ebomvu. Phakathi nalo mgidi, abanye odeveli abasinayo bathwala isithombe sosanta babo emahlombe. Laba basini baphothula lokhu ngokumasha phambi kwesonto, ngemva kokuhlonipha isiphambano esikhulu esisedolobheni.

Akukhona OkoFakazi BakaJehova

Lokhu kwaba okuhlangenwe nakho okuthakazelisayo kithi njengezivakashi. Ngesikhathi sivakashele edolobheni elincane laseYare, sasingeke singaziqapheli izinto ezazenziwa njengoba kwakunodeveli abadansayo. Nokho, thina maKristu, njengoFakazi BakaJehova baseVenezuela abangaphezu kuka-70 000, asihlanganyeli edilini loDeveli Abadansayo BaseYare noma ezenzakalweni ezifuze lesi.

Kungani? Kungoba silalela amazwi omphostoli uPawulu: “Angifuni ukuba nibe abahlanganyeli namademoni. Anikwazi ukuphuza indebe yeNkosi nendebe yamademoni; anikwazi ukudla etafuleni leNkosi nibe nidla etafuleni lamademoni.” (1 Korinte 10:20, 21, New American Bible)—Inikelwe.