Isifundo 29
Okuqephuzayo, Ukunikezwa Kwengxoxo Nokuphinyiselwa Kwamazwi Okufanele
1-4. Shono uhidi lonobangela nezimpawu zokuntuleka kokuqephuza.
1 Lapho uma phambi kwezilaleli ukunikeza inkulumo, ingabe uzifumana kaningi uswele amazwi afanele na? Noma, lapho ufunda ngezwi elikhulu, ingabe uyangingiza emazwini athile na? Uma kunjalo, unenkinga ngokuqephuza. Umuntu oyiqaqhuqaphu ngonamazwi alungele ukusetshenziswa. Akusho i“washuwashu,” okungukuthi, umuntu ongacabangeli noma okhululeke nangokungenaqiniso ngamazwi. Yinkulumo ebushelelezi noma enomusa ngokujabulisayo, entuluka kalula noma ngenkululeko. Ukuqephuza kufakwe ohidini epheshaneni Leseluleko Senkulumo ukuze kunakekelisiswe.
2 Ekukhulumeni, onobangela abavame kakhulu bokuntuleka kokuqephuza wukuntuleka kokucabanga okukhanyayo nokulungiselelwa kwendaba. Kungabangelwa nangamazwi enkulumo abuthakathaka noma ukukhethwa okubana kwamazwi. Ekufundeni, ukuntuleka kokuqephuza ngokuvamile kungenxa yokuntuleka kokuzijwayeza ukufunda ngezwi elikhulu, nakuba nalapha ukuntuleka kolwazi lwamazwi kuyobangela ukungingiza noma ukukhukhuza. Enkonzweni yasensimini, ukuntuleka kokuqephuza kungaba-wukuhlanganiswa kwalezizisusa kanye nokuba-novalo noma ukungaqiniseki. Lapho lenkinga yimbi kakhulu ngokuba ngezinye izikhathi izilaleli zakho ziyakukuduba zikushiya. EHolweni loMbuso izilaleli zakho azinakukuduba zikushiye kepha izingqondo zazo ziyozulazula nokuningi kwalokho okushoyo kuyolahleka. Njalo yindaba engathi sina; ukuqephuza kuyimfanelo emelwe izuzwe ngempela.
3 Izikhulumi eziningi zinesijwayezo esenyelisayo sokufaka amazwi anjengo“kushʼukuthi” noma afanayo “amazwi angasho-lutho.” Uma ungazi ngokuvama owengeza ngakho amazwi anjalo enkulumweni yakho, ubungahle uzame isikhathi sokuzijwayeza okunomunye ozakulalela ngaso futhi aphindaphinde lamazwi ekulingisela ngesinye nesinye isikhathi lapho uwasho. Ubungahle umangale.
4 Abanye abantu njalo bakhuluma ngokuhlehla, okungukuthi, beqalisa umusho, bese bethula baqalise futhi. Uma uhlushwa yilenjwayelo embi, zama ukuyinqoba engxoxweni yakho yansuku zonke. Zama ngokuzimisele ukucabanga kuqala bese ukhanyelwa ngumcabango engqondweni. Bese ukhuluma umcabango ophelele ngaphandle kokuthula noma ukuguqula imiqondo “phakathi naphakathi.”
5-10. Yini esikiselwayo ukuthuthukisa ukuqephuza kwesikhulumi na?
5 Enye into. Sijwayele ukusebenzisa amazwi njengoba sikhuluma. Njalo amazwi afanele azifikele uma sikwazi ngokuyikho du lokho esifuna ukukusho. Awudingi ukucabanga ngamazwi. Eqinisweni, kuhle kakhulu ngenxa yokuzijwayeza ukuqiniseka nje ukuthi umqondo uyakukhanyela futhi cabanga ngamazwi njengoba uqhubeka. Uma kunjalo, futhi uma ulokhu ucabanga ngomqondo kunangamazwi owakhulumayo, amazwi afanele azifikele nemicabango yakho ifanele ishiwo njengoba uyicabanga ngempela. Kepha masinyane lapho uqala ukucabanga ngamazwi kunangemiqondo uyongingiza.
6 Uma inkinga yakho ngokuqephuza kuyindaba yokukhethwa kwamazwi, kubizela-ke ukufunda okuvamile ngokwakha amazwi olimi. KuNqabayokulinda nezinye izincwadi zeSociety qaphelisisa amazwi ongawaziyo bese ungeza amanye awo emazwini akho ansuku zonke olimi.
7 Njengoba ukuntuleka kokuqephuza ekufundeni ngokuvamile kubangelwa ukungawazi amazwi, ubuyokwenza kahle ukuzijwayeza ukufunda ngezwi elikhulu njalo nangomthetho uma lokhu kuyinkinga yakho.
8 Enye indlela okungenziwa ngayo lokhu ukukhetha isigaba esisodwa noma ezimbili zendaba bese uyifundisisa futhi ngokuthulile uze uwazi wonke umcabango walengxenye. Hlukanisa amaqembu emicabango, uwaphawula uma kudingekile. Bese uqala ukuzijwayeza ukufunda lengxenye ngezwi elikhulu. Ngokufundiswa okuhle, yifunde ngokuphindaphindiwe uze ukwazi ukuwafunda onke amaqembu emicabango ngaphandle kokukhukhuza nakanye noma ukuthula ezindaweni ezingafanele.
9 Amazwi ongawazi noma anzima afanele aphinyiselwe ngokuphindaphindiwe uze ukwazi ukuwasho kalula. Ngemuva kokwazi ukusho izwi lilodwa, funda-ke wonke umusho kuhlanganise nalelozwi uze ukwazi ukulengeza emshweni kalula njengoba ukwazi kalula amazwi owazi kakhulu.
10 Zijwayeze nokufunda ngokuqabuka njalo. Ngokwesibonelo, njalo funda itekisi losuku nokubekwa kwamazwana ngezwi elikhulu uqala ukukubona. Zijwayeze ukuvumela amehlo akho athathe amazwi njengamaqembu, esho imicabango ephelele, kunokubona izwi elilodwa nje ngesikhathi. Uma uzijwayeza, ungayinqoba lemfanelo ebalulekile yokuphumelelayo ukukhuluma nokufunda.
**********
11-15. Imfanelo yengxoxo yencike kanjani ezinkulumweni ezisetshenzisiwe na?
11 Olunye uphawu lwenkulumo oluthandekayo olulotshwe epheshaneni leseluleko yi“Mfanelo yengxoxo.” Kungokuthile onakho empilweni yansuku zonke, kepha ingabe unayo lapho usukumela ukunikela inkulumo na? Sengathi nje, abantu abaxoxa kalula ngisho naneqembu elikhulu bavame ukulandela isimiso kakhulu futhi ba“thambekele ukushumayela” lapho bebizelwa ukulungiselela ngaphambili uku“nikeza inkulumo.” Kanti indlela ephumelelayo kakhulu yokukhuluma obala yindlela yengxoxo.
12 Izinkulumo zengxoxo zisetshenzisiwe. Okukhulu ukuphumelela kwenkulumo yengxoxo kwencike ezinkulumweni ezisetshenziswayo. Ekulungiseleleni inkulumo engahloswanga, ngokuvamile akulungile ukuphindaphinda izinkulumo njengoba zilotshiwe. Indlela yokuloba yahlukile ezwini elikhulunywayo. Njalo lungisa lemiqondo ngokwendlela yakho yokukhuluma. Xwaya ukusetshenziswa kwesakhiwo semisho eyinkimbinkimbi.
13 Inkulumo yakho endaweni yesikhulumi ifanele ibonise inkulumo yakho yansuku zonke. Awufanele uzame uku“ziqhenya.” Nokho, inkulumo yakho elungiselelwe ngokuvamile iyokuba-wukuthuthukiswa kwenkulumo yakho yansuku zonke, njengoba imiqondo yakho icatshangelwe ngokunakekela kakhulu ngaphambili futhi iyofika ngokuqephuza okukhulu kakhulu. Ngakho-ke, izinkulumo zakho uqobo lwazo zifanele zishiwo kangcono.
14 Lokhu kugcizelela ukubaluleka kokuzijwayeza kwansuku zonke. Ekukhulumeni, ungazenzisi. Xwaya isihumusha. Xwaya ukuphindaphindwa njalo kwezinkulumo ezifanayo nemishwana ukunikeza yonke imicabango eyahlukene obungahle ube-nayo. Funda ukukhuluma ngokunengqondo. Qhosha ngengxoxo yakho yansuku zonke, nalapho usendaweni yesikhulumi, amazwi ayofika masinyane kakhulu futhi uyokwazi ukukhuluma ngemfanelo yengxoxo eyokhanya, ibe-lula futhi ithandeke kunoma yiziphi izilaleli.
15 Lokhu kunjalo ikakhulu enkonzweni yasensimini. Nasezinkulumweni zakho zabafundi, uma uxoxa nomninindlu, zama ukuxoxa sengathi ubusenkonzweni yasensimini, usebenzisa izinkulumo obuyozisebenzisa lapho ngendlela yemvelo nelula. Lokhu kuyokwenza inkulumo engengasimiso neyoqobo, nokubaluleke ngaphezulu, kuyokufundisela ukunikela okuphumelelayo ngaphezulu enkonzweni yasensimini.
16-19. Shono indlela ukunikela okungathinta ngayo imfanelo yengxoxo.
16 Eyengxoxo indlela yokunikela. Imfanelo yengxoxo ayenciki kuphela ezinkulumweni ezisetshenziswayo. Isimo sakho noma indlela yokunikela nayo ibalulekile. Lokhu kuhilela isimo sezwi, ukuguquka kwezwi nesimo semvelo senkulumo. Kuyazenzekela njengokukhuluma kwansuku zonke, nakuba kukhulisiwe ezilalelini.
17 Ukunikezwa kwengxoxo kuphambene-ngqo nobuntwesi benkulumo. Kuntula yonke imisuka yokunikela koku“thambekela ukushumayela” futhi akunabo bonke ubuzenzisi.
18 Enye indlela imfanelo yengxoxo evame ukulahleka ngayo ezikhulumini eziqalisayo kungokulungiselela ngempela kakhulu ngaphambili ukubekwa kwamazwi endaba. Ekulungiseleleni ukunikela, musa ukucabanga ukuthi ufanele uphinde inkulumo izwi ngezwi uze uyazi cishe ngekhanda ukuze ube-ngolungiselele ngokufanele. Ekukhulumeni okungahloswanga, ukulungiselela ukunikela kufanele kugcizelele ukubukezwa okuhle kwemiqondo emelwe ishiwo. Lena ifanele ibukezwe njengemicabango noma imiqondo ize ilandelane kalula engqondweni yakho. Uma ithuthukiswe ngomqondo ohlelekile futhi icetshwe kahle lokhu akufanele kube-nzima, nasekunikezweni kwenkulumo imiqondo ifanele ifike ngenkululeko nakalula. Uma kunjalo, futhi uma ishiwo ngesifiso sokukhulumisana, imfanelo yengxoxo iyokuba-yingxenye yokunikela.
19 Enye indlela ongaziqinisekisa ngayo ngalokhu kuwukuzama ukuxoxa nabantu ngabanye abahlukene ezilalelini. Khuluma ngokuqondile nomunye ngesikhathi. Cabanga ngalowomuntu njengobuze umbuzo, bese uwuphendula. Zifanekise uxoxa ngasese nalowomuntu ekuthuthukiseni lowomcabango othile. Bese udlulela komunye ezilalelini futhi uphinda yona leyonqubo.
20-23. Umuntu angenza kanjani ukufunda kwakhe kuzwakale kungokwemvelo na?
20 Ukulondoloza eyengxoxo indlela yokunikela ekufundeni ngenye yezimfanelo ezinzima kakhulu zenkulumo zokufundwa kahle, kanti ngenye yezibaluleke kakhulu. Okuningi ukufunda kwethu kwasobala, phela, kuvela eBhayibhelini, ngokufunda amatekisi ahlangene nenkulumo engahloswanga. IBhayibheli lifanele lifundwe ngokuzwela nokuqaphelisisa incazelo. Kufanele kushise. Ngenye indlela, izikhonzi zikaNkulunkulu zeqiniso azinakulingisa nanini ukuguquka kwezwi kobuzenzisi kwabefundisi benkolo. Izinceku zikaJehova ziyofunda iZwi lakhe ngokugcizelela kwemvelo nokungazenzisi koqobo okufanelwe wulimi olushisayo lwaleNcwadi.
21 Okufanayo kakhulu kunjalo ngokufunda INqabayokulinda noma ukubukeza izigaba esifundweni sencwadi. Nalapha, izinkulumo nezakhiwo zemisho azihloselwanga ingxoxo, njalo ukufunda kwakho akukwazi ukuzwakala njalo njengengxoxo. Kepha, uma uthola ingqondo yalokho okufundayo futhi ukufunda ngokwemvelo nangokunengqondo ngamandla akho onke, kaningi ungakwenza kuzwakale sengathi bekuyinkulumo engahloswanga, nakuba mhlawumbe ngokulandela umthetho ngaphezudlwana kunalokho obungakusebenzisa ngokuvamile. Kufanele kube-yinjwayelo yakho-ke, ukuloba noma yiziphi izimpawu eziyokusiza, uma ungalungiselela ngaphambili, futhi yenza ngamandla akho onke ukunikela indaba ngendlela yoqobo neyemvelo.
22 Kokwengxoxo ukufunda noma ukukhuluma, ukuqiniseka nesimo semvelo yizihluthulelo. Makuthi inhliziyo yakho ichichime futhi ukhulume ngokuhlaba izilaleli zakho umxhwele.
23 Inkulumo enhle ayikwazi ukubekelwa isikhathi esithile njengoba kunjalo nangenhlonipho. Kepha uma usebenzisa inkulumo enhle nsuku zonke iyobonakala endaweni yesikhulumi njengenhlonipho yakho esetshenziswa ekhaya iyabonakala njalo lapho usebantwini.
**********
24, 25. Kungani ukuphinyiswa kwamazwi okubana kungathandeki na?
24 Ukuphinyiselwa kwamazwi. Ukuphinyiselwa kwamazwi okufanele nakho kubalulekile, futhi kufakwe ohidini kodwa epheshaneni Leseluleko Senkulumo. Nakuba kungewona onke amaKristu abe-nemfundo yezwe ephakeme kakhulu, ngisho njengoba oPetru noJohane babhekwa njengabangafundile nemifunda nje, kusabalulekile ukuxwaya ukuxoshwa ekunikezeni kwethu isigijimi ngenxa yokuphinyiselwa kwamazwi okubana. Kungokuthile okungalungiswa masinyane uma sikunakekela ngokwanele.
25 Uma ukuphinyiselwa kwamazwi komuntu kukubi kakhulu, kungahle ngisho kube-wukuthi uyonikeza imiqondo edukile ezingqondweni zezilaleli zakhe, obekuyokuba-ngokungathandeki ngempela. Lapho uzwa omunye ephimisela kabi izwi enkulumeni yakhe, umphumela ovamile wukuthi lithi shazi engqondweni yakho njengesibani esimisa okuhamba emgwaqweni. Ungahle uyeke ngisho ukulandela indlela yakhe yokugomela bese uqala ukucabanga ngezwi aliphimisele kabi. Kungabangela ukuthi ususe ukulalela kwakho kulokho okushiwoyo kuya endleleni okushiwo ngayo.
26, 27. Yiziphi izinkinga ezifakwe ohidini ngokuhlangene nokuphinyiswa kwamazwi na?
26 Bekungahle kushiwo ukuthi kukhona izinhlobo ezintathu ezivamile zezinkinga ngokuhlangene nokuphinyiselwa kwamazwi. Enye wukuphinyiselwa kwamazwi okwedukile ngempela, lapho ukugcizelela kubekwe endaweni engeyiyo noma onobumba benikwe umsindo ongesiwo. Eziningi izilimi zanamuhla zinendlela evamile yokugcizelela, kepha olimini lwesiNgisi indlela ayiyinye, okwenza lenkinga ibenzima ngaphezulu. Bese kuba-khona nokuphinyiselwa kwamazwi okulungile kepha okwedlulisile, okuyikho du ngokweqile, kunikeza umcabango wobuzenzisi, ngisho ukulingisela, nalokhu akuthandeki. Inkinga yesithathu yinkulumo enyefulayo, iphawuleka ngokumunyungwa njalo kwamazwi, ukububaniswa noma ukweqiwa kwamalunga nezinye izinjwayelo ezinjalo. Zimelwe zixwaywe.
27 Ngokuvamile enkulumweni yethu yansuku zonke sisebenzisa amazwi esiwazi kahle; njalo ukuphinyiselwa kwamazwi akuyona inkinga enkulu ngokuhlangene nalokhu. Inkinga enkulu kunazo zonke iphakama ekufundeni. Kepha ofakazi bakaJehova bafunda kakhulu obala nangasese. Sifundela abantu iBhayibheli lapho sihamba indlu ngendlu. Ngezinye izikhathi sibizelwa ukufunda izigaba esifundweni seNqabayokulinda, esifundweni sasekhaya seBhayibheli noma esifundweni sencwadi sebandla. Kubalulekile ukuba ukufunda kushaye emhloleni, ukuthi ukuphinyiselwa kwamazwi kube-ngokufanele. Uma kungenjalo, kunikela umcabango wokuthi asikwazi lokho esikhuluma ngakho. Kwenza nesigijimi singalalelwa.
28-34. Umuntu angasizwa kanjani ukuthuthukisa ukuphinyiswa kwakhe kwamazwi na?
28 Iseluleko sokuphinyiselwa kwamazwi okubi asifanele seqiswe. Uma kukhona inkinga ethile ngezwi elilodwa noma amabili, iseluleko sangasese singahle sanele. Kepha ngisho noma kuphinyiswa amazwi ambalwa kuphela kabi phakathi nenkulumo, uma lawa kungamazwi esiwasebenzisa njalo enkonzweni yethu noma enkulumweni yethu yansuku zonke, bekuyokuba-nosizo kumfundi ngombonisi wesikole ukuwakhomba ukuze afunde indlela yokuwaphimisa ngokufanele.
29 Ngenye indlela, uma ekufundeni iBhayibheli kwenzeka ukuba umfundi aphimise kabi elilodwa noma amabili amagama esiHeberu, lokhu bekungenakucatshangelwa njengobuthakathaka obuqhamile. Nokho, uma abephimise kabi amagama amaningi, lokhu bekuyobonisa ukuntuleka kokulungiselela, neseluleko sifanele sinikelwe. Umfundi ufanele asizwe ukufunda indlela yokuqinisekisa ukuphinyiselwa kwamazwi okufanele bese ezijwayeza.
30 Kuyafana nangokuphinyiselwa kwamazwi okweqisiwe. Uma kususana ngempela enkulumweni ngokuba kuyinjwayelo evamile, umfundi ufanele asizwe. Kufanele kuqashelwe nokuthi, lapho bekhuluma masinyane, abantu abaningi bathambekele ukumungunya amazwi ambalwa. Akukho-seluleko esimelwe sinikezwe ngalokhu, kepha uma kuyinjwayelo evamile, uma umfundi ewamungunya ngokuvamile amazwi akhe futhi kube-nzima ukuqonda inkulumo yakhe noma kuxoshane esigijimini, bekuyokuba-ngokufanele-ke ukumsiza ngokuphimisela amazwi ngokuchachile.
31 Phela, umeluleki wakho uyokhumbula ukuthi ukuphinyiselwa kwamazwi okwamukelekayo bekungahle kuguquke ezindaweni ezahlukene. Ngisho izichazimazwi zivame ukufaka ohidini ngaphezu kokuphinyiselwa kwamazwi okukodwa. Njalo uyoqaphela ngokweluleka ngokuphinyiselwa kwamazwi. Akanakukwenza indaba yokuzikhethela komuntu.
32 Uma unenkinga ngokuphinyiselwa kwamazwi, awunakukufumana kunzima ukukulungisa lapho ucabanga ngakho. Ngisho izikhulumi ezinolwazi lapho zinikelwa isabelo sokufunda zikhipha isichazimazwi bese zihlola amazwi ezingawazi kahle. Aziwazami nje. Njalo sebenzisa isichazimazwi.
33 Enye indlela ukuphinyiselwa kwamazwi okungenziwa kube-ngcono ngayo kungokufundela omunye, lowo owaphimisa kahle amazwi, bese umcela akumise futhi akweluleke njalo lapho wenze iphutha.
34 Indlela yesithathu kungokulalelisisa izikhulumi ezinhle. Cabanga njengoba ulalela; qaphela amazwi eziwaphimisa ngokwahlukile kuwe. Walobe phansi; wahlole kusichazimazwi futhi uzijwayeze wona. Masinyane nawe uyophimisela kahle. Okuqephuzayo, ukunikezwa kwengxoxo, kanye nokuphinyiselwa kwamazwi okufanele, kuyokukhulisa kakhulu ukukhuluma kwakho.