Khuluma Ngenkazimulo Yobukhosi BukaNkulunkulu
“Ngenkazimulo yombuso wakho bayakukhuluma, bashumayele ngamandla akho.”—IHUBO 145:11.
1. Ngokuyinhloko, kungani uJehova asinikeza ikhono lokukhuluma?
UJEHOVA wayenenjongo ekusinikezeni ikhono lokukhuluma. (Eksodusi 4:11) Ngokuyinhloko, yayiwukuba izindebe zethu ‘zichichime indumiso’ yakhe. (IHubo 119:171, 172) Njengoba umhubi uDavide asho: “Yonke imisebenzi yakho iyakukudumisa, abangcwele bakho bakubonge. Ngenkazimulo yombuso wakho bayakukhuluma, bashumayele ngamandla akho ukuba babazise abantwana babantu izenzo zakho zamandla nenkazimulo yobukhosi bombuso wakho. Umbuso wakho ungumbuso kuze kube-phakade; ubukhosi bakho busezizukulwaneni ngezizukulwane.”—IHubo 145:10-13.
2. Kungaziphi izindlela sishukunyiselwa ukuba ‘sichichime indumiso’ kuNkulunkulu?
2 Abalandeli abagcotshiwe bakaJesu Kristu nabangane babo ‘besixuku esikhulu’ bayakulangazelela ukudumisa uJehova, “iNkosi yaphakade.” (IsAmbulo 7:9; 15:3, NW) Ngokutadisha iBhayibheli ngenkuthalo ngosizo lweNqabayokulinda nezinye izincwadi zobuKristu, singazuza ulwazi oluqondile ngoNkulunkulu olufana nomthombo wamanzi acwebile, aqabulayo, nanikeza ukuphila. Kanjalo, endabeni yethu ‘umthombo wokuhlakanipha uba umfula ogobhozayo.’ (IzAga 18:4) Sishukunyiselwa ukuba ‘sichichime indumiso’ ekufakazeni endlini ngendlu nakwezinye izinhlobo zenkonzo yasensimini. Kodwa futhi kunesizathu esingokomBhalo sokufakaza ngokwethukela.
Izandulela EzingokomBhalo
3. Siza uphawule isibonelo sokufakaza ngokwethukela kukaJesu Kristu.
3 Ukushumayela kokuqala uJesu akwenza ngemva kokuba egcotshwe ngomoya ongcwele kwakulapho ayehlala khona, lapho ayememele khona uJohane, uAndreya, futhi ngokusobala noPetru. Babelapho usuku lonke, ngokusobala bamukela ubufakazi kulesosimo esingalindelekile. (Johane 1:35-42) Futhi kwakungaphansi kwezimo ezingalindelekile—“esadlula”—lapho uJesu ebona uMathewu ehhovisi lentela futhi wathola imiphumela emihle lapho ethi: “Ngilandele.”—Mathewu 9:9.
4. Yini uJesu ayisho lapho efakaza kowesifazane waseSamariya, futhi lokhu kwaholelaphi?
4 UJesu wayeyisibonelo esihle kakhulu ‘somthombo wokuhlakanipha ogobhozayo.’ Nakuba wayehleli ngasemthonjeni kaJakobe ngaseSikhari, elambile futhi ekhathele, wafakaza kowesifazane waseSamariya oweza ezokukha amanzi. UJesu wathi: “Lowo oyakuphuza amanzi engiyakumnika wona kasayikoma naphakade; kepha amanzi engiyakumnika wona, phakathi kwakhe ayakuba-ngumthombo wamanzi aphuphumayo, kube-ngukuphila okuphakade.” Lokhu kufakaza ngokwethukela kwaholela ekushumayeleni kukaJesu eqenjini owesifazane ayelishukumisele ukuba libuthane futhi lizwe lokho ayekusho.—Johane 4:6-42.
5. UFiliphu umvangeli nomphostoli uPawulu banikeza ziphi izibonelo zokufakaza ngokwethukela?
5 UFiliphu umvangeli wamisa inqola eyayidlula futhi wafakaza ngokwethukela kowayekuyo, owayefunda isiprofetho sikaIsaya. Esekhweliswe enqoleni, uFiliphu wachaza “ivangeli ngoJesu” kulowomthenwa wase-Etiyopiya, okusabela kwakhe kokwazisa kwaholela ekubhapathizweni kwakhe. (IzEnzo 8:26-38) Lapho amaketanga kamphostoli uPawulu asejele ethukululwa ekuzamazameni okukhulu komhlaba eFilipi, wafakaza ngokwethukela kumgcini ziboshwa. Waba yini umphumela? “Wabhapathizwa khona-lapho, yena nabo bonke abakhe.”—IzEnzo 16:19-34.
6. Cishe kukumiphi imisebenzi yabafundi bakaJesu ukufakaza ngokwethukela okwafeza ingxenye kuyo ngemva kokukhandwa kukaStefanu ngamatshe?
6 Namuhla, ukufakaza ngokwethukela kungenye indlela yokumemezela izindaba ezinhle lapho umsebenzi wethu wobuKristu ungaphansi kokuvinjelwa. Nokho, ngisho noma sishushiswa izinhliziyo zethu zisiqhubela ukuba sikhulume ngenkazimulo yobukhosi bukaNkulunkulu. Ngemva kokuba uStefanu ekhandwe ngamatshe waze wafa, abaningi babafundi ababeshushiswa bahlakazeka. Nokho, baqhubeka bememezela izindaba ezinhle, futhi ngokungangabazeki ukufakaza ngokwethukela kwakuhlanganisiwe emizamweni yabo yokushumayela ngoMbuso.—IzEnzo 8:4-8; 11:19-21.
7. Njengoba ayevalelekile, yini uPawulu ayenza, lokhu kuphakamisa muphi umbuzo?
7 Ukufakaza ngokwethukela kungenye indlela yokukhuluma ngenkazimulo yobukhosi bukaNkulunkulu uma siboshiwe noma sihlala sisemakhaya ethu ngenxa yokugula noma ukukhubazeka. UPawulu wayevalelekile iminyaka emibili elindwe amaRoma. Kodwa esikhundleni sokudangala, wabiza izilaleli futhi “wamukela bonke abeza kuye, washumayela umbuso kaNkulunkulu, wafundisa ngaso sonke isibindi izindaba zeNkosi uJesu Kristu.” (IzEnzo 28:16-31) Yeka isibonelo esihle! Uma unguFakazi KaJehova ovalelekile, ungakwenza yini okufana nalokho?
8. Kwakuphumelela kangakanani ukufakaza ngokwethukela kukaPawulu?
8 Njengoba abalindi bakaPawulu babeshintsha ngemva kwesikhathi esithile, abalindi abahlukahlukene bamuzwa ekhuluma nabanye ngenkazimulo yobukhosi bukaNkulunkulu. Nokho, singaqiniseka ukuthi wafakaza futhi ngokuqondile kulabobalindi. Lokhu kufakaza ngokwethukela kwakuphumelela kangangokuba uPawulu wayengabhala: “Lokho okwangehlelayo kugciné kwaveza ukuqhubeka kwevangeli, kwaze kwathi izibopho zami zabonakala enqabeni yonke nakubo bonke abanye ukuthi zingenxa kaKristu nokuthi iningi labazalwane eNkosini betholile ithemba ngezibopho zami bazuzile kakhulu isibindi sokukhuluma izwi likaNkulunkulu ngokungesabi.” (Filipi 1:12-14) NjengoPawulu, uma singase siboshwe futhi siphucwe amathuba okufakaza ngendlela ehleliwe, sisengakhuluma ngobukhosi bukaNkulunkulu. Futhi yeka isibindi lokhu okungasinika abafowethu!
9, 10. Yibuphi ubufakazi obungokwezwe obukhona bokuthi amaKristu okuqala ayeshumayela ngokwethukela?
9 Ukufaza ngokwethukela kwakuvamile phakathi kwamaKritu okuqala kangangokuba ngisho nangeminyaka eyalandela kwakungathiwa: “Kumbhali ongumKristu, kungenzeka ungowaseCarthage cishe ngonyaka ka-200, sithola umbono . . . [o]phathelene nabantu ababefunde kakhulu. Abameli abathathu abasebasha, abangane abasondelene, bachitha iholide losuku ngasolwandle. Ababili bangamaKristu, owesithathu ungumhedeni. Ngokushesha inkulumo yabo iphendukela enkolweni . . . Indaba yenkulumo-mpikiswano ende iyaphela, ‘Sobathathu, saphindela ekhaya sijabule. Oyedwa wayejabule ngoba wayamukele ukholo lobuKristu, abanye ngenxa yokuthi babemholele kulo.’ Umbhalo awuzami ukuba umlando ongokoqobo; yiNkulumo Yokuzivikela, kaMinucius Felix. Kodwa iyalumelela uhlobo lwento eyayenzeka phakathi kwabantu abanamalungelo ngokwengeziwe.” (Church History 1—The First Advance: AD 29—500, nguJohn Foster, kk. 46, 48) Yebo, futhi lendaba ibonisa ukuthi ukufakaza ngokwethukela kwakusekhona phakathi kwamaKristu okuzisholo angalesosikhathi.
10 Ngokuqondene namaKristu okuqala, kuye kwathiwa futhi: “Kwakukhona isibalo esanda njalo samakholwa angamaKristu, okwakuthi, kungakhathaliseki lapho ayeya khona, kungaba semisebenzini yawo evamile noma ehanjiswa ushushiso, ashumayele uKristu . . . Kwakunabaningi balabo ababenza imisebenzi yabo yokuziphilisa, imisebenzi yabo yansuku zonke, yanoma yiluphi uhlobo, ibe yindlela yokwandisa ukholo lwabo.” (The Missionary Enterprise, nguEdwin Munsell Bliss, ikhasi 14) Yebo, abamemezeli boMbuso bokuqala bafakaza ngokwethukela nangezindlela ezihleliwe.
Ukucabangela Kusengaphambili Nokulungiselela
11. Yini esingayifunda kuJesu ngokubhekisa ukunakekela eqinisweni likaNkulunkulu?
11 NjengoJesu nabalandeli bakhe bokuqala, kufanele sifakaze kokubili ngendlela ehleliwe nangokwethukela. Ukwenza kanjalo ngokuphumelelayo kudinga ukucabangela kusengaphambili nokulungiselela. Ukuze afakaze ngokwethukela noma anikeze isiyalo, uJesu wayebhekisela ebantwaneni, ekudleni, ezingutsheni, ezinyonini, ezimbalini, ezimweni zezulu, nasemisebenzini. (Mathewu 4:18, 19; 6:25-34; 11:16-19; 13:3-8; 16:1-4) Nathi futhi singasebenzisa cishe noma isiphi isihloko njengesisekelo sokubhekisa ukunakekela eqinisweni likaNkulunkulu.
12. Lapho eceba uhambo, umuntu angakulungiselelisa kanjani ukufakaza ngokwethukela?
12 Singafakaza ngokwethukela kubantu abahleli emapaki, abami kolayini ezindaweni zokuthenga, njalonjalo. EAthene, uPawulu wakhuluma “imihla ngemihla kubo ababesuke bekhona.” (IzEnzo 17:17) Kodwa sidinga ukukulungiselela ukufakaza ngokwethukela. Ngokwesibonelo, ingabe uceba uhambo ngendiza, ngesitimela, noma ngebhasi? Khona-ke phatha iBhayibheli namapheshana athile, omagazini, noma izincwajana ezingangomagazini. Ukufunda izincwadi zobuKristu ezintweni zokuhamba zomphakathi noma kwezinye izindawo ngokuvamile kuqalisa ingxoxo.
13. Bonisa ukuthi ungakuqalisa kanjani ukufakaza kumuntu osegugile lapho usohambweni.
13 Ngokusobala isethulo sobungane siza kuqala. Incwadi ephathekayo ethi Ukubonisana NgemiBhalo isikisela izingeniso zokusetshenziswa enkonzweni yasensimini, kodwa ezinye zazo zingalungiswa ukuze zisetshenziswe lapho kufakazwa ngokwethukela. Ngokwesibonelo, uma lapho usohambweni uhleli eduze komuntu osegugile, ungase uthi: “Igama lami ngingu . Bengicabanga kakhulu ngenjongo yokuphila. Abantu abaningi bamatasa kakhulu ngokuziphilisa kangangokuthi abanasikhathi sokucabanga ngenjongo yokuphila. Nokho, njengoba sikhula ngeminyaka siyaqaphela ukuthi ukuphila kufushane futhi singase sizibuze: ‘Ingabe lokhu ukuphela kwalokho ukuphila okumelwe kube yikho?’ Ingabe ucabanga ukuthi uNkulunkulu unenjongo ngokuba khona kwethu?” Lindela impendulo. Khona-ke ungase ukhulume ngenjongo kaNkulunkulu ngesintu futhi ukhulumele izinto ezinhle ezithenjiswe kusAmbulo 21:3, 4. Ukuze ufakaze ngokwethukela ngokuphumelelayo, ungasebenzisa futhi amanye amaphuzu amahle atholakala emihlanganweni yebandla nasezincwadini zobuKristu.
Kungalindelwa Imiphumela Emihle
14. Iyiphi impumelelo omunye umzalwane aba nayo ekufakazeni ngokwethukela ohambweni?
14 NjengoJesu nabalandeli bakhe bokuqala, singaphumelela lapho sifakaza ngokwethukela. Ngokwesibonelo: Lapho ephakathi nohambo lwakhe ngendiza, omunye uFakazi wakhuluma nesikhulu sezempi esase sineminyaka engama-20 sishadile. Inkosikazi yaleyondoda yayisebenzisa imilaliso, yayizame ukuzibulala izikhathi eziningana, futhi yayisizoyishiya ukuze izihlanganise nendoda esencane. Lapho uFakazi ekhuluma ngosizo olungokomBhalo ayeluthola kuNqabayokulinda nakumagazini ongumngane wayo iPhaphama!, isikhulu senza isikhokhelo futhi safuna ukuba omagazini bathunyelwe kumkaso. Abanye abagibeli bakuzwa lokho uFakazi ayekusho. Waba yini umphumela? Phela, ngenxa yokufakaza ngalesosikhathi, wathola izikhokhelo ezingama-22 futhi wahambisa omagazini abangama-45 nezincwadi ezingama-21!
15, 16. (a) Nikeza izibonelo zokufakaza ngokwethukela okuphumelelayo kubantu osebenza nabo. (b) Lemiphumela isikiselani kuwe?
15 Kuthiwani ngokufakaza ngokwethukela kosebenza nabo? Omunye umzalwane washiya omagazini bethu endlini yokugezela lapho esebenza khona. Othile asebenza naye wafunda omagazini, wathintana nomzalwane, futhi wenza isikhokhelo sabo. Lendoda futhi yamukela isifundo seBhayibheli futhi yayeka ukuphila kwayo okungcolile, kodwa umkayo wayephuma njalo endlini lapho kuphathwa igama likaNkulunkulu. Lapho indoda ifuna ukusula esontweni, umfundisi weza ezoxoxa ngalokhu, wathola inkosikazi yalendoda kuphela ekhaya. Ukuntula komfundisi ukholo namanga akhe ngoFakazi BakaJehova kwayithusa, ngoba yayibone umyeni wayo eshintshile futhi waba ngcono. Yathi kumfundisi: “Nami ungangibhalela isitifiketi sokwesula kanye nabantwana!” Ngokuhamba kwesikhathi, lendoda nomkayo baba oFakazi ababhapathiziwe.
16 Eminyakeni eminingi edlule, umzalwane manje ohlala eUnited States wafakaza ngokwethukela kowayesebenza naye eNgilandi futhi waya nalensizwa embukisweni wamaslide owawuhlelwe oFakazi BakaJehova. Ngemva kweminyaka engamashumi amathathu nanye, umzalwane wamukela lencwadi: “Manje ngithanda ukukutshela ukuthi ubufakazi owabunikeza [insizwa] baba nemiphumela emihle, ngoba cishe eminyakeni emibili kamuva omunye umzalwane wakhuluma nayo, wayihambisela omagazini, futhi waya nayo eHholo LoMbuso eliseduze . . . Yaba uFakazi, yabhapathizwa ngo-1959, futhi manje ingumdala ebandleni lakubo. . . . Ngemva kweminyaka eyi-14 umkayo waba uFakazi futhi naye wabhapathizwa. Eminyakeni emibili kamuva indodakazi yayo yabhapathizwa futhi manje iyiphayona elivamile eNyakatho Derbyshire . . . Kusukela kulokho kufakaza okuncane owakwenza emuva lé eAshford, leyonsizwa, umkayo nendodakazi, umzala nendodakazi yakhe, umyeni nabantwana abahlanu, nomntwana wenye indodakazi kamzala bonke baba oFakazi. . . . Ngithanda ukukubonga kakhulu, Ted, ngoba ngingummisi wezinsimbi, futhi indaba engisanda kuyilandisa indaba yami yokufakaza kwakho kimi nokuthi kwaphumelaphi.”
17. Yimaphi amathuba okufakaza ngokwethukela izinceku zikaJehova ezisencane ezinawo?
17 Nani futhi zinceku zikaJehova ezisencane ninensimu enhle yokufakaza—enifunda nabo nothisha. Ingabe niyabunikeza ubufakazi bokwethukela ezindabeni ezilotshwayo, ekubukezeni okukhulunywayo, njalonjalo? Umfundi wasesikoleni esiphakeme e-Ecuador owayeqhutshelwa isifundo seBhayibheli wasebenzisa uchungechunge olusesembozweni sePhaphama! kaSeptember 8, 1985 olunesihloko esithi “IHiroshima—Ingabe Isifundo Sayo Siye Sakhohlakala?” njengomthombo wokwaziswa wendaba elotshwayo. Indaba yakhe elotshwayo yanconywa abahluleli emncintiswaneni wamazwe onke futhi kwaphumela ohambweni lwamahhala lokuya eJapane. Yebo, ukudla ubhedu emincintiswaneni akuyona injongo yezincwadi zobuKristu. Kodwa lokhu kubonisa ukubaluleka kwezincwadi ezinjalo nokuphumelela ukunikeza ubufakazi esikoleni kube udumo kuNkulunkulu.
18. Waba yini umphumela wokunikeza ubufakazi obufushane kumuntu owayefuna ukuqasha ikamelo?
18 Ngenxa yezizathu zemali, udade kwadingeka ukuba aqashise ngekamelo. Lapho ethola ucingo olubuza ngalo, watshela owesifazane owayeshaye ucingo ukuthi wayengomunye woFakazi BakaJehova futhi wayengenakubuvumela ubufebe ekhaya lakhe. Izivakashi kwakuyofuneka zihambe kungakahlwi, futhi izivakashi zesilisa kwakuyofuneka zibonakale ngazo zonke izikhathi. Lona oshaye ucingo wangabaza, wayesethi: “Ngangifundelwa lapho ngisemusha, kodwa akuzange kungihlabe umxhwele. Ngakho ngaya ekholiji.” Lapho ebuzwa ukuthi uyafisa yini ukuqalisa kabusha ukutadisha kwakhe iBhayibheli, waphendula, “Yebo.” Ngokuhamba kwesikhathi, owayeshaye ucingo, unina, nodadewabo baba yizinceku zikaJehova ezizinikezele—konke lokhu kungoba udade wafakaza ngokwethukela.
19. Kwaphumelaphi ukufakaza ngokwethukela endabeni yowesifazane waseziqhingini zaseBahama?
19 Eziqhingini zaseBahama owesifazane othile ongumKatolika wayekhathazwa unembeza ngoba wayeseneminyaka eyisihlanu engasayi esontweni. Ngakho ngolunye usuku lwangeSonto ekuseni, lina, wangena indlela eya esontweni. Kweza oFakazi abathathu, abamgibelisa emotweni—futhi bafakaza kuye. Lapho befika esontweni, wafuna ukuzwa okwengeziwe ngakho wahlala nabo njengoba babehamba beyolanda umfundi weBhayibheli. Baphinde futhi badlula esontweni, kodwa wayefuna ukuzwa okwengeziwe ngakho waya eHholo LoMbuso. Inkulumo yeningi yayikhuluma ngayo kanye indaba eyayixoxwa emotweni. Kwaqaliswa isifundo seBhayibheli nowesifazane, owaxosha indoda ayehlala nayo (uyise wabantwana bakhe abane), futhi wabhapathizwa emhlanganweni owawuseNassau ngo-1986. Yeka ukuthi wayejabula kanjani ngokuthi othile wafakaza kuye ngokwethukela!
Qhubeka Ukhuluma Ngobukhosi BukaNkulunkulu!
20. (a) Kufanele kubhekwe kanjani ukufakaza ngokwethukela ngokuqondene nenkonzo yasensimini? (b) Yini esikiselwayo uma umuntu emanqikanqika ngokufakaza ngokwethukela?
20 Ukufakaza ngokwethukela akusithathi isikhundla senkonzo yasensimini evamile yoFakazi BakaJehova. Ngokusobala ukufakaza endlini ngendlu kungokomBhalo futhi kuyaphumelela. (IzEnzo 5:42; 20:20, 21) Nokho, ukufakaza ngokwethukela kunezithelo, futhi izinceku zikaJehova kumelwe zihlanganyele kukho. Noma kuphi lapho kunabantu khona—izihlobo, ofunda nabo, osebenza nabo, nabanye—kunamathuba okukhuluma ngenkazimulo yobukhosi bukaNkulunkulu. Ngakho ungaluvumeli uvalo noma ukwesaba kukuvimbe. (IzAga 29:25; 2 Thimothewu 1:6-8) Uma umanqikanqika ngokufakaza ngokwethukela, kungani ungathandazi njengoba kwenza abafundi bakaJesu ababeshushiswa? Bacela: “Somandla [“Jehova,” NW], . . . unike izinceku zakho ukuba zikhulume izwi lakho ngaso sonke isibindi.” Ingabe umthandazo wabo waphendulwa? Yebo, ngoba “kwazanyazanyiswa indawo lapho babebuthene khona, bagcwaliswa bonke nguMoya oNgcwele, bakhuluma izwi likaNkulunkulu ngesibindi.”—IzEnzo 4:23-31.
21. Yini eyoshukumisela umuntu ukuba anikeze ubufakazi ngaphansi kwazo zonke izimo?
21 Ngakho, hlakulela isimo sengqondo esiqondile ngokufakaza ngokwethukela. Vumela uthando ngoNkulunkulu lukushukumisele ukuba unikeze ubufakazi ngaphansi kwazo zonke izinhlobo zezimo. Shiseka, njengokungathi uchichima iqiniso ngawo wonke amathuba. Yebo, qhubeka ukhuluma ngenkazimulo yobukhosi bukaNkulunkulu.
Zithini Izimpendulo Zakho?
◻ Ukufakaza ngokwethukela kunasiphi isisekelo esingokomBhalo?
◻ Yiziphi ezinye izindlela zokulungiselela ukufakaza ngokwethukela?
◻ Uma sifakaza ngokwethukela, yimiphi imiphumela esingayilindela?
◻ Kufanele sikubheke kanjani ukufakaza ngokwethukela ngokuqondene nenkonzo yethu evamile yasensimini?
[Isithombe ekhasini 23]
Uma uvalelekile, ingabe uyafakaza njengoba kwenza uPawulu lapho evalelwe?
[Isithombe ekhasini 25]
Ukulungiselela kusengaphambili kuyosenza sikwazi ukufakaza ngokwethukela ngendlela ephumelelayo