Ingabe IBhayibheli Liyayifundisa Inkolelo Yokudalelwa?

UKUHLANJALAZWA! UKUNYUNDELWA! Lapho ilungu elihlonishwayo lomphakathi likholelwa ukuthi igama noma idumela lalo liye lonakaliswa umbiko ongamanga, lizizwa liphoqelekile ukuba lilungise izindaba. Lingase libamangalele ngisho nokubamangalela labo ababangele lokho kuhlanjalazwa.

Inkolelo yokudalelwa empeleni iyikho kanye ukunyundelwa kukaNkulunkulu uMninimandla onke. Lenkolelo ithi nguNkulunkulu uqobo obangela zonke izinhlekelele namashwa akhungatha isintu. Uma ukholelwa ekudalelweni, ungase ucabange ukuthi uMbusi Wendawo Yonke uye wakha uhlelo lwezenzakalo olufundeka njengalokhu okulandelayo: ‘Namuhla, uJohn uzolimala engozini yemoto, uFatou uzohlaselwa umalaleveva, umuzi kaMamadou uzobhidlizwa yisiphepho’! Ingabe ngempela ubungashukumiseleka ukukhonza uNkulunkulu onjalo?

‘Kodwa uma kungeyena uNkulunkulu obangela amashwa esiba nawo, ubani-ke owabangelayo?’ kubuza abantu abakholelwa ekudalelweni. U-Ousmane, insizwa okukhulunywe ngayo esihlokweni esandulele, naye wayezibuza lombuzo. Kodwa akudingekanga ukuba aqagele noma afunisele ukuze athole impendulo. Wathola ukuthi, ngezimfundiso ezitholakala eZwini laKhe eliphefumulelwe, iBhayibheli, uNkulunkulu uye wazihlanza kulokhu kuhlanjalazwa. (2 Thimothewu 3:16) Khona-ke, ake sicabangele lokho iBhayibheli elikushoyo ngalendaba.

Ubani Onecala?

Izikhukhula, iziphepho, ukuzamazama komhlaba—ngokuvamile izinhlekelele ezinjalo kuthiwa ziyizenzo zikaNkulunkulu. Kodwa iBhayibheli alibonisi ukuthi izinhlekelele ezinjalo zibangelwa uNkulunkulu. Cabanga ngenhlekelele eyenzeka eMpumalanga Ephakathi emakhulwini amaningi eminyaka adlule. IBhayibheli lisitshela ukuthi okuwukuphela komuntu owasinda kulenhlekelele wabika: “Umlilo kaNkulunkulu [amazwi esiHeberu ngokuvamile asho umbani] uwile ezulwini, washisa izimvu nezinceku, waziqeda; mina ngedwa kuphela ngisindile, ukuze ngikubikele.”—Jobe 1:16.

Nakuba kungenzeka lendoda eyayethukile yayicabanga ukuthi lomlilo wawubangelwe uNkulunkulu, iBhayibheli libonisa ukuthi akuyena owayewubangele. Zifundele uJobe 1:7-12, uzothola ukuthi lokhu kubaneka akubangelwanga uNkulunkulu, kodwa kwabangelwa iSitha sakhe—uSathane uDeveli! Akukhona ukuthi wonke amashwa abangelwa uSathane ngokuqondile. Kodwa kuyacaca ukuthi asikho isizathu sokubeka uNkulunkulu icala.

Empeleni, ngokuvamile abantu abasuke bengunobangela lapho konakala izinto. Ukungaphumeleli esikoleni, emsebenzini, noma ebuhlotsheni nabantu kungase kubangelwe ukuntuleka komzamo nokuqeqeshwa okuhle noma mhlawumbe ukungabacabangeli abanye. Ngokufanayo, ukugula, izingozi, nokufa kungase kubangelwe ukuba budedengu. Ingani ukumane abophe ibhande lesihlalo lapho ehamba ngemoto kuwanciphisa kakhulu amathuba okuba umuntu afe engozini yemoto. Ibhande lesihlalo belingeke lenze mehluko ukube “ukudalelwa” okungenakuguquka bekuqondisa izinto. Ukunakekelwa kahle kwempilo nenhlanzeko nakho kulinciphisa kakhulu inani labafa ngaphambi kwesikhathi. Ngisho nezinhlekelele ezithile ngokuvamile ezibizwa ngokuthi “izenzo zikaNkulunkulu,” eqinisweni, ziyizenzo zabantu—ifa elidabukisayo lokuwuphatha kabi komuntu umhlaba.—Qhathanisa nesAmbulo 11:18.

‘Isikhathi Nesenzakalo Esingalindelekile’

Yiqiniso, kunezenzakalo eziningi ezidabukisayo okungabonakali ngokucacile ukuthi zibangelwa yini. Nokho, phawula lokho iBhayibheli elikushoyo kumShumayeli 9:11: “Ngabuye ngabona phansi kwelanga ukuthi ukujaha akuyi ngabanejubane, nokulwa ngamaqhawe, nesinkwa ngabahlakaniphileyo, nengcebo ngabaqondileyo, nomusa ngabanokwazi, ngokuba bonke bahlangabezana [nesikhathi nesenzakalo esingalindelekile, NW].” Ngakho-ke asikho isizathu sokukholelwa ukuthi uMdali nguye obangela izingozi noma ukuthi ngandlela-thile izisulu zezingozi zisuke zijeziswa.

UJesu Kristu uqobo wawuphikisa umqondo wokudalelwa. Ebhekisela enhlekeleleni izilaleli zakhe ezaziyazi kahle, uJesu wabuza: “Labo abayishumi nesishiyagalombili umbhoshongo waseSilowama owawela phezu kwabo, ngaleyondlela ubabulala, ingabe nicabanga ukuthi babengabanecala kakhulu kunabo bonke abanye abantu abahlala eJerusalema? Lutho, impela, ngiyanitshela.” (Luka 13:4, 5) Ngokusobala uJesu wayengabheki lenhlekelele njengeyabangelwa ukungenela kukaNkulunkulu, kodwa njengeyabangelwa ‘isikhathi nezenzakalo ezingalindelekile.’

Imiphumela Eyinhlekelele Yokungapheleli

Nokho, kuthiwani ngokufa nokugula okungachazeki? IBhayibheli lichaza isimo sabantu ngokungagwegwesi ngalendlela: ‘Bonke bayafa ku-Adamu.’ (1 Korinte 15:22) Ukufa kuye kwakhungatha isintu kusukela lapho ukhokho wethu u-Adamu ethatha inkambo yokungalaleli. Njengoba nje uNkulunkulu ayexwayisile, u-Adamu washiyela inzalo yakhe ifa eliwukufa. (Genesise 2:17; Roma 5:12) Khona-ke, ekugcineni kungabonakala ukuthi konke ukugula kwabangelwa ukhokho wethu sonke u-Adamu. Ubuthakathaka bethu esibuzuze njengefa nabo buhlangene kakhulu nokudumazeka nokwehluleka esibhekana nakho ekuphileni.—IHubo 51:5.

Cabanga ngenkinga yobumpofu. Inkolelo yokudalelwa ngokuvamile iye yakhuthaza abantu abahluphekile ukuba baziyekelele ezimweni zabo ezinzima. Bakholelwa ukuthi, ‘Sadalelwa lokhu.’ Nokho, iBhayibheli libonisa ukuthi imbangela ayikona ukudalelwa, kodwa iwukungapheleli kwabantu. Abanye baba mpofu lapho ‘bevuna lokho abaye bakuhlwanyela’ ngokuvilapha noma ngokungayiphathi kahle impahla yabo. (Galathiya 6:7; IzAga 6:10, 11) Izigidi ezingenakubalwa zimpofu ngenxa yokuthi zixhashazwa abantu abanobugovu abaphethe. (Qhathanisa noJakobe 2:6.) ‘Umuntu uye wabusa omunye kwaba-ngukulimala kwakhe,’ kusho iBhayibheli. (UmShumayeli 8:9) Akukho bufakazi bokuthi bonke ubumpofu bubangelwa uNkulunkulu noma ukudalelwa.

Ukukholelwa Ekudalelweni—Imiphumela Yako Elimazayo

Elinye futhi iphuzu elinamandla eliphikisa inkolelo yokudalelwa liwumphumela lenkolelo engaba nawo kwabakholelwa kuyo. UJesu Kristu wathi: “Yonke imithi emihle ithela izithelo ezinhle, kodwa yonke imithi ebolile ithela izithelo ezingenanzuzo.” (Mathewu 7:17) Ake sicabange ‘ngesithelo’ esisodwa senkolelo yokudalelwa—indlela ethonya ngayo umuzwa wabantu wokuba nomthwalo wemfanelo.

Umuzwa ohluzekile wokuba nomthwalo wemfanelo ubalulekile. Ungenye yezinto ezishukumisa abazali ukuba bondle imikhaya yabo, izisebenzi ukuba zenze imisebenzi yazo ngobuqotho, nabakhi ukuba bakhe imikhiqizo esezingeni eliphakeme. Ukukholelwa ekudalelweni kungase kuthuntubeze lowo muzwa. Ngokwesibonelo, ake sithi isondo lokuqondisa imoto yomlisa othile alisebenzi kahle. Uma enomuzwa obukhali wokuba nomthwalo wemfanelo, uyalilungisa ngenxa yokukhathalela ukuphila kwakhe siqu nokuphila kwabagibeli. Ngakolunye uhlangothi, umuntu okholelwa ekudalelweni angase angayishayi mkhuba lengozi, acabange ukuthi isondo lemoto liyohluleka ukusebenza kuphela uma ‘kuyintando kaNkulunkulu’!

Yebo, ukukholelwa ekudalelweni kungase kukhuthaze kalula ukuyekelela, ukuvilapha, ukungakwamukeli ukuthi umuntu uyolandisa ngezenzo zakhe, nohide lwezinye izici ezimbi.

Isithiyo Ebuhlotsheni Bethu NoNkulunkulu?

Okulimaza kunakho konke ukuthi inkolelo yokudalelwa ingacindezela umuzwa womuntu wokuba nesibopho kuNkulunkulu. (UmShumayeli 12:13) Umhubi unxusa sonke isintu ukuba ‘sizwe sibone ukuthi uJehova muhle.’ (IHubo 34:8) UNkulunkulu ubekela labo abayojabulela ubuhle bakhe izimfuneko ezithile.—IHubo 15:1-5.

Enye yalezo zimfuneko iwukuphenduka. (IzEnzo 3:19; 17:30) Lokho kuhilela ukuvuma amaphutha ethu nokwenza izinguquko ezidingekayo. Njengabantu abangaphelele, sonke sinokuningi esidinga ukuphenduka kukho. Kodwa uma umuntu ekholelwa ukuthi uyisisulu sokudalelwa esingenakuzisiza, kunzima ukuba ezwe isidingo sokuphenduka noma sokuvuma ukuthi amaphutha akhe abangelwe nguye.

Umhubi wathi ngoNkulunkulu: “Umusa wakho umnandi kunokuphila.” (IHubo 63:3) Nokho, inkolelo yokudalelwa iye yenza izigidi zakholelwa ukuthi uNkulunkulu ungunobangela wosizi lwazo. Ngokuvamile lokhu kuye kwenza abaningi bamcasukela, bavala ithuba lokuba babe nobuhlobo obuseduze ngempela noMdali. Khona nje ungaba kanjani nomuzwa wothando ngomuntu ombheka njengobangela zonke izinkinga nezinkathazo zakho? Ngakho inkolelo yokudalelwa ibeka isithiyo phakathi kukaNkulunkulu nomuntu.

Ukukhululeka Kumashiqela Oyinkolelo Yokudalelwa

U-Ousmane osemusha, okukhulunywe ngaye ekuqaleni, wake waba isigqila senkolelo yokudalelwa. Nokho, lapho oFakazi BakaJehova bemsiza ukuba ahlole ayekucabanga ekhanyiselwa iBhayibheli, u-Ousmane washukumiseleka ukuba ayeke ukukholelwa ekudalelweni. Imiphumela yaba umuzwa ojulile wempumuzo, nesimo sengqondo esisha, nesiqondile ngokuphila. Okubaluleke nakakhulu, uye wamazi uJehova njengoNkulunkulu “ogcwele isihe, onomusa, ophuza ukuthukuthela, novamé ubumnene neqiniso.”—Eksodusi 34:6.

U-Ousmane uye waqaphela nokuthi nakuba uNkulunkulu engahleli yonke imininingwane yokuphila kwethu, unayo injongo ngekusasa.a Eyesi-2 Petru 3:13 ithi: “Kukhona amazulu amasha nomhlaba omusha esikulindele ngokwesithembiso sakhe, futhi kukho kuyohlala ukulunga.” OFakazi BakaJehova baye basiza izigidi ukuba zihlakulele ithemba lokuphila phakade ziyingxenye ‘yalomhlaba omusha’ othenjisiwe. Bangathanda ukukusiza nawe.

Njengoba ukhula olwazini olunembile lweBhayibheli, uzoqaphela ukuthi ikusasa lakho alixhomekile ekudalelweni kusengaphambili ongenakukulawula. Amazwi kaMose kuma-Israyeli asendulo asebenza kahle: “Ngibeké phambi kwenu ukuphila nokufa, isibusiso nesiqalekiso; ngalokho khethani ukuphila ukuba niphile, wena nenzalo yakho, ukuba umthande uJehova uNkulunkulu wakho, ulilalele izwi lakhe, unamathele kuye.” (Duteronomi 30:19, 20) Yebo, ungazikhethela lokho ikusasa lakho eliyoba yikho. Alilawulwa ukudalelwa.

[Umbhalo waphansi]

[Izithombe ekhasini 6, 7]

Lezi zinhlekelele zazingezona ‘izenzo zikaNkulunkulu’

[Imithombo]

U.S. Coast Guard photo

WHO

UN PHOTO 186208/M. Grafman