Ingabe Uyakhumbula?

Ukujabulele yini ukufunda omagazini bamuva be-Nqabayokulinda? Manje, ake ubone ukuthi ungayiphendula yini imibuzo elandelayo:

• Iziphi ezinye izindlela uRuthe aba ngazo isibonelo esihle?

Waba yisibonelo othandweni lwakhe ngoJehova, othandweni lwakhe oluqotho ngoNawomi nasekuboniseni inkuthalo nokuthobeka. Kwakufanele-ke ukuba abantu bambheke ‘njengowesifazane ovelele.’ (Ruthe 3:11)—4/15, amakhasi 23-6.

• Sazi ngani ukuthi uJehova uyabakhathalela abantu abavamile?

Watshela ama-Israyeli, ayephathwe ngonya eGibhithe, ukuba angabahlukumezi abantu abampofu. (Eksodusi 22:21-24) UJesu, owayelingisa uYise, waba nesithakazelo esiqotho kubantu abavamile, futhi wakhetha abantu “abangafundile nabavamile” ukuba babe abaphostoli. (IzEnzo 4:13; Mathewu 9:36) Singamlingisa uNkulunkulu ngokukhathalela abanye, njengabantu abasebasha.—4/15, amakhasi 28-31.

• Sinasiphi isizathu sokukholelwa ukuthi uJehova uyakuqaphela esikwenzayo?

Ukulandisa kweBhayibheli okuhlukahlukene kubonisa ukuthi uJehova uyakuqaphela okwenziwa abantu. Wawuqaphela umhlatshelo owanikelwa u-Abela, futhi uyayiqaphela ‘imihlatshelo’ yethu ‘yokudumisa, isithelo sezindebe.’ (Hebheru 13:15) UJehova wayeqaphela ukuthi u-Enoke wayelwela ukumjabulisa ngokuphila ukuphila okuhlanzekile, kokuziphatha okuhle. Futhi uNkulunkulu wayibona indlela umfelokazi waseZarefati ongeyena umIsrayeli ahlanganyela ngayo okuncane ayenakho nomprofethi u-Elija. UJehova uyaziqaphela nezenzo zethu zokholo.—5/1, amakhasi 28-31.

• Kungani kungase kuthiwe ngemva kwePhentekoste lika-33 C.E., amaJuda ayeba amaKristu kwakudingeka azinikezele wona luqobo kuNkulunkulu?

Ngo-1513 B.C.E., ama-Israyeli asendulo angena ebuhlotsheni bokuzinikezela kuJehova. (Eksodusi 19:3-8) Ngemva kwalokho, amaJuda azalelwa kuleso sizwe esizinikezele engaphansi kwesivumelwano soMthetho. Kodwa uJehova wasisusa isivumelwano soMthetho ngokufa kukaKristu ngo-33 C.E. (Kolose 2:14) Kusukela ngaleso sikhathi, amaJuda afuna ukukhonza uNkulunkulu ngokwamukelekayo kwakudingeka azinikezele kuye futhi abhapathizwe egameni likaJesu Kristu.—5/15, amakhasi 30-1.

• Ingabe ukushisa impepho kufanelekile ekukhulekeleni kweqiniso namuhla?

Ukusetshenziswa kwempepho kwakuyingxenye yokukhulekela kweqiniso kwa-Israyeli wasendulo. (Eksodusi 30:37, 38; Levitikusi 16:12, 13) Kodwa isivumelwano soMthetho, kuhlanganise nokusetshenziswa kwempepho, saphela ngokufa kukaKristu. AmaKristu angazinqumela ukuthi ayisebenzise yini impepho ngezizathu ezingezona ezenkolo, kodwa ayiyona ingxenye yokukhulekela kweqiniso namuhla. Kufanele kucatshangelwe nemizwa yabanye ukuze bangakhubeki.—6/1, amakhasi 28-30.

• Yini esanda kuvela ezindabeni ebangele ukuba abanye balicabangele kabusha iqiniso lokuthi uJesu waphila ngempela emhlabeni?

Kukhulunywe kakhulu ngebhokisi lokufaka amathambo omuntu ofile elatholakala e-Israel. Kubonakala lingelekhulu lokuqala, futhi kukhona umbhalo kulo othi: “UJakobe, indodana kaJosefa, umfowabo kaJesu.” Lokhu abanye bakubheka “njengobufakazi obuvubukuliwe obudala kunabo bonke obungebona obeBhayibheli” bokuthi uJesu wayekhona ngempela.—6/15, amakhasi 3-4.

• Umuntu ukufunda kanjani ukubonisa uthando?

Abantu baqala ukufunda ukubonisa uthando ngesibonelo sabazali babo nangokufundiswa yibo. Uma indoda nomfazi bebonisana uthando nenhlonipho, abantwana bangafunda ukulubonisa. (Efesu 5:28; Thithu 2:4) Ngisho noma umuntu engakhulelanga ekhayeni elinothando, angakufunda ukulubonisa ngokwamukela isiqondiso sikaJehova esifana nesikababa, ngokuthola usizo lomoya ongcwele nangokuzuza ekusekelweni abazalwane abangamaKristu.—7/1, amakhasi 4-7.

• Wayengubani u-Eusebius, futhi yini esingayifunda ekuphileni kwakhe?

U-Eusebius yisazi-mlando sakudala, ngo-324 C.E. esaqeda ukubhala incwadi eyimiqulu eyishumi enesihloko esithi History of the Christian Church. Nakuba ayekholelwa ukuthi uYise wayekhona ngaphambi kweNdodana, u-Eusebius wamukela umbono ohlukile kunalowo emkhandlwini waseNicaea. Kusobala ukuthi wayishaya indiva imfuneko kaJesu yokuba abalandeli baKhe ‘bangabi ingxenye yezwe.’ (Johane 17:16)—7/15, amakhasi 29-31.

• Ingabe uJehova uwushintshile umbono wakhe ngesithembu?

Cha, uJehova akawushintshanga umbono wakhe ngesithembu. (Malaki 3:6) Ilungiselelo likaNkulunkulu ngomuntu wokuqala laliwukuba ‘anamathele kumkakhe’ abe nyamanye naye. (Genesise 2:24) UJesu wathi ukuhlukanisa ngaphandle kwesizathu sobufebe bese umuntu eshada futhi, kumenza abe isiphingi. (Mathewu 19:4-6, 9) UJehova wapheza ukubekezelela isithembu lapho kumiswa ibandla lobuKristu.—8/1, ikhasi 28.