Imibuzo Evela Kubafundi

Umkhuba womKristu wokubuka izithombe zobulili ezingcolile kungenzeka yini ube mubi kangangokuthi aze axoshwe ebandleni lobuKristu?

▪ Yebo, kungenzeka. Lokhu kugcizelela ukubaluleka kokuzigwema ngokuqinile zonke izinhlobo zezithombe zobulili ezingcolile, ezitholakala ezincwadini, komagazini, kumabhayisikobho, kuma-video nakuyi-Internet.

Izithombe zobulili ezingcolile zisakazeke umhlaba wonke. I-Internet yenza izithombe zobulili ezingcolile zitholakale kalula kunanini ngaphambili futhi iye yandisa inani labantu abangenwa yilo mkhuba omubi. Abanye, abadala nabancane, baye bethuka sebezithela ezingosini zezithombe zobulili ezingcolile. Abanye baye bazivula ngamabomu, benomuzwa wokuthi akukho okubavimbayo ngoba bengafunda izincwadi zezithombe zobulili ezingcolile noma bazibuke ngasese—ekhaya noma ehhovisi. Kungani lokhu kufanele kuwakhathaze kakhulu amaKristu?

Isizathu esibalulekile salokhu sisithola esixwayisweni sikaJesu: “Wonke umuntu oqhubeka ebuka owesifazane aze amkhanuke, usephingile naye kakade enhliziyweni yakhe.” (Math. 5:28) Yiqiniso, ubuhlobo bobulili obungokwemvelo buyafaneleka futhi bungumthombo wenjabulo kubantu abashadile. (IzAga 5:15-19; 1 Kor. 7:2-5) Kodwa izithombe zobulili ezingcolile azigxili kulokho. Kunalokho, zibonisa ubulili obungemthetho obuvusa imicabango yokuziphatha okubi uJesu axwayisa ngayo. Kusobala ukuthi ukufunda noma ukubuka izithombe zobulili ezingcolile kungqubuzana ngokuqondile nalesi siqondiso esivela kuNkulunkulu: “Ngakho-ke, bulalani amalungu emizimba yenu asemhlabeni ngokuqondene nobufebe, ukungcola, isifiso sobulili, isifiso esilimazayo, nokuhaha, okuwukukhonza izithombe.”—Kol. 3:5.

Kuthiwani uma umKristu eke wabuka izithombe zobulili ezingcolile kanye noma kabili? Isimo sakhe, ngandlela-thile, singase sifaniswe naleso esiyingozi umhubi u-Asafa ake wazithola ekuso: “Mina, kusale kancane ukuba izinyawo zami ziphambuke, kusale kancane ukuba izinyathelo zami zishelele.” UmKristu angaba kanjani nonembeza ohlanzekile futhi abe nokuthula noNkulunkulu uma ebekade ebuka izithombe zamadoda noma abesifazane abanqunu noma umbhangqwana owenza ubufebe? U-Asafa akazange abe nokuthula: “Ngahlushwa usuku lonke, futhi ngiyaqondiswa njalo ekuseni.”—IHu. 73:2, 14.

UmKristu ohileleke kulobo bubi kufanele asanguluke futhi aqaphele ukuthi udinga usizo olungokomoya. Lolo sizo luyatholakala ebandleni: “Ngisho noma umuntu ethatha isinyathelo okungesona ngaphambi kokuba aqaphele, nina eninezimfanelo ezingokomoya zamani ukumlungisa ngomoya wobumnene umuntu onjalo, kuyilapho niziqaphela nina ngabanye.” (Gal. 6:1) Umdala oyedwa noma ababili bangamnika usizo aludingayo, kuhlanganise ‘nemithandazo yokholo engenza ongaphilile kahle aphile, futhi athethelelwe isono sakhe.’ (Jak. 5:13-15) Labo abaye bafuna usizo ukuze basuse ukungcola okubangelwa izithombe zobulili ezingcolile baye babona ukuthi ukusondela kuNkulunkulu kuhle kubo, njengo-Asafa.—IHu. 73:28.

Nokho, umphostoli uPawulu wathi abanye ababenze izono babengazange baphenduke “ekungcoleni kwabo nasebufebeni nasekuziphatheni okubi.”a (2 Kor. 12:21) Ngokuphathelene negama lesiGreki elihunyushwe ngokuthi “ukungcola” kuleli vesi, uProfesa Marvin R. Vincent wabhala ukuthi “linomqondo wokungcola okuhambisana namanyala.” Kuyiqiniso elidabukisayo ukuthi ezinye izithombe zobulili ezingcolile zimbi kakhulu kunezigcawu ezibonisa abantu abanqunu noma indoda nowesifazane abenza ubufebe. Kunezithombe zobulili ezingamanyala, ezinyanyekayo ezihilela ubungqingili (ukulalana kwabantu bobulili obufanayo), ukulalana kwabantu abayiqembu, ukulala nesilwane, izithombe zobulili ezingcolile ezihilela izingane, ukudlwengulwa komuntu yiqembu, ukuphatha abesifazane ngesihluku, ukubopha umuntu ngaphambi kokuhlanganyela naye ubulili noma ukuhlukumeza ngenjongo yokuzanelisa ngokobulili. Abanye osukwini lukaPawulu ‘ababesebumnyameni ngengqondo’ bagcina ‘bengasenawo nhlobo umuzwa wokuziphatha okuhle futhi bazinikela ekuziphatheni okubi ukuze benze zonke izinhlobo zokungcola ngokuhaha.’—Efe. 4:18, 19.

UPawulu wabala ‘nokungcola’ kweyabaseGalathiya 5:19. Isazi saseBrithani saphawula ukuthi leli gama “lapha lingase [lisho] ikakhulu zonke izinkanuko eziphambene nezingokwemvelo.” Imuphi umKristu ongaphika ukuthi izinhlobo zezithombe zobulili ezingcolile ezinyanyekayo nezihlazisayo ezibalwe ngenhla “ziyizinkanuko eziphambene nezingokwemvelo” futhi zingamanyala? KweyabaseGalathiya 5:19-21 uPawulu waphetha ngokuthi “labo abenza” ukungcola okunjalo “ngeke balizuze ifa lombuso kaNkulunkulu.” Ngenxa yalokho, uma othile ayengaba nomkhuba ogxilile wokubuka izithombe zobulili ezingcolile ezinyanyekayo nezihlazisayo, mhlawumbe isikhathi eside, futhi engaphenduki aguquke, wayengeke aqhubeke esebandleni lobuKristu. Kwakungadingeka asuswe ekuhlanganyeleni ukuze kulondolozwe ukuhlanzeka nomoya webandla.—1 Kor. 5:5, 11.

Kuhle ukwazi ukuthi abanye abawela esonweni sokubuka izithombe zobulili ezingcolile ezinyanyekayo baya kubadala futhi bathola usizo olungokomoya abaludingayo ukuze benze ushintsho ngokushesha. UJesu wanxusa amaKristu aseSardesi lasendulo: “[Qinisa] izinto ezisele ebesezilungele ukufa, . . . qhubeka ukhumbula ukuthi wamukele kanjani nokuthi wezwa kanjani, uqhubeke ukugcina, futhi uphenduke. Ngokuqinisekile ngaphandle kokuba uvuke, . . . ngeke wazi nhlobo ukuthi iliphi ihora engiyokufikela ngalo.” (IsAm. 3:2, 3) Umuntu angakwazi ukuphenduka futhi kube sengathi uhlwithwe emlilweni.—Jude 22, 23.

Nokho, yeka ukuthi kungcono kangakanani ukuba ngamunye wethu anqume ngokuqinile ukungasondeli kuleso simo esiyingozi. Yebo, kufanele sizimisele ngokuphelele ukugwema zonke izinhlobo zezithombe zobulili ezingcolile!

[Umbhalo waphansi]

[Amazwi acashunwe esihlokweni ekhasini 30]

UmKristu ohileleke ebubini kufanele asanguluke futhi aqaphele ukuthi udinga usizo olungokomoya