Hoe veilig is jou voedsel?
EET jy drie maaltye per dag? Dan sal jy, teen die tyd dat jy 70 jaar oud is, meer as 75 000 maaltye geëet het. Vir ’n tipiese Europeër sal dit beteken dat hy—onder andere—ongeveer 10 000 eiers, 5 000 brode, 100 sakke aartappels, 6 beeshelftes en 2 skape geëet het. Is dit moeite om so baie te eet? Natuurlik nie! Ons mond begin sommer water wanneer iemand “lekker eet” of “bon appétit” sê! Die hoof van ’n kookskool het selfs gevra: “Wat is die lewe sonder kos?”
Gewoonlik neem ons dit dalk as vanselfsprekend aan dat die voedsel wat ons eet, veilig en heilsaam is. Maar as net een van daardie 75 000 maaltye iets skadeliks bevat, kan ons ernstig siek word. Kan ons seker wees dat ons voedsel veilig is? Deesdae lyk dit of al hoe meer mense hieroor twyfel. In party lande het voedselveiligheid ’n groot bekommernis geword. Waarom?
Redes tot kommer
Elke jaar kry nagenoeg 15 persent van die Europese bevolking voedselgedrae siektes. In die vroeë 1980’s byvoorbeeld het giftige kookolie in Spanje ongeveer 1 000 lewens geëis en ’n verdere 20 000 mense ernstig siek gemaak. In 1999 was die bevolking van België geskok toe daar berig is dat artikels soos eiers, pluimvee, kaas en botter moontlik deur ’n gifstof besmet is wat dioksien genoem word. In onlangser tye is Brittanje se verbruikers met afgryse vervul—en het sy beesvleisbedryf in duie gestort—toe beeste met sponsagtige bees-ensefalopatie (malbeessiekte) besmet is. Toe was daar die uitbreek van bek-en-klou-seer, wat daartoe gelei het dat miljoene beeste, skape, varke en bokke van kant gemaak moes word.
Hoewel sulke gevare ernstig is, is daar ander faktore in verband met voedsel waaroor mense besorg is. Verbruikers is bekommerd oor nuwe metodes wat tans gebruik word om voedsel te verbou en te verwerk. Die Europese Kommissie het in 1998 geskryf: “Moderne tegnologieë soos voedselbestraling en die genetiese manipulering van voedselgewasse het ’n uiters omstrede kwessie geword.” Verbeter of verlaag sulke moderne wetenskaplike metodes die gehalte van ons voedsel? En wat kan ons doen om ons eie voedsel veiliger te maak?